Read Ngombale Matyê 13 Bible Online

Matyê 13 - Ngombale bible

Matyê 13

¹Yěso pôu nkwár ndə̂ leʼé wêi, ə́ ngwo nyáŋ ngʉŋ lətʉŋ-nci.

²Mənou lâʼ kəitə mbəʉ zʉ́, a kə̂u ńnyáŋ cər kənyúʼ, ə lâʼ zêi cʉ̂ʼ ntə́ʉtə́ nkaŋ nci.

³A lâghʼ pəsaghʼ-ləghaa ńdáʼ gháp məno tə nzáa, ə́ ndâʼ ngô: «cǒ ŋuu lǎʼ ndə̌r lə̂ maʼ mbi zə̂u,

⁴ə́ nkə́u mǎʼ wó, məcó məmbəm pfûŋtə laŋə́-ndə̂u, pəshʉ̌ŋ tô ńtsûʼtə́ ńzʉ́.

⁵Məcó məmbəm pfûŋtə lə̂ yʉʼ məghǒ, ə́ yʉʼ yi ndesé kâa zâa yé wó, ə́ ntóghʼ sáʼ, ńté no kâa zěi lə shî yé.

⁶Mə́nəu ghʉ̂ ntə́ shʉʼʉ, ə́ ntǒu, ə́ zə̂u ńté no məŋaŋə kâa lə lâr yé sê.

⁷Məcó məmbəm pfûŋtə cər ləghěi tə́poŋ, ləghěi tə́poŋ ghʉ̂ nkóʼ ə́ fə́mə́ měi.

⁸Məcó məmbəm pfûŋtə lə̂ yʉʼ ndesé shʉʼʉ, ə́ sáʼ, ə́ ngúʼ, ə́ nzə́m. Có ləcʉŋə́ ghi ŋə́ məmbəm nkʉ, có ŋə̂ məmbəm mə̂m-ntoghʼó, có ŋə̂ yé pə̂ məmbəm mə̂m-tárə́.»

⁹Ŋuu lə̌i ngwô mətuŋú lə̂ ndághʼ ńzúʼ no a tsúŋu nzúʼ.

¹⁰Ngaŋə-jyêʼ-no Yěso* cʉ́ŋə mbáatə́, ə́ ntúŋú yé ngô: «Ńté hó o laghʼ pə́ saghʼ-ləghaa ńdâʼ no mbó lâʼ?»

¹¹Yěso pwôr lə́ páp ngô: «Ə Sê lə ghʉ ńgó pei jí no lə́nə́ʉ yi ə́ lwǒ lə̂ no ləfou yé, ə́ ngwǒ lə́ pəcó pye, mə́i káa a lə ghʉ̂ yé ńgó gháp jí.

¹²Ŋuu lə̌i ngwô zə̂u, mə́i pə́ wo kʉʼʉ có mə́u, ə zə̂u pé kʉ́ʼʉ́ nzáa. Lə́ ə́ ngwǒ lə́ ŋuu yi kâa ghwô yé có zə̂u, mə́i pə́ wo pfú mbaa məyʉʼ yi a yǎa ngwǒ.

¹³Ə̂ zə̂u yi ə́ ghʉ̌, m mboŋə́ lǎghʼ pə́ saghʼ-ləghaa lǎʼ no lə́ páp, ńté no gháp pə́ nâŋ yʉʼ, lə́ káa pə́ jwô gháp, ə́ mə́ nzʉ̂ʼtə no lə́ káa pə́ tsúŋú zûʼ gháp.

¹⁴Ə́ laghʼ ḿbə̂utə lə̂ no yi Esǎya ntsətə-nkəʉ Sê* lə lǎʼ ngô: “Pei ghʉ̌ pə́ zʉ̂ʼtə yʉʼ, lə́ ə́ pə́ tsuŋú zûʼ wéi po, ə́ pə́ nâŋ yʉʼ, lə́u pə́ jwô wéi po.

¹⁵Ńté no ntə̂ʉ pye lâʼ pwo lə mə́ ntə̂i gháp lə ghuʼu mə́ mətuŋú máp, ə́ nkə́ptə́ mənyôghʼ máp, ə́ ndəʼ lə̂ ndâghʼ nyôghʼ máp njwó yʉʼ, mbaa ndə̂ʼ lə̂ ndághʼ mətuŋú máp ńzúʼ no, ə́ ndəʼ lə̂ ndághʼ jîno záp ńkwǎŋ no. Káa pə́ koŋ gháp lə̂ nkə́p cǐ záp, ə́ ndaghʼ ńdə̂ʼ lə́ pə́ yi m mboʼ ngʉ̂ gháp shwítə.”»

¹⁶Lə́ ngwǒ lə́ pei, mə́i pei pəndʉʉ-mboŋ, ńté no nyôghʼ méi pə́ njwô yʉʼ, mətuŋú méi pə̂ nzûʼ yʉʼ.

¹⁷Pei cʉ́ʼ məŋ ndâʼ wéi, kwaʼ lə́nə́ʉ, pətsətə́-nkəʉ Sê* tə nzáa, mbaa pəkuʼtə́ ləpə̌ʉ* lə tsáa gháʼate lə̂ njwó məno mi pei jwô lo, lə́ káa jwô gháp, ə́ ntsáa lə̂ nzúʼ məno mi pei zûʼ lo, lə́ káa zûʼ gháp.

¹⁸«Pei zúʼ no yi saghʼ-ləghaa lə́ ŋuu yi a pi zə̂u laghʼ ńdáʼ:

¹⁹Ə nkaŋ laŋə́ yi məcó məmbəm pfûŋtə wó, ə̂ pye pi gháp zûʼ no Ləfou Sê*, káa tsúŋú zûʼ gháp. Sə́tə tô, ə́ fú cər ntə̂ʉ páp nkwárə́.

²⁰Ə yʉʼ məghǒ pə̂ pye pi gháp zûʼ no Sê, ə́ fátə́ mbə́i lə̂ lətsei,

²¹lə́ káa nyêr gháp ə̂ lâr məŋaŋə məntə̂ʉ páp, ńté no gháp lěi tə nzúʼ tsâr Sê, káa ghwo gháp tə ə̂ cí. Pə́ lêi tə ńjí lə̂ ntyê gháp, ə́ nyárə́ gháp ngwôʼ ńté zěi, gháp kə̂ tôghʼ mêʼ.

²²Mbi zə̂u yi pfǔŋ cər mə́kǎp-kǎp, laghʼ ḿbə̂ pye pi gháp zûʼ tsâr Sê, ə́ nyáŋ tə njí lə̂ fʉ̂ məno nzʉ̂, ə́ njǐ lə̂ ncóghʼ məntə̂ʉ máp lə̂ nkâp. Mêi mə̂ məzə̂u ghʉ tsâr Sê me məntə̂ʉ páp tə́ zə́m ntǎa.

²³Mbi zə̂u yi pfǔŋ lə̂ ndesé shʉʼʉ laghʼ ḿbə̂ pye pi gháp zûʼ tsâr Sê, ə́ ngwǒ tə ə́ təi. Gháp pə́ ghíʼ məcʉ́ŋə́ zə̂u mi məcó ghí ŋə́ məmbəm nkʉ, məcó ŋə̂ mə̂m-ntoghʼó, məcó ŋə̂ mə̂m-tárə́.»

²⁴Yěso kə̂ ncí ndâʼ gháp cǒ saghʼ-ləghaa ngô: «No Ləfou Sê* pə́ ghíʼ no ŋuu yi a lə pǐ mbi zə̂u shʉʼʉ nkâʼ zʉ́.

²⁵Lə́, pə́ lei tə ndé, ngaŋə-mbəu ye tô ḿbî ləghěi tə́poŋ yi a shwǐ zə̂u shʉʼʉ zə̂, ə́ ndər yé.

²⁶Zə̂u ghʉ nsáʼ, ə́ ngúʼ tə ŋə́ mətû. Pə́ jwô mbi zə̂u tə́poŋ təcər wó.

²⁷Pəghaŋə-faʼ tô ńdáʼ lə́ ngaŋə nkâʼ ngô: “Ə́ Nde, lə́u o lə pi pə̂ mbi zə̂u shʉʼʉ cər nkâʼ gho pé? Ləghěi tə́poŋ pou fû ghó wó?”

²⁸A pwôr lə́ páp ngô: “Ə̂ faʼ ngaŋə-mbəu.” Gháp túŋu yé ngô: “Tə o pə̌i ńgó paghʼ wó ntsóʼ zə̂u tə́poŋ zêi?”

²⁹A lâʼ ngô: “ngə́, mboʼ pei kə̂u ntsôʼ zə̂u tə́poŋ zêi, ə́ nǎa ntsóʼ gháp pə məzə̂u mi shʉʼʉ.

³⁰Pei nyér, gháp pə məzə̂u shʉʼʉ nâa ngúʼ tə nkə́u mpfu mbyě məzʉ̂. Ə́ táa pə́ mpfu wêi, məŋ ndáʼ lə́ pəpyě məzʉ̂ ńgó gháp tsəmbi ntsóʼtə́ məzə̂u tə́poŋ, ə́ nkə́tə́ lə̂ məkaʼá ghíʼ pə́ wo tǒu mǒghʼ, ə́ ngwó lə̂ məzə̂u shʉʼʉ, gháp lôghʼ ńcóghʼ cər nkəi zâa.”»

³¹Yěso kə̂ ncí ndâʼ cǒ saghʼ-ləghaa lə́ páp ngô: «Ə no Ləfou Sê* pə́ ghíʼ cǒ mbə̂u mbyəghʼ tə́shú [3] yi ŋuu lə pǐ nkâʼ zʉ́.

³²Ə mbyəghʼ tə́shú zêi khwôghʼ ndêi məmbi zə̂u mə́tsəm, lə́ ə́ nděi tə sáʼ, ə́ ngúʼ ngwó tʉ́ ndéi məzə̂u mə́tsəm mi ə́ pə́ nkâʼ, ə́ ncʉ́ʼ tʉ̌, ə́ ntóghʼtə́ mbô, pəshʉ̌ŋ tô ḿbáʼ mənkaa máp mə́u.»

³³Yěso kə̂ ncí ndáʼ wo saghʼ-ləghaa ngô: «Ə no Ləfou Sê* pə̂ pə́ ghíʼ məyʉʼ mvuŋ* yi məngyě lǎghʼ ḿvuŋú faalə̂i yi a fə̌iʼ mpfu tárə́ ə́ ntsə̌p, ə́ nkə́ mbûʼ puʼú tə məyʉʼ mvuŋ* wêi ghʉ̂, faalə̂i zêi kôʼ.»

³⁴Yěso lə kə ndaghʼ pə́ pəsaghʼ-ləghaa ndâʼ no mbó lâʼ. Káa a lə pə́ ndâʼ yé có no lə́ páp tə́ ghó a laghʼ pə́ saghʼ-ləghaa ńdâʼ.

³⁵A lə ghʉ yə́rə́, ə́ ndaghʼ ńdôu ńgó no yi ntsətə-nkəʉ Sê* lə lǎʼ, ə̂ pə̂utə́. A lə lâʼ ngô: «Məŋ táa lǎghʼ pəsaghʼ-ləghaa lǎʼ gháp no. Məŋ táa lǎʼ gháp məno mi ə́ pə́ ləlwǒ tə fú mpfu pə́ lə tsuŋú nzʉ̂».

³⁶Yěso cʉ̂ʼ nkə́ nyér lâʼ, ə́ nkə́u ndə̂, ngaŋə-jyêʼ-no* yé kwátə yé, ə́ ndǎʼ lə́ zʉ́ ngô: «Kéʼtə́ saghʼ-ləghaa lə̂ mbi zə̂u tə́poŋ zə̂, ə́ ndǎʼ wághʼ.»

³⁷A lâʼ lə́ páp ngô: «Ŋuu yi a pi zə̂u shʉʼʉ â Môu Ŋuu*;

³⁸ə nkâʼ pə̂ ndəu nzʉ̂, mbi zə̂u shʉʼʉ pə̂ pye pi Sê sâʼ gháp, mbi zə̂u tə́poŋ pə̂ pye pi Sə́tə lə̂ sâʼ gháp.

³⁹Ngaŋə-mbəu yi a pi mbi zə̂u tə́poŋ, a pə̂ Sə́tə. Ə mpfu ndǒghʼ məzʉ̂ pə̂ ndyəghʼzəm leʼé, pəghaŋə-faʼ pə̂ pəcwôʼ Sê*.

⁴⁰Ə ndyəghʼzəm leʼé wo láʼ kə́ pə́ ndʉŋ-ndʉŋ pə́ ghíʼ pə́ tsôʼ zə̂u tə́poŋ ntôu mǒghʼ lə̂.

⁴¹Môu Ŋuu* táa tə́u pəcwôʼ pé, gháp fú nou pye pé nkwárə́ ngaŋə nkwaʼtə mbaa pye tə́poŋ,

⁴²ə́ máʼ gháp cər tə́koʼ mǒghʼ, gháp pə́ yʉʼ wó mə́ ndâa, pəlóŋ páp pə́ nkóʼ.

⁴³Ə̂ ghí pə́ yə́rə́, pye pi gháp kúʼtə́ ləpə̌ʉ* Sê pə́ cər ləfou Tə́ ghap Sê, ə́ mə́ ŋwáŋə ghíʼ mə́nəu lə̂. Ŋuu lə̌i ngwó mətuŋú lə̂ ndághʼ ńzúʼ no, a tsúŋu nzûʼ.»

⁴⁴Yěso kə̂ ncí ndâʼ ngô: «Ə no Ləfou Sê* nkə́ ncí ḿbə́ pə́ ghíʼ có zə̂u lətəi-ndwuŋ yi ə́ lwǒ cər có nkâʼ, ŋuu lei tə njwó, ə́ ntsuŋú ndoʼó, ə́ ndǎghʼ lətsei, ə́ nkhʉtə́ ńgwó fə̂i məzə̂u mé mə́tsəm, ə́ ndǎghʼ nkâp zěi ńtó ńzə́u wêi nkâʼ.

⁴⁵Ə no Ləfou Sê* kə́ ncí mbə́ pə́ ghíʼ no ntaŋ-mətǎa yi a lou tuʼú-cí shʉʼʉ.

⁴⁶A lei tə njwó có tuʼú-cí yi ə́ cóghʼ gháʼate, ə́ ngwó fə̂i məzə̂u mé mə́tsəm, ə́ ndǎghʼ nkâp zěi ńtó ńzə́u zěi.»

⁴⁷Yěso pou nkə́ ncí ndâʼ ngô: «Ə no Ləfou Sê* kə́ ncí mbə́ pə́ ghíʼ no lənkʉ yi pə́ mǎʼ cər lətʉŋ-nci, ə shû kə̂u cər wó mbə̂u lə̂ mbə̂u.

⁴⁸Lənkʉ lei tə ndoghʼə́, pə́ shuŋ ńdághʼ ńděr lə̂ nkaŋ nci, ə́ mbwórə́ nyáŋə́ sê, ə́ ntetə́ shû yi shʉʼʉ, ə́ ncóghʼ cər pətyép, ə́ méʼ có yi mboʼ ə́ kə̂ mpfútə yé po.

⁴⁹Ə́ táa pə́ pə́ yə́rə́, lə̂ ndyəghʼzəm leʼé lâʼ. Pəcwôʼ Sê* táa tó, ə́ fú nou ngaŋə no lə́nə́ʉ, ə́ fǎghʼ pye tə́poŋ,

⁵⁰ə́ mǎʼ gháp cər mələ̂ʉ mǒghʼ. Gháp pə́ yʉʼ wó mə́ ndâa, pəlóŋ páp pə́ nkóʼ.»

⁵¹Yěso túŋu ngaŋə-jyêʼ-no* yé ngô: «Tə pei zǔʼ mwo məno mə́tsəm?» Gháp pwôr ngô: «Ə̂ŋ, paghʼ zûʼ.»

⁵²A lâʼ ngô: «Pei tsúŋú njí ńgó nkeʼtə-ləpə̌ʉ* Mə̌usə̂i yi a pə̌i no Ləfou Sê* a pə́ ghíʼ cǒ ntikáŋ yi məzə̂u mi tsəmbi gháp pə mi nguʼ wo ə́ pə́ cər ntaŋ zʉ́. A nyâŋ tə mbəʉ ye pôŋ, a wô mə́u nkwarə́ mbə̂u yi a kǒŋ.»

⁵³Yěso laghʼ pəsaghʼ-ləghaa ńdáʼ no lə́ pye tə myâghʼ, ə́ fú yʉʼ wó ndə̂r yé

⁵⁴lə̂ lâʼ páp, ə́ nkə́u wó, ə́ mə́ njyêʼ pye no Sê cər ndə̂ cûʼtə* pəyúda. Pye pi pə̂ wó zûʼ tsâr yé, ə́ ndyár, ə́ ndâʼ ngô: «A laghʼ zêi jîno gháp pə mətəʉ mi a laghʼ ńgʉ̂ mənkəʼə məno fú ghó?

⁵⁵Káa a pə́ môu Kámə́ndaa mo? Ləjôghʼ mə́ ye káa pə́ Mǎyaa mo? Káa a pə́ fə̌r Jâghʼ, gháp Yosêp, mbaa Síməu, ə́ nkʉʼʉ́ Yúda mo?

⁵⁶Pəfə̌r pé pi pəngyě pə́tsəm káa pə́ pə́ təcər paghʼə mo? A lâghʼ yo mbə̂u məno fû ghó?»

⁵⁷Gháp laʼ gháʼa, ə́ ndəʼ gháp lə̂ nzúʼ tsâr yé. Yěso cʉ̂ʼ nkə́ ndáʼ lə́ páp ngô: «Pə́ ŋə̂ məkuʼ ntsətə-nkəʉ Sê* yʉʼ tsəm, tə ə́ shi lâʼ páp, mbaa cər cʉŋə-ndə̂ záp.»

⁵⁸Yěso lâʼ yə́rə́, káa ghʉ yé mənkəʼə məno tə ə̂ záa, ńté no káa gháp lə côghʼ gháp ntə̂ʉ lə́ zʉ́.