Read Ngombale Matyê 14 Bible Online

Matyê 14 - Ngombale bible

Matyê 14

¹Ə́ pə̂ mpfu wêi, Elôdə* yi a lə sâʼ paghʼə-ngoŋ Galilêi zûʼ ghíʼ pə́ kʉ̂ʉ Yěso ńté məno mi a pə̌ ngʉ̌,

²ə́ ncʉ́ʼ nkə́ ndáʼ lə́ pəməncʉŋ-ndə̂ pé ngô: «Ŋuu yi pə́ leʼtə lə̂, â Jâŋ Mbaptísʉ, a zʉ̌ʉ lə̂ ləwʉ̂. Ə̂ zə̂u yi ə́ ghʉ̌, a kûʼ lə̂ ngʉ́ mənkəʼə məno.»

³Elôdə* lâʼ yə́rə́, ńté no a lə ghʉ pə́ ghou Jâŋ, ə́ nkə́r yé ḿmǎʼ ndə̂-tsâŋ, ńté Elodyâdə yi a lə pə́ ngwě Fílîp, fə̌r Elôdə* wêi.

⁴Ə́ ghi pə́, mə́i Jâŋ lə pə́ nyáŋ sâʼ yé ngô: «Kâa ləpə̌ʉ* pə́ mbə̂i ńgó a zóʼ Elodyâdə.»

⁵Elôdə* zûʼ, ə́ njǐ lə̂ ndôu məsʉ̂ lə̂ njwí Jâŋ, lə́ mə́ mbôghʼ nyôghʼ pəyúda, ńté ńgó gháp pə́tsəm lə pə́ njî ńgó Jâŋ â ntsətə-nkəʉ Sê*.

⁶Ə́ tâa mbə́ leʼé lətsei, laghʼ ńkʉ́ʉtə́ leʼé yi pə́ lə jí fou Elôdə*. Môu Elodyâdə yi məngyě pîŋ zə̂u mbi lâʼ. Ə no yé fû mboŋə́ fou Elôdə*,

⁷tə a lâʼ lə́ zʉ́ tə nkâa ńgó a lə̌i ndóu pə́ hó mbó zʉ́, mə́i a wo ŋə́.

⁸Mə́ pə môu-məngyě wêi cʉ́ŋə́ yé, ńgó a wó ndǎʼ ńgó a pə̌ nkoŋ tû Jâŋ Mbaptísʉ cər paghʼə kâŋ pə̂ mpfu wo.

⁹Fou zûʼ, ə́ fú nzʉ́ŋ gháʼate. Lə́, ə mbə̂u yi a yǎa ndǎʼ mbi pəghəʉ pé tə nkâa ghʉ, a lâʼ ńgó pə́ ŋə́ tû Jâŋ lə́ môu-məngyě wêi,

¹⁰ə́ ncʉ́ʼ nkə́ ntə́u ŋuu, a wô ndə̂-tsâŋ, ə́ nzáʼ tû Jâŋ,

¹¹ə́ ncóghʼ cər paghʼə kâŋ, ə́ ndǎghʼ ńtó ńŋə́ lə́ môu-məngyě wêi, a pfû, ə́ ngwó ŋə́ lə́ mə́ ye.

¹²Ngaŋə-jyêʼ-no Jâŋ* zûʼ, ə́ ngwó ndə̂-tsâŋ nkhwǒr kə́mtə́ mbəʉ ye, ə́ ngwó ntʉ́ŋ. Tə ə́ kuʼ, gháp wô ndâʼ Yěso no yi ə́ lěi.

¹³Yěso zûʼ no zêi, ə́ nkə́u cər kənyúʼ mə́ ndə̂r lə̂ yʉʼ yi káa pye pə̂ gháp wó. Ə lâʼ jî, ə́ fú cər məlâʼ nkwátə́, ə́ ŋə̂i pə́ nkaŋ nci, ə́ nzuŋtə́ yé yʉʼ yi a lər lə̂ wó.

¹⁴A kə̂u yʉʼ wó, ə́ fú cər kənyúʼ nkwár, ə́ njwó nou lâʼ, məjʉ̂ŋ máp kô yé. A jî lə̂ ngʉ́ pəghou pi gháp pə́ təcər páp shwítə.

¹⁵Ə́ pou mbə́ mpfu-ngwʉ̂, ngaŋə-jyêʼ-no* Yěso cʉ́ŋə mbáatə́ yé, ə́ ndǎʼ lə́ zʉ́ ngô: «Paghʼə pə̌ yaʼa gháʼa pə́ koŋə-məkwaʼá, mə́i zâʼ nzʉ̂ pou mə́ nděi. Lǎʼ lə́ pye ńgó gháp wó yʉʼ yi mənzeʼ pə́ wó, ə́ ndǒu məzʉ̂ nzə́u.»

¹⁶Yěso pwôr lə́ páp ngô: «kâa pə́ ńgó gháp wǒ có yʉʼ, ə́ lǒu zə̂u ə́ zʉ́. Kwaʼ pei lə̂ wo ŋə́ zə̂u gháp zʉ́.»

¹⁷Gháp pwor lə́ zʉ́ ngô: «Paghʼ ghwo pə̂ ndaʼ mbələ̂ghʼ ntâʼ taa yaʼa gháʼá, ə́ ngʉ̌ shû ntâʼ pwô.»

¹⁸Yěso lâʼ lə́ páp ngô: «Pei lâghʼ ńtó, ə́ ŋə́ lə́ məŋ yaʼa gháʼá,»

¹⁹ə́ ndǎʼ yə́rə́, ə́ ndáʼ lə̂ lâʼ ńgó gháp nə̂ʉ ləghěi ńnyáŋtə́ mə̂u. Ə́ ndǎʼ yə́rə́, ə́ mbyé mbələ̂ghʼ wêi ntâʼ taa, gháp pə shû zêi ntâʼ pwô, ə́ mbəʼə́ tû yé ńnáŋ tʉ́, ə́ ŋə́ nkhwo mbó Sê, ə́ mbwóʼtə́ ńŋə́ lə̂ ngaŋə-jyêʼ-no* yé, gháp ghaptə lə̂ lâʼ.

²⁰Ə lâʼ pfâr, ə́ njwə́r. Pə́ kəitə məpfuʼ měi, ə́ lóghʼə pətyép ntsap pwô lə̂ ləghə̂m.

²¹Pye pi gháp lə pfár lə pə́ mbiŋə no tóusʉ tâa, tə́ kwǎʼ pəngyě gháp pə ghəpə́.

²²Zêi no lei, Yěso kə̂ ntóghʼ ndáʼ lə̂ ngaŋə-jyêʼ-no* yé ngô: Pei kə́u cər kənyúʼ ə́ mbə́ mbi, ə́ ntə́u ńdə́r lə̂ cǒ njʉŋə́, n ncʉ́ʼ nzəm ndaʼá lâʼ, ə́ mboŋə́ tó.

²³Yěso cʉ̂ʼ ndaʼá lâʼ, ə́ nkóʼ ndəu ləkôr lə̂ sʉ́ʉtə́ Sê. Twûʼ tâa ngí shʉ́ŋ, a cʉ̂ʼ mbə́ yʉʼ wó pə́ zə́ghʼə́-zʉ́,

²⁴mə́i kənyúʼ ji mə́ ŋə̌i tə mbə́ soŋ nci. Nci pə̂ ngághʼə pye pé, ńté no kəfwor lə pə́ ntô pə̂ mbi-mbi.

²⁵Ə́ ghʉ mbə́ nkôʼ-nzʉ̂, Yěso ghi zuŋtə́ gháp, ə́ mə́ ŋə̂i ndəu nci.

²⁶Ngaŋə-jyêʼ-no* yé jwô ghíʼ a pə̌ ŋəi ndəu nci yə́rə́, ə́ njǐ lə̂ mbóghʼ, ə́ mə́ nkwâŋ záp ńgó ə̂ wú-ŋuu, ləpôghʼ wêi ghʉ̂ gháp cʉ̂ʼ mə́ ncwôr ngwuŋ.

²⁷Lə́ Yěso lêi-lěi ndáʼ lə́ páp ngô: «Pei pwórə́ nyáŋ, ə̂ məŋ, koo pei kə̂ mbóghʼ.»

²⁸Pyêh cʉ̂ʼ nkə́ ndâʼ lə́ zʉ́ ngô: «Ə Nde, ə́ lə̌i mbə́ tû-mbəʉ zô, o ghʉ̂ məŋ ŋə̂i zâa ndəu nci, ə́ ntó ḿbə́utə́ ghô.»

²⁹Yěso lâʼ lə́ zʉ́ ngô: «Tó!» Pyêh kwâr cər kənyúʼ, ə́ mə́ ŋə̂i ndəu nci lə̂ ngwó mbəutə́ yé.

³⁰Lə́, ə́ njwó kəfwor pə̂ ncʉ̂ʼ yʉʼ gháʼate, a pôghʼ, ə́ njí lə̂ miʼí cər nci, ə́ ncʉ́ʼ nkə́ ngeʼtə́ ngô: «Ə́ Nde, n nkwʉ̌ yé!»

³¹Yěso tôghʼ ncághʼə́ pô yé, ə́ nzə yé, ə́ ndáʼ lə́ zʉ́ ngô: «Pyêh, pə̂i-ntə̂ʉ zô khwôghʼ! O mʉŋtə́ ńté hó?»

³²Gháp zʉ́ kə̂u cər kənyúʼ, kəfwor záʼa.

³³Pye pi gháp pə́ cər kənyúʼ kʉ̂ʼtə mbi Yěso, ə́ ndáʼ ngô: «Ə̂ kwaʼ lə́nə́ʉ, ô Môu Sê.»

³⁴Gháp tə̂u nci tə nkə́u lə̂ njʉŋə́ yi Jenezarêd,

³⁵ə́ ngí shíʼ tə tə́ʉ sê, pə́ ləi Yěso, ə́ kə́ ntóghʼ nkhʉ́tə́, ə́ ngwǒ mənzeʼ, ə́ ngʉ́ pə́ laghʼ pəghou ńtó.

³⁶Ə́ sʉ́ʉtə́ yé ńgó â pə́i, gháp kə̂u pə̂ ndaʼ lətsáa ndǐ yé. Ə́ pə̂ yə́rə́, pye pə́tsəm pi gháp lə kə̌u lətsáa ndǐ ye fû shwítə́ lə̂ məghou máp.