Read Ngombale Matyê 15 Bible Online

Matyê 15 - Ngombale bible

Matyê 15

¹Ə́ pə̂ có leʼé, pəcó pəfalísia* gháp pə pəkeʼtə́-lə́pə́ʉ Mə̌usə̂i* fû Yelúsalêm ntó lə́ mbəʉ Yěso, ə́ ntúŋú yé ngô:

²«Ńté hó ngaŋə-jyêʼ-no* zô kâa pə́ ŋə̂i lə̂ nôghʼ lâʼ pye tsəmbi? Gháp lei gháʼá, ə́ mpfár zə̂u tə́ sǒghʼ mbô máp lə́ mbə̂u yi nôghʼ lâʼ wághʼə pə́ ntúŋú?»

³Yěso pwôr lə́ páp ngô: «Ə́ ngwo lə́ pei, pei lâghʼ nôghʼ lâʼ wéi ńgwághʼ ləpə̌ʉ Sê ńté hó?

⁴Ə Sê lə lâʼ ngô: “Ŋə́ məkuʼ tə́ gho gháp mə́ gho;” ə́ nkə́ ncí ndáʼ ngô: “Ŋuu lə̌i nzôutə́ tə́ ye kəʉ mə́ ye, pə́ jwî ngaŋ.”

⁵Ə́ wo lə́ pei, pei lâʼ zéi ngô: “Mboʼ ŋuu lâʼ lə́ tə́ ye káa lə́ mə́ ye ńgó, zə̂u tsəm yi mboʼ a laghʼ mpfútə́ yé cʉ́ʼ yi Sê.”

⁶Ŋuu lə̌i ndêi tə ndâʼ yə́rə́, mə́i pə́ kə́ pǒu túŋú yé yé ńgó tə a ŋə mə́ məkuʼ tə́ ye po; ə́ pə̂ yə́rə́, pei laghʼ nôghʼ lâʼ wéi ńgwághʼ tsâr Sê.

⁷Pêi pəghaŋə nkoŋə mənyôghʼ! Esǎya ntsətə-nkəʉ Sê*, lə fáŋə́ ndâʼ gháʼá ndaghʼ myâghʼ mo, ghíʼ a lə lǎʼ ńté nôghʼ lâʼ wéi ńgó Sê lâʼ ngô:

⁸“Pye pwo laghʼ pə̂ ndaʼ ntsʉ gháp ngûʼtə ghâa, ntə̂ʉ gháp kâa pə̂ yé lə́ məŋ.

⁹Gháp pə́ ngûʼtə ghâa, lə́ kâa no pə̂ yé mə́u, ńté no yi gháp côghʼ ntə̂ʉ njyêʼ pye zə̂u gháʼate, lə́ ə́ pə̂ pə́ ləpə̌ʉ pye-mə́soŋ.”»

¹⁰Yěso fûŋ lâʼ, ə́ ndǎʼ lə́ páp ngô: «Pei zʉ́ʼtə́, ə́ ntsúŋú ńzúʼ,

¹¹zə̂u yi fû ntsʉ ŋuu ńkə̂u ləpəm zʉ́, kâa pə́ côŋ yé yé, ə yi kwar ntsʉ zʉ́ lə́ côŋ yé.»

¹²Ngaŋə-jyêʼ-no Yěso* cʉ̂ʼ nkə́ ncʉ́ŋə́ mbáatə́ yé, ə́ ntúŋú yé ngô: «Tə o pə̌ njî ngô: Ə no yi o lǎʼ lə̂ ə́ ghaghʼə pəfalísia* gháʼate?»

¹³Yěso pwôr lə́ páp ngô: «Pə́ ghʉ̌ fú sê tsóʼ zə̂u tsəm yi káa Tə́ ghâa yi a pə̌ tʉ̌-lə́pû lə pî.

¹⁴Pei nyér gháp! Gháp pəfwoghʼ-mə́nyôghʼ pi gháp ghwo mbô pəcó. Fwoghʼ-mə́nyôghʼ lə̌i ngwó pô cǒ, mə́i gháp zʉ́ pə́pwô wo tsə́ʉ cər ghəm.»

¹⁵Pyêh cʉ̂ʼ ńkə́ ndáʼ lə́ Yěso ngô: «Kéʼtə́ saghʼ-ləghaa wə̂ ńdǎʼ wághʼ.»

¹⁶Yěso pwôr lə́ zʉ́ ngô: «Ńjí ńgó zéi jîno pyér ńkə́ ngwóghʼ wóghʼə́ ghíʼ yi pəcó pye péh?

¹⁷Ə zə̂u yi ə́ kə̂u ntsʉ ŋuu, ə́ shíʼ ńkə̂u ləpəm zʉ́, ə́ mbǒu fû ləpəm zʉ́ nkwár, ə́ ncʉ́ʼ nkə̂u cər korə.

¹⁸Lə́, zə̂u yi ə́ fû ntsʉ ŋuu nkwár, ə́ fú cər ntə̂ʉ zʉ́, zěi lə́ tə̂m ləshwî lə́ ngaŋ.

¹⁹Ńté no məkwaŋtə tə́poŋ yaa nkwâr pə́ cər ntə̂ʉ ŋuu, měi lə́ cʉ́ŋə ŋuu a jwî cǒ, a ghʉ məghap, ə́ ngʉ̂ məno coŋ ndwuŋ, ə́ njǔ, ə́ nzâp sôu tû pəcó pye, ə́ mbou nkʉ̂ʉ pye tə́poŋ.

²⁰Yo məzə̂u mi ə́ tə̂m ləshwî lə́ ŋuu, tə ə́ mbə́ yi ŋuu lə̌i nzʉ́ zə̂u tə́ sǒghʼ mbô ghíʼ nôghʼ lâʼ wághʼə pə́ ntúŋú, lə́u côghʼ yé lǒʼ* lə́ zʉ́ po.»

²¹Yěso ghʉ̂ fú yʉʼ wó ndə́r lə̂ có paghʼə-ngoŋ, ə́ sʉ̂ túsoŋ Tîr gháp Sidôŋ,

²²ə́ nkə́u wó, cǒ məngyě Kánahâŋ fû wó ntó, ə́ njí lə̂ ngêʼtə́, ndǎʼ ngô: «Nde, ŋuu lə̂ ngər fou Ndavîd! Ə zəghʼə tə́poŋ* fǔ mə́ ngághʼə môu ghâa yi məngyě gháʼate.»

²³Lə́ Yěso zûʼ, káa pə̌i pwǒr. Ngaŋə ku* yé tô lə̂ mbəʉ zʉ́, ə́ sʉ́ʉtə́ yé, ə́ mbúʼ mbô ngô: «Ghʉ̌ məngyě wə̂ lə̂r, a pə̌ mbáŋə tû zághʼə.»

²⁴Yěso pwôr ngô: «Ə Sê lə tə̂u ghâa pə́ ndaʼ mbó məndənzʉ* mi ə́ lə cwí cər ngər ndə̂ pye Ísə́lahêl.»

²⁵Lə́ məngyě wêi tô, nkʉ́ʼtə́ sê mbi zʉ́, ə́ ndǎʼ ngô: «Ə́ Nde pfútə́ ghâa!»

²⁶Yěso pwôr ngô: «Kâa pôŋ yé lə̂ mpfú məzʉ̂ ghəpə́, ə́ máʼ lə̂ ngwʉ̂.»

²⁷Məngyě wêi pwôr ngô: «Ə́ Nde, o lâʼ ndághʼ myǎghʼ, lə́ ngwʉ̂ pə́ ndaghʼtə məsaa məzʉ̂ mi ə́ fû ndəu tə́pələ tə́ ghap, ə́ mpfúŋtə sê.»

²⁸Yěso cʉ̂ʼ ńkə́ mbwôr ngô: «Mǎa! O côghʼ pə̂i-ntə̂ʉ zô ghûʼ. Ə́ poŋ ńgó zə̂u yi o pə̌ ntsáa pə̂utə́ yə́rə́!» Yěso lâʼ yə́rə́, môu məngyě wêi cʉ̂ʼ nkə́ ndêi-lěi shwítə́ pə̂ mpfu wêi.

²⁹Yěso ghʉ̂ fú yʉʼ wó, ə́ ndə̌r lə̂ ngʉŋ lətʉŋ-nci yi ə́ pə́ Galilêi, ə́ nkóʼ tə nkə́u ndəu ləkôr, ə́ nyáŋ sê.

³⁰Mənou lâʼ tô, ə́ ngí tó, ə́ ndǎghʼ pəpwoʼtə-mə́ku, gháp pə pəfwoghʼ-mə́nyôghʼ, gháp pə pənkhwô*, gháp pə pəcípə́uʼ, tə mbaa pəcó pəghou tə nzáa. Gháp laghʼ gháp tô mbi Yěso yə́rə́, a ghʉ̂ gháp shwítə pə́tsəm.

³¹Pəcípə́uʼ lâʼ no, pənkhwô shwítə, pəpwoʼtə-mə́ku ŋə̂i shʉʼʉ, pəfwoghʼ-mə́nyôghʼ jwô yʉʼ shʉʼʉ. Lâʼ jwô yə́rə́, ə́ ndyár gháʼate, ńgúʼtə́ Sê pye Ísə́lahêl.

³²Yěso fûŋ ngaŋə-jyêʼ-no* yé, ə́ ndǎʼ lə́ páp ngô: «Məjʉ̂ŋ lâʼ yo fú nkə́u ghâa gháʼate, ńté no ə́ pə́ mpfu wo, ə́ ndaghʼ ḿbə̂ leʼé tárə́, ghíʼ gháp kə́ ḿbə́ pə́ mbəʉ məŋ, káa kə́ pyér ghwo gháp có zə̂u yi mboʼ gháp zʉ̂, m mbôu káa pə́ koŋ ghâa mbághʼə́ gháp nji.»

³³Ngaŋə-jyêʼ-no* yé lâʼ lə́ zʉ́ ngô: «Mboʼ paghʼ jwô mbələ̂ghʼ ghó, koŋə-məkwaʼá yaʼa, tə ndághʼ ńzághʼə́ ndwuŋ lâʼ wo tə gháp jwə̂r?»

³⁴Yěso túŋu gháp ngô: «Pei ghwo mbələ̂ghʼ yʉʼ wó pə́ ntâʼ sə́ʼə́? Gháp pwo ngô: paghʼ ghwo mbələ̂ghʼ ntâʼ saambwô, mbǒu ngʉ́ pôu məntâʼ shû.»

³⁵Yěso lâʼ ńgó lâʼ nyáŋə́ sê,

³⁶ə́ ncʉ́ʼ nkə́ mpfú mbələ̂ghʼ wêi ntâʼ saambwô lə̂ shû zə̂, ə́ ŋə́ nkhwo mbó Sê, ə́ mbwóʼtə́ ńŋə́ lə̂ ngaŋə-jyêʼ-no* yé, gháp ghaptə lə̂ lâʼ.

³⁷Mâa ŋuu tsəm fû mpfár tə ńjwə́r, pə́ pou nkə̂itə́ pfuʼ zěi ə́ lóghʼə pətyép saambwô.

³⁸Pye pi ə́ lə pfár zə̂u lə pə́ mbiŋə tóusʉ ləkwo, tə́ kwǎʼ ghəpə́ gháp pə pəngyě.

³⁹Yěso ghʉ̂ lâʼ lər, a kə̂u cər kənyúʼ, ə́ ndə́r lə̂ cər paghʼə-ngoŋ Magadâŋ.