Read Ngombale Matyê 16 Bible Online

Matyê 16 - Ngombale bible

Matyê 16

¹Pəfalísia* gháp Pəsadúsia* tô nzʉ́ʼ ntsʉ Yěso, ə́ ntúŋú yé ńgó a nyarə́ gháp ləiʼi yi leʼtə ńgó Sê lə̂ tə̌u yé.

²Yěso pwôr lə́ páp ngô: «Ə́ pə̂ mpfu-ngwʉ̂ yi ləfaŋ shərə́ mbǎŋ pei lâʼ ngô: Nzʉ̂ wo fóghʼ, leʼé lâʼ jóghʼ mbôŋ.»

³Ə́ pə̂ mbaʼa-mbaʼ yi ləfaŋ ghə́p shʉ́ŋ pei lâʼ ngô: «Leʼé lâʼ wo jóghʼ shwǒr. Pei lei tə náŋ ləfaŋ, ə́ ntóghʼ njí ghíʼ leʼé lâʼ wo jóghʼ pə́, lə́ ə́ ngwǒ lə̂ məzə̂u mi Sê pə̌ ńnyárə́ mpfu wo káa pei jí zə̂u yi mêi məzə̂u laghʼ ndáʼ ńté hó?

⁴Pye pi ə́ pə́ cər nzʉ̂ mpfu wo, pêi ngaŋə-məfaa, ə́ mbóu nkə́ mə́ ntə̂i pə̂ tû mbó Sê tə̌i mə́ ntúŋu ngô: Məŋ nyarə́ wéi ləiʼi. Lə́ káa pə pə́ ngwô nyarə́ pei có zə̂u, tə ndyéʼ ndaʼ no yi lə ghʉ̌ Yənə́sʉ.» Yěso lâʼ yə́rə́, ə́ nyér gháp yʉʼ wó ə́ ndə̂r yé.

⁵Ngaŋə-jyêʼ-no Yěso* ghʉ ntə́u lətʉŋ-nci záp, ə́ ngí tə́u, ə́ ndyə́ghʼə́ tə́ pyé mbələ̂ghʼ.

⁶Yěso ghʉ̂ mə́ ndâʼ lə́ páp ngô: «Pei laghʼə́ tû zéi, ə́ mbáa mvuŋ* pye Falísia* gháp pə pye Sadúsia*.»

⁷Ngaŋə ku* yé zûʼ, ə́ ncʉ́ʼ nkə́ mə́ ndâʼ təcər páp ńgó, ndeʼ có a lâʼ gháʼa, ńté no paghʼə yǎa ndyəghʼə́ tə́ pyé mbələ̂ghʼ[4].

⁸Yěso jî ghíʼ gháp pə́ nkwaŋ yə́rə́, ə́ ndǎʼ lə́ páp ngô: «Káa pei tsúŋú ncóghʼ ntə̂ʉ lə́ məŋ shʉʼʉ. Pei kwaŋ pə̂ no mbələ̂ghʼ yi káa pei ghwô ńté hó?

⁹Pei kə̌ mbyér pə́ tə jîno péh? Ńjí ńgó káa pei kʉ́ʉtə́ mbələ̂ghʼ wə̂ ntâʼ ntaa, ghíʼ məŋ kə lǎghʼ ńzághʼə́ mbiŋə tóusʉ tâa lə́ péh? Pei lə pə́ leʼé wêi gháʼá ndǎghʼ məkəm, ə́ kwar pətyép pə́sə́ʼə́ ghíʼi,

¹⁰ńjí ńgó káa pei kʉ́ʉtə́ mbələ̂ghʼ wə̂ ntâʼ saambwô, ghíʼ məŋ kə lǎghʼ ńzághʼə́ mbiŋə tóusʉ ləkwo lə́ péh? Pei lə pə́ leʼé wêi gháʼá ndǎghʼ məkəm, ə́ kwar pətyép pə́sə́ʼə́ ghíʼi.

¹¹Ə́ pou nděi gháʼá, káa pei zúʼ ńgó káa məŋ ndâʼ no lə̂ mbələ̂ghʼ? Məŋ kə̂ ncí ndáʼ ngô: Pei páa mvuŋ* pəfalísia* gháp pə Pəsadúsia*.»

¹²Ngaŋə-jyêʼ-no Yěso* cʉ̂ʼ nkə́ nzúʼ ńgó, kâa tə́i ndâʼ gháʼá ńgó gháp páa mvuŋ* yi pə́ laghʼ ńtsúŋu mbələ̂ghʼ. A tə̌i ndâʼ pə́ ńgó gháp páa zə̂u yi pə pəfalísia* gháp pə Pəsadúsia* jyêʼ pye zěi.

¹³Yěso lə̂r tə nkə́u Sezarê yi Fílîp lə sáʼ, ə́ ntúŋú ngaŋə-jyêʼ-no* yé ngô: «Lâʼ gháʼa mə́ ndâʼ ngô: Môu Ŋuu* wǒ?»

¹⁴Gháp pwor ngô: pəcó pye pə́ ndâʼ ngô: «Ô Jâŋ Mbaptísʉ, pəcó pə̂ ndâʼ ngô: Ô Elyê*, pəcó pə̂ ndâʼ záp ngô: Ô Jərəmî, pəcó pə̂ ndâʼ záp ńgó ô cǒ tâʼ lə̂ pətsətə́-nkəʉ Sê*.»

¹⁵Yěso túŋu gháp ngô: «Kwaʼ pei zéi lâʼ ńgó məŋ wǒ?»

¹⁶Síməu Pyêh pwôr ngô: «Ô Nzaʼ-nkʉ*, Môu Sê yi a pə́ ntəʉ.»

¹⁷Yěso cʉ̂ʼ ńkə́ ndáʼ lə́ zʉ́ ngô: «Síməu môu Yənə́sʉ, ô ndʉʉ-mboŋ, ńté no káa ŋuu-məsoŋ lə̂ ghʉ́, o poŋə́ jí yo no lə́nə́ʉ. Tə́ ghâa yi a pə́ tʉ̌-lə́pû lə̂ nyarə́ ghô.

¹⁸N ngwo kə́ cí lǎʼ ghô, kwaʼ lə́nə́ʉ ńgó ô Pyêh, ə́ ndaghʼ ńdâʼ ńgó ləghǒ, n táa tághʼ cûʼtə pye pâa ndəu ləghǒ zêi. Tə mbaa pə̂ ləwʉ̂ láʼ nkûʼ yé lə̂ ncʉ̂ʼ zêi cûʼtə po.

¹⁹Məŋ ngʉ̌ ŋə́ pəkísʉ lə̂ ndághʼ ńtsóʼ ndə̂u Ləfou Sê* lə́ gho. Ə zə̂u yi o wo ghʉ̌ lə̌ʼ ndəu ndesé, pə́ ghʉ̌ lə̌ʼ tʉ̌-lə́pû. Ə zə̂u yi o wo pə́i ndəu ndesé, pə́ wo pə́i zěi tʉ̌-lə́pû.»

²⁰Yěso lâʼ yə́rə́, ə́ ncʉ́ʼ ntôʼ ngaŋə-jyêʼ-no* yé ńgó, koo gháp kʉ̂ʉ tə ŋuu ndeʼe jî ńgó â Nzaʼ-nkʉ*.

²¹Ə́ fû mpfu wêi, Yěso Kəlísto sâa-sǎa ndâʼ mbó ngaŋə-jyêʼ-no* yé ngô: «Ə́ pə́ ntúŋu ńgó a wó Yelúsalêm. A wo kə́u wó jwó ngwôʼ gháʼate mbó pəkə̌m lâʼ, gháp pə pətə́-ndə̂ pənuŋú-poʼ*, mbaa pəkeʼtə́-lə́pə́ʉ Mə̌usə̂i*, gháp ghʉ́ pə́ jwí yé. Â póu nzʉ́ʉ lə̂ ləwʉ̂ lə̂ mbâatə leʼé tárə́.»

²²Pyêh cʉ̂ʼ nkə́ nfúŋ yé ntsəm, ə́ njǐ lə̂ sâʼ yé, ə́ ndáʼ lə́ zʉ́ ngô: «Tsəpye, koo Sê pə̂i zêi mbə̂u no ghʉ̂ ghô! Mboʼ ə́ pə̂ yé yə́rə́ po.»

²³Yěso shə́rə, ə́ ndǎʼ lə́ Pyêh ngô: «Fú nzəm məŋ ncʉ́ŋtə́ Sə́tə! O cʉ̌ʼ nkə́ʼtə ghâa kəʼtə́. Koo o pə́ kwâŋ ghô gháʼá, ghíʼ Sê pə̌ nkwǎŋ, zə́ pə́ pə̂ kwaŋtə pye-mə́soŋ.»

²⁴Yěso pou ndâʼ mbó ngaŋə-jyêʼ-no* yé ngô: «Ŋuu lə̌i mə́ ngwô pə̂ ghâa ŋuu, a wáʼa tû-mbəʉ yé, ə́ nkhwǒr yé tʉ̌-mbʉ̂ŋtə ńdaghʼ ḿbə́i lə̂ nkwʉ́, mboŋə́ ńtsə́ʉ nzəm məŋ.

²⁵Ŋuu yi a wo yǎa lǒu lə̂ mbáa ye ləcǐ-mbî, lə̂ pə̌ ŋuu yi a wo cwî ye ləcǐ-mbî wêi. Lə́ ŋuu kə́ ncwí ləcǐ-mbî ye ńté ghâa, mə́i wêi ŋuu wo táa ghwǒ wěi.

²⁶Pə́ lə̌i nyáa fú khwór nzʉ̂ yo ntsəm ńŋə́ lə́ ŋuu, lə́ ə́ mbə́ yi ə́ wo loghʼó tû yé, mə́i ə́ wo pfútə́ yé lə̂ hó? Mboʼ ŋuu lâghʼ hó ńkə́pə́ tû yé?

²⁷Pei jí ńgó Môu Ŋuu* gháp pə pəcwôʼ pé táa tó cər ləghûʼ Tə́ ye, â cʉ́ʼ nkə́ ntsóʼ faʼ wǒwó, pə́ lə̂ ngʉ̌ məno yé.

²⁸Məŋ ndâʼ wéi, kwaʼ lə́nə́ʉ, pəcó pye lə́ pye pi gháp wə́ yaʼa mpfu wo láʼ kwʉ́tə gháp, tə́ ghó gháp jwó ghíʼ Môu Ŋuu* tô ghíʼ fou po.»