Read Ngombale Matyê 18 Bible Online

Matyê 18 - Ngombale bible

Matyê 18

¹Ə́ kə̂ mbə́ pə̂ mpfu wêi, ngaŋə-jyêʼ-no* Yěso tô ntúŋú yé ngô: «Wǒ ŋuu njwǐ cər no Ləfou Sê*.»

²Yěso fûŋ mə́ceʼé môu, ə́ ntághʼ yé mbi páp,

³ə́ ndǎʼ ngô: «Məŋ ndaʼ wéi, kwaʼ lə́nə́ʉ, pei lə̌i ndə́iʼ kə́p cǐ zéi, tə cʉ́ʼ pə́ pə́ ghíʼ ghəpə́ pó mə́i pei láʼ kə̂u wéi cər no Ləfou Sê po.

⁴Ŋuu lə̌i shuʼú mbəʉ yé ŋə́ sê tə ncʉ́ʼ ghíʼ mə́ceʼé môu wo, mə́i â ŋuu njwǐ cər Ləfou Sê*.

⁵Ŋuu lə̌i ndâghʼ ləjôghʼ zâa ḿpfú mə́ceʼé môu ghíʼ wo, mə́i ngaŋ pfû gháʼá pə́ ghâa.»

⁶Lə́ ŋuu lə̌i mbôu ncʉ́ŋə́ cǒ mə́ceʼé môu wo yi a ghwǒ pə̂i-ntə̂ʉ nzəm məŋ, tə gháp fâa no, mə́i mboŋə pə́ ghíʼ mboʼ pə́ kap tə́koʼ ləghǒ lóŋ ngaŋ, ə́ cǐ yé ḿmáʼ cər mə̂i-nci.

⁷Ndou wə́ tû pye pi gháp pə́ cər yo nzʉ̂, ə́ ncʉ́ŋə pye gháp fâa məno! Ə́ ńté no məno mi ə́ mboʼ ə́ ghʉ ŋuu fâa laŋə́-ndə̂u, ə́ pə́ cər nzʉ̂ tə nzáa gháʼate. Mboʼ mêi məno lâʼ mbûŋ yé po. Lə́ ndʉʉ-tə́poŋ, â ŋuu yi a wo cʉ́ŋə́ ŋuu â fâa laŋə́-ndə̂u!

⁸Pô zô kəʉ ku zô lə̌i mbə́ zə̂u yi ə́ cʉ́ŋə ghô, ô fâa no, o zâʼ zěi ḿmêʼ tə ndǐ təsə. Mbî ghíʼ mboʼ o pə̂ kəm-pô kəʉ kəm-ku, ə́ ndághʼ ḿbə́ wó, ńdéi ghíʼ mboʼ, o ghwô mbô mô mə̂mbwô kəʉ məku mô mə́mbwô, ńdághʼ ńkə́u cər mǒghʼ yi tə láʼ ncwí.

⁹Ə́ lə̌i ncʉ́ʼ yi ləjôghʼ zô cʉ́ŋə ghô, o fâa no, o tsôʼ méʼ ə́ ndǐ təsə. Mbî ghíʼ mboʼ o pə̂ cwî ləjôghʼ ńdághʼ ḿbə́ wó, ńděi ghíʼ mboʼ o ghwô mənyôghʼ mə́mbwô, ńdághʼ ńkə́u cər mǒghʼ.

¹⁰Pei laghʼə́ tû zéi lə̂ ngwághʼ cǒ tâʼ lə́ ghéghé ghəpə́ wo. Cʉ́ʼ məŋ ńdáʼ wéi, pəcwôʼ Sê* pi ə́ nâŋ gháp tə́ʉ mbi Sê mpfu ntsəm. [

¹¹Ńté no Môu Ŋuu* lə tó pə́ lə̂ ndôu pye pi gháp lə cwí ə́ ngʉ́ gháp cwôr.]

¹²Pei cʉ́ʼ n ntúŋú wéi yo no: «Ŋuu lə̌i ngáʼa ngwô məndənzʉ* mé nkʉ, tâʼ cwí, mə́i a wo ghʉ̂ gháʼá? Mə́i a wo tí tə́ nyér pəcó ntsap ləpfuʼú lə̂ mə̂m ləpfuʼú ndəu ləkôr, ə́ wǒ lǒu yi a cwǐ po?

¹³Cʉ́ʼ məŋ ńdáʼ wéi, kwaʼ lə́nə́ʉ, a lə̌i ńdóu wěi tə ńjwó, mə́i a wo fú tsěi té wěi, ə́ lěi pəcó ntsap ləpfuʼú lə̂ mə̂m ləpfuʼú pi káa gháp lə cwî gháp.

¹⁴Ə̂ zə̂u yi ə́ ghʉ̌ záʼa ndě, Tə́ wei yi a pə́ tʉ̌-lə́pû káa kôŋ yé ńgó cǒ tâʼ lə̂ ghəpə́ yé cwî.»

¹⁵«Ə fə̌r gho lə̌i ngʉ́ no tə́poŋ lə́ gho, o wô njwó yé, pei zʉ́ tə̂ʉ lə̂ zéi zʉ́ yʉʼ pə́pwô, o lâʼ yé. A zûʼ, tə mbə́i məfaa, mə́i o kwarə́ gháʼá yé lə̂ laŋə́-ndə̂u tə́poŋ.

¹⁶Lə́ kə́ ndə́iʼ zúʼ po o lôu tâʼ ŋuu kəʉ pye pə́pwô, ńjí ńgó pə́ wo ghǐ sʉ̂ŋ zêi no pənzǔʼ-njwó ə́ pə̂ sê pə́pwô kâa pə́tárə́.

¹⁷Lə́ a kə́ ndə̂ʼ lə̂ nzúʼ no yi gháp lǎʼ, o laghʼ zêi no ńdə́r lə̂ ndə̂ cûʼtə* pye Sê. A póu kə́ ncí ndə̂ʼ lə̂ nzúʼ no yi cûʼtə ə́ lǎʼ, o cʉ̂ʼ náŋ yé pə́ ghíʼ ŋuu yi kâa a pə́ njî yé Sê, kəʉ pə́ ghíʼ pə́ nâŋ mpfu ntsəp pə Lóma* lo.»

¹⁸«N ngwo lǎʼ wéi, kwaʼ lə́nə́ʉ, ngô: Pei lə̌i njwó no tə ndə̂ʼ zêi no ndəu ndesé, mə́i pə́ wo kə́ lə̌ʼ tʉ̌-lə́pû. Pei kə́ ńjwó no tə ḿbə́i ndəu ndesé, mə́i pə́ wo kə́ pə́i zêi no tʉ̌-lə́pû.»

¹⁹«Kwaʼ lə́nə́ʉ, n kə́ cí lǎʼ wéi ngô: Pye pə́pwô təcər pei lə̌i ngwô tâʼ ntsʉ ə́ ndəu ndesé yaʼa, ə́ ndóu pə̂ hó zə̂u mbó Tə́ ghâa yi a pə̌ tʉ̌-lə́pû pó mə́i a wo ŋə́ lə́ páp.

²⁰Yʉʼ yi pye pə́pwô kəʉ pye pə́tárə́, kəitə wó lə̂ ləjôghʼ zâa, m mbə̂ təcər páp.»

²¹Pyêh cʉ̂ʼ nkə́ ńtó ntúŋú Yěso ngô: «Ə́ Nde, fə̌r ghâa lə̌i fâa no mbó məŋ, n ndyə́ghʼə ŋə́ mbó zʉ́ mpfu sə́ʼə́? Ə́ mpfu saambwô kəʉ?»

²²Yěso lâʼ ngô: «ngə́, n ngwo lâʼ ghâa ghô ńgó mpfu saambwô ndaʼ po, n ngwo lǎʼ ńgó mpfu mə̂m saambwô yʉʼ saambwô.

²³Ə̂ zə̂u yi ə́ ghʉ̌ no Ləfou Sê* shwî no cǒ fou yi, a lə pə́ nkôŋ ńgó ngaŋə-faʼ yé tó gháp pə pǎp kwâʼ zə̂u pé pi ə́ pə́ mbó páp gháp paghʼə́ ŋə́,

²⁴ə́ nděi tə njyê, pə́ lâghʼ cǒ tâʼ ńtó mbi zʉ́, gháp zʉ́ ghwo nkâp tə ə pə̂ pəmilyôŋ[5],

²⁵káa a ghwô yé nkâp lə̂ ndághʼ ḿbeʼé nzǒ ye, fou lâʼ ńgó pə́ fə̂i yé, ə́ fə̌i ngwě ye, gháp pə ghəpə́ yé, tə mbaa zə̂u tsəm yi a ghwǒ, ə́ ndǎghʼ ḿbeʼé nzǒ ye.

²⁶Lə́ ngaŋ zûʼ ə́ ngwʉ̌ sê mbi fou, ə́ ndǎʼ ngô: “Tə́sə́u, nyéʼ shə̌ghʼ ə́ nzʉ́ʼtə́ ghâa, məŋ ngʉ̌ peʼé tə ə̂ mé!”

²⁷Məjʉ̂ŋ mé kô fou, a nyêr nkâp ye lə́ zʉ́, ə́ nyér yé a lə̂r.

²⁸Lə́ ngaŋə-faʼ wə̂ fû mbi fou ndə́r ə́ nkə́u laŋə́-ndə̂u, ə́ mbəutə́ cǒ sə̌u ye ngaŋə-faʼ, mə́i wêi ngaŋə-faʼ lə tó ḿpfú nkâp ye tə ə pə̂ zə̂u tóusʉ saambwô. A pə̂utə yé yə́rə́, ə́ ngôu yé, ə́ ntághʼ ngaghʼ lóŋ zʉ́, ə́ ndǎʼ ngô: Ŋə̂ nkâp zâa zə́ pə̂ mpfu wo.

²⁹Ŋuu wə̂ wʉ̂ mbi zʉ́, ə́ sʉ́ʉtə́ yé ńdâʼ ngô: Nyéʼ shə̌ghʼ ə́ nzʉ́ʼtə́ ghâa, məŋ ngʉ̌ ŋə́ nkâp zô.

³⁰Lə́u a lə̂ʼ yé lə̌ʼ po, ə́ fú ncʉ́ʼ ndághʼ yé ńgwǒ ḿmâʼ ndə̂-tsâŋ.

³¹Pəcó pəghaŋə-faʼ fou jwô, ə́ záŋə gháp, tə gháp wo fú ḿbyétə́ zə̂u yi ə́ lěi ə́ ndǎʼ fou.

³²Fou ghʉ̂ pə́ wô ngôu wêi ŋuu ńdághʼ ńtó, a lâʼ lə́ zʉ́ ngô: “Tə tsǎa-mə́jʉ̂ŋ, məŋ ntə̌i ntsáa məjʉ̂ŋ mô, ə́ nyér nkâp zâa mbó gho, ńté no o yǎa sʉ́ʉtə́ ghâa.”

³³Ńté hó káa o tsáa məjʉ̂ŋ sə̌u gho, ghíʼ n ntə̌i ntsâa mô zô lə́wó?

³⁴Yo no fû nzáŋə́ fou, a tə̂u pə́ wo ncóghʼ yé tsâŋ, lə̂ ŋə́ yé ngwôʼ tə nkə́u mpfu yi a fú peʼé ye nzǒ.»

³⁵Yěso cʉ̂ʼ ndáʼ ngô: «Ə̂ ndʉŋ-ndʉŋ ghíʼ Tə́ ghâa yi a pə̌ tʉ̌-lə́pû, a wo ghʉ̌ lə̂ maa wǒwó təcər pei, ghíʼ a lə̌i ndə́iʼ lyəghʼə́ məfaa fə̌r ye lə̂ ntə̂ʉ yé tsəm po.»