Read Ngombale Matyê 19 Bible Online

Matyê 19 - Ngombale bible

Matyê 19

¹Yěso lə ŋə́ mwo məntǎghʼ mbó pye tə nyér, ə́ fú cər paghʼə-ngoŋ Galilêi nkwâr, ə́ ndǎghʼ sʉ̂ yi Yudêi ńdə́r, lə̂ cǒ njʉŋə́ nci Yuudêŋ.

²Lâʼ tsə̂ʉ nzəm zʉ́ tə nzáa. A kə̂u wó ngʉ́ pəghou nou páp shwítə.

³Ə pye lə̂ nou pəfalísia* tô záp, nkwáʼtə́ Yěso, ə́ ntúŋú yé ngô: «Tə ə́ pə́ ghíʼi ləpə̌ʉ* zághʼə pə̂i ńgó ŋuu zúŋ ngwě ye tə mbaa lə́ zarə́ no yi a fǎa zěi?»

⁴Yěso túŋu gháp ngô: «káa pei pə́ fûŋ ŋwaʼa Sê nzúʼ mo? Pə́ lə ŋwaʼá ngô: “Ə́ lə fú ləjǐ, Sê pôu ŋuu mbiŋə gháp məngyě.”»

⁵Pə́ lə kə́ ncí ŋwáʼá ngô: «Ŋuu mbiŋə ghʉ̌ fǎghʼ mbəʉ ye lə́ tə́ ye gháp mə́ ye, ə́ wǒ lǎr mbəʉ ye lə́ ngwě ye, gháp zʉ́ təmtə ńcʉ́ʼ tâʼ ŋuu.

⁶Ə̂ lêi yə́rə́, gháp zʉ́ kə́ mbyêr gháp pye pə́pwô, gháp cʉ́ʼ mbə́ pə́ tâʼ ŋuu. Ghíʼ ə́ kə́ mbə́ yə́rə́ lə̂, ŋuu-məsoŋ páa lə̂ fâghʼ zə̂u yi Sê lar mə́.»

⁷Pəfalísia* túŋú yé ngô: «Tə ńté hó, Mə̌usə̂i lə lâʼ ńgó pə ŋə́ ŋwaʼa lə́ məngyě lə̂ ndághʼ ńzǔŋ yé?»

⁸Yěso pwôr lə́ páp ngô: «Mə̌usə̂i lə lâʼ yə́rə́, ńté no a lə jwó ńgó pei tə̂i tû mbó Sê tə ə́ lei. Ə́ pə́ yə́rə́, a pə́i ńgó pei zúŋ pəngyě péi, mə́i ə́ lə fú ləjǐ káa pə̂ yé yə́rə́.

⁹Məŋ ndaʼ wéi, ŋuu lə̌i nzûŋ ngwě ye tə́ ghó a ghʉ məghap, ə́ nzôʼ cǒ, mə́i ngaŋ ghʉ gháʼá məghap.»

¹⁰Ngaŋə-jyêʼ-no Yěso* ghʉ ndáʼ lə́ zʉ́ ngô: «Ə́ lə̌i mbə́ yə́rə́, mə́i mboŋə́ ghíʼ mboʼ pə́ nyâŋ tə́ zôʼ.»

¹¹Yěso pwôr lə́ páp ngô: «Pye pə́tsəm lə̂ kâa kûʼ gháp lə̂ mbə́i yo no. Lə́ Sê kə̌ mə́ ngʉ́, ə́ có ntâʼ pye kuʼ mə́u.

¹²Məzə̂u mi ə́ ghʉ pye nyâŋ tə́ zôʼ pə́ tə nzáa: Ə́ wo lə́ pəcó pye, káa gháp kûʼ gháp lə̂ nzóʼ tə fú pə̂ leʼé lə́jí, ə́ ngwó lə́ pəcó, mə́i pye-mə́soŋ lə́ lə ghʉ̌, mbóu ngwǒ lə́ pəcó, mə́i gháp lə pə́i lə̂ ngʉ́ yə́rə́, ńté no Ləfou Sê*. Ŋuu yi a ghwǒ lə̂ mbə́i yo no, â pə́i.»

¹³Ə́ pə̂ ndâghʼ ghəpə́ ńtô mbi Yěso ńgó â zápə́ mbô lə́ páp, ə́ sʉ́ʉtə́ Sê. Lə́ ngaŋə-jyêʼ-no* yé pə̂ ntôʼ gháp.

¹⁴Yěso lâʼ ngô: «Pei nyér ghəpə́ gháp tó nkwátə́ ghâa, koo pei kə̂ʼtə gháp, ńté ləfou Sê* pə́ pə́ yi pye pi gháp pə́ ghíʼ páp.»

¹⁵Ə́ ndǎʼ yə́rə́, ńzápə́ mbô mé lə́ páp, tə ə́ kuʼ a fû yʉʼ wó ndə́r.

¹⁶Cǒ ŋuu ghʉ̂ ntó mbəʉ Yěso, ə́ ntúŋú yé ngô: «Cícye, tə mboʼ məŋ ngʉ̂ zarə́ no shʉʼʉ tə ngwô ləcwôr tə me?»

¹⁷Yěso túŋu yé ngô: «Ńté hó o túŋu ghâa no lə̂ no shʉʼʉ? Ŋuu shʉʼʉ pə̌ pə́ tâʼ môʼ. O lə̌i mə́ nkôŋ nkə́u cər Ləfou Sê, o kûʼtə məntǎghʼ mé.»

¹⁸Ŋuu wêi túŋu ngô: «Ə̂ marə́ məntǎghʼ? Yěso pwôr ngô: Koo jwî ŋuu, koo ghʉ̂ məghap, koo jû, koo záp sôu tû ŋuu.

¹⁹Ŋə̂ məkuʼ tə́ gho gháp mə́ gho, kǒŋ fə̌r gho ŋuu-məsoŋ ghíʼ o kôŋ tû-mbəʉ zô.»

²⁰Môu ngwəsəu wêi lâʼ lə́ zʉ́ ngô: «Məŋ ndə̌i nkə́ ŋə̂i pə́ ghíʼ məntǎghʼ mêi mə́tsəm pə́ ndǎʼ. Hó có pyér mə́ mbûŋ ghâa?»

²¹Yěso pwôr lə́ zʉ́ ngô: «O lə̌i mə́ ndôu lə̂ mbə́ tə́ lǒʼ, o wô fə̂i məzə̂u mi o ghwǒ mə́tsəm, ə́ ŋə́ nkâp lə́ pəpûŋ, ə́ ndáʼ ngwô məzə̂u lətəi-ndwuŋ tʉ̌-lə́pû. Wo ngʉ̌ yə́rə́, ə́ mbə̌ʉ ntó ńtsə́ʉ nzəm məŋ.»

²²Môu ngwəsəu wêi zûʼ tsâr zêi, ə́ záŋə yé gháʼate, ńté no a lə ghwô məzə̂u lətəi-ndwuŋ gháʼate.

²³Yěso lâʼ lə́ ngaŋə-jyêʼ-no* yé ngô: «Məŋ ndâʼ wéi, kwaʼ lə́nə́ʉ, ngô: Ə́ təi mbó ngaŋə zə̂u lə̂ nkə́u cər Ləfou Sê.

²⁴Məŋ ngwo kə́ cí ntsúŋú lâʼ wéi ńgó, ə́ zaŋə mbó shwô lə̂ só lə̂ ngwʉ̂ lyaghʼə, ə́ nděi ngaŋə-zə̂u lə̂ nkə́u cər Ləfou Sê.»

²⁵Ngaŋə-jyêʼ-no* yé zûʼ no zêi, ə́ fû nkəʼə́ gháp gháʼate, gháp lâʼ ńgó tə ə́ lə̌i mbə́ gháʼa, wǒ lâʼ ncwór?

²⁶Yěso nâŋ gháp tə ndâʼ ngô: «Ə́ tsə pə́ pye-mə́soŋ, ə Sê kuʼ lə̂ ngʉ́ zə̂u tsəm.»

²⁷Pyêh lâʼ lə́ Yěso ngô: «Tə paghʼ lə nyêr zə̂u tsəm, ə́ ntsə́ʉ nzəm gho gháʼa, tə zághʼ no táa pə́ gháʼá?»

²⁸Yěso pwôr ngô: «Cʉ́ʼ məŋ ndáʼ wéi kwaʼ lə́nə́ʉ, pə́ táa kə́u cər ngoŋ shwî, Môu Ŋuu* nyáŋ lə̂ lwoŋ ləfou yé yi ghwǒ ləghûʼ, pei pye ntsap pwô lə̂ ləghə̂m pi pei lə tsə́ʉ nzəm məŋ, kə́ nyâŋ zéi lə̂ məlwoŋ ntsap pwô lə̂ ləghə̂m, ə́ fêʼ pye Ísə́lahêl, məngər ntsap pwô lə̂ ləghə̂m.

²⁹Wǒwó yi a lə nyér məndə̂ mé, ə́ nyér pəfə̌r pé pi mbiŋə mbaa pi pəngyě, kəʉ pə́ tə́ ye, kəʉ pə́ mə́ ye, kəʉ pə́ ghəpə́ yé, kəʉ pə́ mənkâʼ mé, ńté ləjôghʼ zâa, a táa pǒu ghwǒ mé məzə̂u mpfu nkʉ, ə́ kə́ cí ghwǒ ləcwôr tə me.

³⁰Lə́ lələʉ pəluŋ-mbi mpfu wo, táa cʉ́ʼ pəlyəghʼ-nzəm, lələʉ pəlyəghʼ-nzəm mpfu wo táa pə́ pəluŋ-mbi.»