Read Ngombale Matyê 2 Bible Online

Matyê 2 - Ngombale bible

Matyê 2

¹Pə́ lə ghí jí Yěso túsoŋ Mbetelehêm cər paghʼə-ngoŋ Yudêi, ə́ pə̂ mpfu yi fou Elôdə* lə nyáŋ lwoŋ. Pəcó pəjí-saŋ fû lâʼ páp, ə́ paghʼə sǎʼ-nəu ntó Yelúsalêm;

²ə́ mə́ ŋáa ntúŋu ngô: «Fou pəyúda yi pə́ jí yé lə̂ wə́ ghó yʉʼ? Paghʼ kə tə̂ʉ lâʼ paghʼ, ə́ paghʼə sǎʼ-nəu, ə́ njwó cwôʼ-saŋ ye, paghʼ tô gháʼa lə̂ ŋə́ məkuʼ mé.»

³Gháp pə̂ ŋáa ńtúŋu yə́rə́, ə no zêi kə̂u lətuŋú fou Elôdə*, ə́ fú ncóŋ tû yé, ə́ ncǒŋ tû pye pə́tsəm cər túsoŋ Yelúsalêm.

⁴Fou Elôdə* cʉ̂ʼ nkə́ fúŋ pətə́-ndə̂ pənuŋú-poʼ Sê* gháp pəkeʼtə́-lə́pə́ʉ Mə̌usə̂i* cər lâʼ, ə́ ntúŋú gháp ngô: «Pə́ lə ŋwáʼa cər ŋwaʼa Sê ńgó pə́ wo láʼ jí Nzaʼ-nkʉ* yi Sê lə ghʉ̌ ndaʼa ńgó pə́ ghʉ̌ jí yé lə̂ ghó yʉʼ?»

⁵Gháp laʼ lə́ zʉ́ ngô: «Pə́ lə ŋwaʼá cər ŋwaʼa Sê ńgó pə́ táa jí yé túsoŋ Mbetelehêm, ə́ cər paghʼə-ngoŋ Yudêi yaʼa, ńté no ntsətə-nkəʉ Sê* lə ŋwaʼá ngô:

⁶“Ə́ ngwǒ lə́ gho Mbetelehêm, ə́ cər paghʼə-ngoŋ Yudêi, o pə̌ tə mbə́ pə́ mə́ceʼé lə̂ mətúsoŋ mi ə́ pə́ cər paghʼə-ngoŋ Yudêi, lə́ káa ə́ pə̂ ghô ndyəghʼzəm, ńté ńgó fou yi a táa sáʼ pye lâʼ pâa, ə́ pye Ísə́lahêl táa kwǎr pə́ lə́ gho.”»

⁷Elôdə zûʼ yə́rə́, ə́ fúŋ pəjí-saŋ, gháp pə pǎp tə̂ʉ ntsəm, a túŋu gháp ngô: «Pei kə jî lə̂ njwó wo cwôʼ-saŋ tə fú shʉ́ŋə́?»

⁸Gháp pyêtə ńdáʼ yé, a cʉ̂ʼ nkə́ ntə́u gháp Mbetelehêm, ə́ ndǎʼ lə́ páp ngô: «Pei wó mbwórə́ ndôu môu wei tə ńjwó yé, ńtó ńdáʼ ghâa, n ngwó zâa lə́wó ŋə́ məkuʼ mé.»

⁹Pəjí-saŋ zûʼ no yi fou Elôdə* lǎʼ, ə́ ntsə́ʉ laŋə́-ndə̂u, ə́ nkə́ ncí njí lə̂ njwó cwôʼ-saŋ yi gháp lə jwó lâʼ páp. A pə̂ mbi mə́ ŋə̂i, gháp pə̂ ŋə̂i záp, ə́ ndə̌r tə nkə́u yʉʼ yi môu pə́ wó, ə́ ntə́ʉ, káa kə́ ŋarə́.

¹⁰Gháp jwô yə́rə́, ə́ fú ntsêi gháʼate,

¹¹ə́ nzéʼ ńkə́u ndə̂, ə́ njwó môu gháp mə́ ye Mǎyaa, ə́ nkʉ́ʼtə́ sê, ə́ ŋə́ məkuʼ môu; ə́ mbou ntâʼ məpaa máp, ə́ ndǎghʼ tə̌ʉ-gôl gháp ləmə́ndaa[1] ńcóghʼ shoŋə môu.

¹²Gháp nyâŋ tə mə́ mbə̂ʉ nzəm, Sê lâʼ gháp cər njwo ńgó gháp páa lə̂ nkə́ ncí ndêi mbəʉ fou Elôdə*. Gháp cʉ̂ʼ nzáp pə̂ laŋə́-ndə̂u ndeʼe mboŋə́ pə̌ʉ lə̂ lâʼ páp.

¹³Gháp lei tə ndə́r, Yosêp lê njwo, ə́ njwó cǒ cwôʼ Nde*, a lâʼ lə́ zʉ́ ngô: «Lěsê, ə́ nkhwǒr môu, pei pə mə́pfu khʉ́ ńdə̌r lə̂ cər ngoŋ Egípto, ə́ nyáŋ wó. Məŋ, n ntáa lǎʼ ghô mpfu yi o wo pə̌ʉ nzəm. Ńté ńgó Elôdə* wo lǒu lə̂ njwó môu wei, ə́ njwí yé.»

¹⁴Yosêp lêsê pə́ lətwûʼ, ə́ nkhwǒr môu-mbaŋə́, gháp pə mə́pfu lər lə̂ cər ngoŋ Egípto,

¹⁵ə́ ndáʼ ńnyáŋ wó tə fou Elôdə* kwʉ̂. Mêi məno laghʼ ḿbə̂utə lə̂ məno mi Nde lə zâʼ nzʉ̂, ə́ ncóghʼ ntsʉ ntsətə-nkəʉ ye, a lâʼ ngô: «N ngwo ghʉ̌ Môu ghâa fú cər ngoŋ Egípto, ə́ mbə̂ʉ nzəm.»

¹⁶Elôdə* lêi tə njwó ńgó pəjí-saŋ kə futə́ yé, ə́ nzáŋə́ lóŋ gháʼate, ə́ ncʉ́ʼ nkə́ ntə́u pye ńgó gháp wó túsoŋ Mbetelehêm tə mbaa cər lâʼ zʉ́, ə́ njwítə́ pôu ghəpə́ pə́tsəm pi gháp kuʼ mə́ nguʼ pwô mbaa pi gháp kə́ kûʼ gháp, ə́ ndaghʼ ńdʉ̂ŋtə yə́rə́ lə̂ mpfu yi gháp kə lǎʼ yé ńgó cwôʼ-saŋ lə kwar.

¹⁷Ə́ pə̂ yə́rə́, ə́ ndaghʼ ḿbə̂utə lə̂ no yi Jərəmî ntsətə-nkəʉ Sê* lə záʼ nzʉ̂ ə́ ndǎʼ ngô:

¹⁸«Pə́ zúʼ pə́ pə̂ túsoŋ Ráma, ə́ mə́ ncwôr ngwuŋ, ə́ mə́ nkhwôʼ ləwʉ̂, ə́ ndǎa. Ə́ pə̂ Lǎshyê yi a laa ghəpə́ yé, ńté no gháp kwʉ́tə̂, tə káa pə̌i pə́ nkoŋ yé ńgó pə laŋə́ yé.»

¹⁹Elôdə* lə lei tə nkwʉ́, Yosêp lê njwo Egípto, ə́ njwó cǒ cwôʼ Nde*,

²⁰a lâʼ lə́ zʉ́ ngô: «Lěsê, ə́ nkhwǒr môu, pei pə mə́pfu pə̂ʉ nzəm lə̂ cər ngoŋ Ísə́lahêl. Ńté ńgó pye pi gháp lə pə́ ndôu lə̂ njwí môu kwʉ́tə́ mə́.»

²¹Yosêp lêsê, ə́ nkhwǒr môu, gháp pə mə́pfu pə̂ mbə̂ʉ nzəm lə̂ cər ngoŋ Ísə́lahêl,

²²a zûʼ ńgó Akəlawísʉ lə̂ cʉ̌ʼ sâʼ paghʼə-ngoŋ Yudêi, tə fú ghíʼ tə́ ye Elôdə* kə kwʉ́, ə́ mə́ mbôghʼ ńgwó Yudêi, ə́ ndé njwo, Nde ŋə̂ yé ntǎghʼ. A cʉ̂ʼ ndə́r pə́ lə̂ cər paghʼə-ngoŋ Galilêi,

²³ə́ ndə́r tə nkə́u wó, ə́ mə́ cî cər có túsoŋ yi pə́ fûŋ ńgó Nǎzalêi; ə́ laghʼ ḿbə̂utə lə̂ no yi pətsətə́-nkəʉ Sê* lə záʼ nzʉ̂ ə́ ndǎʼ ńté Nzaʼ-nkʉ* ngô: «Pə́ táa fûŋ yé ńgó ŋuu Nǎzalêi.»