Read Ngombale Matyê 21 Bible Online

Matyê 21 - Ngombale bible

Matyê 21

¹Yěso gháp pə ngaŋə-jyêʼ-no* yé lər tə mə́ nkə̂u túsoŋ Yelúsalêm, ə́ mbyér mbə́ pə́ lə̂ sʉ̂ lâʼ Mbedfajê, ə́ yʉʼ ləkôr mətʉ̌ məwə̂r olîvə. A tə̂u ngaŋə-jyêʼ-no* yé pwô,

²ə́ ndǎʼ lə́ páp ngô: «Pei wó cər lâʼ zə̂ yi ə́ pə́ mbi pei lə̂, pei wo lěi tə kə́u wó ə́ jwó Njəkáasʉ, mə́i pə́ yǎa nkǎp yé, môu ye pə́ mbəʉ zʉ́, pei kéʼ gháp, ə́ ndághʼ gháp ntó, ə́ ŋə́ lə́ məŋ.

³Pei lə̌i mə́ nkéʼ, ŋuu túŋú wéi no, pei pwôr ngô: “Ə Nde lə̂ pə̌ nkoŋ wěi.” Pei wo lǎʼ yə́rə́, ngaŋ lêi-lěi nyér ə́ pei lághʼ ńdə̌r.»

⁴Mwo məno pə̂ yə́rə́, ə́ ndaghʼ ḿbə̂utə lə́ no yi ntsətə-nkəʉ Sê* lə lǎʼ, ə́ ngô:

⁵«Pei tsə́tə́ lə́ pye pi gháp pə́ túsoŋ Siyôŋ ngô: Pei jwó ghíʼ fou wei tô ncêr pei ńjwó, ə́ mbə́ ngaŋə mbwórə, ə́ nyáŋ ndəu môu njəkáasʉ, a pə̂ ngwě wěi.»

⁶Ngaŋə-jyêʼ-no Yěso zêi pwô* lər tə nkə́u wó, ə́ nkə́ ngʉ́ zə̂u tsəm pə́ ghíʼ Yěso yǎa ndǎʼ,

⁷ə́ ndǎghʼ njəkáasʉ gháp môu wěi ńtó, ə́ ndǎghʼ məndǐ fwôghʼ máp ńzə́tə́ mənkaʼtə pənjəkáasʉ, Yěso nyâŋ lə̂ cǒ.

⁸Lələʉ pye shaghʼə́ məndǐ máp ndəu laŋə́, pəcó pye faghʼ mbô tʉ̌ ńdaghʼ ńkwə̂i laŋə́-ndə̂u.

⁹Ə lâʼ pə̂ mbi, ə́ mbə́ nzəm, ə́ ŋə̌i ńdâʼ ngô: «Wuwîi[7]» Ghûʼtə pə́ mbó môu fou Ndavîd! Mbwórə pə́ lə́ ŋuu yi a tô lə́ ləjôghʼ Nde. Wuwîi, ghûʼtə pə́ mbó Sê ə́ tə tʉ̌-lə́pû.

¹⁰Yěso lər tə nkə́u Yelúsalêm, ə túsoŋ fû ncʉ́ʼʉ́, ə pye pə̂ ntúŋu ngô: «Wo ŋuu pə̌ pə̂ wǒ?»

¹¹Ə lâʼ pwôr ngô: «Ə̂ Yěso ntsətə-nkəʉ Sê*, a fǔ túsoŋ Nǎzalêi cər paghʼə-ngoŋ Galilêi.»

¹²Yěso lə̂r tə nkə́u ndə̂ Sê*, ə́ sǎŋ pəfə̌i məzə̂u gháp pə pəzə̌u, ə́ ncǐ məkə̌u mətǎa pəkə́pə́-nkâp ə́ maʼtə́ sê, ə́ nkə́ ncí ə́ kwághʼtə́ məlwoŋ pəfə̌i pəpə́ptə́ ə́ méʼ,

¹³ə́ ndáʼ lə́ páp ngô: «Ə́ pə́ cər ŋwaʼa Sê, Sê lâʼ ngô: “Pə́ wo láʼ fúŋ ndə̂ zâa ńgó ndə̂ sʉ̂ʉtə.” Lə́ pei pə̌ ndaghʼ ńgʉ̂ ndə̂ pətsǒŋ».

¹⁴Pəfwoghʼ-mə́nyôghʼ mbaa pəpwoʼtə-mə́ku pou ntó ńcə́r Yěso ə́ ndə̂ Sê*, a ghʉ̂ gháp shwítə.

¹⁵Pətə́-ndə̂ pənuŋú-poʼ Sê* gháp pə pəkeʼtə́-lə́pə́ʉ Mə̌usə̂i* jwô məndǎa-jwô-mə́no mi Yěso ghʉ̌, ə́ nkə́ ncí nzúʼ ghíʼ ghəpə́ pə́ ndə̂ Sê* mə́ nzâp ńdâʼ ngô: «Wuwîi, ghûʼtə pə́ mbó môu fou Ndavîd!» lóŋ ghap zâŋ;

¹⁶gháp túŋu Yěso ngô: «Tə o pə̌ nzûʼ no yi ghəpə́ pə́ ndǎʼ lo?» Yěso pwôr lə́ páp ngô: «M mə̌ nzúʼ!» Ə́ mbou ndâʼ ngô: «Pei lâa kə́ fúŋ yʉʼ ŋwaʼa Sê yi ə́ lâʼ ngô: “Ə ghəpə́ gháp pə ghəpə́-paŋə́ pə́ ndaghʼ ntsʉ gháp ńzâp ləghûʼ gho” mo?»

¹⁷Ə́ ndǎʼ yə́rə́, ə́ nyér gháp, ə́ fú túsoŋ ńkwár ńdə̌r lə̂ Mbetanî, ə́ nkə́u wó ə́ ndé.

¹⁸[8] Nzʉ̂ fóghʼ, Yěso pə̂ mbə̂ʉ lə̂ túsoŋ, nji záŋə yé.

¹⁹A jwô có tʉ̌ yi pə́ fûŋ ńgó tʉ̌ figyê[9] nkaŋ laŋə́, ə́ ngwó ləcʉŋə́ wó, ə́ njwó pə̂ ndaʼ məfu měi, ə́ ndǎʼ lə̂ tʉ̌ zêi ngô: «O láʼ kə́ pǒu zə̂m ghô có ntǎa po!» Ə tʉ̌ zêi lêi-lěi nzə́u.

²⁰Ngaŋə-jyêʼ-no* yé jwô ghíʼ ə́ zə̂u, ə́ fû nkə́ʼə́ gháp gháʼate, gháp lâʼ ngô: «Ə́ lei gháʼá ə tʉ̌ yo tə̂ʉ pə́ tâʼ mpfu ə́ fú nzə́u ngô?»

²¹Yěso pwôr lə́ páp ngô: «Məŋ ndâʼ wéi, kwaʼ lə́nə́ʉ, pei lə̌i ncóghʼ ntə̂ʉ lə̂ Sê, ə́ ndə́iʼ pə́ mʉ́ŋtə wéi po, mə́i pei wo kǔʼ lə̂ ngʉ́ zə̂u yi məŋ ngʉ̌ lə̂ tʉ̌ figyê lo. Mə́i mboʼ pei lâʼ lə̂ ləkôr yo ngô: “Fú yʉʼ wo ńdə̌r, ə́ ngwo ńtə́ʉ cər mə̂i-nci!” Ə́ zûʼ ntsʉ wéi.

²²Pei lə̌i ncóghʼ ntə̂ʉ lə̂ Sê, ə́ sʉ́ʉtə́ yé ə́ ndóu yé pə̂ hó, mə́i a wo ŋə́ lə́ pei.»

²³Yěso pôu mbə̂ʉ lə̂ ndə̂ Sê*, ə́ njǐ lə̂ njyéʼ pye no Sê, pətə́-ndə̂ pənuŋú-poʼ Sê* gháp pə pətikáŋ cər lâʼ tô ntúŋú yé ngô: «O laghʼ ləjôghʼ wǒ ńgʉ̂ mwo məno? Wǒ lə tə́u ghô ńgó ô ghʉ́ yə́rə́?»

²⁴Yěso pwor lə́ páp ngô: «Tə mbaa məŋ zâa n ngwo tâʼ no moʼ yi ngwo túŋú wéi. N ndə̌i ntúŋú wéi pei pwôr, n ndâʼ wéi ŋuu yi n ndaghʼ ləjôghʼ yé ńgʉ̂ mwo məno.

²⁵Ə nci yi Jâŋ lə ŋə̂ pye wěi lə fú pə́ mbó Sê kəʉ mbó pye-mə́soŋ?» Gháp zûʼ, ə́ nkwâŋtə́ təcər páp ngô: «Paghʼə lə̌i ndâʼ ngô: “Ə Sê lə tə́u yé”, mə́i a wo túŋú wághʼə ngô: “Tə ńté hó káa paghʼə lə pə́i no yi Jâŋ lə laʼá?”

²⁶Ə́ mbǒu ndâʼ ngô: “Ə̂ pye-mə́soŋ”, mə́i lâʼ wo nyêr yé wághʼə po, ńté no pye pə́tsəm pə́ njî ńgó Jâŋ lə pə́ ntsətə-nkəʉ Sê*.»

²⁷Gháp kwaŋ yə́rə́, ə́ ncʉ́ʼ mbwôr pə́ ngô: «Káa paghʼ pə́ njî wághʼ.» Yěso lâʼ lə́ páp ngô: «Tə mbaa məŋ zâa n ngwo lâʼ ghâa wéi ŋuu yi n ndaghʼ ləjôghʼ yé ngʉ mwo məno po.»

²⁸Yěso kə̂ ncí ndâʼ ngô: «Pei zúʼ yo no, ə́ ndǎʼ ghâa zéi no yi pei kwǎŋ mə́u. Cǒ ŋuu lǎʼ ngwǒ ghəpə́ yé pi mbiŋə pwô, ə́ ndǎʼ lə́ nduŋ-mbi ngô: “Môu ghâa, wǒ nkâʼ leʼé wo ə́ njwóghʼ wó fâʼ.”

²⁹A pwôr ngô: “N ndəʼ.” Ə́ mbǒu nyáŋ, ə́ ntsə́rə́ zə̂u yi ə́ yǎa ngʉ̌ a lâʼ yə́rə́, ə́ ndə́r lə̂ nkâʼ.

³⁰Tə́ ghap kə̂ ncí ndáʼ yə́rə́ lə̂ mbâatə môu, wêi môu pwôr ngô: “Ə̂ŋ tǎa, n ngwo lə̌r”, lə́ ə́ ndǎʼ yə́rə́, káa wo yé wó.

³¹Ə warə́ lə́ ghəpə́ yo pwô lə ghʉ̂ zə̂u yi tə́ gháp lə́ pə́ nkôŋ?» pətə́-ndə̂ pənuŋú-poʼ gháp pə pətikáŋ cər lâʼ* pwor ngô: «Ə̂ nduŋ-mbi môu.» Yěso cʉ̂ʼ nkə́ ndáʼ lə́ páp ngô: «Məŋ ndâʼ wéi, kwaʼ lə́nə́ʉ, pəpfǔ-ntsəp pye Lóma* gháp pə məkwarə pəngyě táa pyə̌ghʼ cər Ləfou Sê* ə́ lěi wéi,

³²ńté ghíʼ Jâŋ lə tó ńnyárə́ wéi laŋə́-ndə̂u yi Sê pə̌ nkoŋ ńgó pei ŋə̂i mə́u, lə́ pei lə̂ʼ lə̂ nzúʼ no yi a lâʼ. Pəpfǔ-ntsəp tə mbaa məkwarə pəngyě kə pə̂i, pei tsúŋu njwó, lə́ káa kə̂p wéi cǐ zéi, ə́ pə́i no yi jâŋ lə lǎʼ zěi.»

³³Yěso lâʼ ngô: «Pei kə́ ncí nzûʼ cǒ saghʼ-ləghaa. Cǒ ntikáŋ lǎʼ ngwǒ nkâʼ yé, ə́ ngwó cər wó mbî mətʉ̌ mi pə́ kêi məntǎa měi ə́ ndǎghʼ ńtsúŋu məluʼ, ə́ nkə́r nkâʼ ńdaghʼ ńzə́mə́, ə́ ngwǒ cər nkâʼ wêi ə́ ntúŋ yʉʼ yi pə́ wo kêi məntǎa wó, ə́ mbóu yʉʼ yi pə́ wo kóʼ tə̂ʉ mə́u ə́ pâp nkâʼ, ə́ ngʉ̌ yə́rə́, ə́ nyér nkâʼ mbó pətsuŋú məluʼ, ə́ ncʉ́ʼ ndə́r yé lə̂ tə̂u.

³⁴Ə mpfu ləkǎp məntǎa-ntʉ́ ghʉ nkûʼ, a tə̂u pəghaŋə-faʼ pé mbó pye pi gháp pə́ nkâʼ ńgó gháp wó mpfú yé zə̂u yi ə́ kwǎr nkâʼ ə́ ndǎghʼ ńtó.

³⁵Gháp lər tə nkə́u wó, pye pi gháp fâʼ nkâʼ lêi pfûŋ lə́ nduŋ-mbi ŋuu ńsə́u yé, ə́ njwí mbâatə wěi, ə́ mbou ńdághʼ məghǒ ńtə́mtə́ mbâatə tárə́ ńjwí.

³⁶Ntikáŋ wə̂ kə̂ ncí ntə́u pəcó pəghaŋə-faʼ tə gháp zâa ńdêi pətsəmbi pěi. Lə́ pye pêi kə̂ ngʉ́ pə́ ghíʼ gháp kə ghʉ̌ lə́ pəcó pəghaŋə-faʼ lə̂.

³⁷Ntikáŋ wêi tə́u kwaʼ môu ye yi mbiŋə, ə́ mə́ nkwâŋ ńgó ə́ wo ghʉ̌ hó gháp ŋə́ məkuʼ mé.

³⁸Lə́ pye pêi jwô môu ntikáŋ wêi, ə́ ndǎʼ təcər páp ngô: “Ə nzʉ̂-ndə̂ ye wə̂ a tô lə̂. Pei tó paghʼə jwí yé nzʉ́ nkâʼ!”

³⁹ə́ ndǎʼ yə́rə́, ə́ ngôu yé, ə́ shǔŋ yé ndaghʼ fú nkâʼ ńkwǎr, ə ngwo njwí yé!»

⁴⁰Yěso túŋu ngô: «Tə ntikáŋ wêi ghʉ̌ tó, ə́ ghʉ̌ gháʼá lə́ pye pi a lə nyér nkâʼ lə́ páp?»

⁴¹Pə́ pwor ngô: «A ghʉ̌ tó ghʉ̌ ə́ pə jwítə məfwôr mêi tə́ tsáa məjʉ̂ŋ máp, ə́ pǒu nyér nkâʼ lə́ pəcó pye mə́ndeʼe, pi gháp ghʉ̌ pə́ mpfu yi pə́ kâp məntǎa, ə́ ŋə̂ yé zə̂u yi ə́ kwǎr nkâʼ.»

⁴²Yěso lâʼ lə́ páp ngô: «Ə́ lə̌i ndə́iʼ pə́ pə́ ńgó hó po, mə́i pei kə fúŋ mə́ yʉʼ ŋwaʼa Sê yi ə́ lâʼ ngô: “Ləghǒ yi pəpóu-ndə̂ lə měʼ, kə cʉ̂ʼ ləghǒ yi ə́ pyěʼ ndə̂. Ə Nde Sê lə̂ lə ghʉ̌ yə́rə́, ə́ pə̂ tə́koʼ no shʉʼʉ mənyôghʼ paghʼə?”»

⁴³«Ə́ pə̂ yə́rə́, m mə̂ ndâʼ wéi ńgó pə́ táa pfú yʉʼ zéi cər Ləfou Sê* ə́ mbó pei, ə́ ŋə́ mbó lâʼ yi ə́ wo zə́m ntǎa yi Sê pə̌ nkǒŋ.

⁴⁴[Ləghǒ zêi ə̂ yi ŋuu lə̌i mpfúŋ mə́u, mə́i ngaŋ wo pwóʼtə́, ə́ póu mpfúŋ lə́ ŋuu, mə́i ə́ wo fú nyotə́ ngaŋ.]»

⁴⁵Pətə́-ndə̂ pənuŋú-poʼ Sê* gháp pə pəfalísia* zûʼ wo saghʼ-ləghaa, ə́ ndǎʼ ńgó a lâʼ lə́ páp,

⁴⁶ə́ ndǒu məsʉ̂ lə̂ ngôu yé, lə́ ə́ mbóghʼ nyôghʼ lâʼ, ńté no lâʼ lə pə́ njî ńgó Yěso tâʼ ntsətə-nkəʉ Sê*.