Read Ngombale Matyê 23 Bible Online

Matyê 23 - Ngombale bible

Matyê 23

¹Yěso ghʉ̂ ndáʼ lə̂ mənou lâʼ tə mbaa mbó ngaŋə-jyêʼ-no* yé ngô:

²«Pəkeʼtə́-lə́pə́ʉ Mə̌usə̂i* gháp pə pəfalísia* ghwo lə̂ nkéʼtə́ ləpə̌ʉ* Mə̌usə̂i.

³Ə́ pə̂ yə́rə́, ə́ mə́ ntúŋu ńgó pei zúʼ ntsʉ gháp, ə́ ngʉ̌ zə̂u tsəm yi gháp pə́ ndaʼ lə́ pei. Lə́ koo pei fəiʼi cǐ záp. Ńté no gháp jyêʼ pye zə̂u pə́ tə pə́ ngʉ̂ zěi.

⁴Gháp kə̂r pyeʼ pi ə́ jwə̌r gháʼate, ə́ nzápə məkwêi pye-mə́soŋ, lə́ ə́ ndə̂ʼ lə́ pə́ yi mboʼ kwaʼ tû-mbəʉ záp pəi ndághʼ pə́ shípo ghap yi məncǐ ə́ mbəi nyéʼ ndághʼ ńcwóʼtə́ cwoʼtə́.

⁵Gháp ghí pə́ ghʉ̂ zə̂u tsəm ə́ mə́ ndôu ńgó pə jwó gháp. Ə̂ zə̂u yi ə́ ghʉ̌, gháp wo lə̂ tsâr Sê yi pə́ ŋwaʼá ńcóghʼ cər tə́tóʼ, ə́ yi pə́ kə̂r lə̂ ləzə̌i kəʉ lə̂ pô, gháp ghʉ páp pətə́tóʼ ə́ ghûʼtə pə́ lə̂ mbə̂u yi ndeʼe. Gháp kə̂ ncí ngʉ́ máp məntsâŋ saghʼtə gháʼate lə̂ ndǐ yi pə́ maʼ ńdághʼ ńsʉ̂ʉtə Sê.

⁶Gháp kə̂u yʉʼ lətsei, ə́ nyáŋ záp pə́ lə̂ yʉʼ pətikáŋ, ə́ nkə̂u məndə̂ cûʼtə* ə́ nkâŋ záp yʉʼ pə́ mbi.

⁷Gháp kôŋ ńgó pə́ tə́ʉ zǎa, ə́ ntsêʼtə gháp lə̂ məkuʼ, pye póu nyáŋ fûŋ gháp ńgó “Cícye”.

⁸Lə́ ə́ ngwǒ lə́ pei, koo pei ghʉ ńgó pə fúŋ wéi ńgó “Cícye”, ńté no pei pə̌ pə̂ pəfə̌r pəfə̌r, mbou ńgwó pə́ tâʼ Cícye moʼ.

⁹Koo pei fûŋ cǒ ŋuu ndəu ndesé ńgó “Tə́ wei”, ńté no pei ghwo pə́ tâʼ Tə́ moʼ, a pə̂ tʉ̌-lə́pû.

¹⁰Koo pei pə̂i pə́ fûŋ wéi ńgó “Pəntə̌ʉ-tú-mbi”, ńté no ŋuu yi a tə̂ʉ mbi pə̌ pə́ tâʼ moʼ, ə́ mbə́ nzaʼ-nkʉ yi Sê lə ghʉ̌ ndaʼá mə́u lə̂ ngʉ́ ŋə́.

¹¹Ə́ poŋ ńgó ŋuu njwǐ təcər pei ghwô mbəʉ ye pə́ ghíʼ ngaŋə-faʼ wei lə̂.

¹²Ŋuu lə̌i ŋáʼtə́ mbəʉ ye, mə́i Sê wo shúʼú yé ńŋə́ sê, ə́ kə́ móu nshúʼú mbəʉ yé ńŋə́ sê, mə́i Sê wo koʼó yé ńŋə́ tʉ́.»

¹³Pêi pəndʉʉ-tə́poŋ, pei pəkeʼtə́-lə́pə́ʉ Mə̌usə̂i* tə mbaa pei pəfalísia*. Pêi pəghaŋə nkoŋə mənyôghʼ, pei pə̌ nkə̂ʼ ntsʉ ndə̂ yi pye-mə́soŋ fû mə́u mboŋə́ nkə̂u cər no Ləfou Sê*, ə́ ngʉ̌ yə́rə́, káa kə́ kə̂u wéi cər wó, káa kə́ nyér pye pi gháp pə́ nkoŋ lə̂ nkə́u cər wó, gháp kə́u cər wó. [

¹⁴Pêi pəndʉʉ-tə́poŋ, pei pəfalísia* tə mbaa pei pəkeʼtə́-lə́pə́ʉ Mə̌usə̂i*, pêi ngaŋə məfutə́, pei lə̂ ghou pəpfǒghʼ-pəngyě ə́ mpfû məzə̂u máp, ə́ mbou ncʉ́ʼ lə̂ sʉ́ʉtə́ Sê, ə́ ndǎʼ no sâghʼ, lə̂ ndághʼ fútə́ mənyôghʼ pye, gháp kwaŋ ńgó pêi pye shʉʼʉ. Ə́ wo lěi yə́rə́, ə tsâŋ zéi táa ntə̂i gháʼate.]

¹⁵Pêi pəndʉʉ-tə́poŋ, pei pəfalísia* tə mbaa pei pəkeʼtə́-lə́pə́ʉ Mə̌usə̂i*, pêi ə ngaŋə məfutə́, pei sâʼ təʉ ə́ ŋə̂i yʉʼ tsəm ndəu ndesé mbaa ŋə̂i cər Mə̂i-nci lə̂ ngʉ́ ŋuu yi káa a pə́ njî yé Sê tsə̂ʉ nzəm pei, lə́ a kə́ ə́ ndéi tə ntsə́ʉ nzəm pei, pei lə̂ ghʉ̂ a cʉ̂ʼ mbə́ ŋuu yi Sê wo ghʉ̌ â kə́u təsoŋ mǒghʼ tə́ láʼ ncwí.

¹⁶Pêi pəndʉʉ-tə́poŋ, pei pi pêi pə̌ pəfwoghʼ-mə́nyôghʼ, mbou mə́ ngwô mbô pəcó pye, ə́ nyárə́ gháp laŋə́-ndə̂u. Pei lâʼ ńgó ŋuu lə̌i ndághʼ ndə̂ Sê* ńkâa no, mə́i káa có feʼ pə̂ yé wó. Lə́ nkə́ ńdághʼ ntə̌ʉ-gôl yi ə́ pə́ cər ndə̂ Sê* ńkâa no, mə́i ə̂ fú mbə́ kaa no yi lə́nə́ʉ.

¹⁷Tə káa pei pə́ məghəghəʉ, ə́ mbou mbə́ pəfwoghʼ-mə́nyôghʼ po, ə́ wo lə̂ tə̌ʉ-gôl gháp ndə̂ Sê* ə́ hó lěi hó? Káa ndə̂ Sê* lə̂ ghʉ́ ńgó tə̌ʉ-gôl cʉ́ʼ yi Sê mo?

¹⁸Pei lâʼ ńgó ŋuu lə̌i ńdághʼ yʉʼ yi pə́ nuŋu poʼ Sê wó, ńkâa no, mə́i káa cǒ feʼ pə̂ yé wó. Lə́ nkə́ ńdághʼ poʼ yi ə́ pə́ ndəu wó ńkâa no, mə́i ə́ fú mbə́ kaa no yi lə́nə́ʉ.

¹⁹Pəfwoghʼ-mə́nyôghʼ, ə́ wo lə̂ yʉʼ yi pə́ nuŋu poʼ Sê wó, gháp poʼ, ə́ hó lěi hó? Kâa yʉʼ yi pə́ nuŋu poʼ Sê wó lə̂ ghʉ́ ńgó poʼ cʉ́ʼ yi Sê mo?

²⁰Ə́ pə̂ yə́rə́, ŋuu lə̌i ńdághʼ yʉʼ yi pə́ nuŋu poʼ Sê wó ńkâa no, mə́i a laghʼ gháʼá zêi yʉʼ tə mbaa zə̂u yi ə́ pə́ ndəu wó ńkâa.

²¹Ŋuu yi a laghʼ ndə̂ Sê* ńkâa no, a laghʼ gháʼá ndə̂ Sê* tə mbaa Sê yi a pə́ yʉʼ wó ńkâa.

²²Ŋuu lə̌i ndághʼ tʉ̌-lə́pû ńkâa no, mə́i a laghʼ lwoŋ Sê, tə mbaa Sê yi a nyǎŋ mə́u ńkâa.

²³Pêi pəndʉʉ-tə́poŋ, pei pəkeʼtə́-lə́pə́ʉ Mə̌usə̂i* tə mbaa pei pəfalísia*, pêi pəghaŋə məfutə́, pei ghâptə́ məntû nyêʼ méi mi kâa pə́i nkuʼ yé có zə̂u, yʉʼ ləghə̂m, ə́ ŋə̂ tâʼ yʉʼ mbó Sê, lə́ mbou ngwáʼá zə̂u lətəi-ndwuŋ yi pə́ jyêʼ lə̂ ləpə̌ʉ Sê, ə́ pə̂ kwaʼ məno mi ə́ pfûtə. Ə no ghíʼ ńdáʼ no lə́nə́ʉ, lətsǎa mə́jʉ̂ŋ, ə ndáʼ no ntághʼ ku mə́u, lə́ zěi lə́ pə̂ zə̂u yi ə́ tə́i mə́ ntúŋu ńgó pei ghʉ́. Zə̂ məzə̂u yi pei yǎa ngwǒ lə̂ ngʉ̂ tə́ wâghʼ məcó.

²⁴Pei pi pei pə̌ pəfwoghʼ-mə́nyôghʼ, mbou mə́ ngwô mbô pəcó pye, ə́ nyárə gháp laŋə́-ndə̂u, pei pi pei târ juʼlə́juʼ yi pei pə̌ nó, ə́ mbôghʼ lə̂ mî, lə́ mbǒu mə́ mî shwô.

²⁵Pêi pəndʉʉ-tə́poŋ, pei pəkeʼtə́-lə́pə́ʉ Mə̌usə̂i* tə mbaa pei pəfalísia*, pêi pəghaŋə məfutə́. Pei toghʼ mbəʉ ntə̂uʼ laghʼ ńnó məluʼ tə mbaa yi kâŋ, lə́ məzə̂u mi pei laghʼ tsǒŋ gháp pə píʼí ńgwo lə́ pə̂ cər wó.

²⁶Ŋuu falísia*, ô fwoghʼ-mə́nyôghʼ, o lə̌i tsə́mbi ntóghʼ cər ntə̂uʼ, tə ə́ léi, mə́i nzəm pěi wo páatə́ ə́ lêi yé lə́wó.

²⁷Pêi pəndʉʉ-tə́poŋ, pei pəkeʼtə́-lə́pə́ʉ Mə̌usə̂i* tə mbaa pei pəfalísia*, pêi pəghaŋə məfutə́, pei pə́ ghíʼ mətû-lə́shi mi pǒu, mi pə́ lǎghʼ fúfú mbwǒ ńzóʼ. Ə nzəm pěi pə̂ séi gháʼate, lə́ məkwěi pəpfû gháp pə məlʉ zə̂u lə́ pə̂ cər wó.

²⁸Ə́ kə́ ḿbə́ ndʉŋ-ndʉŋ ghíʼ pə́ nâŋ wêi zéi, ə́ jwó pei pə̂ mbi pye-mə́soŋ, ə́ mbə́ pye Sê gháʼate, lə́ ə́ mbə́ pəghaŋə məfutə́, məkwaŋtə tə́poŋ pə̂ ntə̂ʉ pei tə ndoghʼə́.

²⁹«Pêi pəndʉʉ-tə́poŋ, pei pəkeʼtə́-lə́pə́ʉ Mə̌usə̂i* tə mbaa pei pəfalísia*, pêi pəghaŋə məfutə́, pei pə̌ tsuŋu mbôu mətû-lə́shi lə́ məyʉʼ mi pə́ lə ntʉ́ŋ pətsətə́-nkəʉ Sê* wó, pei pə̌ nkwəi mətû-lə́shi pye pi gháp lə ghí kwʉ́tə́ mə́ ngwô ləpə̌ʉ* Sê shʉʼʉ.

³⁰Tə ə́ kuʼ pei lâʼ ngô: “Paghʼ lə pə́ ghíʼi mbə̂ zághʼ wó lə̂ mpfu yi pəmə́ngâa-njʉʼ pághʼ, mə́i káa paghʼ lə pə̂i wághʼ ńgó pə́ jwítə́ pətsətə́-nkəʉ Sê.”

³¹Pei laghʼ ḿbə̂i yə́rə́ ńgó pêi ghəpə́ pye pi gháp lə jwítə́ pətsətə́-nkəʉ Sê*.

³²Ə́ pə̂ yə́rə́, pei lághʼ faʼ pəmə́ngâa-njʉʼ péi, ə́ ndə́r lə̂ mbi lə.

³³Pêi ngər mənô, ə́ mbə́ pəshwî-nô, mboʼ pei ghʉ̂ gháʼá tə ndáʼ ntítə́ kə́u cər mǒghʼ tə́ láʼ ncwí?

³⁴Pei zúʼ, məŋ ntáa tə́u pətsətə́-nkəʉ Sê*, gháp pə pənjino, tə mbaa pəkeʼtə́-lə́pə́ʉ Mə̌usə̂i*. Pei jwítə́ pəcó, ə́ nkʉʉ pəcó lə̂ tʉ̌-mbʉ̂ŋtə, ə́ sə̂u pəcó lə́ məngwaa cər məndə̂ cûʼtə* méi, ə́ zǔŋ gháp lə̂ fú lə̂ mətúsoŋ ə́ ngwó nkə́u lə̂ məcó.

³⁵Ə́ pə̂ yə́rə́, məci pəpə̌uʼ pə́tsəm mi pə́ lə cwə̌r ndəu ndesé ə̂ nâa shíʼ ndəu pei. Lə̂ fú lə̂ məci Abêl yi a lə nkúʼtə́ ləpə̌ʉ* Sê, ə́ ngwó nkə́u lə́ mi Sakalyê, môu Mbarashî, yi pei lə jwí yé lə̂ saa yi ə́ pə́ lə̂ ləcǐ-móghʼ poʼ Sê yi ə́ pə́ kwaʼ cər yʉʼ yi Sê pə̌ wó.

³⁶Məŋ ndaʼ wéi, kwaʼ lə́nə́ʉ, pə́ táa paghʼə́ pwor məno mêi, ə́ ŋə́ lə́ pye pi pei pə̌ cər nzʉ̂ mpfu wo.»

³⁷Ə mpfu kûʼ Yěso lâʼ ngô: «Pye Yelúsalêm, pye Yelúsalêm, pei pi pei jwîtə pətsətə́-nkəʉ Sê*, ə́ ndaghʼ məghǒ ńtə̂mtə pye pi Sê tə̌u gháp lə́ pei, ə̂ mpfu sə́ʼə́ ghíʼ n ndǒu lə̂ nkə̂itə́ wéi, ghíʼ məngə̂p kəitə pôu pé lə̂ mbâp mé, pei kə̂ ndə̂ʼ ləʼə́?

³⁸Ə́ pə́ mpfu wo gháʼa yʉʼ yi pei lə kə́r lə̂ ngúʼtə́ Sê cər wó, ə Sê wo ké ə̂ tə́ʉ fe.

³⁹Ə̂ zə̂u yi ə́ ghʉ̌, n ngwo lǎʼ wéi ngô: Lə̂ fú mpfu wo, pei láʼ kə́ jwô wéi ghâa po, tə láʼ kə́u leʼé yi pei wo lǎʼ ngô: “Ə mbwórə Sê pə́ lə́ ŋuu yi a tô lə̂ ləjôghʼ yé.”»