Read Ngombale Matyê 25 Bible Online

Matyê 25 - Ngombale bible

Matyê 25

¹Yěso kə̂ ncí ndáʼ ngô: «Ə́ pə̂ yə́rə́, no Ləfou Sê* táa shwí no pôu ngwəngou ləghə̂m pi gháp lə khwǒr pəlâm páp, ə́ ndə̌r lə̂ ngwó mbəutə́ ŋuu mbiŋə yi a wo nzóʼ wó.

²Pi pə́taa pə̂ təcər páp káa ghwô gháp jîno, pi pə́taa ghwo jîno.

³Pi kâa lə ghwô gháp jîno lə ghí khwǒr pəlâm páp, káa ghwo gháp məwə̂r cər có zə̂u ndeʼe.

⁴Pi gháp lə ghwǒ jîno lə ghí nkhwǒr pəlâm páp, ə́ nkə́ ncí ncóghʼ məcó məwə̂r cər có zə̂u ndeʼe ngwô.

⁵Ŋuu yi a wo nzóʼ wó, kâa tóghʼ ntó yé, gháp nyâŋ tə ləlê ghôu gháp, gháp lêtə.

⁶Ntəʉ-twûʼ kûʼ, pə́ zûʼ ŋuu lâghʼ tə́koʼ njî ńdâʼ ngô: “Ŋuu yi a wo nzóʼ wó lə̂ wo a tô lə̂, pei kwâr ngwo ḿbə̂utə́ yé!”

⁷Ngwə-ngou pêi pə́tsəm jye, maa wǒwó kóʼo nkʉ lâm yé.

⁸Pi káa gháp lə ghwô gháp jîno lə̂, lâʼ lə́ pi ə́ ghwǒ jîno ngô: “Pághʼ pəlâm pə́ ncwí, pei ŋə́ wághʼ məyʉʼ lə̂ mêi məwə̂r.”

⁹Pi ə́ ghwǒ jîno pwor ngô: “Paghʼ wo ŋə́ po, paghʼ lə̌i ŋə́, mə́i mághʼ wo púŋ. Pei wó pə́ ndə̂ mətǎa ə́ nzə̂u méi.”

¹⁰Gháp lər lə̂ nzə̌u wó, ŋuu yi a wo nzóʼ wó cʉ̂ʼ ntó, gháp pə ngwə-ngou pi kâa có zə̂u lə pə́ mbûŋ yé gháp kə̂u ndə̂ lətsei lâa-ndə̂, pə́ tsághʼə ntsʉ ndə̂.

¹¹Pə́ nyâŋ tə nzúʼ ghíʼ pəcó ngwə-ngou pi gháp yǎa ndə̌r lə̂ nzə̂u məwə̂r lə̂ pûʼtə ntsʉ ndə̂, ə́ mə́ ndâʼ ngô: “Ə́ Nde, ə́ Nde, tsóʼ ntsʉ ndə̂ ə́ ŋə́ lə́ paghʼ.”

¹²Lə́ a lâʼ lə́ páp ngô: “N ndaʼ wéi kwaʼ lə́nə́ʉ ńgó káa m mə́ njî ghâa wéi.”

¹³Yěso ghi lyəghʼtə́, ə́ ndáʼ ngô: “Pei páa lə̂ ngwáʼá mbəʉ zéi, ńté no káa pei pə́ njî wéi leʼé, káa kə́ pə́ jî mpfu yi Môu Ŋuu* táa tó.”»

¹⁴«Ləfou Sê pə́ ghíʼ no ŋuu yi a lə pə́ ndə̂r lə̂ tə̂u, ə́ nfúŋ pəghaŋə-faʼ pé, ə́ nyér nkâp ye mbó páp,

¹⁵ə́ fə̂iʼ yi maa wǒwó pə́ lə̂ mbə̂u yi a lǎghʼ ḿbə́, ə́ nyér nkâp paghʼ nkʉ tâa mbó nduŋ-mbi, ə́ nyér nkâp paghʼ nkʉ pwô mbó mbâatə, ə́ nyér paghʼ nkʉ mbó mbâatə tárə́, ə́ ndər yé.

¹⁶Ngaŋə-faʼ yi pə́ lə nyér nkâp məpaghʼ nkʉ tâa lə́ zʉ́, cʉ̂ʼ ntóghʼ fátə́ ntâŋ ye, tə nzʉ́ có paghʼ nkʉ tâa.

¹⁷Ŋuu yi pə́ lə nyér ye paghʼ nkʉ pwô, nkə̂ ncí nzʉ́ yé məcó məpaghʼ nkʉ pwô.

¹⁸Lə́, ŋuu yi pə́ lə nyér məpaghʼ nkʉ lə́ zʉ́ lə̂, wô ntúŋ ghəm cər ndesé, ə́ ndoʼó nkâp tə́ ye cər wó.»

¹⁹«Tə́-faʼ wêi lə kə́u cí gháʼate, ə́ mbə̂ʉ nzəm, ə́ fúŋ gháp wêi pə́tárə́, ə́ ntúŋú ghíʼ gháp kə cʉ́ʼ ngʉ́ lə̂ nkâp.

²⁰Ŋuu yi a lə nyér nkâp məpaghʼ nkʉ tâa lə́ zʉ́ tô, ə́ nyárə́ yé məcó məpaghʼ nkʉ tâa, ə́ ndǎʼ ngô: “Ə́ Nde o lə nyêr nkâp məpaghʼ nkʉ tâa lə́ məŋ, n ngʉ mə́ tə məpaghʼ nkʉ tâa zâp mə́u.”

²¹Tə́-faʼ ye lâʼ lə́ zʉ́ ngô: “Ə́ poŋ, ô ngaŋə-faʼ yi shʉʼʉ, o kə ghʉ zə̂u yi məŋ kə pə́ nzʉ̂ʼtə mbó gho, ghíʼ o kə pápə́ mə́ceʼé zə̂u shʉʼʉ lə̂, məŋ ngwo nyér məzə̂u tə nzáa mbó gho. Tó poghʼo nâa ntsěi.”

²²Ŋuu yi a lə nyér nkâp məpaghʼ nkʉ pwô lə́ zʉ́ lə̂ tô yé, ə́ ndáʼ ngô: “Ə́ Nde, o lə nyêr nkâp lə́ məŋ məpaghʼ nkʉ pwô, jwô cǒ məpaghʼ nkʉ pwô yi ə́ zâp mə́u.”

²³Tə́-faʼ ye lâʼ lə́ zʉ́ ngô: “Ə́ poŋ, ô ngaŋə-faʼ yi shʉʼʉ, o kə ghʉ zə̂u yi n kə pə́ nzʉ̂ʼtə mbó gho, ghíʼ o kə pápə́ mə́ceʼé zə̂u shʉʼʉ lə̂, məŋ ngwo nyér məzə̂u tə nzáa mbó gho. Tó poghʼo nâa ntsěi.”

²⁴Lə́ ŋuu yi a lə nyér nkâp məpaghʼ nkʉ lə́ zʉ́ lə̂ tô yé, ə́ ndáʼ ngô: “Ə́ Nde, n nkə pə́ njî ńgó ô ŋuu ntə̂i gháʼate, ə́ nkâp zə̂u pə́ yʉʼ yi koo kə máʼ wó, ə́ mbwôʼ zə̂u yʉʼ yi koo kə pî wó.

²⁵N nkə pə́ mbôghʼ ghô, ə́ ngwó ndoʼó məpaghʼ nkâp mô cər ndesé, ə́ mwo! Nkâp zô yo.”

²⁶Ə́ pə̂ yə́rə́, tə́-faʼ ye pwôr lə́ zʉ́ ngô: “Ô ngaŋə-faʼ yi tə́poŋ, ə́ mbə́ ndǒŋ, o kə pə́ njî ńgó məŋ ndə̌i nkâp zə̂u yʉʼ yi kâa məŋ kə máʼ wó, ə́ mbwôʼ zə̂u pə́ yʉʼ yi kâa n nkə pî wó.

²⁷O kə pə́ njî yə́rə́, ə́ hó ghʉ, koo wó ŋə́ nkâp zâa mbó pətáŋ nkâp ghíʼ məŋ táa ghi tó pfú, ə pəi záp mə́u ńté hó?

²⁸Pei pfú nkâp zei məpaghʼ nkʉ mbó zʉ́, ə́ ŋə́ mbó ŋuu yi a ghwǒ məpaghʼ tóusʉ,

²⁹ńté no ŋuu lə̌i sáʼ təʉ tə ngwô zə̂u, mə́i pə́ wo kʉʼʉ́, a ghwô ə̂ záa, lə́ ŋuu kə́ ndə́iʼ sáʼ təʉ pó mə́i pə́ wo fú mbô zʉ́ pfú mbaa məyʉʼ yi a ghwǒ.

³⁰Ə́ ngwǒ lə́ ngaŋə-faʼ yi tə kə̌u no wə̂, pei mâʼ yé péi cər shî nzə̌m. Â nyáŋ wó mə́ ndâa, lóŋ ye pə́ nkóʼ.»

³¹«Môu Ŋuu* ghʉ̌ lěi tə tó cər ləghûʼ ye, tə gháp pə pəcwôʼ pé nâa mbə́, â nyáŋ lə̂ lwoŋ yé, ə́ mbə́ fou yi kâa cǒ lêi yé yé.

³²Məlâʼ mə́tsəm kə̂itə́ mbi zʉ́, â têtə pye, ə́ fǎghʼ gháp ghíʼ mbápə mbî faghʼ məndənzʉ* lə̂ mbî təʉ lə̂,

³³ə́ tághʼ məndənzʉ* lə̂ ndyə́ghʼə́ pô yé yi təʉ, ə́ tághʼ mbî təʉ lə̂ ndyə́ghʼə́ pô yé yi kwap.

³⁴Fou cʉ̂ʼ nkə́ ndáʼ lə́ pye pi gháp pə́ lə̂ ndyə́ghʼə́ pô yé yi təʉ ngô: “Pei pi tə́ ghâa kə ncóghʼ mə́ mbwórə lə́ pei, pei tó nkə́u cər ləfou yi Sê lə láʼ mə́ ntsúŋú, ə́ mə́ ndaghʼ ńzʉ̂ʼtə wéi tə fú lənuŋú ngoŋ.

³⁵Ə́ nté no, nji lə pə́ nzáŋə ghâa, pei ŋə̂ məzʉ̂ n nzʉ̂, ə ndě-nci pə̂ nzə̂u ghâa, pei ŋə̂ nci n nô, məŋ ndə pə́ ngəʉ pei pfû ghâa.

³⁶Kâa n ndə ghwô ndǐ pei ŋə̂ ndǐ, m mâʼ. N ndə pə́ ngôu, pei tô ńtsâʼ ghâa. N ndə pə́ ndə̂-tsâŋ, pei tô ńnáŋ ghâa.”

³⁷Pye pêi pi gháp lə ghʉ̌ zə̂u yi Sê pə̌ nkǒŋ zûʼ yə́rə́, ə́ ntúŋú ngô: “Ə́ Nde, nji lə záŋə́ ghô shʉ́ŋə́, tə paghʼ jwô ghô ə́ ŋə́ məzʉ̂ o zʉ̂? Ə ndě-nci pou nzə́u ghô pə́ shʉ́ŋə́, tə paghʼ jwô ghô ə́ ŋə́ nci, o nô?

³⁸O lə pə́ ngəʉ gháʼa shʉ́ŋə́, tə paghʼ pfû ghô? Koo lə ghwô ndǐ shʉ́ŋə́ tə paghʼ ŋə̂ ndǐ o mâʼ?

³⁹O lə pə́ ngôu shʉ́ŋə́, ə́ mbə́ ndə̂-tsâŋ shʉ́ŋə́ tə paghʼ tô ńnáŋtə́ ghô?”

⁴⁰Fou pwôr lə́ páp ngô: “Məŋ ndâʼ wéi, kwaʼ lə́nə́ʉ, mbaa zarə́ mpfu ló yi pei lə ghʉ mwo məno, lə́ warə́ mə́ceʼé ŋuu yi a pə̌ fə̌r ghâa, mə́i pei lə ghʉ gháʼá pə́ lə́ məŋ.”»

⁴¹«Ə́ cʉ́ʼ nkə́ ndáʼ lə́ pye gháp pə́ lə̂ ndyə́ghʼə́ pô yé yi kwap ngô: “Pêi pəghaŋə ndou, pei fú mbəʉ məŋ ndə́r tə ndǐ saghʼ, ə́ ngwo nkə́u cər mǒghʼ yi ə́ wo láʼ cwî yé po, ə́ yi pə́ lə tsuŋú ńté Sə́tə gháp pə pəcwôʼ pé!

⁴²Ńté no nji lə zaŋə́ ghâa, káa pei ŋə́ məzʉ̂ məŋ nzʉ́, ə ndě-nci pə̂ nzə̂u ghâa, káa pei ŋə́ nci n nó.

⁴³N ndə pə́ ngəʉ, káa pei pfû wéi ghâa. Kâa n ndə ghwô ghâa ndǐ, káa pei ŋə̂ wéi ndǐ məŋ m mâʼ. N ndə pə́ ngôu, ə́ mbə́ ndə̂-tsâŋ, káa pei nâŋ wéi ghâa.”

⁴⁴Gháp kə̂ mbwôr záp ngô: “Ə́ Nde, paghʼ lə jwó ghô shʉ́ŋə́, nji pə̂ nzáŋə ghô, ńjwó ghô shʉ́ŋə́, ə ndě-nci pə̂ nzə̂u ghô, ə́ jwó ghô shʉ́ŋə́, o pə̂ ngəʉ, ə́ jwó ghô shʉ́ŋə́ koo ghwô ndǐ, ə́ jwó ghô shʉ́ŋə́, o pə̂ ngôu, ə́ nzúʼ shʉ́ŋə́ ńgó o wə́ ndə̂-tsâŋ, káa paghʼ pfútə́ ghô?”

⁴⁵Fou pwôr lə́ páp ngô: “Məŋ ndâʼ wéi, kwaʼ lə́nə́ʉ, mbaa zarə́ mpfu ló yi káa pei lə ghʉ́ wéi mwo məno lə́ warə́ mə́ceʼé ŋuu yi â fə̌r ghâa, ə́ laghʼ ḿbə̂ ńgó káa pei lə ghʉ̂ wéi lə́ məŋ.”

⁴⁶Pwo pye cʉ̂ʼ nkə́ ndə́r lə̂ yʉʼ yi gháp wo láʼ cî wó, ə́ jwô pə̂ ngwôʼ tə me. Pye pi ə́ lə ghʉ̌ zə̂u yi Sê lə pə́ nkôŋ, gháp ghwô ləcǐ-mbî tə me.»