Read Ngombale Matyê 28 Bible Online

Matyê 28 - Ngombale bible

Matyê 28

¹Leʼé njî Pəyúda lei, ə́ pə̂ mbaʼa-mbaʼ lə̂ nduŋ-mbi leʼé lə̂ ngap lâʼ, Mǎyaa Mǎghʼdala gháp cǒ Mǎyaa wô lə̂ njwó ləshi,

²ə́ nkə́ ngí pə́ kə̂u yʉʼ wó, ə́ nzúʼ ndesé pə̂ ncʉʼʉ́ gháʼate. cwôʼ Sê* fû tʉ̌-lə́pû shíʼ, ə́ ntó ńtyétə́ ləghǒ yi pə́ kə lǎghʼ ńtsághʼə́ ntsʉ ləshi, ə́ nkóʼ ńnyáŋ lə̂ ləghǒ zêi.

³Ə sʉ̂ cwôʼ Sê wei lə ŋwáŋə pə́ ghíʼ nyǐ mbʉŋ lə̂, məndǐ mé pou mə́ fóghʼ tə ŋwâŋtə́.

⁴Pəpáp ləshi jwô yə́rə́, ə́ ngwə̌r, ə́ mbóghʼ tə ncʉ́ʼ nyáŋtə́ pə́ ghíʼ məpfû-zə̂u.

⁵Lə́ cwôʼ Sê* lâʼ lə́ pəngyě ngô: «Koo pei pôghʼ, məŋ njǐ ńgó pei tô ndǒu Yěso yi pə́ kə kʉ̌ʉ yé lə̂ tʉ̌-mbʉ̂ŋtə lə̂.

⁶Káa a pyér yé yaʼa gháʼá, a zʉʉ mə́ lə̂ ləwʉ̂ ghíʼ a lə lǎʼ lə̂. Pei tó ńnáŋ yʉʼ yi pfû yé lə nǔŋ wó, ə́ njwó.

⁷Pei tóghʼ ńgwó ńdǎʼ ngaŋə-jyêʼ-no* yé ńgó a zʉʉ mə́ lə̂ ləwʉ̂, ńgó a wo pyə̌ghʼ Galilêi pə́ zʉ̂ʼtə wéi pə pǎp, pei wo kə́u wó poŋə́ jwó yé. Yo ə́ no yi məŋ ntə̌i ngwǒ lə̂ ndáʼ wéi.»

⁸Pəngyě pêi tôghʼ fú ngʉŋ ləshi ńdə́r lə̂ ngwó ńtsətə́ yo no mbó ngaŋə-jyêʼ-no* Yěso. Ləpôghʼ pyêr ḿbə́ pə́ lə́ páp, lə́ gháp pə̂ ntsêi tsěi,

⁹ə́ nkə́u lə̂ ŋə̂i, ə́ nkwár lə́ Yěso. A lâʼ lə́ páp ngô: «N tsêʼtə wéi!» Gháp cʉ́ŋə mbáatə́ yé, ə́ ngwǒ məku mé, ə́ ŋə́ məkuʼ mé.

¹⁰Yěso cʉ̂ʼ nkə́ ndáʼ lə́ páp ngô: «Koo pei pôghʼ. Pei wó ntsətə́ mbó pəfə̌r pâa, ńgó gháp lə́r lə̂ Galilêi, ńgó gháp wo jwó ghâa pə́ wó.»

¹¹Pəngyě pə̂ tsə̂ʉ laŋə́ mə́ ndə́r, pəcó pəlwóʼó-ntso pi gháp lə pə́ mbâp ləshi wô túsoŋ, ə́ fú mbyétə́ zə̂u tsəm yi lěi, ə́ ndǎʼ pətə́-ndə̂ pənuŋú-poʼ Sê*.

¹²Pətə́-ndə̂ pənuŋú-poʼ*, fûŋ pəkə̌m lâʼ, gháp pə pǎp kəitə ńnyáŋ sê, ə́ nkwaŋə́ tû záp, ə́ ŋə́ mbwoʼ nkâp mbó pəlwóʼó-ntso,

¹³ə́ ndáʼ lə́ páp ngô: «Pei pə́ ndâʼ pə́ ńgó pei yǎa mə́ ndé lətwûʼ, ngaŋə-jyêʼ-no* Yěso tô ńjú pfû yé ńdǎghʼ ndə́r.

¹⁴Ngə́mnaa lə̌i nkə́ nzúʼ, mə́i paghʼ wo jí no yi paghʼ wo lǎʼ yé, ə́ mbóghʼ no a wo ŋə́ wéi ngwôʼ.»

¹⁵Pəlwóʼó-ntso pfû nkâp, ə́ ngʉ̌ ghíʼ pə́ tsətə́ lə́ páp. Ə̂ zə̂u yi ə́ ghʉ̌ yo no poŋə́ sǎr yʉʼ tsəm. Pəyúda jî záp pə́ zêi no tə nkə́u leʼé wo.

¹⁶Ngaŋə-jyêʼ-no Yěso* ntsap môʼ lə̂ ləghə̂m lə zûʼ no yi Pəngyě pə́ lǎʼ, ə́ ndə́r lə́ Galilêi, ə́ nkóʼ ndəu ləkôr yi gháp pə Yěso lə ghʉ̌ ndaʼá lə̂ ntáa mbə̂utə́ wó.

¹⁷Gháp lei tə njwó Yěso, ə́ ngúʼtə́ yé, lə́ pəcó pye təcər páp, pə̂ mʉ̂ŋtə mʉŋtə́.

¹⁸Yěso tô mbəʉ páp, ə́ ndáʼ lə́ páp ngô: «Ə Sê lə ŋə̂ mətəʉ mə́tsəm lə́ məŋ lə̂ ndághʼ ńsáʼ məzə̂u mi ə́ pə́ tʉ̌-lə́pû tə mbaa mi ə́ pə́ ndəu ndesé.»

¹⁹Ə́ pə̂ yə́rə́, pei wó ndǎghʼ pye pə́tsəm ndəu nzʉ̂, ə́ ngʉ́ ngaŋə-jyêʼ-no* zâa, ə́ ŋə́ gháp nci lə̂ ləjôghʼ Tə́, lə́ yi Môu, lə́ yi Zəghʼə Ndêi-lěi,

²⁰ə́ njyéʼ gháp lə̂ ntághʼ ku lə̂ məno mə́tsəm mi n ndə lǎʼ ńgó pei pə́ ngʉ́. Pei jí ńgó paghʼə lə̂ wo láʼ kə́ pə́ tə nzʉ̂ láʼ mê.