Read Ngombale Matyê 3 Bible Online

Matyê 3 - Ngombale bible

Matyê 3

¹Ə́ nyêʼ ncí, Jâŋ Mbaptísʉ kwâr koŋə-məkwaʼá Yudêi, ə́ mə́ tsə́tə ngô:

²«Pei kə́p cǐ zéi, ńté no mpfu yi Sê wo nyarə́ ləfou yé cʉŋə mə́ tə mbáatə́.»

³Jâŋ lâghʼ ḿbə̂ ŋuu yi Esǎya ntsətə-nkəʉ Sê* lə lǎʼ no ńté yé ngô: «Nji ŋuu kǒʼ, ə́ fú koŋə-məkwaʼá, ə́ mə́ ndáʼ ngô: Pei tsúŋtə́ laŋə́-ndə̂u Nde, ə́ ngʉ́ pəshwáŋə-láŋə́ pé tə́ʉ ndʉŋ-ndʉŋ!»

⁴Jâŋ lə pə́ koŋə-məkwaʼá, ə́ mǎʼ ndǐ, ə pə̂ yi pə́ lǎghʼ mənyuŋ kamêl ḿbáʼ; ə têi yi ə́ lə pə́ luʼú zʉ́ pə̂ ngəp mə́nye*; məzʉ̂ mé pə̂ ngʉ̌ʉ gháp ŋwâʼ tyer.

⁵Ə pye pə̂ fû túsoŋ Yelúsalêm mbaa cər Yudêi ntsəm, ə́ fû cər paghʼə-ngoŋ yi ə́ pə́ nkaŋ nci Yuudêŋ ńtó ńjwô Jâŋ,

⁶ə́ ntə́ʉ mbi lâʼ, ə́ mbə̂i məno tə́poŋ máp, Jâŋ ŋə̂ gháp nci cər nci Yuudêŋ.

⁷Jâŋ jwô ghíʼ pye lə̂ nou pəfalísia* gháp pə pye lə̂ nou Pəsadúsia* tô záp tə nzáa lə̂ mpfú nci, ə́ ndǎʼ lə́ páp ngô: «Ngər mənô, wǒ kə jyéʼ wéi lə̂ nkhʉ̂ ngwôʼ yi Sê pə̌ ngwo ntághʼ wó tû pei.

⁸Pei ghʉ́ pə̂ məno shʉʼʉ mi ə́ wo nyarə́ ńgó pei kə́p mə́ cǐ zéi.

⁹Pei páa lə̂ ndághʼ pə̂ ndaʼ ntsʉ wéi ńdáʼ ngô: “Pâghʼ ngər Ábələhâm.” Pei cʉ́ʼ n ndâʼ wéi, Sê kuʼ lə̂ shə́rə́ məghǒ mwo ńdághʼ ńgʉ̌ ngər Ábələhâm.

¹⁰Pə́ tə́i mə́ ndáʼ nkhwór nzaa lə̂ ndághʼ ńkhwóʼ zarə́ zarə́ tʉ̌ yi kâa pə́ nzə̂m yé məntǎa shʉʼʉ; pə́ wo fú sê nkhwóʼ zěi, ə́ mǎʼ mǒghʼ.

¹¹N ndaghʼ zâa pə̂ nci fefe ŋə̂ wéi nci lə̂ ndághʼ nyarə́ ńgó pei kə́p mə́ cǐ zéi; lə́ cǒ ŋuu pə́ nzəm məŋ mə́ ntó, ə́ tə̌i ńdéi ghâa tə kâa m mbə́i nkuʼ ghâa pə́ lə̂ nkéʼ mənkʉ məlaŋə́ mé. A táa laghʼ yé pə̂ Zəghʼə Ndêi-lěi gháp mǒghʼ ńŋə́ wéi nci.

¹²A wo tó, ə́ tétə́ məzə̂u mi pə́ lǒghʼ nkâʼ. Ə́ cóghʼ mi shʉʼʉ cər nkəi. Ə́ cʉ̌ʼ mətyʉŋə, a cwə̂r cər mǒghʼ yi tə́ láʼ ncwí*.»

¹³Yěso cʉ̂ʼ nkə́ fú Galilêi ńtó lətsǒ nci Yuudêŋ, ə́ ncə́r Jâŋ, â ŋə́ yé nci.

¹⁴Jâŋ pə̂ ndə̂ʼ, ə́ mə́ ndâʼ lə́ zʉ́ ngô: «Gho lə̂ ghwǒ lə̂ ŋə́ ghâa nci, o pou ntó ńgó məŋ lə̂ ŋə́ ghô nci áa?»

¹⁵Lə́ Yěso pwôr lə́ zʉ́ ngô: «Pə́i ńgó ə̂ pə̂ yə́rə́ mpfu wo, ńté no poghʼo lə̌i ngʉ́ yə́rə́, ə́ laghʼ ḿbə́ zə̂u yi Sê pə̌ ntúŋú.» Jâŋ cʉ̂ʼ nkə́ mbə́i,

¹⁶ə́ ŋə́ yé nci. Yěso lêi tə nkwár, ntsʉ tʉ̌-lə́pû tsóʼo ńtə́ʉ. A jwô Zəghʼə Sê fû tʉ́, ə́ shíʼ ə́ mbə́ ghíʼ puŋu lə̂, ə́ ntó ńnyáŋ lə́ zʉ́.

¹⁷Cǒ nji fû tʉ̌-lə́pû ə́ ndǎʼ ngô: «Yo Môu ghâa, n nkoŋ yé gháʼate, â ghâa lətsei.»