Read Ngombale Máakúsʉ 1 Bible Online

Máakúsʉ 1 - Ngombale bible

Máakúsʉ 1

¹Ləjitə́ Nkəʉ Shʉʼʉ Yěso Kəlísto yi a pə̌ Môu Sê.

²Ə́ pə́ cər ŋwaʼa Esǎya ntsətə-nkəʉ-Sê*, Sê lâ ngô: «Jwô n ngwo tə́u ngaŋə-ntə̂u ghâa mbi gho, a pə́ ntsúŋu laŋə́-ndə̂u zô.»

³A wo kóʼó njî ye koŋə-məkwaʼá, ə́ lǎʼ ngô: «Pei tsuŋú laŋə́-ndə̂u Nde, ə́ ngʉ̌ pəshwáŋə-láŋə́ pə́ tə́ʉ ndʉŋ-ndʉŋ[1]!»

⁴Jâŋ lə kwâr koŋə-məkwaʼá, ə́ mə́ ndâʼ lə̂ lâʼ ńgó gháp kə́p cǐ záp, ə́ mpfú nci, Sê lyəghʼə́ məfaa ghap.

⁵Pye Yudêi pə́tsəm ə́ ngʉ̌ pye Yelúsalêm pə́tsəm tô ńcə́r Jâŋ, ə́ mbə́i məfaa ghap mbi lâʼ, a tə̂ʉ cər nci Yuudêŋ, ə́ ŋə́ gháp nci.

⁶Jâŋ lə mâʼ ndǐ, ə pə̂ yi pə́ lə lǎghʼ mənyuŋ cǒ nye yi pə́ fûŋ ńgó shamô ḿbáʼ, ə́ têi yi a wǎa luʼú zʉ́ pə̂ yi pə́ lǎghʼ ngəp mə́nye ńtsúŋú. Məzʉ̂ mé lə pə́ pəkə́zaʼ ə́ mbóu ngʉ̌ ŋwâʼ tyer.

⁷A lə pə́ ndâʼ lə̂ lâʼ ngô: «Cǒ ŋuu pə́ nzəm məŋ mə́ ntó, ə́ ntə̌i ńdêi ghâa tə káa m mbə́i nkuʼ ghâa pə́ lə̂ mbə́i ŋwuŋú sê ńkéʼ mənkʉ məlaŋə́ mé.

⁸Məŋ ŋə̂ zâa wéi pə̂ nci, lə́ ngwǒ lə́ zʉ́, mə́i a wo ŋə́ wéi Zəghʼə Ndêi-lěi.»

⁹Yěso fû túsoŋ Nǎzalêi yi ə́ pə́ cər paghʼə-ngoŋ Galilêi ńtó ńcə́r Jâŋ, a tə̂ʉ cər nci Yuudêŋ, ə́ ŋə́ yé nci.

¹⁰Yěso pə̂ fû nci ńkwár, ə́ njwó tʉ̌-lə́pû lêi-lěi ŋéʼé ńtə́ʉ, Zəghʼə Ndêi-lěi shîʼ, ə́ mbə́ ghíʼ pə́ptə́ lə̂, ə́ ntó ńtə́ʉ ndəu zʉ́.

¹¹Cǒ njî fû tʉ̌-lə́pû ndǎʼ ngô: «Ô môu ghâa yi n nkǒŋ yé gháʼate, ə́ mbou ncóghʼ ntə̂ʉ ghâa tsəm lə́ gho.»

¹²Ə Zəghʼə Ndêi-lěi zêi kə̂ ntóghʼ ncʉ́ŋə́ Yěso ńŋə́ koŋə-məkwaʼá.

¹³A cí wó leʼé mə̂mkwo, Sə́tə pə̂ nkwâʼtə yé. Gháp pə pəmə́nye ləghěi pə̂ ncí, pəcwôʼ Sê* pou mə́ fâʼ mbó zʉ́.

¹⁴Pə́ lə ghou Jâŋ ə́ ncóghʼ yé tsâŋ, Yěso lə̂r lə̂ Galilêi; ə́ mə́ ntsə̂tə Nkəʉ Shʉʼʉ yi fû mbó Sê ndâʼ ngô:

¹⁵«Mpfu kuʼ mə́, ləfou Sê pou ncʉ́ŋə́ tə mbáatə́! Pei kə́p cǐ zéi, ə́ mbə́i Nkəʉ Shʉʼʉ.»

¹⁶Yěso pə̂ ndêi nkaŋ mə̂i-nci Galilêi, ə́ njwó pəcó pəmǎʼ-shû pə́pwô, Síməu gháp fə̌r ye Ndeléya. Gháp pə̂ mâʼ lənkʉ záp nci lə̂ ndághʼ ńgǒu shû.

¹⁷Yěso lâʼ lə́ páp ngô: «Pei tsə́ʉ nzəm məŋ, n ngwo ghʉ̌ pei cʉ́ʼ ngôu pə́ pye-mə́soŋ.»

¹⁸Gháp zûʼ yə́rə́, ə́ ncʉ́ʼ nkə́ ndêi-lěi nyér mənkʉ máp, ə́ ntsə́ʉ nzəm zʉ́.

¹⁹Yěso fû yʉʼ wó, ə́ ncʉ́ŋə́ ńkə́u mbi, ə́ njwó ghəpə́ Zebede pwô, Jâghʼ gháp fə̌r ye Jâŋ, gháp pə̂ cər kənyúʼ mə́ ntsúŋu mənkʉ máp.

²⁰Yěso lêi-lěi fúŋ gháp, gháp nyêr tə́ ghap Zebede gháp pə pəghaŋə-faʼ cər kənyúʼ, ə́ ntsə́ʉ nzəm zʉ́.

²¹Gháp pə pǎp lər tə nkə́u túsoŋ Kapérnawûm. Ə́ pə̂ leʼé nji pəyúda*, Yěso kə̂u ndə̂ cûʼtə pəyúda*, ə́ mə́ njyêʼ pye no Sê.

²²Ye mbə̂u lə̂ ndághʼ ńjyéʼ pye no Sê fû nkəʼə́ lâʼ gháʼate, ńté no káa a lə pə́ njyêʼ yé lə̂ mbə̂u yi pəkeʼtə́-lə́pə́ʉ Mə̌usə̂i*, a lə ghí pə́ jyéʼ, ə́ ngwǒ mətəʉ mi ə́ fú mbó Sê.

²³Ə́ lə ghí pə́, cǒ ŋuu pə̂ yé ndə̂ cûʼtə* wêi, mə́i có zəghʼə tə́poŋ* lə mə́ kə́u lə́ zʉ́, a nyâŋ tə ngwóghʼə, ə́ ncwǒr ngwuŋ ndâʼ ngô:

²⁴«O pfû hó mbó Paghʼ Yěso ŋuu Nǎzalêi? O tə̌i ntô gháʼá pə́ mbə́ghʼ paghʼ mo? M mə̌ njî ghô. Ô Ndêi-lěi yi Sê tə̌u yé.»

²⁵Yěso sâʼ zəghʼə tə́poŋ* zêi ə́ ndǎʼ lə́ zʉ́ ngô: «Nǎʼ ntsʉ ghô, ə́ fú lə́ ŋuu wə̂ nkwǎr!»

²⁶Ə zəghʼə tə́poŋ* zêi cʉ̂ʼ ŋuu wêi lə̂ mətəʉ, tə ngí fú lə́ zʉ́ kwǎr, ə́ mə́ ncwôr ngwuŋ lə̂ təʉ.

²⁷Ə́ fû nkəʼə́ pye, gháp lyâr, ə́ ntúŋú təcər páp ngô: «Yo hó? A jyêʼ pə́ lə̂ mbə̂u yi pə́ laa kə́ jwó. A fǔ tə̌i tə ndâʼ no məzəghʼə tə́poŋ* zûʼ ntsʉ yé.»

²⁸Ə́ lei yə́rə́, ləjôghʼ Yěso sar yʉʼ tsəm cər paghʼə-ngoŋ Galilêi.

²⁹Yěso gháp pə Jâghʼ ngʉ̌ Jâŋ ə́ nkʉ́ʼʉ́ Síməu gháp pə Ndeléya fû ndə̂ cûʼtə pəyúda* nkwár, ə́ ndə́r lə̂ nzeʼ Síməu gháp Ndeléya.

³⁰Ə́ ghi pə́, mə́kʉʼ Síməu nûŋ kə̌u, nə̂r pə́ lə́ zʉ́. Yěso kə̂u ndə̂ Síməu gháp Ndeléya, pə́ kə̂ ntóghʼ ndáʼ yé no ghou zêi.

³¹A cʉ́ŋə mbáatə́ ngou ndəu kə̌u, ə́ ngwǒ pô yé, ə́ ngʉ̌ a lêsê. Nə̂r mê, ngou wêi lî gháp.

³²Ə́ pou mbə́ mpfu-ngwʉ̂, pə́ khwor pəghou pə́tsəm, tə mbaa pye pi məzəghʼə tə́poŋ* lə pə́ mbə̂u gháp, ə́ ndaghʼ ńtó ńcə́r Yěso.

³³Pye túsoŋ pêi pə́tsəm kəitə ntsʉ ndə̂.

³⁴Yěso ghʉ pəghou mbə̂u lə̂ mbə̂u shwítə, ə́ fú lə́ pye nzúŋ məzəghʼə tə́poŋ* tə ə́ zâa zǎa. Lə́ káa pə̂i yé tə có zəghʼə tə́poŋ* zêi lâʼ no, ńté no gháp lə pə́ njî yé.

³⁵Ə́ lə pə́ məfoghʼə́ nzʉ̂, Yěso fû ndə̂ nkwǎr, ə́ ndə́r lə̂ có yʉʼ yi káa ŋuu pə̂ yé wó, ə́ njǐ lə̂ sʉ́ʉtə́ Sê.

³⁶Síməu gháp pə pfuʼ pye cʉ̂ʼ nzəm, ə́ mə́ ndôu yé,

³⁷ə́ ndéi tə njwó yé, ə́ ndǎʼ lə́ zʉ́ ngô: «ŋuu ntsəm pə̌ ndou ghô.»

³⁸Yěso pwôr lə́ páp ngô: «Paghʼə wó lə̂ məcó məyʉʼ mi ndeʼe, ə́ cər məlâʼ mi ə́ páatə́ yáʼa, n nkə́ ndeʼtə́ Nkəʉ Shʉʼʉ yʉʼ wó lə́wó, ńté no ə̂ nkwar-ndə̂ ghâa.»

³⁹A lâʼ yə́rə́, ə́ ŋáa ŋə́i cər paghʼə-ngoŋ Galilêi tsəm, ə́ nkə̂u məndə̂ cûʼtə pəyúda*, ə́ ndêʼtə Nkəʉ Shʉʼʉ, ə́ mbou nzûŋ məzəghʼə tə́poŋ* lə́ pye.

⁴⁰Cǒ ngaŋə-tsóʼ-páp tô ńkʉ́ʼtə́ mbi Yěso, ə́ sʉ́ʉtə́ yé ə́ ndáʼ lə́ zʉ́ ngô: «O lə̌i nkôŋ, mə́i o kuʼ lə̂ ngʉ́ n nshwítə.»

⁴¹Məjʉ̂ŋ mé kô Yěso, a zápə pô yé ndəu zʉ́, ə́ ndǎʼ ngô: «Məŋ nkoŋ yə́rə́, shwítə.»

⁴²Nkaʼ lêi-lěi mé lə́ zʉ́, a shwîtə.

⁴³Yěso ghi lǎʼ lə́ zʉ́ ńgó a lə̂r yé, ə́ nkweitə́ tû yé,

⁴⁴ə́ ndǎʼ lə́ zʉ́ ngô: «Páa lə̂ ndáʼ ŋuu có no. Tu ńgwó nyarə́ mbəʉ zô mbó nuŋu-poʼ Sê, ə́ mbóu ŋə́ məzə̂u poʼ Sê mi ləpə̌ʉ Mə̌usə̂i* pə́ ntúŋú; lə̂ ndághʼ ńnyarə́ ńgó o shwîtə.»

⁴⁵Ŋuu wêi lə̂r, lə́ ə́ ŋə̌i ndâghʼ no zêi ńsâr yʉʼ tsəm, tə ə́ pə̂ yi mboʼ Yěso kə̂ mbóu sâa yé sáa nkə́u cər có túsoŋ po, ə́ ncʉ́ʼ sótə́ ńtə̂ʉ pə́ məlî lâʼ lə̂ məyʉʼ mi káa pye pə́ ncî gháp wó. Pye cʉ̂ʼ mə́ fû maa yʉʼ tsəm, ə́ ntó ńcə̂r yé.