Read Ngombale Máakúsʉ 11 Bible Online

Máakúsʉ 11 - Ngombale bible

Máakúsʉ 11

¹Yěso gháp pə ngaŋə-jyêʼ-no* yé lə pə́ ndə̂r lə́ Yelúsalêm, ə́ ŋə̌i tə mə́ mbâatə Mbedfajê gháp Mbetanî, ə́ nkə́u ləkôr mətʉ̌ məwə̂r olîvə. A tə̂u ngaŋə-jyêʼ-no* yé pi pə́pwô ə́ ndǎʼ lə́ páp ngô:

²«Pei wó cər lâʼ yi ə́ pə́ mbi pei lə̂. Pei wo lěi tə kə́u wó, ə́ jwó môu naʼá yi pə́ yǎa nkǎp, a pə́ yi ŋuu laa kə́ nyâŋ yé ndəu zʉ́. Pei kéʼ yé ndaghʼ ntó ńŋə́ lə́ məŋ.

³Pei lə̌i mə́ nkêʼ yé, ŋuu túŋú wéi ńgó pei kêʼ yé ndaghʼ ńgwô ghó? Pei lâʼ lə́ zʉ́ ngô: Nde pə̌ nkoŋ wěi. Pei wo lǎʼ yé yə́rə́, a lâʼ ńgó pei lâghʼ yé ndə̌r.»

⁴Gháp lər ńkə́u wó, ə́ njwó môu naʼá yi pə́ nkǎp yé nkaŋ laŋə́ ə́ ntsʉ mbuʼ, ə́ nkéʼ yé.

⁵Pəcó pye pi gháp yǎa mbə́ yʉʼ wó túŋu gháp ngô: «Zə̂ hó? Pei kêʼ naʼá wə̂ ńté hó?»

⁶Gháp pwor ghíʼ Yěso yǎa ndǎʼ, pəghaŋ nyêr yé; gháp laghʼ yé ńdə́r.

⁷Gháp laghʼ môu naʼá wêi ńtó ńcə́r Yěso, ə́ nzápə́ məndǐ fwôghʼ máp ndəu zʉ́, Yěso kôʼ ńnyáŋ lə́ wěi;

⁸ə́ mə́ ńdághʼ ŋə̌i, pye tə nzáa laghʼ məndǐ fwôghʼ máp ńzə́tə́ laŋə́. Pəcó pye laghʼ záp pə̂ mbô tʉ̌ shwî mi gháp faghʼtə́ cər mənkâʼ ə́ nkwə̌i laŋə́.

⁹Pye pi gháp lə pə́ mbi zʉ́ gháp pə pi ə́ lə pə́ nzəm zʉ́ cʉ̂ʼ mə́ ŋə́i nzap ngô: Ghûʼtə pə́ mbó Sê, mbwórə pə́ lə́ ŋuu yi a tô lə̂ ləjôghʼ Nde.

¹⁰Ə́ Sê cóghʼ mbwórə lə́ ləfou yi ə́ pə́ ntó, ə́ ləfou yi ə́ pə́ ghíʼ yi Tə́ waghʼə fou Ndavîd. Ghûʼtə pə́ mbó Sê tʉ̌-lə́pû.

¹¹Yěso kə̂u Yelúsalêm, ə́ ndə̌r lə̂ ndə̂ Sê*. Ə́ ntsuŋu njwó zə̂u tsəm yi ə́ lə pə́ ndêitə́ tə ə́ kuʼ, gháp pə ngaŋə-jyêʼ-no* yé ntsap pwô lə̂ ləghə̂m pəʉ lə́ Mbetanî, ńté no ə́ lə ghí pə́, mə́i zâʼ nzʉ̂ lei mə́.

¹²Nzʉ̂ fôghʼ, gháp pə̂ fû Mbetanî mbə̂ʉ lə̂ Yelúsalêm, ə nji záŋə Yěso.

¹³A tə̂ʉ ndǐ təsə máʼ nyôghʼ mé, ə́ njwó cǒ mbə̂u tʉ̌ yi pə́ fûŋ ńgó figyê, məfu mêi pə̂ shwítə́, a ghi lə̌r lə́ ləcʉŋə́ wó, ə́ mə́ nkwâŋ yé ńgó a kə́u jwó məntǎa mə́u tə zʉ́, ə́ nkə́u yʉʼ wó ńjwó pə̂ ndaʼ məfu měi. Ńté no káa ə̂ lə pə̂ yé mpfu mbə̂u tʉ̌ zêi zə̂m.

¹⁴A cʉ̂ʼ ndáʼ lə̂ tʉ̌ zêi ngô: «Ŋuu láʼ nkə́ pǒu zʉ̂ yé məntǎa mô po; ə́ ndǎʼ yə́rə́, ngaŋə-jyêʼ-no* yé zûʼ.»

¹⁵Gháp lər tə nkə́u Yelúsalêm, Yěso kə̂u ndə̂ Sê*, ə́ njǐ lə̂ saŋ pye pi gháp pə́ wó ə́ mə́ fə̂i zə̂u gháp pə pəzə̌u-zə̂u, ə́ ncǐ məkə̌u mətǎa pəkə́pə́ nkâp ḿmáʼtə́ sê, ə́ ntsóʼtə́ məlwoŋ pəfə̌i pəpə́ptə́,

¹⁶káa pə̂i yé tə ŋuu khwór có zə̂u ndaghʼ ńzáʼá ńdêi.

¹⁷Ə́ ncʉ́ʼ njí lə̂ njyéʼ gháp ngô: «Ə́ pə́ cər ŋwaʼa Sê ə́ mbə́ ngô: “Ndə̂ zâa láʼ cí pə̂ pə́ ndə̂ sʉ̂ʉtə mbó ngoŋ tsəm.” Lə́ pei, pei cʉ̌ʼ ndaghʼ ńgʉ́ ləpəutə́ pətsǒŋ.»

¹⁸Pətə́-ndə̂ pənuŋú-poʼ Sê gháp pə pəkeʼtə́-lə́pə́ʉ Mə̌usə̂i* zûʼ, ə́ njǐ lə̂ ndôu məsʉ̂ lə̂ ndághʼ ńjwí yé. Gháp lə yaa mə́ mbôghʼ yé ńté ńgó lâʼ lə pə́ fə́tə no yi a lə jyêʼ gháp zěi.

¹⁹Ə́ pə̂ mpfu-ngwʉ̂, Yěso gháp pə ngaŋə-jyêʼ-no* yé fû túsoŋ nkwár.

²⁰Gháp mə̂ʉ mbaʼa-mbaʼ mə́ ndêi, ə́ njwó mə́i tʉ̌ figyê zə̂ zə̂u mə́ tə nkə́u lə̂ məŋaŋə.

²¹Pyêh kʉ̂ʉtə no yi ə́ kə lěi, ə́ ndǎʼ lə́ Yěso ngô: «Cícye, jwó ghíʼ tʉ̌ zə̂ yi o lə tə́m kwâʼ yé lə́ nǎa nzə́u tə ncʉ́ʼ mbə́.»

²²Yěso cʉ̂ʼ ndáʼ lə́ páp ngô: «Məŋ ndâʼ wéi ə̂ no lə́nə́ʉ, pei cóghʼ ntə̂ʉ wéi lə̂ Sê.»

²³Məŋ ndaʼ wéi kwaʼ lə́nə́ʉ, ŋuu lə̌i ndáʼ lə̂ ləkôr yo ngô: «Tsóʼó yʉʼ wə̂, ə́ ngwo ntsə́ʉ cər mə̂i-nci.» Ə́ ndǎʼ tə́ mʉ̂ŋtə, ə́ ngwǒ pə̂i-ntə̂ʉ ńgó zə̂u yi a túŋu wo pə́ yə́rə́, mə́i ə́ wo pə́ yə́rə́.

²⁴Ə̂ zə̂u yi ə́ ghʉ̌, m mə̂ ndâʼ wéi ngô: «Pei lə̌i mə́ ndâghʼ sʉ̂ʉtə ńdôu zə̂u mbó Sê, ə́ fú ngwó cər ntə̂ʉ péi ńgó pei ghwo mə́ zêi zə̂u, mə́i a wo ŋə́ zěi lə́ pei.»

²⁵O lə̌i mə́ ngwô ngʉ sʉ̂ʉtə, ə́ pə́ yi o pə̌ nzáŋə́ lóŋ ńté ŋuu, o lyə́ghʼə ńŋə́ lə́ ngaŋ. Ə̂ lei yə́rə́, Tə́ wei yi a pə́ tʉ̌-lə́pû poŋə́ lyəghʼə́ wei məfaa ńŋə́ lə́ pei. [

²⁶Pei lə̌i ndə́iʼ lyəghʼə́ məfaa pəcó pye po, mə́i Tə́ wei yi a pə́ tʉ̌-lə́pû kə́ lyəghʼə yé wei məfaa po.]

²⁷Yěso gháp pə ngaŋə-jyêʼ-no* yé kə̂ ncí ndə́r tə nkə́u Yelúsalêm, a kə̂u ndə̂ Sê*. Ə́ mə́ ŋáa ŋə̂itə́, pətə́-ndə̂ pənuŋú-poʼ-Sê gháp pə pəkeʼtə́-lə́pə́ʉ Mə̌usə̂i* tə mbaa pəkə̌m lâʼ tó ncə́r yé,

²⁸ə́ ntúŋú yé ngô: «O laghʼ mətəʉ wǒ ngʉ̂ mwo məno? Wǒ ŋə̌ ghô mətəʉ lə̂ ngʉ̌ měi?»

²⁹Yěso pwôr lə́ páp ngô: «Məŋ zâa lə́wó, m mbǎa ntúŋú wéi tâʼ no, pei lə̌i mbwôr, mə́i n ngwo lǎʼ wéi ŋuu yi a ŋə̌ ghâa mətəʉ lə̂ ngʉ́ zə̂u pei.

³⁰Wǒ lə ghíʼi ntə́u Jâŋ lə̂ ŋə́ pye nci, ə Sê kəʉ pye-mə́soŋ? Pei láʼ ghâa.»

³¹Gháp zûʼ, ə́ nkwaŋə́ tû záp təcər páp ngô: «Paghʼə lə̌i ndáʼ ngô: “Ə Sê lə tə́u yé”, mə́i a wo túŋú wághʼə ngô: “Tə ńté hó káa paghʼə lə pə́i no Jâŋ?”

³²Lə́ tə mboʼ paghʼə kə̂ myághʼə́ ndáʼ ngô: “Ə̂ pye-mə́soŋ?”» Gháp lə pə́ mbôghʼ lâʼ, ŋuu ntsəm lə pə́ njwô Jâŋ ghíʼ kwaʼ ntsətə-nkəʉ Sê*.

³³Gháp kwaŋ yə́rə́, ə́ ncʉ́ʼ mbwôr lə́ Yěso pə́ ngô: «Káa paghʼ jî wághʼ.» Yěso kə̂ ndâʼ yé lə́ páp ngô: «Məŋ zâa lə́wó, n ngwo lâʼ ghâa wéi ŋuu yi a ŋə̌ ghâa mətəʉ lə̂ ndághʼ ngʉ̌ zə̂u pei po.»