Read Ngombale Máakúsʉ 14 Bible Online

Máakúsʉ 14 - Ngombale bible

Máakúsʉ 14

¹Ə́ ghʉ mə́ mbûŋ leʼé pwô pə zʉ́ lətsei pəyúda yi pə́ fûŋ ńgó Pásʉ́ka*, ə́ mbə́ məleʼé mi pə́ lə mpfâr mbələ̂ghʼ tə mvuŋ* mə́u ngwó, pətə́-ndə̂ pənuŋú-poʼ Sê* gháp pə pəkeʼtə́-lə́pə́ʉ Mə̌usə̂i* pə̂ ndôu məsʉ̂ ghíʼ gháp wo nyéʼtə́ ghǒu Yěso, ə́ jwí yé,

²ə́ nkwǎŋ təcər páp ngô: «Káa ə̂ pə́ ntúŋu yé ńgó ə̂ pə́ mpfu lətsei, ə́ mbóghʼ lâʼ lə̂ máʼ tághʼə́.»

³Yěso ghʉ̂ mbə́ Betanî, ə́ ndə̂ Síməu ngaŋə-tsóʼ-páp, ə́ nyáŋə́ sê mə́ nzʉ̂ zə̂u, cǒ məngyě kə̂u yé ndə̂, ə́ ngwǒ tôʼ cǒ mbə̂u lamə́ndaa shʉʼʉ yi pə́ lə lǎghʼ có ntû ləghěi yi pə́ fûŋ ńgó nârd ńtsúŋú, pə̂ cər wó, ndwuŋ wěi pou ncóghʼ gháʼate. A lâghʼ ńtó ńtə́ʉ mbəʉ Yěso, ə́ ntsóʼ tôʼ zěi, ə́ ncwə́tə́ lamə́ndaa tû Yěso.

⁴Pəcó pye pǐ lə pə́ yʉʼ wó jwô ə́ záŋə gháp, gháp ləmtə ńdáʼ ngô: «A fǔ ncôŋ yo lamə́ndaa gháʼa ńté hó?

⁵Mboʼ pə́ tə́i fə́i zěi, mə́i ə́ ŋə̂ nkâp no məpaghʼ nkʉ tárə́; pə́ ŋə̂ lə́ pəpûŋ.» Ə́ ndǎʼ yə́rə́, ə́ njǐ lə̂ ntsátə́ tə́poŋ ńté məngyě wêi.

⁶Lə́ Yěso lâʼ ngô: «Pei tyâghʼ yé ńnyér, pei kʉ̂ʉ yé tə́poŋ ńté hó? A ghʉ pə̂ no shʉʼʉ lə́ məŋ.

⁷Pei kə̌ njwô pəpûŋ pə̂ mpfu tsəm, pei pə pǎp lə́ kə́ mbə̂ mpfu tsəm, pei lə̌i nkóŋ pə̂ mpfu hó pei ghʉ̂ shʉʼʉ lə́ páp. Lə́ ə́ ngwǒ lə́ məŋ, mə́i paghʼə láʼ kə́ pə̂ wághʼə pə̂ mpfu tsəm po.

⁸Məngyě wo ghʉ yé zə̂u yi a kǔʼ lə̂ ngʉ́, ə́ nzáʼ nzʉ̂ ńdǎghʼ lamə́ndaa nzóʼ ghâa, pə táa mboŋə́ tʉ́ŋ ghâa.

⁹Məŋ ndaʼ wéi, kwaʼ lə́nə́ʉ, maa yʉʼ tsəm yi pə́ táa tsətə́ Nkəʉ Shʉʼʉ zâa wó cər nzʉ̂, pə́ táa leʼtə́ zə̂u yi məngyě wo ghʉ̌ zěi, pə lághʼ ńkʉ́ʉtə́ yé.»

¹⁰Cǒ ngaŋə-jyêʼ-no Yěso lə́ pi ntsap pwô lə̂ ləghə̂m yi pə́ fûŋ yé ńgó Yúda Isəkaryôtə pə̂ʉ ńgwó ńjwó pətə́-ndə̂ pənuŋú-poʼ Sê*, ə́ ndǎʼ lə́ páp ńgó gháp pə pǎp ntsûŋtə́, â féi Yěso ńŋə́ lə́ páp.

¹¹Gháp zûʼ, ə́ poŋə́ gháp gháʼate. Gháp pʉ̂ yé nkâp yi gháp wo ŋə́ lə́ zʉ́. Yúda cʉ̂ʼ nkə́ njí lə̂ ndôu məsʉ̂ mi a lǎghʼ féi Yěso ńŋə́ lə́ páp tə lə́u có lǒʼ* kwâr yé po.

¹²Nduŋ-mbi leʼé lətsei mbələ̂ghʼ tə mvuŋ* ghʉ̂ nkûʼ, ə́ mbə́ leʼé yi pə́ lə̌i ngwâr məndənzʉ* ndághʼ ńzʉ̂ lətsei pəyúda yi pə́ fûŋ ńgó Pásʉ́ka*, ngaŋə-jyêʼ-no* Yěso túŋu yé ngô: «O koŋ ńgó paghʼ wó ghó ntsúŋtə́ yʉʼ, ô zʉ́ Pásʉ́ka* wó?»

¹³A tə̂u ngaŋə-jyêʼ-no* yé pwô, ə́ ndǎʼ lə́ páp ngô: «Pei wó túsoŋ, pei wo kə́u wó, ə́ jwó ŋuu mbiŋə yi a ghwǒ twô nci, pei tsə́ʉ nzəm zʉ́,

¹⁴tə a kə́u ndə̂, pei kə̂u zéi, ə́ ndáʼ lə́ ngaŋə ndə̂ ngô: Cícye lâʼ ńgó paghʼ túŋú ghô ńgó ye lûm ndə̂ yi gháp pə ngaŋə-jyêʼ-no* yé wo zʉ́ Pásʉ́ka* cər wó, â warə́?

¹⁵A wo nyarə́ wéi tə́koʼ lûm ndə̂, lə́ dêghʼ yi tʉ̌. Mə́i pə́ yaa mə́ ndáʼ ńtsúŋú, ə̂ yʉʼ yi pei wo tsuŋu mághʼə məzʉ̂ lətsei wó.»

¹⁶Ngaŋə-jyêʼ-no* yé lər tə nkə́u túsoŋ, ə́ njwó, zə̂u tsəm kə̂ mbə́ pə́ ghíʼ Yěso yǎa ndǎʼ. Gháp tsuŋu məzʉ̂ Pásʉ́ka* yʉʼ wó.

¹⁷Ə́ pou mbə́ mpfu-ngwʉ̂, Yěso gháp pə pye pé ntsap pwô lə̂ ləghə̂m tô ńkə́u wó,

¹⁸ə́ mbou nyáŋ sê mə́ nzʉ̂ zə̂u, Yěso lâʼ ngô: «Məŋ ndaʼ wéi kwaʼ lə́nə́ʉ, cǒ ŋuu təcər pei wo féi ghâa ńŋə́, tə mbə́ pə́ ŋuu yi paghʼ zʉ́ təm zə̂u nzʉ́.»

¹⁹Gháp zûʼ, ə́ shʉ́ŋə́ məsʉ̂ máp, ə́ nǎa ndyár. Wǒwó lə́ páp túŋu yé ngô: «Mboʼ ə́ pə̂ məŋ?»

²⁰Yěso lâʼ lə́ páp ngô: «Məŋ ndaʼ wéi ńgó â cǒ ŋuu təcər pei pwo ntsap pwô lə̂ ləghə̂m yi paghʼ zʉ́ pə́ ntəm zə̂u nzʉ́ cər tâʼ kâŋ.

²¹Môu Ŋuu* wo kwʉ́, ə̂ pə́ ghíʼ pə́ lə lǎʼ cər ŋwaʼa Sê ńté yé, lə́ ndʉʉ-tə́poŋ ŋuu yi a féi Môu Ŋuu ńŋə́*. Mboŋə mə́i káa pə lə jî yé ngaŋ!»

²²Gháp pə̂ nzʉ̂ məzʉ̂, Yěso pyê mbələ̂ghʼ, ə́ ŋə́ nkhwo mbó Sê, ə́ mbwóʼtə́ ə́ mə́ ŋə̂ lə́ páp, ə́ ndǎʼ ngô: Pei ko! Yô mbap mbəʉ zâa,

²³ə́ mbou nkhwór tə́tóʼ məluʼ, ə́ ŋə́ nkhwo mbó Sê, ə́ ŋə́ lə́ páp, gháp pə́tsəm nô.

²⁴A lâʼ lə́ páp ngô: «Yô məci mâa, ə́ mbə́ məci mi kaa* shwî, mi ə́ wo ncwə́rə́ wó ńté tû pye tə nzáa.

²⁵Məŋ ndaʼ wéi kwaʼ lə́nə́ʉ, n ndáʼ kə́ pǒu nô ghâa mwo məluʼ po tə láʼ cʉ́ʼ nó pə́ mi shwî cər Ləfou Sê.»

²⁶Gháp pə pǎp cʉ̂ʼ nkə́ nzâp pə̂ mənci laghʼ ńgúʼtə́ Sê. Mpfu pôu nkûʼ, gháp kwar, ə́ ndə́r lə̂ ndəu ləkôr mətʉ̌ məwə̂r olîvə.

²⁷Yěso lâʼ lə́ páp ngô: «Pei pə́tsəm wo měʼ ghâa, ə́ khʉ̌. Ə̂ laghʼ ḿbəutə́ lə̂ zə̂u yi pə́ lə ŋwaʼá cər ŋwaʼa Sê ngô: N ntáa sə́u mbapə mbî, məndənzʉ* sêi[18].»

²⁸Yěso kə̂ ncí ndáʼ ngô: «N ntáa zʉ́ʉ lə̂ ləwʉ̂, ə́ pyə̌ghʼ Galilêi.»

²⁹Pyêh lâʼ lə́ zʉ́ ngô: «Pye pə́tsəm lə̌i méʼ ghô ńkhʉ gháp, m mêʼ ghâa ghô po.»

³⁰Yěso pwôr lə́ zʉ́ ngô: «Məŋ ndáʼ ghô kwaʼ lə́nə́ʉ, mənkhwoʼ táa ghǐ tóŋ lətwûʼ leʼé wo mpfu pwô, mə́i o muŋú mə́ ghâa mpfu tárə́.»

³¹Lə́ Pyêh kə̂ ncí mbʉ̂ŋ lə̂ təʉ ngô: «Pə́ lə̌i mbə́i nǎa pə́ wóghʼə lə̂ ngwó ńjwítə́, mə́i mboʼ məŋ múŋu ghâa ghô po. Pəcó ngaŋə-jyêʼ-no* yé pə́tsəm kə̂ ndâʼ záp pə́ yə́rə́.»

³²Yěso gháp pə ngaŋə-jyêʼ-no* yé lər tə nkə̂u có yʉʼ yi pə́ fûŋ ńgó Getsémane, a lâʼ lə́ páp ngô: «Pei nyáŋ yaʼa, n ngwó sʉ́ʉtə́ Sê.»

³³Ə́ tsóʼ Pyêh, ə́ ngʉ̌ Jâghʼ gháp Jâŋ, gháp pə pǎp lər. A jî lə̂ nzúʼ ghíʼ ləpôghʼ ghou yé, ləwʉ̂ pə̂ ncátə yé,

³⁴a lâʼ lə́ páp ngô: «Ntə̂ʉ ghâa gháʼa mə́ ncátə pə́ lə̂ mbə̂u yi mboʼ n nkwʉ̂. Pei nyáŋ yaʼa gháʼá. Pei páa lə̂ ndé.»

³⁵Ə́ ndǎʼ yə́rə́, ə́ nyéʼ ncʉ́ŋə́ lə̂ mbi, ə́ shíʼ ńkʉ́ʼtə́ sê ə́ mə́ sʉ̂ʉtə Sê ndâʼ ńgó ə́ lə̌i mbə̂u mbó Sê, a pyárə yo mpfu tə́poŋ lə́ zʉ́.

³⁶Ə́ mə́ ndâʼ ngô: «Ába, Tǎa, mboʼ có no tsə̂ yé ghô po. Pyárə́ ngwôʼ yo yi tô lə́ məŋ lo. Lə́, koo ghʉ̂ pə̂ ghâa ləkoŋtə, ghʉ̌ pə̂ gho.»

³⁷Yěso sʉ̂ʉtə Sê yə́rə́, ə́ mbə̌ʉ ńtó ńcə́r ngaŋə-jyêʼ-no* yé zêi pə́tárə́, ə́ njwó gháp pə̂ ndé. A lâʼ lə́ Pyêh ngô: «Síməu, o pə̌ ndé áa? Kôo fú nkûʼ ghô lə̂ shə̂ghʼ ləlê mbaa pə́ tâʼ mə́nəu áa?

³⁸Koo pei kə̂ ndé, pei sʉ́ʉtə́ Sê ə́ mbóghʼ lə̂ mpfúŋ cər nkwaʼtə. Ntə̂ʉ ŋuu-məsoŋ ghwo məkwaŋtə shʉʼʉ, lə́ mbap mbəʉ ye pwôr.»

³⁹Ə́ nkə́ ncí fú mbəʉ páp ndə̌r lə̂ ngwó nsʉ́ʉtə́ Sê, ə́ nkə́u nkə́ ndáʼ pə̂ məno mi a yǎa ndǎʼ.

⁴⁰Ə́ mbou nkə́ ncí mbə̂ʉ nzəm, ə́ ngí tó gháp pə̂ ndé, ńté no lə ghí pə́, mə́i ləlê fú mə́ ngǒu gháp gháʼate. Gháp jye, káa kə́ jî gháp no yi mboʼ gháp laʼ yé.

⁴¹A tô lə̂ mbâatə mpfu tárə́, ə́ ndǎʼ lə́ páp ngô: «Pei lé, ə́ nzətə wéi. Ə́ pəu mə́. Mpfu kuʼ mə́. Pə́ wo féi Môu Ŋuu* ńŋə́ lə́ ngaŋə-məfaa.

⁴²Pei lesê paghʼə lə́r! Ŋuu yi a fêi ghâa ńŋə̂ lə́ páp wə̂, a tô lə̂!»

⁴³Yěso pyêr mə́ ndâʼ laʼá, Yúda yi a pə̌ cǒ ŋuu lə̂ ngaŋə-jyêʼ-no yé ntsap pwô lə̂ ləghə̂m tô. Nou lâʼ pə̂ nzəm zʉ́, ə́ ŋə̌i ńgwó mənyǐ ntso gháp pə pəkə́shʉŋ, ə́ mbə́ pye pi pətə́-ndə̂ pənuŋú-poʼ Sê* gháp pəkeʼtə́-lə́pə́ʉ Mə̌usə̂i*, tə mbaa pəkə̌m lâʼ* tə́u gháp.

⁴⁴Ə́ ghi pə́, mə́i Yúda ngaŋə-mənyaŋ kə leʼtə́ gháp ləiʼi yi a lǎghʼ ńnyarə́ gháp Yěso ngô: «Pei lə̌i njwó, m mbáʼá ŋuu, pei jî ńgó â zʉ́, ə́ ngǒu yé, ə́ ngwǒ yé shʉʼʉ, ə́ ndaghʼ yé ńdə́r.»

⁴⁵Yúda tô tə nkə́u yʉʼ wó, ə́ nděi-lěi ncʉ́ŋə́ mbáatə́ Yěso, ə́ ndǎʼ lə́ zʉ́ ngô: «Cícye», ə́ mbáʼá yé.

⁴⁶Gháp cwîʼ mbô lə́ Yěso.

⁴⁷Cǒ ŋuu lə́ pye pi gháp pə Yěso tə́i mbə́, sôŋ nyǐ ntso ye cər ngwâa, ə́ ndaghʼ ńzáʼ lətuŋú ngaŋə-faʼ tə́-ndə̂ pənuŋú-poʼ Sê*.

⁴⁸Yěso túŋu gháp ngô: «Ńté hó pei ghí pə́ tó lə̂ ngôu ghâa, ə́ ŋə́i ńgwó mənyǐ ntso gháp pə pəkə́shʉŋ pə́ ghíʼ məŋ tâʼ ntsǒŋ mətəʉ?

⁴⁹Məŋ ndə pə́ təcər pei leʼé ntsəm, ə́ mə́ njyêʼ pye zə̂u ndə̂ Sê*. Káa pei ghôu wéi ghâa. Lə́ yo no tó lə̂ ngʉ́, zə̂u yi pə́ lə ŋwaʼá cər ŋwaʼa Sê pəutə.»

⁵⁰Ə́ pə̂ yə́rə́, ngaŋə-jyêʼ-no* yé pə́tsəm meʼ yé nkhʉ̂ gháp.

⁵¹Cǒ môu-ngwəsəu tsə̂ʉ nzəm Yěso, ə́ mbə́ʉtə́ pə̂ ndaʼ pô ndǐ, pə́ ghou yé.

⁵²A fû mbô páp ńtə́u, ə́ měʼ pô-ndí zei lə́ páp, ə́ nkhʉ̌ ntsəmə.

⁵³Gháp laghʼ Yěso ńdə́r lə̂ nzeʼ nuŋu-poʼ Sê yi njwǐ*, ə́ yʉʼ yi pətə́-ndə̂ pənuŋú-poʼ Sê* gháp pə pəkə̌m lâʼ* ə́ ngʉ̌ pəkeʼtə́-lə́pə́ʉ Mə̌usə̂i* nyâŋ nkə̂itə wó.

⁵⁴Pyêh tsə̂ʉ nzəm Yěso, lə́ mbə́ pə́ tə nzəm, ə́ ndə̌r tə nkə́u tətáa nuŋu-poʼ Sê yi njwǐ*, ə́ shîʼ yé ńnyáŋə́ sê mbəʉ mǒghʼ yi pəpáp ndə̂ Sê* yǎa tsuŋú gháp pə pǎp pə̂ nzághʼ.

⁵⁵Pətə́-ndə̂ pənuŋú-poʼ Sê* gháp pə kəitə pəsǎʼ lâʼ* yi jwǐ pə̂ ndôu no yi mboʼ gháp kap tû Yěso, ə́ ndaghʼ ńgʉ́ pə́ jwî yé, lə́ káa pə́ jwô gháp.

⁵⁶Ńté no pye tə nzáa lə pə́ kâp məno tû zʉ́, pə́ pə̂ mbyétə́ lə́u ə́ pə̂ mbə̂u yé po.

⁵⁷Pəcó pye le záp sê lə̂ nkâp no tû zʉ́, ə́ ndâʼ záp ngô:

⁵⁸«Paghʼ lə zúʼ a lâʼ ngô: “N ntáa vǒghʼ ndə̂ Sê* yi pye-mə́soŋ lə lǎghʼ mbô máp ńkə́r, ə́ lǎghʼ leʼé tárə́ ńkə́r yi ndeʼe, tə lə́u kə́ mbyér mbə̂ yé faʼ pye-mə́soŋ po.”»

⁵⁹Tə mbaa yə́rə́, lə́u gháp pə̂ gháp tâʼ ntsʉ po.

⁶⁰Ə̂ pə́ yə́rə́, nuŋu-poʼ Sê yi njwǐ* lêsê mbi lâʼ, ə́ ntúŋú Yěso ngô: «O nâʼ naʼá? Kôo pə́ mbwôr no lə̂ ndwuŋ məno mi pə́ lâʼ ńté gho lo ńté hó?»

⁶¹Yěso lʉ̂ŋtə, káa tsáp. Nuŋu-poʼ Sê yi njwǐ* lâʼ lə́ zʉ́ ngô: «Ô Nzaʼ-nkʉ yi Sê lə ghʉ̌ ndaʼá mə́u lə̂ ngʉ́ ŋə́*? Ô Môu Sê? Ə́ Sê yi paghʼ ghûʼtə yé lə̂?»

⁶²Yěso pwôr ngô: «Mə̂ŋ zʉ́. Pei táa jwó Môu Ŋuu* nyáŋ lə̂ ndyəghʼə́ pô Tǎa Sê yi təʉ, ə́ kə́ cí jwó ghíʼ a fû tʉ̌-lə́pû ńtô cər məlâm.»

⁶³Nuŋu-poʼ Sê yi njwǐ* zûʼ yə́rə́, ə́ shərə́ sətə́ ndʉʉ məndǐ* yé, ə́ ndǎʼ ngô: «Paghʼə kə̌ mbou ndôu zárə́ mbə̂u nzǔʼ-njwó?

⁶⁴Pei zǔʼ ghíʼ a zoutə́ Sê, pei kwaŋ zéi ńgó hó?» Ŋuu ntsəm lâʼ ngô: «A ŋuu yi mboʼ pə́ jwî yé jwí.»

⁶⁵Pəcó pye ji lə̂ ntyə̂ghʼ mətê lə́ zʉ́, ə́ nkə̂r sʉ̂ yé. Ə́ mə́ ntî mbô lə́ zʉ́, ə́ ndâʼ ngô: «Tóghʼ ŋuu yi a sə̂u ghô.» Pəpǎp nzeʼ nuŋu-poʼ Sê yi njwǐ* sə̂u məfěi tû zʉ́.

⁶⁶Pyêh nyâŋ tətáa ndyəghʼə́ mətwuŋú, cǒ tâʼ lə́ pəngyě pi gháp lə faʼ nzeʼ nuŋu-poʼ Sê yi njwǐ* tô.

⁶⁷Ə́ njwó Pyêh pə̂ nzâghʼ mǒghʼ, a ntsúŋu ndə̂ʼtə́ yé, ə́ ndǎʼ lə́ zʉ́ ngô: «Gho zô, pei Yěso ŋuu Nǎzalêi kə pə́.»

⁶⁸Pyêh múŋu yé, ə́ ndǎʼ ngô: «káa m mə́ njî ghâa yé, ə́ mbou káa pə́ zûʼ ghâa no yi o lou ndâʼ zěi, ə́ fú mətwuŋú, ə́ nkwár ńdə̌r lə̂ ntsʉ nkâʼ, mənkhwoʼ tôŋ.»

⁶⁹Məngyě wêi nkə́ ncí njwó yé, ə́ njǐ lə̂ ndáʼ pye pi gháp pə pǎp lə pə́ yʉʼ wó ngô: «Ŋuu wo cǒ ŋuu ghap.»

⁷⁰Pyêh kə̂ ncí múŋú yé. Mpfu ghi pə́ pwô, pye pi gháp lə pə́ yʉʼ wó, kə̂ ncí ndâʼ záp lə́ Pyêh ngô: «Kâa pə́ no lou lǒu, o cǒ ŋuu ghap. O yaa mbə̌i mbə́ ŋuu Galilêi.»

⁷¹A cʉ̂ʼ njí lə̂ ndâʼ ngô: «Ə Sê tághʼ ngwôʼ tû məŋ, ghíʼ n ndə̌i mə́ ntâŋ məlaa, lyéʼe zâa ée, káa m mə́ njî ghâa ŋuu yi pei kʉ̂ʉ yé lə̂.»

⁷²Mənkhwoʼ kə̂ ncí ntóŋ lə̂ mbâatə mpfu pwô, Pyêh kʉ̂ʉtə tsâr yi Yěso yǎa ndǎʼ lə́ zʉ́ ngô: «Mənkhwoʼ táa ghǐ tóŋ mpfu pwô, mə́i o muŋú mə́ ghâa mpfu tárə́.» Ə́ nkhwóʼ ləghe.