Read Ngombale Máakúsʉ 16 Bible Online

Máakúsʉ 16 - Ngombale bible

Máakúsʉ 16

¹Leʼé nji pəyúda* zêi lei, Salomê gháp Mǎyaa Mǎghʼdala, ə́ ngʉ̌ Mǎyaa mə́ pə Jâghʼ wo nzə́u lamə́ndaa lə̂ ndághʼ ńzóʼ pfû Yěso[20].

²Ə́ pə́ nduŋ-mbi leʼé lə̂ ngap lâʼ, gháp mə̂ʉ tə mə́nəu ghi sáʼ, gháp pə̂ ntsʉ ləshi.

³Gháp lə pə́ ndə̂r lə̂ yʉʼ wó, ə́ ŋəi mə́ ndâʼ təcər páp ngô: «Tə wǒ gháʼa kə́u tyetə́ tə́koʼ ləghǒ yi pə́ lə lǎghʼ ńgwúʼú ntsʉ ləshi ńŋə́ lə́ paghʼə?»

⁴Ə́ ndə̌r tə nkə́u yʉʼ wó, ə́ njwó mə́i pə́ fú mə́ ntsʉ ləshi ntyêtə́ tə́koʼ ləghǒ wêi ńnúŋú nzəm.

⁵Gháp nkə̂u cər ləshi, ə́ njwó cǒ môu ngwəsəu nyâŋ lə̂ ndyəghʼə́ pô təʉ, ə́ mǎʼ ndǐ fúfú. Gháp jwô yé mbóghʼ gháʼate.

⁶Lə́ a lâʼ lə́ páp ngô: «Koo pei pôghʼ, pei lou Yěso ŋuu Nǎzalêi yi pə́ kə kʉ̌ʉ yé lə̂ tʉ̌-mbʉ̂ŋtə lə̂? A zʉʉ mə́ lə̂ ləwʉ̂, káa a pyêr yé yaʼa gháʼá! Pei jwó yʉʼ yi pə́ kə nuŋú pfû yé wó ńjwó.

⁷Pei wó ndǎʼ lə́ ngaŋə-jyêʼ-no* yé mbaa lə́ Pyêh ńgó a pyəghʼ mə́ Galilêi. Ə̂ yʉʼ yi pei wo jwó yé wó ghíʼ a lə lǎʼ wéi lə̂.

⁸Pəngyě pêi zûʼ yə́rə́, ə́ fú ləshi ńkwár ńkhʉ̌; káa kə́ lâʼ gháp có no lə́ ŋuu, ńté ńgó gháp lə pə́ mbôghʼ gháʼate.» [

⁹[21]Ə́ lə pə́ mbaʼa-mbaʼ lə̂ nduŋ-mbi[22] leʼé lə̂ ngap lâʼ, Yěso zʉ̂ʉ lə̂ ləwʉ̂, ə́ ntsə̌mbi nyárə́ mbəʉ ye lə́ Mǎyaa Mǎghʼdala yi a lə zǔŋ məzəghʼə tə́poŋ* saambwô lə́ zʉ́ lə̂.

¹⁰A cʉ̂ʼ nkə́ ndə́r lə̂ ngwó ńdǎʼ pye pǐ lə ŋəi nzəm Yěso, ə́ ngǐ tó gháp nuŋu ləwʉ̂ mə́ ndâa.

¹¹A pyêtə ńdáʼ gháp ńgó Nde pyěr pə̂ ntəʉ, a jwô mə́ yé, gháp zûʼ káa pə̂i gháp no yi a laʼ zěi.

¹²Zêi zə̂ lei, Yěso nkə̂ ncí nyárə́ mbəʉ ye lə̂ mbəu yi ndeʼe lə̂ có ngaŋə-jyêʼ-no* yé pwô, pi gháp lə pə́ laŋə́ mə́ ndə̂r lə̂ lâʼ.

¹³Gháp jwô yé yə́rə́, ə́ mbə̌ʉ nzəm ndáʼ pəcó ngaŋə-ku záp, káa gháp kə́ ncí mbə̂i gháp záp lə́wó.

¹⁴Yěso ghi lyəghʼtə́, ə́ nyárə́ mbəʉ ye lə́ ngaŋə-jyêʼ-no* yé ntsap moʼ lə̂ ləghə̂m mpfu yi gháp lə nyáŋ mə́ nzʉ̂ zə̂u. Ə́ sáʼ gháp ńté no gháp lə mʉ́ŋtə́ káa pə̂i gháp no yi pye pi gháp lə jwó yé ghíʼ a zʉ̌ʉ lə̂ ləwʉ̂ lǎʼ gháp.

¹⁵Ə́ mbǒu ndáʼ lə́ páp ngô: «Pei wó maa yʉʼ tsəm cər nzʉ̂, ə́ tsətə́ Nkəʉ Shʉʼʉ lə́ pye-mə́soŋ pə́tsəm.»

¹⁶Ŋuu yi a pə̌i, ə́ mpfú nci táa cwór. Ŋuu yi a lə̌ʼ táa cwí.

¹⁷Yo mələiʼi mi pə́ táa lǎghʼ jí pye pi gháp pə́i no zâa: Gháp táa lǎghʼ ləjôghʼ zâa zǔŋ məzəghʼə tə́poŋ* lə́ pye, ə́ pǒu tsár mətsâr shwî,

¹⁸gháp lə̌i mbə́i ngǒu pə̂ mənô kəʉ nzʉ́ pə̂ məcap, có zə̂u ghʉ yé gháp po; gháp táa zápə́ mbô máp lə́ pəghou, gháp shwítə́.

¹⁹Nde Yěso lə lâʼ mwo məno lə́ páp tə ə́ kuʼ, Sê laghʼ yé ńkóʼ ńdə́r lə̂ tʉ̌-lə́pû, ə́ nyáŋ yé lə̂ ndyəghʼə́ pô yé yi təʉ.

²⁰Ngaŋə-jyêʼ-no* Yěso fû yʉʼ wó ndə́r lə̂ ngwó ndeʼtə́ no Sê maa yʉʼ tsəm. Nde ghi pə́ tôutə gháp lə̂ faʼ, ə́ mə́ ngʉ̂ mənkəʼə-məno lə̂ ndághʼ ńnyarə́ ńgó no yi gháp laʼ zěi, ə̂ no lə́nə́ʉ.]