Read Ngombale Máakúsʉ 3 Bible Online

Máakúsʉ 3 - Ngombale bible

Máakúsʉ 3

¹Yěso kə̂ ncí mbə̂ʉ ndə̂ cûʼtə* pəyúda, cǒ ŋuu pə̂ ndə̂ wêi, ə́ mbə́ kwʉ-pô.

²Ə pye pə̂ náŋ lə̂ njwó ńgó kəʉ a wo ghʉ̌ ŋuu wêi shwítə́ leʼé nji, gháp lêitə́ mə́u ə́ nkǎp no tû zʉ́.

³Yěso lâʼ lə́ kwʉ-pô wêi ngô: «Lěsê yʉʼ wó ńtə́ʉ mbi lâʼ.»

⁴Ə́ mbǒu ntúŋú pye pêi ngô: «Ləpə̌ʉ* zághʼə ghíʼi ntúŋú ńgó pə ghʉ́ hó leʼé nji? Ńgó pə ghʉ no shʉʼʉ leʼé nji kəʉ pə̂ no tə́poŋ? Ńgó pə ghʉ́ ŋuu cwór leʼé nji kəʉ ńgó pə nyér yé â kwʉ́?» Lə́ káa cǒ ghap pwôr.

⁵Yěso nâŋ gháp lə̂ záŋə-lóŋ ńté ghíʼ məntə̂ʉ máp tə̌i, ə́ ncʉ́ʼ ndáʼ lə́ kwʉ-pô wêi ngô: «Shǐ pô zô!» A shî, ə́ shwítə́.

⁶Pəfalísia* kə̂ ntóghʼ fú ndə̂ cûʼtə* ńkwátə́, ə́ ngwo nâatə́ lə̂ pye Elôdə*, gháp pə pǎp pə̂ ndôu məsʉ̂ lə̂ njwí Yěso.

⁷Yěso gháp pə ngaŋə-jyêʼ-no* yé fû yʉʼ wó ndə̂r lə̂ nkaŋ lətʉŋ-nci Galilêi. Nou lâʼ jwǐ tsə̂ʉ nzəm zʉ́. Pye lə pə́ fû Galilêi, ə́ mə́ fû Yudêi,

⁸ə́ mə́ fû Yelúsalêm mbaa Idwimê, ə́ mə́ fû lə̂ cǒ njʉŋə́ nci Yuudêŋ tə mbaa lə̂ paghʼə-ngoŋ Tîr gháp Sidôŋ. Gháp lə tô mənou mə́nou ə́ ncə̂r Yěso, ńté məno mə́tsəm mi gháp lə pə́ nzúʼ ńgó a ghʉ měi.

⁹Ə́ pə̂ yə́rə́, Yěso lâʼ lə̂ ngaŋə-jyêʼ-no* yé ńgó gháp tsúŋtə́ kənyúʼ â kə́u cər wó, ə́ mbóghʼ lâʼ lə̂ fár yé.

¹⁰Ghíʼ ə́ kə yǎa ngí pə́ a pə̂ ngʉ́ pəghou tə nzáa shwítə lə, ŋuu tsəm yi a lə pə́ ngôu pə̂ ncʉ́ŋə́ ńkə̂u lə́ zʉ́, ə́ ndû lə̂ nkə̂u yé.

¹¹Pye pi məzəghʼə tə́poŋ* lə pə́ mbə̂u gháp lə lei tə njwó Yěso, ə́ mpfúŋ ńnûŋ məku zʉ́, ə́ ndâʼ lə̂ təʉ ngô: «Ô Môu Sê.»

¹²Lə́ Yěso sâʼ gháp ńgó gháp páa lə̂ ngʉ́ pə́ jî ŋuu yi a pə̌ wěi.

¹³Yěso ghʉ̂ nkóʼ ndəu có ləkôr, ə́ fúŋ pye pi a pə̌ nkǒŋ. Gháp tô ńcə́r yé,

¹⁴a wô təcər páp, ə́ ntsóʼ pye ntsap pwô lə̂ ləghə̂m, ə́ ncʉ́ʼ fúŋ gháp ńgó ngaŋə-ntə̂u* yé, ghíʼ gháp pə pǎp wo cʉ́ʼ pə́, a pə́ ntə̂u gháp, gháp wó ntsətə́ Nkəʉ Shʉʼʉ yi Sê,

¹⁵ə́ mbou nkúʼtə́ lə̂ nzûŋ məzəghʼə tə́poŋ* lə́ pye.

¹⁶Pye pi a lə tsóʼ gháp lêi pwo: Síməu yi Yěso lə cǐ có ləjôghʼ yé ńgó Pyêh,

¹⁷ə́ ngʉ̌ ghəpə́ Zebede Jâghʼ gháp fə̌r ye Jâŋ. Yěso cî ləjôghʼ záp ńgó Mbohanejês yi ə́ laghʼ ńdâʼ ńgó ghəpə́ ləfaŋ.

¹⁸Yěso kə̂ ncí ntsóʼ Ndeléya, Fílîp gháp Patələmî, ə́ nkʉ́ʼʉ́ Matyê gháp Tomásʉ, ə́ ngʉ̌ Jâghʼ môu Aləfê gháp Tadê lə́ Síməu nzoŋ-məno-lâʼ,

¹⁹ə́ mbou ngʉ́ Yúda Isəkaryôtə yi a lə pǒu ntáa féi Yěso ńŋə́.

²⁰Yěso pou mbə̂ʉ lə̂ nzeʼ, ə lâʼ kə̂ ncí nkóʼ, tə yé nzʉ́ zə̂u káa kə́ mbóu mbə̂ yé wó.

²¹Ə pye cʉŋə-ndə̂ pə Yěso zûʼ yə́rə́, ə́ nděsê ńtsə́ʉ laŋə́ lə̂ ngwó ngǒu yé, ńté no gháp lə pə́ ndâʼ záp pə́ ńgó tû yé coŋtə.

²²Pəkeʼtə́-lə́pə́ʉ Mə̌usə̂i* pi gháp lə fú Yelúsalêm pə̂ ndâʼ ngô: «Mbelzebûl yi a pə̌ tə́-ndə̂ məzəghʼə tə́poŋ* pə̌ lə́ zʉ́. Zʉ́ lə́ ŋə̂ yé mətəʉ lə̂ ndághʼ ńzǔŋ məzəghʼə tə́poŋ.»

²³Yěso fûŋ gháp, gháp tô, a lâghʼ saghʼ-ləghaa ńdáʼ lə́ páp ngô: «Tə mboʼ Sə́tə shə́rə ńzúŋ tû-mbəʉ yé gháʼa gháʼá?

²⁴Ə pye tâʼ lâʼ lə̌i shə́rə́ ńdwoʼó ntso təcər páp, mə́i zêi lâʼ wo mě.

²⁵Ə pye tâʼ cʉŋə-ndə̂ póu shə́rə́ ńdwóʼo təcər páp, mə́i zêi cʉŋə-ndə̂ wo mě.

²⁶Sə́tə lə̌i mbóu shə́rə́ ńdwoʼó mbəʉ yé, mə́i ghaptə wo kə́u cər ləfou yé, ləfou yé zêi mê.

²⁷Kâa cǒ ŋuu pə̂ yé wó yi mboʼ a pwôʼ ndə̂ tə́-məntəʉ, ə́ nkhwór məzə̂u mé tə́ tsə̌mbi nkə́r yé. A lə̌i ndêi tə nkə́r yé, a kûʼ lə̂ nkə́u ndə̂ zʉ́, ə́ nkhwǒr məzə̂u mé mə́tsəm.»

²⁸N ndaʼ wéi kwaʼ lə́nə́ʉ, mboʼ Sê lâʼ fú ndyə́ghʼə́ məfaa pye-mə́soŋ mə́tsəm ńŋə́ lə́ páp, tə mbaa mətsâr mə́tsəm mi gháp laghʼ ńzôutə yé.

²⁹Lə́, ŋuu lə̌i nzóutə́ Zəghʼə Ndêi-lěi, Sê lâʼ ndyə́ghʼə yé ńŋə́ lə́ ngaŋ po.

³⁰Yěso lə laʼ lə́ páp yə́rə́, ńté no gháp lə laʼ ńgó zəghʼə tə́poŋ* pə́ lə́ zʉ́.

³¹Mə́ pə Yěso gháp pə pəfə̌r pé tô ńtə́ʉ ntsʉ ndə̂, ə́ ntə́u ŋuu ńgó a wó fúŋ yé ńŋə́ lə́ páp.

³²Pye tə nzáa lə nyáŋtə́ mbəʉ Yěso tə nzə́mə́ yé mbóghʼó, ə́ ndǎʼ lə́ zʉ́ ngô: «Jwô, mə́ gho gháp pə pəfə̌r pô pi mbiŋə ə́ nkʉ́ʼʉ́ pi pəngyě pə́ pěi mə́ ndôu ghô.»

³³Yěso pwôr ngô: «Mə́ ghâa gháp pə pəfə̌r pâa pəwǒ?»

³⁴Ə́ ndǎʼ yə́rə́, ə́ mbou shərə́ ńnáŋ pye pi gháp nyáŋtə́ tə zə́mə́ yé mbóghʼó, ə́ ndǎʼ ngô: «Mə́ ghâa gháp pə pəfə̌r pâa pwo.

³⁵Ńté ńgó ŋuu yi a ghʉ zə̂u yi Sê pə̌ ntúŋú, gháʼá mbə́ fə̌r ghâa yi mbiŋə tə mbaa yi məngyě, ə́ mbə́ mə́ ghâa.»