Read Ngombale Máakúsʉ 4 Bible Online

Máakúsʉ 4 - Ngombale bible

Máakúsʉ 4

¹Yěso lə pou nkə́ ncí mə́ njyéʼ pye no Sê nkaŋ lətʉŋ-nci Galilêi, ə lâʼ tô ńkə́itə́ mbəʉ zʉ́, ə́ fú nzáa tə a kə̂u ńnyáŋ cər kənyúʼ yi ə́ lə pə́ cər nci. Lâʼ cʉ̂ʼ nkə́itə́ kâŋ nci.

²A lə pə́ ndâghʼ saghʼ-ləghaa* ńjyéʼ gháp məno tə nzáa, ə́ mə́ ndâʼ lə́ páp ngô:

³«Pei zʉ́ʼtə́ ńzúʼ, cǒ ŋuu lǎʼ ngwǒ nkâʼ zʉ́ leʼé có maʼ mbi zə̂u,

⁴ə́ kə́u mǎʼ wó, məcó məmbəm pfûŋtə laŋə́-ndə̂u, pəshʉ̌ŋ tô ntsûʼtə́ mî.

⁵Məcó məmbəm pfûŋtə lə̂ yʉʼ məghǒ, ə́ ntóghʼ nsáʼ ńté no kâa ndesé lə zâa yé yʉʼ wó.

⁶Mə́nəu pôu ńtə́ kwaʼ shʉʼʉ, ə́ ntǒu məzə̂u mi ə́ sáʼ lei, ə́ zə̂u, ńté no kâa məŋaŋə měi lə zâa yé sê.

⁷Məcó məmbəm pfûŋtə cər mə́kǎp-kǎp, ə́ sáʼ, ə́ mbǒŋ gháʼate. Mə́kǎp-kǎp wei ghʉ̂ nkóʼ, ə́ fámə́ məzə̂u mei tə kâa zə̂m yé.

⁸Məcó məmbəm pfûŋtə lə̂ yʉʼ ndesé shʉʼʉ, ə́ sáʼ, ə́ ngə́ kwaʼ shʉʼʉ, ə́ nzə́m. Có ləcʉŋə́ ghi ŋə́ məmbəm mə̂m-tárə́, có ŋə̂ mə̂m-ntoghʼó, có ŋə̂ yé məmbəm nkʉ».

⁹Yěso lə tsár tə ngí lyəghʼtə́, ə́ ndáʼ ngô: «Ŋuu yi a ghwǒ mətuŋú lə̂ ndághʼ ńzúʼ no, â tsúŋú zûʼ.»

¹⁰Ə lâʼ sêi ńdə́r, pye pi gháp lə cî mbə̂ mbəʉ Yěso gháp pə ngaŋə-jyêʼ-no* yé ntsap pwô lə̂ ləghə̂m cʉ̂ʼ nzəm, ə́ ntúŋú yé no ńté saghʼ-ləghaa*.

¹¹A lâʼ lə́ páp ngô: «Pə́ lə ghʉ pei kûʼ lə̂ njí məno Ləfou Sê mi ə́ pə́ ləlwǒ, lə́ ə́ ngwǒ lə́ pəcó pye, mə́i gháp zûʼ záp pə́ cər pəsaghʼ-ləghaa;

¹²ńjí ńgó ə́ leitə́ yə́rə́, “gháp pə̂ nâŋ yʉʼ, lə́u mə́ ntsuŋú njwô gháp po, ə́ mə́ nzûʼ yʉʼ, lə́u mə́ ntsuŋú nzûʼ gháp po. Ə́ tə́i ndə̌iʼ pə́ yə́rə́ po, mə́i mboʼ gháp pəʉ lə̂ mbó Sê, a lyə́ghʼə məfaa ghap[8]!”»

¹³Yěso pôu ndâʼ lə́ páp ngô: «Tə káa pei zúʼ wéi wo saghʼ-ləghaa* gháʼa, ə́ pǒu zûʼ pəcó pə́ gháʼá?

¹⁴Ŋuu yi a pi zə̂u, a pi gháʼá tsâr Sê.

¹⁵Pəcó pye pə́ ghíʼ nkaŋ laŋə́ yi mbi zə̂u pfuŋtə́ mə́u. Gháp kə́ nděi tə nzúʼ tsâr Sê, Sə́tə tô fú məntə̂ʉ páp ńkwarə́ zěi.

¹⁶Pəcó pye pə́ ghíʼ yʉʼ məghǒ yi mbi zə̂u pfuŋtə́ mə́u. Gháp kə́ ndéi tə nzúʼ tsâr Sê, ə́ ndǎghʼ lətsei ḿpfú zěi,

¹⁷lə́ kâa nyêr gháp zěi, ə̂ lâr məŋaŋə məntə̂ʉ páp, ə́ nyéʼ nkápə záp mə́u kapə́, pə́ lei tə njí lə̂ ntyé gháp, ə́ ŋə́ gháp ngwôʼ ńté no Sê, gháp tôghʼ mêʼ pə̂i-ntə̂ʉ záp.

¹⁸Pəcó pye pə́ ghíʼ mə́kǎp-kǎp yi mbi zə̂u pfuŋtə́ cər wó. Gháp zûʼ tsâr Sê,

¹⁹ə́ ncí ndə̂ nzûŋ nzəm məzə̂u ndəu-nzʉ̂, ə nkâp gháp pə məfuʼ mbə̂u lə̂ mbə̂u pə̂ fútə gháp, zə̂u pêi tsəm naa fə́mə́ tsâr Sê, lə́u ə́ zə̂m yé ntǎa po.

²⁰Pəcó pye pə́ ghíʼ ndesé shʉʼʉ yi mbi zə̂u pfuŋtə́ mə́u. Gháp zûʼ tsâr Sê, ə́ mpfú zěi, ə́ nzə́m məntǎa. Tâʼ ləcʉŋə́ ŋə̂ məmbəm mə̂m-tárə́, ə có ŋə̂ məmbəm mə̂m-ntoghʼó, ə có ŋə̂ yé məmbəm nkʉ.»

²¹Yěso pou nkə́ ncí ndáʼ lə́ páp ngô: «Ŋuu pə̌ ncûʼ lâm ndághʼ ńtô lə̂ nkêʼ pye, ə́ mbou ndâghʼ nkaa ńkə́ptə́ kəʉ ntâghʼ ncʉŋ nkə̌u mo? Lə́u a wo tághʼ pə́ ndəu ləʼtə zěi péh?

²²Ńté no zə̂u tsəm yi ə́ lwǒ mpfu táa kwǎr mbi lâʼ ntə̌ʉ-nəu, zə̂u tsəm yi ə́ pǒu mbə́ pə́ cər ntsəm mpfu táa kwǎr cər nkeʼ.

²³Ŋuu lə̌i ngwó mətuŋú lə̂ ndághʼ nzúʼ no, a tsúŋu nzúʼ.»

²⁴Yěso kə̂ ncí nkʉ́ʼʉ́ ndáʼ lə́ páp ngô: «Pei laghʼə́ tû zéi lə̂ no yi pei zûʼ zěi. Sê ghʉ̌ kə́ lǎghʼ pə́ fəiʼ yi pei laghʼ fə̂iʼ zə̂u, ə́ fəiʼ zéi tə pǒu kʉʼʉ có mə́u ńŋə́ lə́ pei.

²⁵Ńté no ŋuu lə̌i ngwó zə̂u, mə́i pə́ wo kʉʼʉ có mə́u, lə́ ŋuu póu ndə̌iʼ ghwo yé có po, mə́i pə́ wo mpfú tə mbaa məyʉʼ yi a yǎa ngwǒ.»

²⁶Yěso kə̂ ncí ndáʼ ngô: «Ləfou Sê* pə́ ghíʼ ŋuu yi a maʼ mbi zə̂u nkâʼ zʉ́,

²⁷ə́ mbou ngwó nuŋ yé lətwûʼ ndé, ə́ mə́ʉ njyê leʼé tsəm, mbi zə̂u cʉ̂ʼ sáʼ, ə́ mə́ ngúʼ, lə́u a jî yé ghíʼ zěi ghʉ̌ mboŋə́ ghúʼ po.

²⁸Ndesé zə́ghʼə́-zʉ́ lə́ ghʉ mbi zə̂u sâʼ, ə́ ngúʼ mbou nzə́m.

²⁹Məzʉ̂ lei tə ntə̂ʉ, ngaŋə nkâʼ kə̂u nkâʼ, ə́ njǐ lə̂ mbyé, ńté ńgó mpfu mbyê məzʉ̂ kuʼ mə́.»

³⁰Yěso kə̂ ncí ndáʼ ngô: «Mboʼ paghʼə lâghʼ hó ḿbyé fəiʼ lə̂ no Ləfou Sê*, mboʼ paghʼə lâghʼ warə́ saghʼ-ləghaa* ḿbyé fəiʼ zěi?

³¹Ə́ pə́ ghíʼ mbyəghʼ cǒ mbə̂u tə́shú yi pə́ fûŋ ńgó Mutâadə*. Pə́ ghí mǎʼ zěi, ə́ khwôghʼ ndéi məmbi zə̂u mə́tsəm ndəu ndesé.

³²Lə́ pə́ póu ndêi tə máʼ, ə́ sâʼ, ə́ ngúʼ ńdéi məzə̂u ngárə mə́tsəm, ə́ ntóghʼtə́ pətə́koʼ mbô tə ə́ pə̂ yi mboʼ pəshʉ̌ŋ tô ḿbáʼ mənkaa máp mə́u.»

³³Yěso lə laghʼ pə́ pəsaghʼ-ləghaa tə nzáa ghíʼ pwo ńjyêʼ pye zə̂u, ə́ mbou njyêʼ yə́rə́ lə̂ mbə̂u yi mboʼ ŋuu ntsəm zûʼ.

³⁴Kâa a lə pə́ ndâʼ yé gháp no tə́ lǎghʼ pə́ saghʼ-ləghaa* ńdâʼ, ə́ mbou ncʉ́ʼ nkéʼtə́ zə̂u tsəm ńdáʼ ngaŋə-jyêʼ-no* lə̂ záp pəpáp yʉʼ.

³⁵Ə́ pou nkə́ mbə́ pə̂ mpfu-ngwʉ̂ leʼé wêi, Yěso lâʼ lə́ ngaŋə-jyêʼ-no* yé ngô: «Paghʼə tə́u ńdə́r lə̂ cǒ njʉŋə́ lətʉŋ-nci.»

³⁶Ngaŋə-jyêʼ-no* yé nyêr lâʼ nkaŋ nci, ə́ ncʉ́ʼ nkwátə́ Yěso cər kənyúʼ yi a lə nyáŋ cər wó, ə́ ngǐ lǎghʼ yé pə́ tə́u, pəcó pye laghʼ məcó məkənyúʼ ńtsə́ʉ nzəm páp.

³⁷Tâʼ tə́koʼ fə̂m jî lə̂ ncʉ́ʼ yʉʼ, nci cʉʼʉ, mələ̂ʉ nci zêʼ ńkə́u cər kənyúʼ tə ə́ cʉ̂ʼ mə́ ndóghʼə loghʼə́,

³⁸Yěso nyâŋ nzəm, ə́ njóʼó lə̂ tôu-tû mə́ ndé, ngaŋə-jyêʼ-no* yé jye yé, ə́ ndǎʼ ngô: «Ə́ Nde, koo o pə́ njwô ghíʼ paghʼə wo nkwʉ́tə́ wó lo áa?»

³⁹Yěso jyê, ə́ sáʼ fə̂m gháp nci, ə́ ndáʼ lə̂ nci ngô: «Nâʼ!» Ə fə̂m lêi-lěi nzáʼá, ə nci nâʼ tə lə́u nkə́ mbyér mə́ ncʉ́ʼʉ yé po.

⁴⁰A túŋu ngaŋə-jyêʼ-no* yé ngô: «Pei fǔ mbôghʼ gháʼa hó ndwuŋ wo? Pei kə́ ghwô pə̂i-ntə̂ʉ mô?»

⁴¹Gháp fû nkʉ́ʼʉ́ mbóghʼ tə ncʉ́ʼ mə́ ntúŋu təcər páp ngô: «Ŋuu wo gháʼa mbə̂ yé pə̂ wǒ tə fə̂m gháp nci zûʼ ntsʉ yé?»