Read Ngombale Máakúsʉ 5 Bible Online

Máakúsʉ 5 - Ngombale bible

Máakúsʉ 5

¹Yěso gháp pə ngaŋə-jyêʼ-no* yé cʉ̂ʼ ntə̂u lətʉŋ-nci Galilêi tə nkə́u lə̂ cǒ njʉŋə́ cər paghʼə-ngoŋ pye Gadazanyê,

²Yěso ghi kwǎr kənyúʼ tə tə́ʉ sê, cǒ ŋuu fû təcər mətû-lə́shi ńtó ńtə́ʉ mbi zʉ́, mə́i zəghʼə tə́poŋ* lə kə̂u mə́ lə́ zʉ́, ə́ ncʉ́ʼ nyáŋ mbə̂u yé.

³A lə cî yé pə́ təcər mətû-lə́shi mêi, káa ŋuu lə póu nkə́ nkûʼ yé lə̂ ndághʼ cêŋ ńkâp yé.

⁴Pə́ lə yaa nyáŋ ndâghʼ pəcêŋ ńkə̂r mbô mé, ə́ mbou ndâghʼ mətə̌ʉ ńkə̂r məku mé, lə́ a kə̂ nzéʼtə́ pəcêŋ zeʼtə́, ə́ mbóu mbwóʼtə́ mətə̌ʉ tə lə́u cǒ ŋuu yi a pǒu mbyér ngwó mətəʉ lə̂ ndághʼ ngǒu yé kə̂ mbə̂ yé wó po.

⁵Ə́ lə pə̂ ntə̌ʉ-nəu gháp lətwûʼ, a ŋâa sótə təcər mətû-lə́shi, ə́ ŋáa ŋə̂i ndəu məkôr ḿmâʼ wâr, ə́ mbou ndâghʼ məghǒ ńgwátə mbəʉ ye.

⁶A lə tə́ʉ ndǐ təsə ńjwó Yěso, ə́ ndǎghʼ ndyʉ ńtó ńshíʼ ńkʉ́ʼtə́ sê mbi zʉ́,

⁷ə́ mǎʼ wâr lə̂ təʉ ńdáʼ ngô: «O pfû hó mbó məŋ Yěso Môu Tsəpye Sê? N sʉ́ʉtə́ ghô lə̂ ləjôghʼ Sê ńgó koo o pə̂u ghâa.»

⁸Ńté no Yěso lə pə́ ndâʼ lə́ zʉ́ ngô: «Zəghʼə tə́poŋ*, fú lə́ ŋuu wo ńkwár!»

⁹Ə́ mbou ntúŋu yé ngô: «Ləjôghʼ zô wǒ?» A pwôr lə́ Yěso ngô: «Ləjôghʼ zâa Pətənzáa, ńté no paghʼ zǎa.»

¹⁰Ə́ ncʉ́ʼ mə́ sʉ̂ʉtə Yěso pə́ lə́ cʉ́ŋə́ ńgó koo a fû lâʼ páp ńzǔŋ məzəghʼə tə́poŋ mêi.

¹¹Ə́ lə ghí pə́, ə cǒ mbuŋu pəkúnye yi pə́ lə pə́ nkóʼó pə̂ yʉʼ wó ndəu ləkôr, ə́ mə́ ŋáa nkár ńzʉ́.

¹²Məzəghʼə tə́poŋ* mêi sʉ̂ʉtə Yěso ndáʼ lə́ zʉ́ ngô: «Caghʼə́ wághʼ ńŋə́ cər mbuŋu pəkúnye yo, ə́ nyér paghʼ kə́utə́ lə́ páp.»

¹³Yěso pə̂i, məzəghʼə tə́poŋ mêi* cʉ̂ʼ nkə́ fú lə́ ŋuu wêi ńkwátə́, ə́ nkə́utə́ lə̂ pəkúnye pêi. Ə mbuŋu pəkúnye yi mboʼ pə́ lə kwaʼ, gháp pə̂ no tóusʉ pwô, ə nâa fú ndəu ləkôr sěi ńgwo ncwə́rə́ nci ńfə́m cər wó ńkwʉ́tə́.

¹⁴Pəpáp pəkúnye pêi jwô yə́rə́, ə́ nkhʉ̂ gháp, ə́ ngwǒ túsoŋ tə mbaa məyʉʼ mi pə́ sor məzə̂u məku wó, ə́ ndeʼtə́ no mə́u. Ə lâʼ kôʼ ńtó ńjwó zə̂u yi ə́ yǎa nděi.

¹⁵Gháp lə tó tə nkə́u mbəʉ Yěso, ə́ njwó ŋuu yi məzəghʼə tə́poŋ* lə pə́ lə́ zʉ́ lêi, a nyâŋ sê tə ngwér məndǐ, mə́i jîno yé pəʉ mə́. Gháp jwô yə́rə́, ə́ fú mbóghʼ gháʼate.

¹⁶Pənzǔʼ-njwó pyêtə ńdáʼ pye lâʼ ghíʼ ə́ tə́i nděi.

¹⁷Pye lâʼ cʉ̂ʼ sʉ́ʉtə́ Yěso ńgó a fú lâʼ páp ńdə́r yé.

¹⁸Yěso pə̂ nkə̂u kənyúʼ lə̂ ndə́r, ŋuu yi məzəghʼə tə́poŋ lə fú lə́ zʉ́ ńkwátə́ lêi sʉ̂ʉtə yé lə̂ ntsə́ʉ nzəm zʉ́.

¹⁹Yěso lə̂ʼ, ə́ ndǎʼ lə́ zʉ́ ngô: «Pəʉ gho lə̂ nzeʼ gho ńkwátə́ pye pô, ə́ ndǎʼ gháp zə̂u tsəm yi Nde yǎa ndǎghʼ poŋə-ntə̂ʉ yé ə́ ngʉ́ lə́ gho.»

²⁰Ŋuu wêi cʉ̂ʼ ndə̂r lə̂ lâʼ yi pə́ fûŋ ńgó Mətúsoŋ Ləghə̂m, ə́ ŋáa ŋə́i ńdeʼtə́ no yi Yěso yǎa ngʉ̌ lə́ zʉ́. Ŋuu ntsəm zûʼ, ə́ kəʼə yé gháʼate.

²¹Yěso lâghʼ kənyúʼ ə́ mbə̌ʉ ntə́u nci, ə́ ntó tə nkə́u lə̂ njʉŋə́ yi a kə yǎa mbə́ wó, ə́ mbyér ntə́ʉ pə́ nkaŋ nci, nou lâʼ jwǐ kôʼ ńkə̂itə́ mbəʉ zʉ́.

²²Cǒ tə́-ndə̂ cûʼtə pəyúda yi pə́ fúŋ yé ńgó Njalúsʉ, tô njwó Yěso, ə́ mpfúŋ məku zʉ́,

²³ə́ mbúʼ mbô ńsʉ́ʉtə́ yé pə́ lə́ cʉ́ŋə́ ə́ ndǎʼ lə́ zʉ́ ngô: «Môu ghâa yi məngyě cʉ̌ʼ ntə́ʉ pə́ ntsʉ ləwʉ̂, tə́sə́u tó ńzápə́ mbô mô lə́ zʉ́, â ncwór, ə́ mbə́ wó.»

²⁴Yěso pə̂i, gháp tsə̂ʉ laŋə́ mə́ ndə́r, ə lâʼ tsə̂ʉ nzəm zʉ́ tə mə́ ŋə́i fâr yé pə̂ ndyəghʼə́ tsəm.

²⁵Cǒ məngyě pə̂ yé nou lâʼ, mə́i mə́sóu ghaghʼə mə́ yé nguʼ ntsap pwô lə̂ ləghə̂m.

²⁶Ə́ lə ghí pə́ mə́i a jwô mə́ ngwôʼ gháʼate lə̂ ntsúʼ mbəʉ ye mbó pəghʉ̌-mə́fu, ə́ fú ncôŋ nkâp ye ntsəm, lə́ káa zûʼ yé shʉʼʉ. Ə́ ncʉ́ʼ lə̂ shwítə́, ghou kʉʼʉ ngáʼ ghaʼá.

²⁷A lə zúʼ ghíʼ pə́ kʉ̂ʉ Yěso, ə́ nyéʼtə́ fú pə́ nzəm cər nou lâʼ ntó, ə́ ngí pə́ kə̂u ndǐ ye,

²⁸ə́ mə́ ndâʼ cər ntə̂ʉ zʉ́ ngô: «N ndə̌i ndû tə nkə̂u pə̂ ndaʼ məndǐ mé, mə́i n ngwo shwítə́.»

²⁹A lə kə́ ndǔ tə nkə̂u ndǐ Yěso, mə́sóu wei lêi-lěi nzáʼá, a zûʼ cər mbəʉ ye ńgó a shwitə̂.

³⁰Yěso kə̂ ntôghʼ nzúʼ ńgó məcó mətəʉ fú lə́ zʉ́ ńkwǎr, ə́ shərə́ ńtúŋú lâʼ ngô: «Wǒ kə̌u məndǐ mâa?»

³¹Ngaŋə-jyêʼ-no* yé pwor ngô: «O jwô mbə̂u yi lâʼ laghʼ ńfâr ghô ndyə́ghʼə́ tsəm, ə́ mbǒu ntúŋú ńgó wǒ kə̌u ghô áa?»

³²Lə́ Yěso kə̂ mə́ nâŋ pə̂ yʉʼ lə̂ njí ŋuu yi a kə̌u yé.

³³Məngyě wêi lə pə́ mbóghʼ ə́ mə́ ngwə̂r, ńté no a lə pə́ njî zə̂u yǐ lěi, ə́ ncʉ́ʼ nkə́ ńtó ḿpfúŋ ńnúŋ məku Yěso, ə́ ndáʼ yé no-lə́nə́ʉ.

³⁴Yěso lâʼ lə́ zʉ́ ngô: «Ngwâa ghâa, pə̂i-ntə̂ʉ zô ghʉ o shwîtə, lər ghô lə̂ mbwórə, ghou zô mê.»

³⁵Yěso pə̂ ndâʼ yə́rə́ lə́ məngyě wêi, pəcó pəghaŋə-ntə̂u fû nzeʼ tə́-ndə̂ cûʼtə pəyúda ńtó ńdáʼ lə́ tə́-ndə̂ cûʼtə wêi ngô: «Môu gho yi məngyě kwʉ mə́, koo o kə̂ ngághʼə́ Cícye.»

³⁶Yěso ghʉ̂ ghíʼ a kə́ pə́i nzûʼ yé có no, ə́ ndǎʼ lə́ Njalúsʉ ngô: «Koo o pôghʼ, ghwǒ pə̂ pə̂i-ntə̂ʉ.»

³⁷Ə́ ndǎʼ yə́rə́ tə́ ə́ kuʼ, a pə̂ ndə́r lə̂ nzeʼ Njalúsʉ, Káa pə̂i yé ńgó cǒ ŋuu tsə́ʉ nzəm zʉ́, tə ndyéʼ ndaʼ Pyêh ə́ ngʉ̌ Jâghʼ gháp fə̌r ye Jâŋ.

³⁸Gháp lər tə nkə́u nzeʼ Njalúsʉ, Yěso jwô pye pə̂ wó mə́ ntsə́rə́, ə́ mbûʼ mbəʉ záp, pəcó pə̂ cwôr məngwuŋ, ə́ mə́ ndâa.

³⁹Yěso kə̂u ndə̂ ə́ ndǎʼ lə́ páp ngô: «Pei fǔ ndǎa ə́ mbáŋə yʉʼ ndwuŋ wo gháʼa ńté hó? Môu kə́ kwʉ̂ yé, a pə̌ ndê lě.»

⁴⁰Gháp zûʼ, ə́ njí lə̂ njwî yé. A ghʉ ŋuu ntsəm fû ndə̂ ńkwǎr tə ə́ cʉ̂ʼ ndaʼ tə́ môu gháp maa môu, ə́ ngʉ̌ ngaŋə-jyêʼ-no* yé pə́tárə́. A cʉ̂ʼ nkə́u cər lûm ndə̂ yi môu wei nǔŋ cər wó.

⁴¹Yěso pyê pô môu wei ngwô, ə́ ndǎʼ lə́ zʉ́ ngô: «Talita kum!» Ə́ ndaghʼ ńdâʼ ngô: «Môu məngyě, n ndaʼ lə́ gho; lěse!»

⁴²Môu məngyě wêi kə̂ ntóghʼ mbəʼə́ mbəʉ ye, ə́ nděsê ńjǐ lə̂ ŋə̂i. Ŋuu ntsəm jwô ə́ kəʼə yé gháʼate. A lə pə́ môu nguʼ ntsap pwô lə̂ ləghə̂m.

⁴³Yěso tôʼ gháp lə̂ nkʉ́ʉ tə ŋuu zûʼ zə̂u yi a ghʉ̌ zěi, ə́ mbǒu ndáʼ ngô: «Pə ŋə́ zə̂u a zʉ́.»