Read Ngombale Máakúsʉ 7 Bible Online

Máakúsʉ 7 - Ngombale bible

Máakúsʉ 7

¹Pəfalísia gháp pə pəkeʼtə́-lə́pə́ʉ Mə̌usə̂i* pǐ fú Yelúsalêm tô ńkə́itə́ mbəʉ Yěso,

²ə́ njwó ngaŋə-jyêʼ-no* yé pə̂ nzʉ̂ zə̂u tə́ tsə̌mbi sóghʼ mbô máp ghíʼ nôghʼ-lâʼ gháp pə́ ntúŋú.

³Lə́ mə́i pəfalísia* gháp pə pəyúda pə́tsəm lə̌i ngáʼa nzʉ̂ gháp zə̂u tə́ tsə̌mbi ntsúŋú sǒghʼ mbô máp po, ə́ pə̂ zə̂u yi nôghʼ-lâʼ gháp túŋú ńgó pə ghʉ́ zěi.

⁴Ə́ ngwó mətǎa tə mbə̂ʉ, gháp ghi zʉ́ zə̂u, ə́ ntsə̌mbi sóghʼ mbô máp. Gháp kə́ ncí ngwô məcó məzə̂u tə nzáa mi nôghʼ-lâʼ gháp túŋú ńgó gháp ghʉ́ měi ghíʼ: ə́ sóghʼ pətə́tóʼ, ə́ sóghʼ məkhʉŋ gháp pə məkâŋ.

⁵Ə́ pə̂ yə́rə́, pəfalísia* gháp pə pəkeʼtə́-lə́pə́ʉ Mə̌usə̂i* cʉ̂ʼ ntúŋu Yěso ngô: «Ńté hó ngaŋə-jyêʼ-no* zô káa pə́ ngʉ̂ gháp zə̂u yi nôghʼ-lâʼ wághʼ ntúŋú ńgó pə ghʉ́? Ńté hó gháp zʉ̂ zə̂u pə́ tə́ sǒghʼ mbô máp ghíʼ nôghʼ-lâʼ wághʼ pə́ ntúŋú?»

⁶Yěso pwôr lə́ páp ngô: «Pəghaŋə nkoŋə mənyôghʼ, Esǎya ntsətə-nkəʉ Sê* lə tsuŋu ndǎʼ yo no ńté wéi, ə́ pə̂ ghíʼ pə́ ŋwaʼá cər ŋwaʼa Sê ngô: “Pye pwo laghʼ pə̂ ndaʼ məkəpə-ntsʉ máp ńgûʼtə ghâa, Lə́ káa pə́ ncôghʼ gháp ntə̂ʉ lə́ məŋ.

⁷Gháp ghûʼtə ghâa pə̂ fefe, ńté no məno mi gháp jyêʼ pye měi pə́ pə̂ məkwaŋtə pye-mə́soŋ[11].”

⁸Pei cʉ̌ʼ meʼ məntǎghʼ Sê, ə́ nkapə lə̂ nôghʼ-lâʼ wéi.»

⁹Yěso kʉ́ʼʉ ńdáʼ ngô: «Pei fǔ měʼ məntǎghʼ Sê, ə́ ncʉ́ʼ nkápə́ pə́ lə̂ nôghʼ-lâʼ wéi.

¹⁰Ńté no Mə̌usə̂i lə lâʼ ngô: “Ŋə́ məkuʼ tə́ gho gháp mə́ gho”, ə́ nkə́ ncí ndáʼ ngô: “Ŋuu lə̌i nzôutə́ tə́ ye kəʉ pə́ mə́ ye, pə́ jwî yé[12].”

¹¹Lə́ ə́ ngwǒ lə́ pei, pei lâʼ zéi ńgó ŋuu lə̌i ndáʼ lə́ tə́ ye kəʉ pə́ lə́ mə́ ye ngô: “Zə̂u yi mboʼ n ntə̂i ndághʼ ḿpfútə́ ghô cʉ́ʼ mbə́ pə́ yi poʼ Sê”, ə́ ndâghʼ ńdâʼ ngô: “ə́ cʉ́ʼ mbə́ pə́ yi a ghwǒ lə̂ ŋə́ lə̂ Sê”,

¹²mə́i pei wo pə́i ńgó káa a kə́ ngwô yé lə̂ mpfútə́ tə́ ye kəʉ pə́ mə́ ye ló.

¹³Pei cʉ̂ʼ ngʉ̂ yə́rə́, ə́ ndaghʼ nôghʼ-lâʼ wéi yi pei kə nuŋú pə́ pei mbə̂ghʼ tsâr Sê. Pei pou nkə́ ncí mə́ ngʉ̂ məcó məno mi zǎa ghíʼ měi.»

¹⁴Yěso pou nkə́ ncí fúŋ lâʼ, ə́ ndǎʼ lə́ páp ngô: «Pei pə́tsəm, pei tsúŋú nzʉ́ʼtə́ ńzúʼ no yi məŋ ndaʼ wéi.

¹⁵Có zə̂u yi mboʼ ə́ fû pə́ nzəm pěi, ə́ nkə́u lə́ ŋuu tə ncóghʼ lǒʼ* lə́ zʉ́ kâa pə̂ yé wó, yi ə́ fû cər ntə̂ʉ zʉ́ lə́ côghʼ lǒʼ* lə́ zʉ́.

¹⁶[Ŋuu lə̌i ngwô mətuŋú lə̂ ndághʼ nzúʼ no, a tsúŋu nzúʼ.]»

¹⁷Yěso pôu nyér lâʼ, ə́ kə́u ndə̂, ngaŋə-jyêʼ-no* yé laʼ lə́ zʉ́ ńgó a kéʼtə́ saghʼ-ləghaa wə̂ ə́ ndǎʼ gháp.

¹⁸A lâʼ lə́ páp ngô: «Njí ńgó pei zei, pei kə̌ mbyér mbə́ zéi pə̂ məghəghəʉ áa? Ńjí ńgó káa pei pə́ njî wéi ńgó zə̂u yi ə́ fû pə́ nzəm pěi ńkə̂u lə́ ŋuu, kâa pə̂ ncóghʼ yé lǒʼ lə́ zʉ́ áa?

¹⁹Ńté no mêi məzə̂u kâa kə́u yé pə́ cər ntə̂ʉ ngaŋ, ə́ kə̂u pə́ ləpəm zʉ́, ə́ fú yʉʼ wó ńkwár ńkə̂u korə.» Yěso laghʼ mətsâr mwo ndâʼ gháʼá ńgó məzʉ̂ mə́tsəm gháʼá ḿbə́ mi mboʼ pə́ zʉ̂.

²⁰Yěso kə̂ ncí ndáʼ ngô: «Ə zə̂u yi ə́ fû ntə̂ʉ ŋuu ńkwár lə́ côghʼ lǒʼ* lə́ zʉ́.»

²¹Məkwaŋtə tə́poŋ yaa fû pə́ cər ntə̂ʉ ŋuu mə́soŋ ńkwár, ə́ ncʉ́ŋə yé a fâʼ kwarə, ə́ ncʉ́ŋə a jû, ə́ ncʉ́ŋə yé a jwî ŋuu,

²²ə́ mə́ ncʉ́ŋə yé a ghʉ̂ məghap, ə́ ncʉ́ŋə yé a ghwô lóŋ nguʼú, ə́ ngwô ntə̂ʉ shʉ́ŋə́, ə́ ngʉ́ ŋuu cʉ̂ʼ ngaŋə-məfutə́, ə́ ngʉ̂ pye coŋ məmbəʉ máp, ə́ ngwo ŋwə́itə́, ə́ nkʉ́ʉ pye tə́poŋ, ə́ ngʉ ŋuu cʉ̂ʼ ngaŋə-ŋâʼtə, ə́ ngʉ ŋuu cʉ̂ʼ ghəghəʉ.

²³Ndwuŋ məno tə́poŋ mwo mə́tsəm fû pə́ ntə̂ʉ ŋuu ńkwátə́ ńcôŋ yé.

²⁴Yěso fú yʉʼ wó ndə̂r lə̂ cər paghʼə-ngoŋ Tîr, ə́ nkə́u cər cǒ ndə̂, káa pə́ kôŋ yé ńgó ŋuu jí ńgó a pə́ yé cər wó. Lə́ pə́ kə̂ njí jí.

²⁵Ńté no cǒ məngyě yi có zəghʼə tə́poŋ* lə pə́ mbə̂u môu ye yi məngyě zûʼ pə́ pə̂ nkʉ̂ʉ Yěso, a tôghʼ ncʉ́ŋə mbáatə́ yé ə́ núŋ məku zʉ́,

²⁶ə́ sʉ́ʉtə́ yé ńgó a zûŋ zəghʼə tə́poŋ* zêi, ə̂ kwâr lə́ môu ye. Məngyě wêi kâa lə pə̂ yé môu pəyúda. A lə pə́ môu Fenisî, ə́ cər ngoŋ Silə̂i.

²⁷Yěso lâʼ lə́ zʉ́ ngô: «Nyér ghəpə́ tsə́mbi nzʉ́ tə njwə́r, kâa pôŋ yé lə̂ mpfú məzʉ̂ ghəpə́ ə́ mǎʼ lə̂ pôu ngwʉ̂.»

²⁸Məngyě wêi pwôr lə́ zʉ́ ngô: «Ə̂ŋ Nde, o lâʼ no lə́nə́ʉ, lə́ pôu ngwʉ̂ pə́ ndaghʼtə mənyuʼ məzʉ̂ mǐ fû mbó ghəpə́ mpfúŋtə́ cʉŋə tə́pələ.»

²⁹Yěso cʉ̂ʼ ndáʼ lə́ zʉ́ ngô: «Mbə̂u yi o lǎghʼ ḿbwǒr tsâr yo ghʉ môu gho shwítə, pəʉ ghô lə̂ nzeʼ gho, ə zəghʼə tə́poŋ* kwar mə́ lə́ môu gho.»

³⁰A pə̂ʉ tə nkə́u nzeʼ, ə́ njwó môu nûŋ kə̌u, mə́i zəghʼə tə́poŋ* kwar mə́ lə́ zʉ́.

³¹Yěso fû lâʼ Tîr ə́ mə́ mbə̂ʉ lə́ nkaŋ lətʉŋ-nci Galilêi, ə́ nzáp ndə̂u yi ə́ lei Sidôŋ gháp pə cər lâʼ yi pə́ fûŋ ńgó Mətúsoŋ Ləghə̂m.

³²Pə́ laghʼ cǒ ŋuu ńtó ńcə́r yé, a pə̂ kʉʉ-tû, ə́ mbou káa pə́ tsâr yé tə ə̂ kwâr, ə́ sʉ́ʉtə́ Yěso ńgó a zápə́ mbô mé lə́ zʉ́ a shwítə́.

³³Yěso lâghʼ yé fú nou pye ńkwár, ə́ ncóghʼ pəshí-mbô pé cər mətuŋú mé, ə́ ndǎghʼ ndʉʉ mətê mé zʉ́ Yěso, ə́ nkə́u lə̂ʉ yé,

³⁴ə́ mbəʼə́ nyôghʼ mé ńnáŋ tʉ́, ə́ nkóʼó Zəghʼə, ə́ ndáʼ ngô: «Efáta!» Ə́ ndaghʼ ndâʼ ngô: Tsóʼó!

³⁵Mətuŋú mé lêi-lěi ntsóʼó, lə̂ʉ yé kéʼe, a jî lə̂ ntsár shʉʼʉ.

³⁶Yěso lâʼ lə́ pye pi gháp yǎa ndǎghʼ yé ntó ngô: «Koo pei kʉʉ tə ŋuu zûʼ.» Lə́ ə́ ntǒʼ gháp tə nkə́u ghó, gháp kə̂ mə́ ndêʼtə leʼtə́.

³⁷Pye pə́tsəm zúʼ, ə́ fú ndyár tə ndáʼ ńgó a kə̌ ngʉ̂ yé pə̂ məno shʉʼʉ. Ə́ ngʉ pəkʉʉ-mə́tuŋú zûʼ yʉʼ mbaa pəcípə́uʼ tsâr.