Read Ngombale Lúʼkáasʉ 10 Bible Online

Lúʼkáasʉ 10 - Ngombale bible

Lúʼkáasʉ 10

¹Zêi no lei yə́rə́, Yěso tsôʼ pəcó pye ntsap pwô lə̂ mə̂m-saambwô ńtə́u gháp pə́pwô pə́pwô, ńgó gháp pə́ mbi, ə́ mbyə́ghʼ cər məlâʼ gháp pə mətúsoŋ mi a wo lěi wó.

²Ə́ ndǎʼ lə́ páp ngô: «Məzʉ̂ záa nkâʼ, lə́ pəpyě ńŋə́ ndə̂ khwôghʼ. Pei sʉ́ʉtə́ ngaŋə nkâʼ ńgó a kʉ́ʼʉ́ pəghaŋə-faʼ nkâʼ lə̂ ndôghʼ məzʉ̂ mei.

³Pei tu! N ntə̂u wéi gháʼá ghíʼ məndənzʉ təcər pənye-njwi.

⁴Koo pei pyê nkâp, koo pei pyê paa, koo pei pyê məlaŋə́ lə̂ ndághʼ ńkə́pə́ məcó. Koo pei kə̂u laŋə́ ntə́ʉ lə̂ ntsêʼtə́ ŋuu.

⁵Ndə̂ yi pei tsə̌mbi ńkə́u cər wó, pei pə́ ntsêʼtə pye, pei lâʼ ngô: “Mbwórə pə́ ndə̂ yaʼa.”

⁶Ŋuu mbwórə tə́i mbə́ cər wó, mbwórə zêi kə̂u lə́ zʉ́; ə́ nkə́ ndə́iʼ pə́ cər wó po, mbwórə zei pə̂ʉ ńkə́u lə́ pei.

⁷Pei kə́ cî pə́ ndə̂ wei, ə́ nzʉ́ mbou nó zə̂u tsəm yi pə́ ŋə́ lə́ pei wó ńté ńgó ngaŋə-faʼ ghwo lə̂ mpfú məntsoʼó-faʼ mé. Koo pei kwâr ndə̂ zei ńgwó ńkə́u yi ndeʼe.

⁸Túsoŋ tsəm yi pei kə̌u wó tə pə́ pfû wéi, pei zʉ́ zə̂u tsəm yi pə́ ŋə́ lə́ pei.

⁹Pei ghʉ́ pəghou pi ə́ pə́ wó shwítə́, ə́ mbou ndáʼ lə́ páp ngô: ləfou Sê cʉ́ŋə́ mə́ tə mbáatə́ wéi.

¹⁰Lə́ túsoŋ yi pei kə̌u wó pə́ lə̂ʼ lə̂ mpfú wéi, pei wó ndəu məzǎa ńdǎʼ ngô:

¹¹Paghʼ pfər gháʼá pəpə́ lâʼ zéi yi ə́ yǎa mbátə́ məku paghʼ, ə́ mbághʼə́ ńŋə̂ lə́ pei. Lə́ pei póu ntsuŋú njí ńgó Ləfou Sê cʉ́ŋə́ mə́ tə mbáatə́.

¹²Məŋ ndâʼ wéi ńgó: Ə́ láʼ pə́ leʼé yi Sê wo nzáʼ kôr təcər páp pə pye-mə́soŋ, ngwôʼ pye pi gháp pə́ túsoŋ wêi záa ndêi yi pye túsoŋ Sodôm.

¹³Ndou wə́ tû pei pye Korazêŋ! Ndou wə́ tû pei pye Betsayída! Ńté ńgó mənkəʼə-məno mi ə́ lə leitə́ təcər pei lə ghíʼi ńdêitə́ pə́ mbi pye Tîr mbaa mbi pye Sidôŋ, mə́i gháp kə láʼ mə́ nkə́p cǐ záp, ə́ ngwér məpaa ndághʼ ńnyáŋ cər pfû.

¹⁴Ə̂ zə̂u yi ə́ ghʉ̌, ə́ láʼ pə́ leʼé yi Sê wo nzáʼ kôr təcər páp pə pye-mə́soŋ, zei ngwôʼ lêi yi pye túsoŋ Tîr mbaa yi pye túsoŋ Sidôŋ,

¹⁵ə́ ngwo lə́ pei pye Kapérnawûm, pei kwaŋ zéi ńgó pei táa kóʼ tə kə́u tʉ̌-lə́pû mo? Ə ngə́, pə́ táa shúʼú wéi, pei shíʼ tə nkə́u lâʼ pəpfû-sê.»

¹⁶Yěso nkə̂ ncí ndáʼ lə́ ngaŋə-jyêʼ-no yé ngô: «Ŋuu lə̌i nzúʼ tsâr zéi, mə́i a zûʼ gháʼá pə̂ tsâr zâa; ə́ mbou ndə̂ʼ lə̂ mpfú wéi, mə́i ngaŋ lə̂ʼ gháʼá pə́ ghâa; ŋuu póu ndə̌ʼ lə̂ mpfú ghâa, mə́i ngaŋ lə̂ʼ gháʼá lə̂ mpfú ŋuu yi a lə tə́u ghâa.»

¹⁷Ngaŋə-jyêʼ-no zêi ntsap pwô lə̂ mə̂m-saambwô laghʼ lətsei ńkwó ńdáʼ lə́ Yěso ngô: «Ə́ Nde, paghʼ kə kə́u ndǎghʼ ləjôghʼ zô sáʼ məzəghʼə tə́poŋ gháp zûʼ ntsʉ wághʼ!»

¹⁸Yěso pwôr lə́ páp ngô: «N nkə jwó ghíʼ Sə́tə fû tʉ̌-lə́pû ḿpfúŋ ńgó ŋwâŋ ghíʼ nyǐ-mbʉŋ lə̂.

¹⁹Pei zûʼ: N nkə ŋə́ wéi mətəʉ lə̂ ndághʼ ńŋə̌i ndəu mənô gháp pə pəmə́ngáa-tə́fuʼ, mbaa ndəu mətəʉ ngaŋə-mbəu mə́tsəm tə lə́u có zə̂u ghʉ yé wéi po.

²⁰Lə́ koo pei tsêi ńté no məzəghʼə tə́poŋ zúʼ ntsʉ wéi; pei tsêi ńté pə́ no ńgó pə́ ŋwaʼa mənyôghʼ méi tʉ̌-lə́pû.»

²¹Yěso pyêr mə́ ndâʼ no zêi lǎʼ, Zəghʼə Ndêi-lěi ghʉ a laghʼ tə́koʼ lətsei ńdáʼ ngô: «Ô Tə́ ghâa, gho Tsəpye yi o ghwǒ lə́pû gháp ndesé, n ŋə̌ nkhwo lə́ gho ńté ghíʼ o kə nyárə məghəghəʉ zə̂u, ə́ mbǒu ndwô zěi mbó pənjino mbaa mbó pye pi gháp kə jyéʼ jîno. Ə̂ŋ Tǎa, gho lə̂ kə kə́ nkóŋ ńgó ə̂ pə́ yə́rə́.»

²²Yěso pou nkə̂ ncí ńdáʼ ngô: «Tə́ ghâa lə côghʼ zə̂u tsəm mbó məŋ. Káa cǒ ŋuu pə́ njî yé ŋuu yi Môu pə̌ zʉ́ tə ndyéʼ Tə́. Káa cǒ ŋuu póu nkə́ mə́ njî yé ŋuu yi Tə́ pə̌ zʉ́ tə ndyéʼ Fou mbaa pye pi Fou kǒŋ lə̂ nkêʼ gháp Tə́ ye.»

²³Ə́ mbou shərə́, ə́ ncwǐ ngaŋə-jyêʼ-no yé, ə́ ndǎʼ lə́ páp ngô: «Pêi pəndʉʉ-mboŋ ńté ghíʼ pei pə̌ njwô zə̂u yi pei jwô lo!

²⁴Ńté ńgó pətsətə́-nkəʉ Sê gháp pə pəfou tə nzáa lə tsâa lə̂ njwó zə̂u pei jwô lo, káa jwô gháp; ə́ ntsáa lə̂ nzúʼ no yi pei zûʼ lo, káa zûʼ gháp.»

²⁵Cǒ nkeʼtə-ləpə̌ʉ Mə̌usə̂i lêsê mə́ ndou ńdághʼ tsâr ngǒu Yěso, ə́ ndáʼ ngô: «Cícye, tə mboʼ n ngʉ̂ gháʼá tə ndáʼ ngwô zâa ləcwôr tə me?»

²⁶Yěso pwôr lə́ zʉ́ ngô: «Ə́ pə́ cər ŋwaʼa ləpə̌ʉ wághʼə mbə́ ńgó hó? O fûŋ zô ńzúʼ pə́ ńgó ho?»

²⁷A pwôr ngô: «O ghwo lə̂ nkóŋ Nde Sê zô lə̂ ntə̂ʉ ghô tsəm, lə̂ Zəghʼə zô tsəm, lə̂ mətəʉ mô mə́tsəm, mbaa lə̂ kwaŋtə zô tsəm; ə́ mbou nkóŋ fə̌r gho ghíʼ o kôŋ tû-mbəʉ zô.»

²⁸Yěso lâʼ lə́ zʉ́ ngô: «O pwor shʉʼʉ. Ghʉ̌ yə́rə́, ə́ ndáʼ ngwó ləcwôr tə me.»

²⁹Nkeʼtə-ləpə̌ʉ wêi pə̂ ndôu lə̂ nyárə́ ńgó a wo ndʉŋ-ndʉŋ, ə́ ntúŋú Yěso ngô: «Fə̌r ghâa gháʼa mbə́ wǒ?»

³⁰Yěso kə̂ ncí ndáʼ ngô: «Cǒ ŋuu lǎʼ fú Yelúsalêm mə́ shíʼ ńdə́r lə́ Yeríko, pətsǒŋ kə̂u ngôu yé laŋə́-ndə̂u ḿpfú zə̂u pə́ tsəm, ə́ sǎr məndǐ mé, ə́ sə́u yé tə a tə̂ʉ lə̂ nkwʉ́ gháp mêʼ yé sê yʉʼ wó ńdə̂r gháp.

³¹Cǒ nuŋu-poʼ Sê kə̂ mə́ nzâp yé wêi ndə̂u, ńtó tə kwâr lə́ ŋuu wêi, ə́ mbaŋtə́ ńdéi lə̂ có ndyə́ghʼə́ laŋə́ ə́ ndə̂r yé.

³²Cǒ ŋuu ngər-ndə̂ Levî ntô tə nkə́u yé yʉʼ wó lə́wó, ə́ njwó ŋuu wêi, ə́ ndwóʼtə́ yé ńdéi lə́ có ndyə́ghʼə́ laŋə́ ńdə́r yé.

³³Lə́ cǒ ŋuu Samalə̂i yi a lə kə́ mə́ nzâp yé wêi ndə̂u ngwô ləŋəi tô tə kə́u mbəʉ ŋuu wêi, ə́ njwó yé, məjʉ̂ŋ mé kô yé.

³⁴A cʉ́ŋə mbáatə́ yé, ə́ sóghʼ məfʉ̌ŋ mé, ə́ ndǎghʼ məfu ńtsə̂ʼ, ə́ ndǎghʼ zə̂u ndǐ ńkə́r, ə́ khwǒr yé ndəu nye yi a yǎa ŋə̌i mə́u, ə́ ndǎghʼ yé ńdə́r lə́ ndə̂ pəghəʉ, ə́ ngʉ́ pə́ tsûʼ yé.

³⁵Nzʉ̂ fóghʼ, a ŋə̂ məpaghʼ nkâp mə́mbwô lə́ ngaŋə ndə̂ pəghəʉ ə́ ndǎʼ lə́ zʉ́ ngô: Pápə́ ŋuu wo shʉʼʉ, o lə̌i ncʉ́ʼ nzəm ńcóŋ nkâp yo tə mé, o kʉʼʉ cǒ mə́u, ńjí ńgó n ntǎa mə́ mbə̂ʉ nzəm ə́ ŋə́ lə́ gho.

³⁶Yěso lâʼ yə́rə́ tə ə́ kuʼ, a túŋu ngô: Warə́ ŋuu lə́ pye pwo pə́tárə́, gháʼa ḿbə́ mbó gho ḿbə́ fə̌r ŋuu wo yi pətsǒŋ lə ghǒu yé lo?»

³⁷Nkeʼtə-ləpə̌ʉ wêi pwôr ngô: «Â ŋuu yi a lə tsáa məjʉ̂ŋ mé.» Yěso cʉ̂ʼ ndáʼ lə́ zʉ́ ngô: «Tu nkə́ ngʉ̂ zô pə́ yə́rə́.»

³⁸Yěso gháp pə ngaŋə-jyêʼ-no yé pə̂ laŋə́ mə́ ndə́r, a kə̂u cər có lâʼ, cǒ məngyě yi pə́ fûŋ yé ńgó Máatə pfû yé ndə̂ zʉ́.

³⁹Máatə lə ghwo fə̌r ye cǒ yi məngyě, ləjôghʼ yé pə̂ Mǎyaa. A lə tó ńnyáŋ mbəʉ Yěso mə́ nzûʼ tsâr yé.

⁴⁰Máatə cʉ̂ʼ mbə́ ndə̂ mə́ ntáŋə zə́ghʼə́-zʉ́ lə̂ ntsúŋú məzʉ̂, ə́ ntó ńdáʼ lə́ Yěso ngô: «Ə́ Nde, kâa pə́i mə́ ndaʼ yé gho có zə̂u ghíʼ Mǎyaa nyěr məfaʼ mə́tsəm lə́ məŋ lo áa? Lǎʼ lə́ zʉ́ ńgó a pfútə́ ghâa láa!»

⁴¹Nde pwôr lə́ zʉ́ ngô: «Máatə, Máatə, o pə̌ mbûʼ mbəʉ zô ńté məzə̂u tə nzáa.

⁴²Lə́ tâʼ zə̂u pə́ wó mbə́ yi lətəi-ndwuŋ. Mǎyaa kâŋ zə̂u shʉʼʉ yi mboʼ ŋuu fû yé mbó zʉ́ ḿpfú po.»