Read Ngombale Lúʼkáasʉ 11 Bible Online

Lúʼkáasʉ 11 - Ngombale bible

Lúʼkáasʉ 11

¹Yěso lə pə̂ có leʼé, ə́ mbə̂ có yʉʼ mə́ sʉ̂ʉtə Sê. Ə́ sʉ́ʉtə́ tə nyér, cǒ ngaŋə-jyêʼ-no ye lâʼ lə́ zʉ́ ngô: «Ə́ Nde, jyéʼ wághʼ lə̂ sʉ́ʉtə́ Sê ghíʼ Jâŋ lə kə́ njyéʼ ngaŋə-jyêʼ-no yé lə́wó.»

²A lâʼ lə́ páp ngô: «Pei lə̌i mə́ sʉ̂ʉtə Sê, pei lâʼ ngô: Tǎa! Ghʉ̌ pye-mə́soŋ ghúʼtə́ ləjôghʼ zô, mbǒu ngʉ́ ləfou zô tó!

³Pə́ leʼé tsəm, ə́ ŋə́ mághʼ məzʉ̂ mi ə́ wo kǔʼ lə́ paghʼ;

⁴Lyəghʼə́ məfaa waghʼ, ghíʼ paghʼ zághʼ lə́wó pə́ ndyəghʼə mi pye ghʉ̌ lə́ paghʼ. Koo pôu mbə́i paghʼ pfûŋ cər nkwaʼtə.»

⁵Yěso pôu nkə́ ncí ndâʼ lə́ páp ngô: «Cǒ ŋuu lə́ pei lə̌i ngwô sə̌u ye, ə́ ngwǒ nzeʼ zʉ́ ntəʉ-twûʼ ə́ ndǎʼ lə́ zʉ́ ngô: Ə sə̌u, fǒ ghâa məyʉʼ mbəpə́ pâa,

⁶ńté ńgó cǒ sə̌u ghâa fǔ ləŋəi ntó ńkwátə́ ghâa ndə̂ pə̂ mpfu wo, m mbôu káa ghwô ghâa có zə̂u yi mboʼ n ndaghʼ ńdí yé.

⁷Sə̌u ye wêi póu fú cər ndə̂ mbwǒr lə́ zʉ́ ngô: Koo kə̂ ngághʼə́ ghâa, n ntsághʼə mə́ ntsʉ ndə̂ ghâa, paghʼ pə ghəpə́ zâa nûŋ mə́ wághʼ; mboʼ n nkə̂ ndê ghâa sê mpfu wo tə ŋə́ mbəpə́ pâa lə́ gho po.

⁸Məŋ ndaʼ wéi lə́nə́ʉ, ə́ lə̌i mbə́i ndə̌iʼ pə́ pə́ yi mboʼ a lâghʼ yé no yi a pə̌ sə̌u ye ńdésê ŋə́ məyʉʼ mbəpə́ pâa lə́ zʉ́ po, mə́i a kə́ lě pə́ sê ńŋə́ ńté ghíʼ sə̌u ye kə̌ mə́ fárə́ ndôu yé lóu.

⁹Ə́ pə̂ yə́rə́, m mə̂ ndâʼ wéi ngô: Pei lóu, pə́ wo ŋə́ lə́ pei; Pei lôu, pei wo jwó; Pei púʼtə́ ntsʉ ndə̂, pə́ wo tsóʼ ŋə́ lə́ pei.

¹⁰Ńté ńgó ŋuu lə̌i ndóu, mə́i pə́ wo ŋə́, ə́ ndǒu, mə́i a wo jwo, ə́ mbou mbúʼtə́ ntsʉ ndə̂, mə́i pə́ wo tsóʼ ńŋə́ lə́ zʉ́.

¹¹Ə́ wə́ təsoŋ pei pətə́ ghəpə́ mboʼ warə́ tə́ môu ŋə̂ nô lə́ môu yé mpfu yi a lǒu yé shû?

¹²Kəʉ môu yé póu ndóu yé ləpəu ngə̂p, mə́i a kə́ myághʼə́ ŋə́ mə́ngáa-tə́fuʼ lə́ zʉ́ mo?

¹³Tə pei pi pei lâp məno tə́poŋ lə̌i njí ə ŋə́ məzə̂u shʉʼʉ lə̂ ghəpə́ zéi, mə́i Sê yi a wə́ tʉ̌-lə́pû wo ghʉ̌ ghaʼá poŋə́ tí tə́ ŋə́ Zəghʼə Ndêi-lěi lə́ pye pi gháp lôu yé zěi?»

¹⁴Yěso lə pə́ nzûŋ có zəghʼə tə́poŋ yi lə lǎghʼ cǒ ŋuu ńgʉ́ cípúʼ. zəghʼə tə́poŋ zêi lei tə kwâr, cípúʼ wêi jî lə̂ ntsár, lâʼ jwô yə́rə́, ə́ kə́ʼə gháp gháʼate.

¹⁵Lə́ pəcó pye təcər páp pə̂ ntsátə́ ńdâʼ ngô: «Belzebûl yi a pə̌ tə́-ndə̂ pələʉ-sê lə̂ ŋə̂ yé mətəʉ lə̂ ndághʼ ńzǔŋ pələʉ-sê.»

¹⁶Pəcó pye laghʼ lə̂ ńkwáʼtə́ yé, ə́ ndǎʼ lə́ zʉ́ ńgó a nyárə́ gháp ləiʼi yi pə́ nyarə ńgó mətəʉ mé fú tʉ̌-lə́pû.

¹⁷Ghíʼ Yěso lə pə́ njî məkwaŋtə máp lə̂, a lâʼ lə́ páp ngô: «Pye tâʼ lâʼ lə̌i shə́rə́ mə́ ndwóʼo təcər páp, mə́i zêi lâʼ wo mě, məndə̂ kə́mə́ ńcwə́rə́ lə̂ məcó.

¹⁸Sə́tə lə̌i mbóu shərə́ mə́ ńdwóʼo mbəʉ ye, mə́i ləfou yé wo ghʉ̌ ghaʼá poŋə́ títə́ mě? Ghíʼ pei lâʼ ńgó n ndaghʼ pə̂ mətəʉ Belzebûl nzûŋ məzəghʼə tə́poŋ lo.

¹⁹N ndə̌i nyáa mə́ ndâghʼ pə̂ mətəʉ Belzebûl nzûŋ pələʉ-sê, mə́i zéi ghəpə́ ghíʼi ncʉ̂ʼ ndâghʼ záp pə̂ mi wó ńzûŋ pələʉ-sê? Ə̂ zə̂u yi ə́ ghʉ̌ tú mbəʉ záp lə́ táa fěʼ wéi.

²⁰Lə́, ə́ lə̌i nkə́ mbə́ yi n ndaghʼ pə̂ mətəʉ Sê ńzûŋ məzəghʼə tə́poŋ, ə́ pə̂ ńgó Ləfou Sê tô mə́ tə kwátə́ wéi.

²¹Ŋuu lə̌i ngwô mətəʉ, ə́ mbou ngwô məzə̂u ntso mé, ə́ mbáp ndə̂ ye shʉʼʉ, zə̂u pé pə̂ tə́ kəu.

²²Lə́ cǒ ŋuu yi a tə̌i nděi yé pôu ntó ńzʉ́ yé, mə́i a wo ghǒu məzə̂u mé mi a laghʼ ḿbâp yʉʼ pfú ghâptə́.

²³Ŋuu lə̌i ndə́iʼ pə́ nzəm məŋ po, ə́ pə̂ ńgó a pə̌ ndwóʼo ghâa. Ŋuu póu ndə̌iʼ pfútə́ ghâa lə̂ nkə̂itə́ pye páa po, mə́i a cʉ̌ʼ shaghʼə́ gháp shaghʼə́.»

²⁴Zəghʼə tə́poŋ lei tə kwâr lə́ ŋuu, ə́ ndə̌r lə̂ yʉʼ yi ə́ zə́pə́ zəpə́, ə́ ŋáa mbə́u ndôu lənyǎŋ. Ə́ ndə́iʼ jwó po, a cʉ̂ʼ ndáʼ ngô: «N ngwo pəʉ ghâa lə̂ ndə̂ məŋ yi n ndə kwǎr wó»

²⁵Ə́ mbə̌ʉ lə̂ cər wó, ə́ njwó mə́i pə́ kə zâghʼ ndə̂ mbou nkwə̂i,

²⁶mə́i a wǒ, ə́ lǒu pəcó pələʉ-sê saambwô pi gháp péi nděi yé, gháp pə pǎp nâa mbə̂ʉ ńtó ńnyáŋ ndə̂ wei, ngwôʼ ngaŋ fû nkʉʼʉ́ ńgáʼ nděi ghíʼ ə kə yǎa mbə́.

²⁷Yěso lə pə́ ntsâr yə́rə́, cǒ məngyě fû nou lâʼ, ə́ ndǎʼ lə́ zʉ́ ngô: «Ndʉʉ-mboŋ məngyě yi a lə jí ghô ə́ mbǒu nóŋə́ ghô!»

²⁸Lə́ Yěso pwôr ngô: «Pəndʉʉ-mboŋ pəi mbə́ pə́ pye pi gháp zûʼ tsâr Sê mbou ngʉ̂ ghíʼ ə́ pə́ ntúŋú.»

²⁹Lâʼ lə pə́ nkóʼ nzâa mbəʉ Yěso, a lâʼ lə̂ páp ngô: «Ngər pye-mə́soŋ pi mpfu wo, ə̂ yi tə́poŋ; gháp pə́ ntúŋu tâʼ ləiʼi nkəʼə-no, lə́ có ləiʼi yi mboʼ pə́ pou nyárə́ gháp tə ndyéʼ no yi ə́ kə ghʉ̌ Yənə́sʉ kâa pə̂ yé wó.

³⁰Ńté ńgó Yənə́sʉ lə pə́ tâʼ ləiʼi mbó pye Ninîvə gháʼá, Môu Ŋuu wo kə́ pə̂ yé tâʼ ləiʼi mbó ngər pye-mə́soŋ yi mpfu wo.

³¹Ə́ táa pə́ leʼé yi Sê pə̌ feʼ pye-mə́soŋ, Maa-fou pye ncʉ̂ŋ lêsê ńtə́ʉ mbi ngər pye-mə́soŋ yi mpfu wo, ə́ sáʼ gháp, ńté no a lə fú lə̂ ləlyəghʼtə́ ngoŋ ńtó lə̂ nzúʼ mətsâr jîno Salə́məu. Ə́ yo, cǒ ŋuu pou mbə́ yaʼa gháʼa tə ndêi Salə́məu, ə́ mə́ ndâʼ wéi no lə́ káa pei pə́ nzûʼ wéi.

³²Ə́ táa pə́ leʼé yi Sê pə̌ feʼ pye-mə́soŋ, ə pye Ninîvə lesê ńtə́ʉ mbi ngər pye-mə́soŋ yi mpfu wo, ə́ sáʼ gháp ńté ńgó pye Ninîvə kə kə̂p cǐ záp, ə́ ndeitə́ lə̂ tsár Yənə́sʉ. Ə́ yo, cǒ ŋuu pou mbə́ yaʼa gháʼa tə ndéi Yənə́sʉ, ə́ mə́ ndâʼ wéi no lə́ káa pei pə́ nzûʼ wéi.»

³³«Káa pə lə̌i cûʼ yé lâm lə̂ ndwô wěi kəʉ pə lə̂ ndághʼ nkaa ńkə́ptə́ lo. Pə́ cûʼ lâm tâghʼ pə́ ndəu ləʼtə yé, ə́ njí ńgó ŋuu ghí pə́ kə̂u ndə̂, a pə̂ nkêʼ yʉʼ.

³⁴Nyôghʼ mô gháʼá mbə́ lâm yi a keʼ mbəʉ zô. Nyôghʼ mô lə̌i mbə́ shʉʼʉ, mə́i mbəʉ zô tsəm wo pə́ cər keʼ; lə́ nyôghʼ mô póu ndə̌iʼ pə́ jwô yʉʼ po, mbəʉ zô ntsəm pə̂ cər nzə̌m.

³⁵Ghíʼ ə́ kə́ mbə́ yə́rə́ lə̂, páa ńgó koo keʼ yi pə̌ ndəu gho shə́rə ncʉ́ʼ nzə̌m.

³⁶Mbəʉ zô lə̌i mbə́ cər nkeʼ tə́ có yʉʼ lə́iʼ pə̂ yé cər nzə̌m po, mə́i ə wo nǎa kěʼ yʉʼ ghíʼ lâm kêʼ laŋə́-ndə̂u pə́ tsuŋu njwó lə̂!»

³⁷Yěso lə tsár tə ngí myǎghʼ, cǒ ŋuu falísia ghə̂u yé ńgó a tó nzeʼ zʉ́ ńzʉ́ zə̂u. Yěso wo nyáŋ sê mə́ nzʉ̂ zə̂u.

³⁸Ŋuu falísia wêi jwô ghíʼ Yěso jǐ lə̂ ńzʉ́ zə̂u tə́ tsə̌mbi sóghʼ mbô, ə́ fû nkə́ʼə́ yé gháʼate.

³⁹Nde lâʼ lə́ zʉ́ ngô: «Pei pəfalísia, pei nyêr cər tə́tóʼ, gháp cər kâŋ, ə sôghʼ zéi pə̂ nzəm pěi, lə́ tsǒŋ gháp pə məno tə́poŋ pə̂ lə́ pei tə ndóghʼó lóghʼó.

⁴⁰Yêe lə́ pei ghə̂ʉ ée! Káa Sê yi a kə tsuŋú nzəm pěi lə̂ kə kə́ mbóu ntsúŋú nzəm yi cər wó mo?

⁴¹Pei ŋə́ zə̂u yi wə́ cər pətə́tóʼ péi gháp pə məkâŋ méi lə̂ pəpûŋ, ə̂ lêitə́ yə́rə́, zə̂u péi tsəm léi.

⁴²Pei pəfalísia, ndou wə́ tú pei! Pei ghaptə zə̂u péi tə mbaa məntû nyêʼ méi yʉʼ ləghə̂m, ə́ ŋə̂ tâʼ lə̂ Sê; lə́ káa pə́ koŋ wéi yé, ə́ mbou káa kə́ pə́ ghʉ wéi məno shʉʼʉ lə́ pye-mə́soŋ ghíʼ Sê pə̌ nkǒŋ; lə́ ə́ pə̂ məzə̂u mi pei yǎa ngwǒ lə̂ ngʉ̂ měi tə́ lyəghʼə məcó.

⁴³Pei pəfalísia, ndou wə́ tú pei! Pei kə̂u məndə̂ cûʼtə, ə́ nkâŋ méi məyʉʼ pə́ mbi, mbou nkôŋ zéi pə́ ńgó pə tə́ʉ ndəu məzǎa ndághʼ məkuʼ ntsêʼtə́ wéi.

⁴⁴Ndou wə́ tú pei! Ńté ńgó pei wə́ pə́ ghíʼ mətû-lə́shi mi káa ŋuu pə́ njwô yé, ə́ mbǒu ŋə̂i mə́u pə́ tə pə̌ njí, ə́ nkhwor məlǒʼ.»

⁴⁵Cǒ nkeʼtə-ləpə̌ʉ Mə̌usə̂i lâʼ lə́ zʉ́ ngô: «Cícye, o jǐ ńgó o zoutə gháʼá wághʼ zághʼ lə́wó?»

⁴⁶Yěso pwôr ngô: «Tə mbaa pei zéi pəkeʼtə́-lə́pə́ʉ Mə̌usə̂i, pêi pəndʉʉ-tə́poŋ, ńté ńgó pei tâghʼ pyeʼ jwǐ tû pye-mə́soŋ, ə́ mbou káa pə̂i wéi lə̂ mbə́i ndǎghʼ pə́ lətû shípo wei ntóutə́ ńdághʼ ḿpfútə́ gháp.

⁴⁷Ndou wə́ tû pei pi pei pôu mətû-lə́shi pətsətə́-nkəʉ Sê, lə́ mə́i pətə́ péi lə́ lə kə́ njwítə́ gháp.

⁴⁸Pei laghʼ ńnyárə gháʼá ńgó pei pə̌i zə̂u yi pətə́ péi lə ghʉ̌ zěi, ńté ńgó gháp kə jwítə pətsətə́-nkəʉ Sê, pei cʉ̌ʼ mə́ mbôu mətû-lə́shi máp!

⁴⁹Ə̂ zə̂u yi ə́ ghʉ̌, Sê lə lâghʼ jîno ńdáʼ ngô: N ngʉ̌ tə́u pətsətə́-nkəʉ Sê gháp pə pəghaŋə-ntə̂u pâa lə́ páp; gháp ghí jwítə́ pəcó, ə́ ŋə́ pəcó ngwôʼ.

⁵⁰Ə̂ zə̂u yi ə́ ghʉ̌, pye pi mpfu táa ŋǎghʼ ləwʉ̂ pətsətə́-nkəʉ Sê pi pə́ lə jwítə gháp tə fú lənuŋú ngoŋ.

⁵¹Lə̂ fú lə́ ləwʉ̂ Abêl ngwó ńkə́u lə́ yi Sakalyê yi pə́ kə jwí yé lə̂ fú yʉʼ lənuŋú poʼ Sê, ə́ ngwo nkə́u ndə̂ Sê. Ə̂ŋ n ndâʼ wéi lə́nə́ʉ ńgó pye pi mpfu táa ŋǎghʼ məwʉ̂ mêi mə́tsəm.

⁵²Ndou wə́ tû pei pəkeʼtə́-lə́pə́ʉ Mə̌usə̂i, pei kə pfú kísʉ laghʼ ńtsóʼ ntsʉ ndə̂ jîno, káa kə̂u wéi, ə́ mbou mə́ nkêʼtə pye pi gháp pə́ koŋ lə̂ nkə́u.»

⁵³Yěso lə fú ndə̂ wêi nkwár, pəkeʼtə́-lə́pə́ʉ Mə̌usə̂i gháp pə pəfalísia záŋə lóŋ ńté yé, ə́ cʉ́ʼ mə́ ŋə́ʼtə́ ńtúŋú yé məno mbə̂u lə̂ mbə̂u.

⁵⁴Ə́ ŋə̂ʼtə yé yə́rə́, ə́ ndôu ńgó a wʉ́ no gháp lêitə́ mə́u, ə́ féi yé ńŋə́.