Read Ngombale Lúʼkáasʉ 12 Bible Online

Lúʼkáasʉ 12 - Ngombale bible

Lúʼkáasʉ 12

¹Yěso pə̂ ntsâr yə́rə́, lâʼ pə̂ nkʉ́ʼʉ́ ńkóʼ ńtô lə̂ mbəʉ zʉ́, yʉʼ fû fárə́ tə pye pə̂ nyʉ̂ŋtə məku pəcó. A ghi pə́ lâʼ no lə́ lâʼ, ə́ tsə̌mbi ndáʼ lə̂ ngaŋə-jyêʼ-no yé ngô: «Pei laghʼə́ tû zéi, ə́ mbáa mvuŋ pəfalísia. Koo pei cʉ̂ʼ ngaŋə-koŋə-mənyôghʼ ghíʼ páp.»

²Ə zə̂u yi ə́ lwǒ táa kwǎr sʉ̂ lâʼ. No tsəm yi pə́ lóʼo cər ntsəm, pə táa njí.

³Ə̂ zə̂u yi ə́ ghʉ̌, no tsəm yi pei lə lǎʼ cər nzə̌m, pə táa zúʼ ntə̌ʉ-nəu, no tsəm yi pei pǒu ntsághʼə́ pəlûm ndə̂, ə́ nyáŋ cər wó ńtsə́mtə́ mətuŋú pye, pə táa tə́ʉ məntsoʼ ndə̂ tsətə́.

⁴Məŋ ndaʼ gháʼá wéi pei pəsə̌u pâa ńgó koo pei pôghʼ wéi pye pi gháp jwî záp pə̂ mbap mbəʉ, lə́ káa pǒu kuʼ gháp ngʉ̂ có zə̂u tə ndyéʼ zêi zə̂.

⁵N ngwo nyarə́ wéi ŋuu yi pei ghwǒ lə̂ mbóghʼ yé. Pei póghʼ pə́ ndaʼ Sê, ńté no mboʼ a jwî ŋuu, mbou nkûʼ lə̂ maʼ yé mǒghʼ.

⁶Pə́ pə́ fəi məpuŋu. Lə́ tə pə́ lə̌i nkə́itə́ pi pə́taa ə́ fə̂i pə́ pfû kwaʼ mboŋə́ hó mə́u? Lə́ Sê kâa pə́ ndyə́ghʼə yé cǒ ghap.

⁷Tə mbaa mənyuŋu tû méi mə́tsəm, ə̂ mi kwaʼá. Koo pei nyâŋ mbôghʼ wéi có zə̂u. Lətəi-ndwuŋ wei lei yi mbuŋu məpuŋu!

⁸Məŋ ndaʼ gháʼa wéi, ŋuu lə̌i ntə́ʉ mbi lâʼ, ə́ mbə́i ńgó â ngaŋə-jyêʼ-no ghâa, mə́i Môu Ŋuu ghʉ̌ tə̂ʉ yé mbi pəcwôʼ Sê, ə́ kə́ pə̂i yé ńgó â ŋuu ye lə́wó.

⁹Lə́ ŋuu póu ntə́ʉ mbi lâʼ, ə́ muŋú ghâa, mə́i Môu Ŋuu láʼ kə́ tə̂ʉ yé mbi pəcwôʼ Sê ə́ muŋú yé yé lə́wó.

¹⁰Ŋuu lə̌i ntsár tə́poŋ ńté Môu Ŋuu, mə́i mboʼ Sê lyəghʼə ńŋə́ lə́ zʉ́, lə́ ŋuu póu nzǒutə́ Zəghʼə Ndêi-lěi, mə́i Sê táa lyəghʼə yé ńŋə́ lə́ zʉ́ po.

¹¹Pə́ lə̌i ntáa mə́ ndâghʼ wéi ńdə́r lə̂ ńgwó fěʼ wéi məndə̂ cûʼtə pəyúda, ə́ mbi pəfou kəʉ pə́ mbi pəsǎʼ lâʼ, koo pei tsôʼtə wéi lə̂ mbə̂u yi pei kə́u wó lǎghʼ zǒŋ tû zéi tə mbaa pə́ lə̂ no yi pei kə́u wó lǎʼ,

¹²ńté ńgó Zəghʼə Ndêi-lěi táa pə́ mpfu wêi, ə́ jyéʼ wéi no yi pei wo lǎʼ.

¹³Cǒ ŋuu fû nou lâʼ ə́ ndǎʼ lə́ Yěso ngô: «Cícye lǎʼ lə́ fə̌r ghâa ńgó a gháptə́ məzə̂u mi tə́ waghʼ zʉ́ lə nyér, ə́ ŋə̂ mâa.»

¹⁴Yěso pwôr lə́ zʉ́ ngô: «Ə sə̌u, wǒ tsǒʼ ghâa lə̂ fêʼ məno méi, kəʉ pə́ lə̂ ngâp məzə̂u méi ńŋə́ lə́ pei?»

¹⁵Ə mbou ndáʼ lə́ ŋuu tsəm ngô: «Pei laghʼə́ tû zéi lə̂ nkə́ nyáŋ ntsâa pə̂ ngwô zə̂u, ńté ńgó káa ŋuu cî yé mbî ńté pə̂ məzə̂u mi a ghwǒ měi, tə mbaa ghíʼ a lə̌i mbə́i ngwǒ tə nkə́u pə́ ghó.»

¹⁶Ə́ ndǎʼ yə́rə́ tə ə́ kuʼ, a lâghʼ wo saghʼ-ləghaa ńdáʼ lə́ páp ngô: «Cǒ ngaŋə-zə̂u lǎʼ mbə́ wó, ə́ ntáa nyáŋ cǒ mpfu tə məzə̂u zə̂m nkâʼ zʉ́ gháʼate.

¹⁷A jî lə̂ nkwáŋə́ tû yé ngô: Tə n ngwo ghʉ̌ gháʼá lə̂ məzə̂u mâa? Kâa n ngwô ghâa yʉʼ yi mboʼ m mbyê měi núŋú wó.

¹⁸Ə́ ncʉ́ʼ ndâʼ ngô: M mə̌ njî ghíʼ n ngwo ghʉ̌ mpfu wo. N ngwo kə̌m mənkəi mâa mə́tsəm, ə́ cʉ́ʼ kə́r pə́ mi jwǐ, ə́ cóghʼ ngəsâŋ-ncʉ̂ŋ zâa gháp pə məcó məzə̂u mâa cər wó.

¹⁹Ə́ cʉ́ʼ pwórə́ nyâŋ ghâa kwáa ku zâa, ə́ lǎʼ lə̂ tû-mbəʉ zâa ngô: Ə sə̌u, o fǔ ngwǒ məzə̂u mi ə́ wo cí mənguʼ mənguʼ, pwórə́ nzətə ghô, ə́ nzʉ́ mbou nó, ə́ ntsěi ləcǐ-mbî gho!

²⁰Lə́ Sê lâʼ lə́ zʉ́ ngô: Ghəghəʉ yo, o wo kwʉ́ pə̂ lətwûʼ wo. Tə ndwuŋ məzə̂u mi o kəitə́ lo, ə́ wo cʉ́ʼ mi wó?

²¹Ə́ gháʼá ndaghʼ ńnyárə ghíʼ ŋuu yi a tsâp məzə̂u ntê pə̂ tû-mbəʉ yé, lə́ mbou mbə́ mbi Sê, káa ghwo yé có zə̂u pə̌.»

²²Yěso kə̂ ncí ndâʼ lə̂ ngaŋə-jyêʼ-no ye ngô: «Ə̂ zə̂u yi ə́ ghʉ̌, m mə̂ ndâʼ wéi ńgó koo pei jwôghʼ nzʉ́ŋ ńté ləcǐ-mbî wei, ńté no zə̂u pei wo zʉ́, mbaa no ndǐ yi pei mǎʼ lǎghʼ pǒu mbəʉ zéi.

²³Ńté ńgó ləcǐ-mbî lêi məzʉ̂, mbəʉ pôu ndêi ndǐ.

²⁴Pei náŋ məngə́ŋâa ńjwó: Káa gháp pə̂ mbî gháp zə̂u, káa kə́ pǒu pə́ pyê gháp ŋə̂ ndə̂, káa ghwo gháp ntaŋ, káa kə́ ghwo gháp nkəi; lə́ Sê pôu mə́ nzághʼə gháp. Pei jí ńgó pei ghwo lətəi-ndwuŋ ndêi pəshʉ̌ŋ.

²⁵Tə mboʼ wǒ ŋuu lə́ pei cî ndə̂ nzʉ̌ŋ wó, ə́ kʉʼʉ́ məlǎp lə̂ ləcǐ-mbî ye?

²⁶Tə mə́ceʼé zə̂u lə̌i ngáʼ wéi, pei pôu mbûʼ mbəʉ zéi lə̂ pfuʼ məzə̂u ńté hó?

²⁷Pei náŋtə́ tə́toŋə́ lə̂ ləghěi nkâʼ ńjwó mbə̂u yi a lǎghʼ séi. Ləghěi wêi tə̌ʉ nkâʼ káa pə́ fâʼ yé, káa pǒu kə́ pə́ pâʼ yé ndǐ. Fou Salə́məu lə pə́ ngaŋə-zə̂u, lə́ káa láʼ ghwo yé ndǐ tə ə́ poŋ ghíʼ tə́toŋə́ wêi.

²⁸Tə mboʼ Sê mâʼ məndǐ shʉʼʉ gháʼa lə́ ləghěi yi a jwôghʼ ntə̂ʉ nkâʼ leʼé wo, ə nzʉ̂ pôu fóghʼ pə́ soʼ mâʼ mǒghʼ, mə́i a cʉ́ʼ tó lə́ pei mǎʼ zarə́ mbə̂u ndǐ? Yêe pə̂i-ntə̂ʉ zéi khwôghʼ ée!

²⁹Koo pei kə̂ njwóghʼ mbûʼ mbəʉ zéi ntê zə̂u yi pei wo zʉ́ tə mbaa pə́ yi pei wo nó.

³⁰Pətəpə̌i no Sê cər nzʉ̂ yo lə́ gháʼá ntáŋə tə́ kâa lə̂ ngwô məzə̂u mêi mə́tsəm. Lə́ ngwǒ lə́ pei, mə́i pei ghwo tâʼ Tə́ yi a pə̌ njî zə̂u tsəm yi ə́ pə́ tsə wéi.

³¹Pei lôu pə́ ndaʼ Ləfou Sê, ńjí ńgó Sê cʉ̌ʼ ŋə́ pfuʼ məzə̂u mei lə́ pei.»

³²Pye pâa, pei khwôghʼ lə́ koo pei pôghʼ wéi! Ńté ńgó Tə́ wei lə koŋ yé koŋə́, ə́ ŋə́ ləfou lə́ pei.

³³Pei fə̂i məzə̂u méi ńŋə́ nkâp zěi lə́ pəpûŋ. Pei tsúŋú pôu-paa pi tə láʼ ncóŋtə́ ńdaghʼ ńdóʼó nkâp zei, ə́ kəitə́ məfuʼ méi tʉ̌-lə́pû, ə́ yʉʼ yi mboʼ měi lâʼ mê yé wó leʼé có po, pətsǒŋ kuʼ gháp lə̂ njú po, lə́u saa kə̂ kûʼ yé lə̂ nzʉ́ po.

³⁴Ńté ńgó yʉʼ yi məfuʼ méi pə́ wó, ntə̂ʉ wéi wo kə́ pə̂ yé pə́ yʉʼ wó lə́wó.

³⁵«Pei tsuŋú mbəʉ zéi lə̂ faʼ, koo pei pə̂ghʼ pəlâm péi!

³⁶Pei pə́ ghíʼ pəghaŋə-faʼ pi gháp lê tə́ lê, ə́ mə́ nzʉ́ʼtə tə́-faʼ gháp yi a lə̌r lə̂ yʉʼ lətsei nzóʼ ghíʼ a wo kwó púʼtə́ ntsʉ ndə̂, gháp tóghʼ ntsóʼ.

³⁷Pəndʉʉ-mboŋ, ə̂ pəghaŋə-faʼ pi tə́-faʼ gháp ghǐ kwó, mə́i gháp kə́ lê gháp. Kwaʼ lə́nə́ʉ, məŋ ndaʼ wéi ńgó a wo tsuŋú mbəʉ ye, ə́ ghʉ̌ gháp nyáŋə́ sê lə̂ nzʉ́ zə̂u, â lî gháp.

³⁸A lə̌i mbə̂ʉ ntəʉ-twûʼ kəʉ pə́ nkôʼ-nzʉ̂, ə́ ntó ńjwó gháp pyér pə́ tə lê, mə́i gháp pəndʉʉ-mboŋ.

³⁹Pei tsúŋú nzúʼ: Ə́ tə́i ḿbə́ yi mboʼ ngaŋə ndə̂ jî mpfu yi ntsǒŋ wo tó túŋ ndə̂ ye, mə́i mboʼ a nyêr yé, a tô ḿbwóʼ ndə̂ ye po.

⁴⁰Pei zéi, pei tsúŋtə́ mbəʉ zéi ḿbáp, ńté ńgó Môu Ŋuu ghʉ̌ tó pə̂ mpfu yi káa pei yáa mə́ nzʉ̂ʼtə wéi yé.»

⁴¹Pyêh túŋu yé ngô: «Ə́ Nde, o pyêtə wo saghʼ-ləghaa gháʼa ńdâʼ pə́ lə́ paghʼ kəʉ pə́ lə́ ŋuu ntsəm?»

⁴²Nde pwôr lə́ zʉ́ ngô: «Ngaŋə-faʼ yi a zǔʼ ntsʉ tə́-faʼ ye mbóu njí no gháʼa mbə́ warə́? Yo cǒ tâʼ yi tə́-faʼ yé ghí lə̌r, ə́ ŋə́ faʼ lə́ zʉ́ ńgó â cʉ́ʼ mə́ mbâp nzeʼ, mbóu mə́ náŋtə pəcó pəghaŋə-faʼ, ə́ ŋə̂ gháp məzʉ̂ mpfu yi ə́ pə́ ntúŋú.

⁴³Tə́-faʼ wêi lə̌i ndáʼ ngí pə̌ʉ nzəm, ə́ njwó a pə́ fâʼ faʼ zêi shʉʼʉ, mə́i â ndʉʉ-mboŋ.

⁴⁴Məŋ ndaʼ wéi kwaʼ lə́nə́ʉ, tə́-faʼ wêi wo ghʉ̌ zʉ́ lə̂ cʉ̂ʼ mə́ nâŋtə zə̂u pé tsəm.

⁴⁵Lə́ ngaŋə-faʼ ye wêi lə̌i ncʉ́ʼ nzəm nkwâŋ ngô: Tə́-faʼ ghâa wo tóghʼ kwô yé po, ə́ ncʉ́ʼ nkə́ ndêi-lěi njí lə̂ sə́u pəcó pəghaŋə-faʼ tə́ cwǐ ŋuu, ə́ nzʉ́ zə̂u, ə́ nó məluʼ ḿbʉ́ʉ,

⁴⁶mə́i tə́-faʼ yé wêi wo woghʼə́ woghʼə́ nkwó leʼé yi kâa a yáa mə́ nzʉ́ʼtə yé yé, ə́ mpfu yi káa a yáa mə́ njî yé ńgó mboʼ a tô, ə́ zǔŋ yé a lə́r ńgwo ńjwó ngwôʼ ghíʼ pətəpə̌i no Sê.

⁴⁷Ngaŋə-faʼ yi a pə̌ njî faʼ yi tə́-faʼ ye pə̌ nkoŋ ńgó â fâʼ, lə́ káa faʼ yé, â yi pə́ táa sə̂u yé gháʼate.

⁴⁸Lə́ ngaŋə-faʼ yi kâa pə́ njî yé faʼ yi tə́-faʼ ye pə̌ nkoŋ ńgó â fâʼ, ə́ ngʉ̌ zə̂u yi mboʼ pə́ lêitə mə́u nsə́u yé gháʼate, â yi pə́ táa sə́u yé pə́ məyʉʼ. Pə́ lə̌i ŋə́ zə̂u lə́ ŋuu ə́ záa, mə́i pə́ táa kə́ túŋú yé ə̂ záa, pə́ póu nyér zə̂u zǎa lə́ ŋuu ńgó a pə́ náŋtə́, mə́i pə́ táa túŋú yé ə̂ záa ndêi yə́rə́.»

⁴⁹«Yěso pôu ndâʼ lə́ ngaŋə-ntə̂u yé ngô: N ndə tó lə̂ mâʼ mǒghʼ ndəu ndesé. M mbou mə́ ntsâa ńgó wěi fátə́ nkʉ́.

⁵⁰Pə́ pə́ ngwo nyǔʼ məŋ cər ngwôʼ. M mbou mə́ ntsâa ńgó zêi leʼé fátə́ ntó.

⁵¹Koo pei kwaŋ ńgó n nkə lâghʼ mbwórə ńtó ndəu ndesé, n nkə laghʼ pə̂ ghaptə ńtó.

⁵²Lə̂ fú mpfu wo, ghaptə wo pə́ təcər pye pə́taa pi gháp pə́ cər tâʼ ndə̂. Pi pə́tárə́ ghí pə́ paa pi pə́pwô, pi pə́pwô kə́ mə́ mbâa záp pi pə́tárə́ lə́wó.

⁵³Tə́ môu ghí pə́ lə̂ʼ lə̂ nzúʼ no môu ye yi mbiŋə, môu mbiŋə pə́ ndə̂ʼ lə̂ nzúʼ no tə́ ye. Maa-môu ghí pə́ ləʼ lə̂ nzúʼ no môu ye yi məngyě, môu-məngyě pə́ ndə̂ʼ lə̂ nzúʼ no mə́ ye, ngwě môu ghí pə́ lə̂ʼ lə̂ nzúʼ no mə́ ndə̂u yé, mə́ ndə̂u pə́ ndə̂ʼ lə̂ nzúʼ no ngwě môu.»

⁵⁴Yěso kə̂ ncí ndáʼ lə́ lâʼ ngô: «Pei lei tə njwó məlâm kôʼ ntsǒ-nəu, pei lâʼ ńgó mbʉŋ wo ló, ə kə̂ ndó,

⁵⁵ə́ mbou njwó kəfwor shə́rə́ tə ncʉ́ʼ fû pə́ lə̂ sʉ̂ yi ncʉ̂ŋ ə́ ncʉ̂ʼ yʉʼ, pei lâʼ ńgó yʉʼ pə́ ngwo ntǒu wó, ə́ kə̂ ntôu.

⁵⁶Pəsap-ndwô-fʉ́ŋ, pei nâŋ ləfaŋ gháp ndesé ńjî zə̂u yi ə́ pə́ ngwo nděi wó, ńté hó pei pou njwó məno mi ə́ pə́ kwatə mpfu wo, káa kə́ kûʼ wéi njí no yi ə́ laghʼ ńdáʼ?

⁵⁷Ńté hó káa pei jí lə̂ njwó zə̂u yi ə́ pǒŋ ńgó mboʼ pə́ ghʉ zěi?

⁵⁸Pei ŋuu lə̌i ngwô nzǒ, a pə́ ndaghʼ ghô ńdər lə̂ mbi fou kôr, pei zʉ́ pyér pə́ laŋə́-ndə̂u, o sʉ̂ʉtə yé pei zʉ́ lyəghʼ pə́ laŋə́ ə́ tsuŋtə́, ə́ me. Tə ndə́iʼ yə́rə́ po mə́i a lǎghʼ gho lə̌r tə kə́u mbi fou kôr, â féʼ ghô, ə́ ŋə́ ghó lə́ pəpáp-pəghaŋə-tsâŋ, gháp cóghʼ ghô tsâŋ.

⁵⁹N ntsuŋu ndâʼ ghô ńgó o táa kwar ghô ndə̂-tsâŋ wêi tə́ ghó o tʉ̂ nzǒ yi a yǎa mə́ nkə̂ ghô lei po.»