Read Ngombale Lúʼkáasʉ 13 Bible Online

Lúʼkáasʉ 13 - Ngombale bible

Lúʼkáasʉ 13

¹Ə́ lə pə́ mpfu wêi, pəcó pye tô mə́ ḿbyétə́ ńdâʼ Yěso ghíʼ Piláto lə ghʉ̌ pə́ jwítə pye Galilêi mpfu yi gháp lə pə́ ŋə̂ máp məzə̂u poʼ Sê.

²Yěso pwôr lə́ páp ngô: «Pei kwâŋ ńgó pye Galilêi pi pə́ kə jwítə́ gháp lêi lə lâghʼ ḿbə̂ ngaŋə-məfaa tə ndêi pfuʼ pəfə̌r páp mo?

³Ə́ ngə́, məŋ ndâʼ wéi; pei lə̌i ndə́iʼ kə́p cǐ zêi po, mə́i pei ghʉ̌ kə́ mê zêi pə́ ghíʼ páp.

⁴Tə mbaa pye tsap-ləfǎa lə̂ ləghə̂m pi ndə̂ yi pə́ póu ə sâghʼ ńgwó tʉ́ lə kəmə́ Silowê ńjwítə́ gháp lə̂, pei kwaŋ ńgó gháp lə fú mbə́ pəghaŋə məfaa tə ńdéi pye pə́tsəm túsoŋ Yelúsalêm mo?

⁵Ə́ ngə́, məŋ ndaʼ wéi; pei lə̌i ndə́iʼ kə́p cǐ zei po, pei ghʉ̂ nkə́ mê zéi pə́ ghíʼ páp.»

⁶Yěso pôu ndáʼ gháp wo saghʼ-ləghaa ngô: «Cǒ ŋuu lə pi mbə̂u tʉ̌ yi pə́ fûŋ ńgó “figyê” nkâʼ zʉ́. Ə́ ngʉ̌ nyáŋ tə ntó lə̂ ńkâp məntǎa měi, káa jwó yé có zə̂u.

⁷Ə́ cʉ́ʼ nkə́ ndáʼ lə́ ngaŋə-faʼ ye ngô: “Khwóʼ tʉ́ yo mêʼ, ńté ńgó ə́ pə́ mə́ mpfu wo nguʼ tárə́ ghíʼ n ntǒ lə̂ nkáp məntǎa měi, káa pə́ jwó ghâa có zə̂u. Ə́ gháʼa nzʉ̂ yo pǎp ndesé fefe ńté hó?”

⁸Ngaŋə-faʼ ye pwôr lə́ zʉ́ ngô: “Ə́ Nde, kə́ cí nyér zěi nguʼ wo, n ngwo tǎʼ ləcʉŋ zěi tə zə́mə́ poghʼó, ə́ ncóghʼ mətyʉŋə laghʼ ḿbwórə́ ndesé.

⁹Mbə̂ có, ə́ tâa ngí pə́ nguʼ gháʼa, ə́ nzə́m, ə́ kə́ ndə́iʼ zə́m ye po, o ghʉ̂ n nkhwôʼ mêʼ mpfu wêi.”»

¹⁰Ə́ lə pə́ có leʼé nji pəyúda, Yěso pə̂ ndə̂ cûʼtə mə́ njyêʼ pye no Sê.

¹¹Cǒ məngyě pə̂ yé ndə̂ wêi, mə́i ə́ pə́ mə́ nguʼ ntsap ləfǎa lə̂ ləghə̂m ghíʼ có zəghʼə tə́poŋ lə kə́u lə́ zʉ́; ə́ ŋóʼó yé tə yé mbóu mbəʼə́ tə ntə́ʉ ndʉŋ-ndʉŋ kâa kə́ mbə̂ yé wó.

¹²Yěso jwô yé, ə́ fúŋ yé, ə́ ndǎʼ lə́ zʉ́ ngô: «Mǎa, lǒʼ zô me.»

¹³Ə́ nzápə́ mbô mé ndəu zʉ́, a lêi-lěi mbə́ʼə́ mbəʉ ye ńtə́ʉ ndʉŋ-ndʉŋ, ə́ cʉ́ʼ nkə́ mə́ ngûʼtə pə̂ Sê.

¹⁴Lə́ tə́-ndə̂ cûʼtə jwô yə́rə́, ə́ nzáŋə́ lóŋ, ńté no Yěso ghʉ ŋuu shwítə leʼé nji Pəyúda. Ə́ ncʉ́ʼ ndáʼ lə́ lâʼ ngô: «Məleʼé mi mboʼ pə́ faʼ pə̂ ntoghʼó, pei lághʼ məghou méi ńtó pə́ lə́ mêi məleʼé pə ghʉ́ pei shwítə́, koo pei kə̂ ndághʼ ńtó leʼé nji!»

¹⁵Lə́ Nde pwôr lə́ zʉ́ ngô: «Pəsap-ndwô-fʉ́ŋ lə́u ə́ lə̌i mbə̂ leʼé nji wǒwó kêʼ foŋ yé kəʉ pə́ njəkáasʉ ye ndaghʼ ńgwó, a nô nci péh?

¹⁶Tə məngyě wo yi a pə̌ môu ngər-ndə̂ Ábələhâm mə́i Sə́tə lə kə́r yé ngwô tə ə́ pə́ mə́ nguʼ ntsap ləfǎa lə̂ ləghə̂m lo, n təi lə́u kêʼ ghâa yé leʼé wo po ńté ńgó ə́ leʼé nji áa?»

¹⁷Yěso pə̂ ntsâr yə́rə́, ə sə̂ʉ ghi pə́ kô ngaŋə-mbəu yé pə́tsəm, ə lâʼ pə̂ tsêi ńté məno shʉʼʉ mi gháp jwó a ghʉ̂ měi.

¹⁸Yěso kə̂ ncí ndâʼ ngô: «Ləfou Sê gháʼa shwí hó? Mboʼ n ndâghʼ hó fəiʼtə́?

¹⁹Ə́ pə́ ghíʼ mbyəghʼ có tʉ́ yi pə́ fûŋ ńgó *Mutâadə yi cǒ ŋuu lə mǎʼ nkâʼ zʉ́, ə́ ghʉ sáʼ, ə́ ngúʼ, pəshʉ̌ŋ tô ngí pə́ nyâŋtə mə́u, ə́ mə́ mbâʼ mənkaa máp lə̂ mbô měi.»

²⁰Yěso pou nkə́ ncí ndâʼ ngô: «N ngwo kə́ cí lǎghʼ hó pyé fəiʼ lə̂ Ləfou Sê?

²¹Ə́ wə́ ghíʼ məyʉʼ mvuŋ yi məngyě laghʼ ḿbûʼ tâʼ paa faalə̂i tə ə́ kôʼ.»

²²Yěso lə pə́ ndə̂r lə̂ Yelúsalêm, ə́ kə̂u cər mətúsoŋ gháp pə cər məlâʼ, ə́ njyêʼ pye no Sê.

²³Ə́ ŋə̌i tə nkə̂u có yʉʼ, cǒ ŋuu túŋu yé ngô: «Ə́ Nde, ndaʼ ntâʼ pye lə́ táa cwór áa?» Yěso pwôr ngô:

²⁴«Pei sáʼ təʉ, ə́ nděi lə̂ ntsʉ ndə̂ yi mə́ceʼé; ńté ńgó pye tə nzáa táa lǔ lə̂ nkə́u, lə́ ə́ kuʼ gháp nkə́u po.

²⁵Ngaŋə ndə̂ táa lěi tə lěsê tsághʼə́ ntsʉ ndə̂ yé, pei tə́ʉ péi, ə́ njǐ lə̂ mbúʼtə́ ntsʉ ndə̂ ńdǎʼ ngô: Ə́ Nde, ə́ Nde tsóʼ ntsʉ ndə̂ ńŋə́ lə́ paghʼ. Â pwôr ngô: Káa m mə́ njî ghâa ləfǔ zéi!

²⁶Pei cʉ́ʼ nkə́ njî lə̂ ndâʼ lə́ zʉ́ ńgó, lə́u paghʼə lə tə̂m zə̂u nzʉ́, ə́ mbǒu nó, o pôu ŋə̂i lə̂ məlaŋə́-ndə̂u túsoŋ paghʼ, ə́ njyêʼ pye zə̂u pô?

²⁷Â kə̂ ncí ndâʼ lə́ pei ngô: káa m mə́ njí ghâa ləfǔ zéi. Pei fú ntsʉ ndə̂ məŋ ncʉ́ŋtə́, pei pə́tsəm pi pei ghʉ̂ məno tə́poŋ!

²⁸Pei táa tsə́rə́, ə́ pǒu mpfár mə́soŋ méi ńté ghíʼ pei jwǒ Ábələhâm, Ísaghʼ, Yokôp gháp pə pətsətə́-nkəʉ Sê pə́tsəm pə̂ cər Ləfou Sê, ə́ pǒu ghǐ pə́, mə́i pə́ meʼ mə́ wéi péi.

²⁹Pye táa fú sǎʼ-nəu gháp pə ntsǒ-nəu, ə́ fú tû gháp pə ncʉ̂ŋ, ə́ tó ńnyáŋtə́ sê ə́ zʉ́ zə̂u cər Ləfou Sê.

³⁰Ə̂ pə̂ yə́rə́, pəcó pye pi gháp pə́ mpfu wo, ə́ mbə́ pəlyəghʼ-nzəm, gháp cʉ́ʼ pəluŋ-mbi. Pəcó pi pə́ mpfu wo ə́ mbə́ pəluŋ-mbi, gháp cʉ́ʼ pəlyəghʼ-nzəm.»

³¹Pəcó pəfalísia cʉ́ŋə mbáatə́ Yěso pə̂ mpfu wêi mpfu wêi, ə́ ndǎʼ lə́ zʉ́ ngô: «Fû ghô yaʼa gháʼá ndə́r, ńté ńgó Elôdə pə̌ ndou ńgʉ́ pə́ jwî ghô.»

³²Yěso lâʼ lə́ páp ngô: «Pei wó ndǎʼ lə́ káʼ wêi ńgó n ngwó zǔŋ məzəghʼə tə́poŋ, ə́ pǒu ghʉ̌ pye shwítə́ leʼé wo gháp zou, ə̂ pə́ lə̂ mbâatə leʼé tárə́, m myâghʼ faʼ zâa.»

³³Ə́ poŋ ńgó n ntsə́ʉ laŋə́ leʼé wo, ə́ ngʉ̌ zou tə mbaa leʼé yi ə́ nkə́ mbə́ pə́ laŋə́. Ə́ pə́ ntúŋu ńgó n ndə́r tə nkə́u Yelúsalêm, ńté ńgó ntsətə-nkəʉ-Sê ghwo lə̂ nkə́ nkwʉ́ pə́ Yelúsalêm.

³⁴Pye Yelúsalêm, pye Yelúsalêm, pei pi pei laghʼ məghǒ ńtə̂m pye pi Sê tə̌u lə́ pei ńjwítə́, ə̂ mpfu sə́ʼə́ ghíʼ n nkoŋ mə́ lə̂ nkə́itə́ wéi mbəʉ məŋ, ghíʼ məngə̂p pâatə pôu pé, lə́ pei kə̂ ndə̂ʼ wéi ləʼə́?

³⁵Ə́ tə̂ʉ mpfu wo, pə́ wo měʼ ndə̂ zei lə́ pei. Məŋ ndaʼ wéi ńgó pei táa kə́ pǒu jwô wéi ghâa po tə kə́u ghíʼ leʼé táa kǔʼ, pei lâʼ ngô: «Mbwórə wə́ lə́ ŋuu yi a tô lə̂ ləjôghʼ Nde!»