Read Ngombale Lúʼkáasʉ 15 Bible Online

Lúʼkáasʉ 15 - Ngombale bible

Lúʼkáasʉ 15

¹Ə́ pə̂ có leʼé, pəpfǔ-ntsəp gháp pə pəcó pəghaŋə məfaa cʉ́ŋə mbáatə́ Yěso lə̂ nzúʼ tsâr yé.

²Pəfalísia gháp pə pəkeʼtə́-lə́pə́ʉ Mə̌usə̂i pə̂ ndə̂mtə́ ńdâʼ ngô: «Ŋuu wo pə̌ mpfû pəghaŋə məfaa tə gháp pəpáp tə̂m zə̂u ńzʉ́.»

³Lə́ Yěso lâghʼ wo saghʼ-ləghaa ńdáʼ lə́ páp ngô:

⁴«Wǒ ŋuu wə́ təcər pei yi a lə̌i ngwô mbî yé nkʉ, tâʼ cwî mə́u, a tî tə́ nyér pi tsap-pfuʼú lə̂ mə̂m-ləpfuʼú koŋə, ə́ ngwó ŋáa ndôu wêi wə́ tâʼ tə njwó?

⁵A lə̌i ndéi tə ńjwó wěi, mə́i a wo lǎghʼ lətsei khwǒr yé zápə́ məkwêi zʉ́,

⁶ə́ kwó tə kə́u nzéʼ zʉ́, ə́ fúŋ pəsə̌u pé gháp pə pəghaŋə ləpar nzeʼ pé, ə́ lǎʼ lə́ páp ngô: Paghʼə tsêi ńté no n njwǒ məmbi ghâa yi a kə cwí.

⁷Ə́ kə́ mbə́ pə́ yə́rə́, m mə̂ ndâʼ wéi, lətsei ghʉ̌ pə́ tʉ̌-lə́pû ńté tâʼ ngaŋə-məfaa môʼ yi a kə̌p cǐ yé, ə́ mbə́i no Sê, ə́ nděi ghíʼ mboʼ pə́ tsêi ńté pye ntsap ləpfuʼú lə̂ mə̂m ləpfuʼú pi gháp jwó ńgó mboʼ gháp kə̂ kə̂p gháp cǐ záp lə̂ mbə́i no Sê po.»

⁸«Kəʉ məngyě lə̌i ngwô nkâp ye məpaghʼ ləghə̂m, có paghʼ póu cwí, a tî tə́ cúʼ lâm, ə́ pwórə́ zǎghʼ sʉ̂ ndə̂, ə́ tsuŋú lǒu tə jwó?

⁹A lə̌i ndôu tə njwó, mə́i a wo fúŋ pəsə̌u pé gháp pə pəghaŋə ləpar nzeʼ pé, ə́ lǎʼ lə́ páp ngô: Pei tó paghʼə tsêi ńté ńgó n njwǒ paghʼə nkâp zâa yi ə́ kə cwí.

¹⁰Ə́ kə́ mbə́ pə́ yə́rə́, m mə̂ ndâʼ wéi: Lətsei wə́ təcər pəcwôʼ Sê ghíʼ tâʼ ngaŋə-məfaa môʼ kə̌p cǐ yé, ə́ mbə́i no Sê.»

¹¹Yěso kə̂ ncí ndâʼ ngô: «Cǒ ŋuu lǎʼ ngwǒ ghəpə́ mbiŋə yé pwô.

¹²Yi nkhʉ̂ nyâŋ tə ndâʼ lə́ zʉ́ ngô: Tǎa, məzə̂u mi o jǐ ńgó mboʼ ə́ lâʼ mbə̂ mâa, ŋə́ lə́ məŋ mpfu wo. Tə́ ghap kə̂ ncʉ́ʼ ngáptə́ məzə̂u mé yʉʼ pwô, ə́ ŋə̂ mé.

¹³Ə́ ghi lěi leʼé ndwuŋ, yi nkhʉ̂ wə̂ fə̂i mé məzə̂u ńdághʼ nkâp zěi ńdər yé lə̂ tə́u tə́ fə̌r, ə́ nkə́u wó ŋáa ngwú ńcôŋ nkâp zə̂ tsəm.

¹⁴A lə kə́ nděi tə ncóŋ zěi ntsəm, wáʼ wʉ̂ cər lâʼ wêi. A jî lə̂ mbúŋ.

¹⁵Ə́ ngwo nkə́u faʼ mbó cǒ ŋuu lâʼ wêi. A tə̂u yé tyer lə̂ mbáp pəkúnye.

¹⁶A kə̂u yʉʼ mbâp pəkúnye, nji záŋə yé tə a tsâa lə̂ ńzʉ́ məzʉ̂ máp lə́ káa ŋuu pə́i ŋə̂ yé pə̂ cǒ məyʉʼ lə́ zʉ́.

¹⁷A nyâŋ tə nkwáŋə́ tû yé lə̂ ngwôʼ yi a jwô zěi, ə́ ndâʼ ngô: Pəghaŋə-faʼ tə́ ghâa pə́tsəm wə́ nzeʼ paghʼ, ə́ nzʉ̂ zə̂u tə ə́ tə̂m gháp, m mbə̂ yaʼa gháʼa nkwʉ̂ nji!

¹⁸N ngwo lər ghâa, ə́ wǒ cə́r tə́ ghâa, ə́ kə́u lǎʼ lə́ zʉ́ ngô: Tǎa, n ndə wʉ̂ no mbi Sê, mbaa mbi gho.

¹⁹Kâa m mbyér nkûʼ ghâa yi mboʼ o kə fúŋ ghâa ńgó môu gho. Cʉ́ʼ pfú ghâa pə́ ghíʼ cǒ ngaŋə-faʼ gho.

²⁰Ə́ kwǎŋ yə́rə́, ə́ nděsê ńdə̌r lə̂ ngwó ncə́r tə́ ye, ə́ mbyér mbə́ pə́ ndǐ təsə mə́ ńtó, tə́ ye tə̂ʉ ńjwó yé, məjʉ̂ŋ mé kô yé, a khʉ̂tə ńgwó ḿbáʼá yé.

²¹Môu wêi lâʼ lə́ tə́ ye ngô: Tǎa, n ndə wʉ̂ no mbi Sê, mbaa mbi gho, kâa m mbyér nkûʼ ghâa yi mboʼ o kə̂ fúŋ ghâa ńgó môu gho.

²²Lə́, tə́ ye lâʼ lə́ pəghaŋə-faʼ pé ngô: Pei fátə́ ndághʼ ndǐ shʉʼʉ ńtó ḿmáʼ ndəu zʉ́, pei wé kə̂ʉ lə́ shípo ye, ə́ ngwér məlaŋə́ məku zʉ́.

²³Pei lághʼ môu foŋ yi tə́koʼ wə̂ ńtó ńjwí, paghʼə pfár, ə́ ntsêi wághʼə,

²⁴ńté ńgó ə́ lə cʉ́ʼ shwí ghâa pə́ ghíʼ môu ghâa wo kə kwʉ́ mə́, lə́ a pou mbyér pə́ wó.

²⁵Ə́ ghi pə́, môu-lətû ye pə̂ tyer. Ə́ mbou mə́ nkwó, ə́ ntó tə mə́ nkə̂u nzeʼ, ə́ nzúʼ ləluŋú pə̂ ncú, pə́ pə̂ mbíŋ.

²⁶A fûŋ cǒ ngaŋə-faʼ, ə́ ntúŋú yé zə̂u yi ə́ pə́ nděi.

²⁷A lâʼ lə́ zʉ́ ngô: Fə̌r gho pəʉ mə́, tə́ gho pou ngʉ́ pə́ jwî môu foŋ yi tə́koʼ wə̂, ńté ńgó a ghí jwó yé, a pyêr ḿbə́ pə́ shʉʼʉ.

²⁸Môu-lətû ye wêi zûʼ, ə́ nzáŋə́ lóŋ tə ndə̂ʼ lə̂ nkə́u ndə̂. Tə́ ye kwâr péi, ə́ ndyaghʼtə́ yé ńgó â kə́u ndə̂.

²⁹Lə́ môu-lətû wêi lâʼ lə́ zʉ́ ngô: Jwó ndwuŋ mənguʼ n nfaʼ mə́ ŋə́ lə́ gho tə́ tə̌i tû, lə́ o laa kə́ pə́i ŋə́ pə́ môu mbî ńgó n njwí paghʼ pə pəsə̌u pâa lághʼ ńtsěi.

³⁰Lə́ môu gho wo yi gháp pə məkwarə kə pfár nkâp zô kə̌ nkə́u lə̂ mbə̂ʉ, o lêi-lěi njwí môu foŋ yi tə́koʼ wə̂ ńté yé!

³¹Tə́ ye lâʼ lə́ zʉ́ ngô: Môu ghâa, poghʼo lə̂ kə̌ njóghʼə, zə̂u tsəm yi n ngwǒ kə́ mbə́ pə̂ zô.

³²Lə́, paghʼə yaa ngwǒ lə̂ ngʉ́ lətsei, ə́ tsêi wághʼə ńté ńgó ə́ kə́ cʉ́ʼ shwí pə́ ghíʼ fə̌r gho wo kə kwʉ́ mə́, a ləcwî lə́ pə́ pou njwó yé.»