Read Ngombale Lúʼkáasʉ 16 Bible Online

Lúʼkáasʉ 16 - Ngombale bible

Lúʼkáasʉ 16

¹Yěso pôu ndâʼ lə́ ngaŋə-jyêʼ-no yé ngô: «Tâʼ ngaŋə-zə̂u lə ghwo ŋuu yi a nâŋtə zə̂u pé. Pə́ nyâŋ tə ntó ńdâʼ yé ńgó ŋuu wêi pə̌ tə̂m séi lə́ zə̂u pé pêi.

²A fûŋ yé, ə́ ntúŋú yé ngô: N nzǔʼ pə́ laʼ ńgó o pə̌ ngʉ gháʼá lə́ məzə̂u mâa ló? Tʉ́ŋtə́ məzə̂u mâa mə́tsəm, ə́ nyárə́ ghâa, ə́ ndər ghô, ńté ńgó o kə́ pǒu faʼ ghô mbó məŋ po.

³Ngaŋə-faʼ wêi zûʼ, ə kwaŋtə tô tû zʉ́ ngô: Tə́-faʼ ghâa wo zǔŋ ghâa faʼ n ngʉ́ gháʼá? Káa n ngwô ghâa mətəʉ lə̂ ndághʼ ńkhwóʼ sô, n ndə̌i mbə́i ngaŋə-ndôu, mə́i sə̂ʉ wo kó ghâa.

⁴M mə̌ njî zə̂u yi n ngwo ghʉ̌ tə ghwǒ pye pi mboʼ gháp tâa mpfú ghâa məndə̂ páp mpfu yi pə́ zǔŋ ghâa faʼ.

⁵A cʉ̂ʼ fúŋ pye pə́tsəm pi gháp pə tə́-faʼ ye ghwǒ nzǒ pə̂ moʼ moʼ, ə́ ntúŋú nduŋ-mbi ŋuu ngô: O ghwo lə̂ ŋə́ hó lə́ tə́-faʼ ghâa?

⁶A lâʼ ńgó: N ngwo lə̂ ŋə́ məwə̂r pəkáasʉ nkʉ lə́ zʉ́. Ngaŋə-faʼ lâʼ ngô: Ŋwaʼa nzǒ gho wo, fátə́ nyáŋə́ sê ə́ ŋwáʼá ńgó ə̂ pəkáasʉ mə̂m-taa.

⁷Ə́ mbóu ndâʼ lə̂ cǒ ŋuu ngô: Gho zô, o pə̌ ngwo tə́-faʼ ghâa hó? Wêi ŋuu pwôr ngô: Ə́ ngəsâŋ-ncʉ̂ŋ məpaa nkʉ. Ngaŋə-faʼ lâʼ lə́ zʉ́ ngô: Ŋwaʼa nzǒ gho wo, cʉ́ʼ ŋwaʼá pə́ ńgó ə̂ məpaa mə̂m-fǎa.

⁸Tə́-faʼ fə́tə ngaŋə-faʼ məfutə́ wêi lə̂ mbə̂u yi a lǎghʼ ńtáa zúŋ pə́ ghíʼ ŋuu yi a jǐ no. Ńté ńgó pətəpə̌i no Sê jî ntʉ́ŋtə́ məno təcər páp, ə́ nděi pye pi gháp jí Sê.»

⁹«Məŋ tsuŋu ndâʼ wéi, pei lághʼ məfuʼ məfutə́ mi cər nzʉ̂ yo ńnúŋú sə̌u zéi ńjí ńgó mpfu yi měi tǎa me, pəsə̌u péi pêi pfú wéi cər ləcǐ-mbî tə me.

¹⁰Ŋuu yi a Pə̌ ndʉŋ-ndʉŋ lə́ pəmə́ceʼé məzə̂u kə̌ mbə́ ndʉŋ-ndʉŋ lə́ mi jwǐ pə́ yə́rə́; ŋuu yi a pǒu mbə́ ngaŋə-məfutə́ lə́ pəmə́ceʼé məzə̂u kə̌ mbou mbə́ ngaŋə-məfutə́ lə́ mi jwǐ pə́ yə́rə́.

¹¹Pei lə̌i nkə lə́iʼ pə́ ndʉŋ-ndʉŋ lə̂ mbə̂u yi pei kə lǎghʼ ńgwô məfuʼ məfutə́ mi cər nzʉ̂ yo po, mə́i mboʼ wǒ pôu ncóghʼ mi lətəi-ndwuŋ mbó pei ńgó pei pə́ náŋtə́?

¹²Pei lə̌i nkə lə́iʼ pǒu ghwǒ wéi zə̂u yi kâa pə̂ ye zéi shʉʼʉ po, mə́i wǒ pǒu ŋə́ yi pə́ nâŋtə wéi lə́ pei?

¹³Mboʼ cǒ ngaŋə-faʼ fâʼ yé mbó pətə́-faʼ pə́pwô po. Mə́i a wo paa cǒ, ə́ koŋ cǒ, ə́ ndə́iʼ pó mə́i a wo ŋə́ məkuʼ cǒ, pǒu wâghʼ cǒ. Mboʼ o pə̂ fâʼ gho mbó Sê mbou kə́ mə́ fâʼ mbó nkâp po.»

¹⁴Pəfalísia pi gháp lə pə́ yʉʼ wó zûʼ yə́rə́, ə́ nǎa sôu, ə́ njwǐ Yěso ńté ńgó gháp lə koŋ no nkâp gháʼate.

¹⁵Yěso lâʼ lə́ páp ngô: «Pei jôghʼ fûtə pye-mə́soŋ ńgó pei pəghaŋə no lə́nə́ʉ, lə́ Sê pôu mə́ njí ghíʼ məntə̂ʉ méi pə̂. Ńté ńgó zə̂u yi pye-mə́soŋ fə́tə, Sê nyə́ghʼə zěi nyəghʼə́.»

¹⁶Yěso kə̂ ncí ndâʼ ngô: «Jâŋ kə ghi tó, pə́ pə̂ nzûʼ pə̂ ləpə̌ʉ Mə̌usə̂i gháp pə məno mi ə́ wə́ cər pəŋwaʼa pətsətə́-nkəʉ Sê. Tə fú mpfu wêi, pə́ cʉ̂ʼ ndâghʼ pə̂ Nkəʉ Shʉʼʉ ńtsə̂tə no Ləfou Sê. Wǒwó pə̂ sâʼ təʉ lə̂ nkə̂u yé cər wó.

¹⁷Mboʼ ləfaŋ gháp ndesé fátə mé, lə́ ə́ ngwǒ lə̂ ləpə̌ʉ Sê, mə́i mboʼ mələtyaghʼ nyúʼu yé mə́u po.»

¹⁸«Ŋuu lə̌i nzúŋ ngwě ye, ə́ nzóʼ məngyě yi ndeʼe, mə́i a ghʉ gháʼá məghap. Ŋuu póu nzóʼ məngyě yi ndə̂u ye zǔŋ yé, mə́i a kə̌ ngʉ gháʼá pə́ məghap.»

¹⁹«Cǒ ngaŋə-zə̂u lǎʼ mbə́ wó, ə́ nkə́ nyáŋ mâʼ yé pə̂ məndǐ mi ə́ cóghʼ gháʼate, ə́ mbə̂ leʼé tsəm, ə́ nkə́ ntwôr yé tworə́ mbou nzʉ̂ yé pə̂ nzʉ̂ shʉʼʉ.

²⁰Cǒ mbûŋ yi pə́ fûŋ yé ńgó Lazâa nûŋ ntsʉ ləzeʼé ndə̂ zʉ́, məfʉ̌ŋ pə̂ lə́ zʉ́ tə myâghʼ mbəʉ yé tsəm.

²¹Lazâa lə́ pə́ ntsâa ńgó mboʼ ngaŋə-zə̂u wei pə̂ nzʉ̂ məzʉ̂, a pə̌ ndâghʼtə mənyuʼ měi mi ə́ cwərə́ sê ḿpfár. Ngwʉ̂ lə pou mə́ ńtó ndâŋ məfʉ̌ŋ mé.

²²Mbûŋ wə̂ ghʉ̂ nkwʉ́, pəcwôʼ Sê khwor yé ńdaghʼ ndə̂r lə̂ mbəʉ Ábələhâm. Ngaŋə-zə̂u ghʉ̂ nkwʉ́ yé lə́wó, pə́ ntʉ̂ŋ yé.

²³A kə̂u lâʼ pəpfû, ə́ mə́ njwô ngwôʼ tə́sə́ʉ, ə́ ntə́ʉ ndǐ təsə, ə́ mbəʼə́ nyôghʼ mé ńjwó Ábələhâm, Lazâa pə̂ mbəʉ zʉ́.

²⁴Ə́ pə̂ yə́rə́, ngaŋə-zə̂u wei laghʼ ləghe ńdâʼ ngô: Tǎa Ábələhâm, tsáa məjʉ̂ŋ mâa, ə́ ntə́u Lazâa ńgó a tsə̂p shípo ye nci ńtó ńtsə̂ʼ lə̂ʉ məŋ, ńté ńgó m mbə́ yaʼa cər mǒghʼ mə́ njwô ngwôʼ gháʼate.

²⁵Lə́ Ábələhâm lâ lə́ zʉ́ ngô: Môu ghâa, kʉ́ʉtə́ ńgó o lə pə́ cər ləcǐ-mbî gho ndəu ndesé, ə́ ngí pə́ zûʼ shʉʼʉ, ə́ mbə̂ ghó ngaŋə-zə̂u. Lazâa pə̂ njwô ngwôʼ mpfu wêi, a pou ḿbə́ yaʼa gháʼa mpfu wo, ə́ ngí pə́ zûʼ shʉʼʉ o pə̂ njwô ngwôʼ.

²⁶Ə́ yaa ngí pə̂, tə́koʼ tâa tə́ ləlyəghʼtə́ pə̂ təcər paghʼə, tə ə́ pə́ yi ńgó ŋuu lə̌i mə́ nkôŋ fú yaʼa ngwó mbəʉ pei yʉʼ wó, a kûʼ yé mə́u po, ŋuu pou mə́ nkôŋ lə̂ fú yʉʼ yi o pə̌ wó ńtó yaʼa, a kûʼ yé mə́u po.

²⁷Ngaŋə-zə̂u lâʼ ngô: Tǎa, n sʉ́ʉtə́ ghô, tə́u Lazâa nzéʼ tə́ ghâa;

²⁸ńté ńgó pəfə̌r pâa pə́ wó pə́taa. Ńjí ńgó a wo shuŋtə́ mətuŋú máp, ə́ ŋə́ gháp ntǎghʼ, ə̂ lêitə́ yə́rə́, lə́u gháp tô gháp záp lə́wó ńkə́u cər lâʼ ngwôʼ yo po.

²⁹Ábələhâm pwôr ngô: Mə̌usə̂i gháp pə pətsətə́-nkəʉ Sê pə́ wó lə̂ shúŋtə́ mətuŋú pəfə̌r pô pei; ghâp zúʼ ntsʉ gháp!

³⁰Ngaŋə-zə̂u wei lâʼ ngô: Ə ngə́ tǎa Ábələhâm ə́ kə́ kûʼ yé, ŋuu lə̌i fú lâʼ pəpfû, ə́ mbə̌ʉ ngwó ńdǎʼ gháp no, mə́i gháp wo zúʼ ə́ kə́p cǐ záp.

³¹Lə́ Ábələhâm lâʼ lə́ zʉ́ ngô: Gháp lə̌i ndə̂ʼ gháp lə̂ nzúʼ ntsʉ Mə̌usə̂i gháp pə yi pətsətə́-nkəʉ Sê, mə́i ŋuu lə̌i mbə́i nděsê pə́ təcər pəpfû ńtó ńdâʼ gháp no, mə́i gháp wo zûʼ gháp po.»