Read Ngombale Lúʼkáasʉ 17 Bible Online

Lúʼkáasʉ 17 - Ngombale bible

Lúʼkáasʉ 17

¹Yěso lâʼ lə́ ngaŋə-jyêʼ-no yé ngô: «Ə̂ no lə́nə́ʉ ńgó mboʼ zə̂u yi ŋuu fû mə̂u faa no pûŋ yé po. Lə́ ndʉʉ-tə́poŋ ŋuu yi a ghʉ cǒ fâa no.

²Mbî ghíʼ mboʼ pə́ kâp tə́koʼ ləghǒ lóŋ ngaŋ, ə́ mǎʼ yé cər mə̂i-nci, ə́ nděi ghíʼ mboʼ a ghʉ̂ cǒ tâʼ lə́ pôu ghəpə́ pwo lêi lə́ zʉ́ mboŋə́ fǎa no.

³Pei laghʼə́ tû zéi shʉʼʉ! Ə fə̌r ghô lə̌i ńgʉ́ no tə́poŋ lə́ gho, o tsuŋu sâʼ yé. A pə́i wʉ no yé mbi gho, o lyəghʼə məfaa yé.

⁴A lə̌i fâa no mbi ghô mpfu saambwô lə̂ leʼé mbî, ə́ mbǒu nkə́ ńtó mpfu saambwô ə́ mbə́i wʉ no yé mbi gho, o lyə́ghʼə məfaa yé.»

⁵Ngaŋə-ntə̂u Nde lâʼ lə́ zʉ́ ngô: «Kʉʼʉ́ pə̂i-ntə̂ʉ zághʼ!»

⁶Nde pwôr ngô: «Mboʼ pə̂i-ntə̂ʉ zéi tə́i mbə́ wó tə nyéʼ ngúʼ ghíʼ mbyəghʼ tə́shú, mə́i pei lə̌i ndâʼ lə́ tʉ̌ yo ngô: “Tsóʼó ngwó ńjə́ghʼ mbəʉ zô cər mə̂i-nci”, mə́i ə́ wo zúʼ ntsʉ wéi.»

⁷Wǒ ŋuu lə́ pei lə̌i ngwô ngaŋə-faʼ ye yi a faʼ nkâʼ zʉ́ kəʉ mə́ mbâp pə̂ mənye mé, ngaŋə-faʼ ye wêi kə̂ nkə́u lə̂ nkwó tyer, mə́i a wo myághʼə́ lǎʼ lə́ zʉ́ ńgó a lêi-lěi nyáŋə́ sê ńzʉ́ zə̂u mo? A lə̌i nkwó mə́i lə́u a wo lǎʼ lə́ zʉ́ pə́ ńgó a kə́pə́ məndǐ mé, ə́ fátə́ ntsúŋú məzʉ̂ ńŋə́ a zʉ̂ mbóu nó zə̂u, záʼa-ndě a poŋə́ zʉ́ ə́ kə́ nô yé zə̂u lə́wó po?

⁹Káa a ghwo ye lə̂ ŋə́ nkhwo lə́ ngaŋə-faʼ ye wei ńté ghíʼ a ghʉ̌ faʼ yi a ghwǒ lə̂ ngʉ́. Kəʉ kâa pə́ yə́rə́ ló?

¹⁰Ə́ wo lə́ pei ə́ nkə́ mbə́ pə́ yə́rə́. Pei lə̌i ndáʼ fâʼ faʼ yi pə́ ŋə́ lə́ pei tə myâghʼ, pei lâʼ ngô: «paghʼ pə̌ zághʼ pə́ pəghaŋə-faʼ ŋuu, paghʼ faʼ pə̂ faʼ yi paghʼ yǎa ngwǒ lə̂ fâʼ.»

¹¹Yěso lə pə́ ndə́r lə̂ Yelúsalêm, ə́ mə́ ŋə̂i lə̂ ndaghʼə Samalə̂i gháp Galilêi,

¹²ə́ ŋə̌i tə mə́ nzéʼ ńkə̂u cər có lâʼ, pəcó pəghaŋə tsóʼ-páp ləghə̂m tô lə̂ mbə̂utə́ yé. Ə́ ngapə́ ntə́ʉ pə́ ndǐ təsə, ə́ ndǎʼ lə̂ təʉ ngô:

¹³«Yěso, ə́ Nde, tsáa məjʉ̂ŋ mághʼ!

¹⁴Yěso jwô gháp, ə́ ndǎʼ lə́ páp ngô: Pei wó nyarə́ mbəʉ zéi lə́ pənuŋú-poʼ Sê. Gháp pə̂ ndə́r ə́ nkə́u laŋə́-ndə̂u nshwítə́.

¹⁵Cǒ tâʼ lə́ páp jwô ghíʼ a shwitə́ mə́, ə́ mbə̌ʉ nzəm, ə́ ŋə́i ńgûʼtə Sê lə̂ təʉ.

¹⁶Ə́ ntó ńshíʼ ńkʉ́ʼtə́ mbi Yěso, ə́ ntsʉ́ŋə́ sʉ̂ yé sê ńŋə́ nkhwo lə́ zʉ́. Ŋuu wêi lə pə́ ŋuu Samalə̂i.

¹⁷Yěso cʉ̂ʼ ndâʼ ngô: Káa gháp pêi ləghə̂m shwítə́ mo? Pi ləpfuʼú ghǒ?

¹⁸Kâa cǒ ŋuu lə́ páp kwâŋ yé lə̂ mbə̂ʉ ńtó ńŋə́ nkhwo lə́ Sê tə ndyéʼ ngəʉ wo!»

¹⁹Yěso pôu ndâʼ lə́ zʉ́ ngô: «Lěsê ńdə̌r ghó; pə̂i-ntə̂ʉ zô ghʉ o cwôr.»

²⁰Pəfalísia túŋu Yěso ńgó Ləfou Sê táa tó shʉ́ŋə́? A pwôr lə́ páp ngô: «Ləfou Sê táa tó lə̂ mbə̂u yi mboʼ ŋuu jwô yé ghíʼ ə́ pə́ ntó po.

²¹Mboʼ pə́ tâa ndâʼ yé ńgó ə́ yo yaʼa káa ńgó ə́ yi yiʼi po. Lə́ pei jí ńgó Ləfou Sê pə́ mə́ təcər pei.»

²²Yěso pôu ndâʼ lə́ ngaŋə-jyêʼ-no yé ngô: «Cǒ mpfu táa kǔʼ, pei tsáa lə̂ njwó Môu Ŋuu pə́ ndaʼ tâʼ leʼé, lə́ jwô wéi yé po.

²³Pə́ táa lǎʼ wéi ngô: “Â wo yaʼa gháʼa!” káa ngô: “Â yi yiʼi ghíʼi!” Lə́ koo pei wô wéi yʉʼ, koo pei zûŋtə.

²⁴Môu Ŋuu ghʉ̌ yǎa pə̌ʉ nzəm pə́ ghíʼ nyǐ-mbʉŋ ŋwâŋ lə́faŋ, ə́ nkêʼ yʉʼ tsəm tâʼ mpfu lə.

²⁵Lə́, ə́ pə́ ntúŋu ńgó a yáa tsə̌mbi njwó ngwôʼ gháʼate, ləwěi pye yi mpfu wo póu ndə̌ʼ no yé.

²⁶Ə zə̂u yi ə́ lə lěi mpfu yi Nówa, ə́ táa kə́ cí lěi lə̂ məleʼé mi Môu Ŋuu.

²⁷Pye lə pə́ mpfu wêi, ə́ mə́ nzʉ́ mbóu mə́ nó, mbiŋə pə̂ nzóʼ, pəngyě pə̂ ngwó nzóʼ tə kə́u leʼé yi Nówa lə kə́u cər láanji; mbʉŋ lô, nci kôʼ, ə́ mbə́ghʼ pfuʼ pye pə́tsəm.

²⁸Ə́ táa pə́ ghíʼ mpfu yi Lôt. Ə́ lə pə́ mpfu wêi, pye pə̂ nzʉ́, ə́ mə́ nó, ə́ mə́ ntâŋ mətǎa, ə́ mə́ mbî zə̂u, ə́ mbou mə́ nkə̂r məndə̂;

²⁹lə́ leʼé yi Lôt lə fú Sodôm nkwár ńdə̌r, Sê lə ghʉ mǒghʼ məkaa fû tʉ́ shíʼ ghíʼ mbʉŋ, ə́ mbə́ghʼ pfuʼ pye pə́tsəm.

³⁰Leʼé yi Môu Ŋuu táa nyarə́ mbəʉ ye, ə́ ghʉ̌ kə́ pə́ pə́ yə́rə́.

³¹Ə́ lə̌i ntáa mbə́ leʼé wêi, koo ŋuu yi a pə̌ tʉ̌-ndə̂ lâʼ ńgó a wo shíʼ sê pyé məzə̂u mé. Koo ŋuu yi a pə̌ nkâʼ lâʼ ńgó a wo pə̌ʉ lə̂ nzeʼ.

³²Pei kʉ́ʉtə́ zə̂u yi ə́ kə ghʉ̌ ngwě Lôt.

³³Ŋuu yi a táa lǒu lə̂ mbáa ləcǐ-mbî ye, a táa cwí wěi; lə́ ŋuu yi a táa cwí ləcǐ-mbî ye, a táa ghwǒ wěi.

³⁴Məŋ ndaʼ wéi ə́ táa pə́ lətwûʼ leʼé wêi, pye pə́pwô nûŋ ndəu tâʼ kə̌u; pə lâghʼ tâʼ ńdə́r, ə́ nyêr cǒ.

³⁵Pəngyě pə́pwô táa pə́ nǎa ghoʼ zə̂u, ə́ pə lâghʼ tâʼ ńdə́r, ə́ nyêr cǒ.

³⁶Mbiŋə pwô táa pə́ cər tâʼ nkâʼ, ə́ pə lâghʼ tâʼ ńdə́r, ə́ nyêr cǒ.»

³⁷Ngaŋə-jyêʼ-no túŋu yé ngô: «Ə́ Nde! Tə zêi yo no táa lěi ghó yʉʼ?» A pwôr ngô: «Yʉʼ yi pfû zə̂u táa nǔŋ wó, pəghə̌u táa kəitə́ yʉʼ wó.»