Read Ngombale Lúʼkáasʉ 19 Bible Online

Lúʼkáasʉ 19 - Ngombale bible

Lúʼkáasʉ 19

²cǒ ŋuu pə̂ wó, ləjôghʼ yé pə̂ Sakíyo; a lə pə́ tə́-ndə̂ pəpfǔ-ntsəp, ə́ mbou mbə́ tâʼ ngaŋə-zə̂u.

³A lə pə́ ndôu lə̂ njwô yé ŋuu yi pə́ fûŋ ńgó Yěso, lə́ kâa kuʼ yé lə̂ njwó yé ńté ńgó lâʼ lə fárə́, a pôu ngwóghʼ.

⁴A cʉ̂ʼ nkhʉ́tə́ ńgwó ńzáʼá mbi lə̂ sʉ̂ yi Yěso wo lěi mə̂u, ə́ nkóʼ ńnyáŋ lə̂ có tʉ́ yi pə́ fûŋ ńgó Sikomôr, ə́ mə́ nzʉ́ʼtə ghíʼ Yěso wo pə́ lěi, â jwó yé.

⁵Yěso lər tə nkə́u yʉʼ wó, ə́ mbəʼə́ tû yé, ə́ ndǎʼ lə́ zʉ́ ngô: «Sakíyo, fátə́ ńshíʼ: Ńté ńgó n ngwo lə̂ ndé ndə̂ gho leʼé wo.»

⁶Sakíyo kə̂ fátə́ shíʼ, ə́ ndǎghʼ lətsei ḿpfú Yěso.

⁷Ə́ lâʼ jwô yə́rə́, ə́ ncʉ́ʼ mə́ ntsátə́ ńtê Yěso ńdâʼ ngô: «Â wə̂ lə̂ a lər lə̂ nzeʼ ŋuu tə́poŋ lə̂!»

⁸Gháp lə lər tə nkə́u ndə̂ Sakíyo, a tə̂ʉ mbi Yěso ndâʼ ngô: «Ə́ Nde, n ngwo ghaptə́ zə̂u pâa tsəm yʉʼ pwô, ə́ ŋə́ tâʼ yʉʼ lə́ pəpûŋ, ə́ kə́ mbə́ yi n ndə laghʼ mə́ píʼí ḿpfú zə̂u ŋuu, mə́i m mbǎa paghʼə́ yə́rə́ mpfu ləkwo, ə́ ŋə́ lə́ ngaŋ.»

⁹Yěso lâʼ lə́ zʉ́ ngô: «Ləcwôr kə̂u ndə̂ yaʼa leʼé wo, ńté ńgó o kə̌ mbə̂ zô pə́ cǒ môu Ábələhâm lə́wó.

¹⁰Môu Ŋuu lə yǎa mbə̂i ntô pə́ lə̂ ndôu pye pi gháp lə cwí, ə́ ghʉ̌ ghap cwór.»

¹¹Gháp lə ghí pə́ zûʼ mêi mwo məno, Yěso kə̂ ncí ndâghʼ saghʼ-ləghaa ńdâʼ no lə́ páp ńté ńgó ə́ lə yaa ngǐ pə́, mə́i gháp lər mə́ tə mə́ nkə̂u Yelúsalêm, pye pə̂ nkwâŋ záp pə́ ńgó Ləfou Sê wo kə́ tó pə̂ mpfu wêi mpfu wêi.

¹²Yěso lâʼ ngô: «Cǒ môu ntôʼ lǎʼ nděsê, ə́ ngwǒ tə̂u ghíʼ pə́ wo laghʼ yé zóʼ fou-ntwoʼ, â pə̂ʉ nzəm mə́ sâʼ yé paghʼə lâʼ.

¹³Ə́ ngǐ lə̌r, ə́ fúŋ pəcó pəghaŋə-faʼ pé ləghə̂m, ə́ ŋə́ paghʼə nkâp yi lətəi-ndwuŋ lə̂ wǒwó təcər páp, ə́ ndǎʼ ngô: Pei cʉ́ʼ nzəm mə́ ntâŋ nkâp zə̂ tə n ndáʼ nkwó.

¹⁴Lə́ kâa pye lâʼ páp lə pə́ nkôŋ gháp no yé, ə́ ncʉ́ʼ ntsóʼ pəcó pye ntə́u gháp ńgó gháp wó yʉʼ yi a lə lər lə̂ wó, ə́ ndǎʼ ngô: Káa paghʼ pə́ nkôŋ wághʼ ńgó ŋuu wo pə́ fou waghʼ.

¹⁵Lə́ a lə lər tə nkə́u wó, pə́ kə̂ ńdâghʼ yé ńgʉ́ pə́ fou. A fû wó nkwó, ə́ fúŋ pəghaŋə-faʼ pé pi a lə ŋə́ nkâp lə́ páp ńgó gháp tó ḿbyétə́ ńdâʼ yé mbə̂u yi gháp lə cʉ́ʼ nzəm ndághʼ ńtáŋ nkâp zei tə ə́ pə́.

¹⁶Nduŋ-mbi tô ńdâʼ ngô: Ə́ Nde, n ndə ncʉ́ʼ ntáŋ paghʼə nkâp yi o lə ŋə́ lə́ məŋ lə̂ tə pəi zěi kwar məpaghʼ ləghə̂m.

¹⁷A lâʼ lə́ zʉ́ ngô: Ə́ poŋ, ô ngaŋə-faʼ yi shʉʼʉ. Ghíʼ o papə́ môu məzə̂u yi n ndə ŋə́ lə́ gho kwaʼ shʉʼʉ lə̂, n ngwo cʉ́ʼ ŋə́ mətúsoŋ ləghə̂m lə́ gho ô pə́ sâʼ měi.

¹⁸Mbâatə tô yé, ə́ ndǎʼ ngô: Ə Nde, n ndə ntâŋ paghʼə nkâp yi o lə ŋə́ lə́ məŋ lə̂, tə pəi zěi kwar məpaghʼ mə́ntaa.

¹⁹A lâʼ lə́ zʉ́ ngô: N ngwo ŋə́ mətúsoŋ mə́ntaa lə́ gho ô pə́ sâʼ měi.

²⁰Cǒ tâʼ tô yé ńdâʼ ngô: Ə́ Nde, paghʼə nkâp zô zə̂ yo, n ndə laghʼ zə̂u ndǐ ńkə́r ńdóʼó,

²¹n ndə pə́ mbôghʼ ghô ńté ńgó məno mô təi: O pyê zə̂u pə́ tə yǎa núŋú, ə́ mbou ntsôʼ pə́ tə yǎa mbî.

²²A lâʼ lə́ zʉ́ ngô: Ngaŋə-faʼ yi tə́poŋ, n ngwo lǎghʼ pə́ ndʉʉ tsâr gho fěʼ ghô. O lə pə́ ntsúŋú njî ńgó məno mâa təi, ńgó m mbyê zə̂u pə́ tə yǎa núŋú, ə́ mbou ntsôʼ pə́ tə yǎa mbî:

²³tə ńté hó koo o lə cóghʼ nkâp zâa mbâŋ? Mə́i n nkə kwó, ə́ ngǐ kwarə́, ə pəi zěi zápə mə́u.

²⁴Ə́ cʉ́ʼ nkə́ ndâʼ lə̂ pye pi gháp lə pə́ yʉʼ wó ngô: Pei ghôu yé ḿpfú paghʼə nkâp zei ńŋə́ lə́ ŋuu yi a ghwǒ məpaghʼ ləghə̂m.

²⁵Gháp lâʼ lə́ zʉ́ ngô: Ə́ Nde, ye pə mə́ məpaghʼ ləghə̂m!

²⁶Məŋ ndâʼ wéi, ŋuu yi a ghwǒ zə̂u, pə́ táa kʉʼʉ́; lə́ ŋuu yi káa a ghwô yé có zə̂u, pə́ táa pə̌i pfú mbaa məyʉʼ yi mboʼ a təi mbə́i nyáŋ mbó zʉ́.

²⁷Ə́ ngwó lə́ pəghaŋə mbəu pâa pi káa gháp kə pə̂i gháp ńgó məŋ mbə́ fou ghap lə̂, pei lághʼ gháp ńtó, ə́ nzáʼ pəlóŋ páp pə́ mbi məŋ.»

²⁸Yěso tsâr yə́rə́ tə mpfu kuʼ, a pfû mbi gháp pə pǎp pə̂ ńkóʼ ńdə̂r lə̂ Yelúsalêm.

²⁹Ə́ ndə́r tə mə́ nkə̂u Mbedfajê gháp Mbetanî, ə́ mbəʉ ləkôr mətʉ̌ məwə̂r Olîvə, Yěso tsôʼ pəcó ngaŋə-jyêʼ-no pwô ńtə́u gháp,

³⁰ə́ ndǎʼ lə́ páp ngô: «Pei wó cər lâʼ yi ə́ ŋwě wághʼə lo. Pei wo kə́u wó, ə́ jwó môu njəkáasʉ yi pə́ nkǎp, â pə́ yi cǒ ŋuu laa kə́ nyâŋ yé ndəu zʉ́. Pei kêʼ yé ńdághʼ ńtó.

³¹Pei lə̌i mə́ nkêʼ yé, ŋuu túŋú wéi ńgó pei kêʼ njəkáasʉ wə̂ ńté hó? Pei pwôr ńgó Nde pə̌ nkoŋ wěi.»

³²Pye pi a lə tə́u gháp lər ńkə́u nkə́ njwó zə̂u tsəm pə̂ pə́ ghíʼ Yěso yǎa ndǎʼ gháp.

³³Gháp lə pə́ nkêʼ mə́ceʼé njəkáasʉ wêi, pye pi a lə pə̂ ghap túŋu gháp ngô: «Pei kêʼ mə́ceʼé njəkáasʉ wə̂ ńté hó?»

³⁴Gháp pwôr ngô: «Nde pə̌ nkoŋ wěi.»

³⁵Gháp laghʼ môu njəkáasʉ wêi ngwó ŋə́ lə́ Yěso, ə́ ndághʼ məndǐ máp ńzə́tə́ nkaʼtə ye, ə́ ngʉ̌ a kôʼ ńnyáŋ ndəu zʉ́.

³⁶Njəkáasʉ cʉ̂ʼ ngí pə́ laghʼ yé ńŋə̌i, pye pə̂ mbi ə́ mə́ ndâghʼ məndǐ máp ńzə́tə laŋə́-ndə̂u.

³⁷A lə lər tə ngí pə́ fû ləkôr mətʉ̌ məwə̂r Olîvə shíʼ kə̂u Yelúsalêm, lətsei kə̂u lə̂ ngaŋə-jyêʼ-no yé pi gháp lə pə́ nzəm zʉ́ tə mbə́ pə́ nou wěi, gháp jî lə̂ ngúʼtə́ Sê lə̂ təʉ ńté mənkəʼə-məno mi gháp lə jwó.

³⁸Gháp lə pə́ ndâʼ ngô: «Ə Sê cóghʼ mbwórə lə́ fou yi a tô lə̂ ləjôghʼ Nde! Mbwórə wə́ tʉ̌-lə́pû, ghûʼtə pə̂ mbó Sê tə tʉ̌-lə́pû.»

³⁹Pəcó pəfalísia pi gháp lə pə̂ záp yʉʼ wó, fû cər nou lâʼ, ə́ ndǎʼ lə́ Yěso ngô: «Cícye, ghʉ pəghaŋə-jyêʼ-no pô pwo nâʼ!»

⁴⁰Yěso pwôr ngô: «Məŋ ndaʼ wéi, gháp lə̌i nâʼ mə́i məghǒ wo páŋə́ yʉʼ!»

⁴¹Yěso lə̂r tə mə́ nkə́u Yelúsalêm, ə́ náŋtə́ túsoŋ zêi, ə́ njǐ lə̂ ńdâa, ə́ mə́ ndâʼ ngô:

⁴²«O kaʼá ntə́i mə́ njî ghíʼ mboʼ o ghʉ̂ leʼé wo tə ngwô mbwórə! Lə́, ə́ lwo mənyôghʼ gho, mboʼ o jwô ghô po!

⁴³Ə cǒ mpfu táa pə́, pəghaŋə mbəu pô tó ńkə́r nkâʼ ndaghʼ ńzə́mə́ ghô ńŋə́ təsoŋ, ə́ fú məndyəghʼə́ mə́tsəm tó fár ghô,

⁴⁴ə́ nǎa wéi pə ghəpə́ zô pə́tsəm fár; ə́ pǒu pə̂i gháp tə ləghǒ pyér nzápə́ lə̂ có po, ńté no o kə muŋu mpfu yi Sê kə tó lə̂ mpfútə́ ghô.»

⁴⁵Yěso kə̂u ndə̂ Sê, ə́ njǐ lə̂ nzûŋ pətáŋ-mə́táa,

⁴⁶ə́ mə́ ndâʼ lə́ páp ngô: «Ə́ pə́ cər ŋwaʼa Sê ńgó ndə̂ zâa táa pə́ ndə̂ sʉ̂ʉtə. Lə́ pei laghʼ mə́ ńgʉ̌ ndə̂ pətsǒŋ.»

⁴⁷Yěso lə pə̂ ndə̂ Sê leʼé tsəm, ə́ njyêʼ pye no Sê, pətə́-ndə̂ pənuŋú-poʼ Sê ə́ ngʉ̌ pəkeʼtə́-lə́pə́ʉ Mə̌usə̂i, gháp pə pəkə̌m lâʼ pə̂ ndôu məsʉ̂ lə̂ ngʉ́ pə́ jwî yé.

⁴⁸Lə́ ndou gháp məsʉ̂ kə́káŋ, ńté no lâʼ tsəm lə tâghʼ lətuŋú, ə́ mə́ ntsúŋú nzûʼ no yi Yěso laʼ gháp zěi.