Read Ngombale Lúʼkáasʉ 20 Bible Online

Lúʼkáasʉ 20 - Ngombale bible

Lúʼkáasʉ 20

¹Yěso pə̂ có leʼé, ə́ mbə́ ndə̂ Sê mə́ njyêʼ pye zə̂u mbou mə́ ntsə́tə́ Nkəʉ Shʉʼʉ lə̂ lâʼ, pətə́-ndə̂ pənuŋú-poʼ Sê gháp pə pəkeʼtə́-lə́pə́ʉ Mə̌usə̂i, ə́ nkʉʼʉ́ pətikáŋ cər lâʼ zêʼ ńkə́u ndə̂,

²ə́ ntúŋú yé ngô: «Wǒ ŋuu ŋə̌ ghô mətəʉ lə̂ ndághʼ ngʉ̌ mwo məno? O laghʼ ləjôghʼ wó ńgʉ̂ zə̂u pei tsəm?»

³Yěso pwor lə́ páp ngô: «Məŋ zâa lə́wó, n ngwo tuŋú wéi tâʼ no. Pei láʼ ghâa:

⁴Wǒ ŋuu lə tə́u Jâŋ ńgó a ŋə̂ pye nci? Sê lə̂ kə tə́u yé kəʉ pə̂ pye mə́soŋ?»

⁵Gháp zûʼ, ə́ ntsəmtə́ təcər páp ngô: «Paghʼə lə̌i ndáʼ ńgó ə Sê lə́ lə̂ tə́u yé, mə́i a wo túŋú wághʼə ńgó tə ńté hó káa paghʼə lə zúʼ ntsʉ Jâŋ wêi?

⁶Lə́ ə́ mbǒu ndáʼ ńgó pye-mə́soŋ lə́ lə̂ tə́u yé, mə́i lâʼ wo lǎghʼ məghǒ tə́m wághʼə jwítə́, ńté no gháp pə́ ntsuŋú ńjî ńgó Jâŋ lə pə́ ntsətə-nkəʉ-Sê.»

⁷Ə́ nkwǎŋ yə́rə́, ə́ ncʉ́ʼ mbwôr ngô: «Káa paghʼ pə́ njî wághʼ ŋuu yi a lə tə́u yé.»

⁸Yěso lâʼ lə́ páp ngô: «Tə mbaa məŋ zâa, n ngwô lâʼ ghâa wéi ŋuu yi a ŋə̂ ghâa mətəʉ n ndaghʼ ngʉ̂ mwo məno po.»

⁹Yěso lâʼ yə́rə́, ə́ njǐ lə̂ ndághʼ saghʼ-ləghaa ńdáʼ lə̂ lâʼ ngô: «Cǒ ŋuu lǎʼ mbǐ mətʉ̌ mi pə́ kêi məntǎa měi ńdághʼ ńtsuŋu cǒ mbə̂u məluʼ cər nkâʼ zʉ́, ə́ mə́ ndə̂r lə̂ ləŋəi yi a kə́u wó ə́ cí, ə́ njwóʼ nkâʼ yé wêi mbó pəlwoŋə ńgó gháp pə́ fâʼ cər wó.

¹⁰Leʼé tǎa nkûʼ a tə̂u cǒ ngaŋə-faʼ ye ńgó a wó ńjwó pye pi a lə jwóʼ nkâʼ lə́ páp, ə́ mpfú yé zə̂u yi ə́ kwǎr nkâʼ, lə́ gháp ghou ngaŋə-faʼ ye wêi, ə́ sə́u yé ńzúŋ yé, a pə̂ʉ mbó fe.

¹¹A kə̂ ncí ntə́u cǒ tâʼ, gháp kə̂ ncí sə́u wei wə̂, ə́ noʼtə́ yé, ə́ nzǔŋ yé a pə̂ʉ mbó fe.

¹²A kə̂ ncí ntə́u mbâatə tárə́, gháp côghʼ məfʉ̌ŋ lə́ wêi wə̂, ə́ fú nkâʼ nzǔŋ yé.

¹³Ngaŋə nkâʼ lâʼ ngô: Tə n ngwo ghʉ̌ gháʼá? N ngwo tə̂u Môu ghâa yi n nkǒŋ yé gháʼate. Ndeʼ có gháp kə̂u ńgúʼtə́ yé.

¹⁴Lə́ gháp jwô ghíʼ a tô, ə́ tsəmə́ təcər páp ngô: Ŋuu yi a táa zʉ́ nkâʼ, â wo a tô lo, paghʼə jwí yé ńjí ńgó nkâʼ táa ncʉ́ʼ ḿbə́ pə̂ wághʼə.

¹⁵Gháp shuŋ yé ńdǎghʼ yé fú nkâʼ nkwǎr, ə́ njwí yé ḿméʼ.» Yěso lâʼ yə́rə́ tə ə́ kûʼ a túŋú gháp ngô: «Pei jwô zéi ńgó ŋwâr nkâʼ ghʉ̌ tó ghʉ̌ gháʼá lə́ páp?

¹⁶A táa tó ghʉ̌ pə jwítə́ gháp, â jwóʼ nkâʼ lə́ pye mə́ndeʼe.» Ə lâʼ zûʼ ghíʼ Yěso lǎʼ yə́rə́, ə́ ndǎʼ ngô: «Koo mbə̂u no zêi nyâŋ nkwátə pye!»

¹⁷Lə́ Yěso náŋtə gháp tə ndáʼ ngô: «Tə wo nkaŋ yi pə̂ cər ŋwaʼa Sê lo, ə́ pə́ gháʼá ndághʼ ńdâʼ ńgó hó? Ləghǒ yi pəpóu-ndə̂ lə měʼ zěi, lə pou ncʉ́ʼ ləghǒ yi ə́ pyěʼ ndə̂.

¹⁸Ləghǒ zêi ə̂ yi ə́ lə̌i mbə́ pə̂ wǒ ə́ mpfúŋ mə̂u, mə́i a wo pwóʼtə́; ə́ póu mpfúŋ lə́ ŋuu, mə́i ə́ wo fú nyotə́ ngaŋ.»

¹⁹Pətə́-ndə̂ pənuŋú-poʼ Sê gháp pə pəkeʼtə́-lə́pə́ʉ Mə̌usə̂i lə pə́ ńdôu ngôu Yěso pə̂ mpfu wêi mpfu wêi, ńté ńgó gháp lə tsuŋu ńjí ńgó a lâghʼ saghʼ-ləghaa wêi ńdâʼ no gháʼá pə́ lə́ páp, lə́ mbou mə́ mbôghʼ lâʼ.

²⁰Ə́ ncʉ́ʼ nkə́ ntə́u mənâŋ nzəm zʉ́, ńgó gháp ŋə́i ghíʼ pye shʉʼʉ lə̂, ə́ ngwo ntúŋú yé no ndághʼ ńkwaʼtə yé, ńjí ńgó mboʼ a kə̂u mbwǒr wó, ə́ ngwʉ̌ ləpə̌ʉ, pə́ ghôu yé ńŋə́ lə́ ngə́mnaa.

²¹Gháp tô ńtúŋú Yěso ngô: «Cícye, paghʼ pə̌ ńjí ńgó no yi o lâʼ ə́ mbóu njyêʼ pye zěi, ə́ pə́ lə́nə́ʉ. Koo o pə́ nkwé gho no ńdághʼ nkôŋ cǒ ŋuu. Lə́ o jyêʼ pye pə̂ no lə́nə́ʉ lə̂ ndághʼ ńgʉ̌ zə̂u yi ə́ wo poŋə́ Sê.

²²Lǎʼ wághʼ: Ləpə̌ʉ zághʼə ə́ ghíʼi mbə́i ńgó paghʼə máʼ ntsəp fou pəlóma kəʉ ngə́?»

²³Lə́ Yěso jî kwaŋtə záp, ə́ ndâʼ lə́ páp ngô: «Pei nyarə́ ghâa paghʼə nkâp ńjwó.

²⁴Ə sʉ̂ ŋuu gháp ləjôghʼ yi ə́ pə̂ mə́u ə́ mi wǒ?» Gháp lâʼ lə́ zʉ́ ńgó ə̂ mi fou pəlóma.

²⁵Yěso lâʼ lə́ páp ngô: «Ə́ poŋ! Pei ŋə́ zə̂u fou lə́ fou, ə́ ŋə́ yi Sê lə̂ Sê.»

²⁶Pwor-tsâr yi a ŋə̌ lə́ páp kəʼə gháp tə gháp cʉ̂ʼ nâʼ naʼá; káa kə́ kuʼ gháp lə̂ ndághʼ tsâr yé ńgôu yé mbi lâʼ.

²⁷Pəcó Pəsadúsia pi gháp lâʼ ńgó kâa ŋuu pə́ nzʉ̂ʉ yé lə̂ ləwʉ̂ cʉ́ŋə mbáatə́ Yěso, ə́ ntúŋú yé ngô:

²⁸«Cícye, Mə̌usə̂i lə ŋwaʼá cər ləpə̌ʉ zághʼ ngô: Ŋuu lə̌i nzóʼ məngyě, ə́ nkwʉ̂ yé tə́ měʼ zə̂u, ə́ pə́ ntúŋú ńgó fə̌r ye sóghʼ mpfǒghʼ, gháp zʉ́ jîtə ghəpə́ ńdaghʼ ńnúŋú ngər ŋuu yi a kwʉ mə́ lei.

²⁹Lǎʼ wághʼ: pəcó pəfə̌r lə pə́ wó, ə́ mbə́ mbiŋə saambwô, nduŋ-mbi zôʼ, ə́ ngʉ́ nkwʉ́ tə́ měʼ zə̂u.

³⁰Mbâatə sôghʼ mpfǒghʼ, ə́ nkə́ ncí nkwʉ́ yé tə́ měʼ zə̂u.

³¹Mbâatə tárə́ kə̂ ncí sóghʼ mpfǒghʼ wêi, ə́ nkə́ nkwʉ̂ yé pə́ tə měʼ zə̂u. Ə́ lə kə́ mbə́ pə́ yə́rə́, tə pəfə̌r pêi saambwô kwʉ́tə gháp pə́tsəm tə́ měʼ zə̂u.

³²Ə́ tâa ngí lyəghʼtə́ məngyě wei kə̂ nkwʉ̂ yé lə́wó.»

³³Gháp táa zʉ̂ʉ lə̂ ləwʉ̂, məngyě wêi pə́ yi warə́ ŋuu təcər páp? Ńté ńgó pəfə̌r pêi saambwô kə zóʼ məngyě wêi pə́tsəm.

³⁴Yěso pwor lə́ páp ngô: «Pye pi gháp pə́ cər ngoŋ yi mpfu wo pə́ ngwô pəngyě, ə́ mə́ ngwô pələ̂u.

³⁵Lə́ ngwǒ lə́ pye pi Sê táa ghʉ̌ gháp zʉ́ʉ lə̂ ləwʉ̂ ə́ nkə̂u cər ngoŋ shwî, mə́i gháp táa kə́ pǒu zôʼ gháp po.

³⁶Ə́ kə́ pǒu kwʉ̂tə gháp po, ńté ńgó gháp táa cʉ́ʼ pə̂ gháp pə́ ghíʼ pəcwôʼ Sê, ə́ pǒu pə́ ghəpə́ Sê yi a ghʉ̌ gháp zʉ̂ʉ lə̂ ləwʉ̂.

³⁷Tû-mbəʉ Mə̌usə̂i lə sâa-sǎa mbə́i ńgó ləzʉ̌ʉ lə̂ ləwʉ̂ pə́ wó. Ə́ pə́ lə̂ yʉʼ ŋwaʼa yi ə́ leʼtə no mǒghʼ yi ə́ lə pə́ nkʉ̂ lə̂ ləcuʼú ləghěi, a tə̂ʉ yʉʼ wó ə́ fúŋ Nde ngô: Ə Sê Ábələhâm, ə Sê Ísaghʼ, ə Sê Yokôp.»

³⁸Yěso kʉʼʉ ńdáʼ ngô: «Ə Sê gháʼá mbə́ pə̂ Sê pətəʉ, káa a pə̂ yé Sê pəpfû. Ńté ńgó ŋuu tsəm wə́ mbó Sê ḿbə́ pə̂ ntəʉ.»

³⁹Yěso pwôr yə́rə́, pəcó pəkeʼtə́-lə́pə́ʉ Mə̌usə̂i tôutə ńdáʼ ngô: «Cícye o pwor kwaʼ shʉʼʉ.»

⁴⁰Ə́ pə̂ yə́rə́, káa pye pêi kə́ mbóu nkuʼ gháp lə̂ nkə́ ncí ntúŋú yé có no.

⁴¹Yěso pou ndâʼ lə́ páp ngô: «Pei fûŋ Nzaʼ-nkʉ ńgó môu fou Ndavîd ńté hó?

⁴²Tû-mbəʉ fou Ndavîd lâʼ cər ŋwaʼa məzap-nci ngô: Ə Nde Tǎa Sê laʼ lə́ Nde ghâa ngô: Tó ńnyáŋ lə̂ ndyəghʼə́ pô ghâa yi təʉ,

⁴³tə ndáʼ nkə́u mpfu yi n ngwo lǎghʼ pəghaŋə mbəu pô ghʉ̌ lətǎghʼ məku zô.

⁴⁴Tə mboʼ fou Ndavîd fûŋ Nzaʼ-nkʉ ńgó Nde ye, a pou mbə́ môu ye lə́ zarə́ mbə̂u?»

⁴⁵Ə lâʼ lə ghí təʉ pə́ zúʼ, Yěso cwî ngaŋə-jyêʼ-no yé, ə́ ndǎʼ lə́ páp ngô:

⁴⁶«Pei páa pəkeʼtə́-lə́pə́ʉ Mə̌usə̂i. Gháp koŋ lə̂ máʼ pətəsə məndǐ ńdághʼ ŋáa ńkár, ə́ mbǒu nkóŋ ńgó pə sóghʼə́ gháp ndəu məzǎa. Ə́ nkə̂u məndə̂ cûʼtə gháp pə məyʉʼ lətsei, ə́ nkâŋ máp məyʉʼ pə́ mbi.

⁴⁷Gháp pi gháp laghʼ jîno mpfû məzə̂u pəpfǒghʼ-pəngyě, ə́ mbou nkôŋ lə̂ ngʉ́ sʉ̂ʉtə záp saghʼ, gháp laghʼ ńfûtə mənyôghʼ pye. Zap ngwôʼ táa tə̌i gháʼate.»