Read Ngombale Lúʼkáasʉ 22 Bible Online

Lúʼkáasʉ 22 - Ngombale bible

Lúʼkáasʉ 22

¹Məleʼé lətsei mbələ̂ghʼ tə mvuŋ yi pə́ fûŋ ńgó Pásʉ́ka lə pə́ nkûʼ.

²pətə́-ndə̂ pənuŋú-poʼ-Sê gháp pə pəkeʼtə́-lə́pə́ʉ Mə̌usə̂i pə̂ ndôu məsʉ̂ lə̂ ndághʼ ńjwí Yěso, lə́ ə́ mə́ mbôghʼ lâʼ.

³Sə́tə kə̂u cər ntə̂ʉ Yúda yi pə́ fûŋ yé ńgó Yúda Isəkaryôtə, a pə̂ cǒ ŋuu lə́ ngaŋə-jyêʼ-no Yěso ntsap pwô lə̂ ləghə̂m.

⁴A cʉ̂ʼ nkə́ ngwó ńjwó pətə́-ndə̂ pənuŋú-poʼ-Sê gháp pə pətə̌ʉ-tú-mbi lə̂ mbáp ndə̂ Sê, gháp pə pǎp nyâŋ sê ńkwaŋtə́ ghíʼ a wo ghʉ̌ poŋə́ féi Yěso ńŋə́ lə́ páp.

⁵Ə́ fû mboŋə́ gháp tə gháp tsuŋtə təcər páp ńgó gháp wo ŋə́ nkâp lə́ zʉ́.

⁶A pə̂i, ə́ nkə́ ntóghʼ njí lə̂ ndôu məsʉ̂ ghíʼ a wo féi Yěso ńŋə́ lə́ páp tə lə́u lâʼ jí yé po.

⁷Leʼé yi pə́ lə pfâr mbələ̂ghʼ tə mvuŋ tô, ə́ mbə́ leʼé yi pə́ lə wâr pôu ndənzʉ lə̂ no lətsei.

⁸Yěso tə̂u Pyêh gháp Jâŋ, ə́ ndǎʼ lə́ páp ngô: «Pei wó ntsuŋu mághʼə məzʉ̂ *Pásʉ́ka ghíʼ paghʼə wo zʉ́.»

⁹Gháp túŋu yé ngô: «O koŋ ńgó paghʼ wó ghó ńtsuŋú měi?»

¹⁰A lâʼ lə́ páp ngô: «Pei tsúŋú ńzúʼ, pei wo lə̌r tə kə́u túsoŋ, ə́ pəutə́ ŋuu mbiŋə yi a pyěʼ twô nci, pei tsə́ʉ nzəm zʉ́ tə a kə́u ndə̂, pei kə̂u zéi lə́wó.

¹¹Ə́ ndáʼ lə́ ngaŋə ndə̂ ngô: Cícye lâʼ ńgó pə túŋú ghó ńgó lûm ndə̂ yi gháp pə ngaŋə-jyêʼ-no yé wo zʉ́ məzʉ̂ lə̂ no lətsei Pásʉ́ka cər wó, â ghǒ?

¹²A wo nyarə́ wéi tə́koʼ lûm ndə̂ lə́ dêghʼ yi tʉ̌, mə́i pə́ tə́i mə́ ńtʉ́ŋtə́ shʉʼʉ, ə̂ pə́ yʉʼ yi pei wo tsuŋú mághʼə məzʉ̂ lətsei Pásʉ́ka wó.»

¹³Gháp lər ńkə́u wó, ə́ njwó zə̂u tsəm pə̂ pə́ ghíʼ Yěso yǎa ndǎʼ gháp. Gháp tsuŋu máp məzʉ̂ Pásʉ́ka yʉʼ wó.

¹⁴Mpfu lə kuʼ, Yěso gháp pə ngaŋə-jyêʼ-no yé tó ńnyáŋ sê mə́ nzʉ̂ zə̂u.

¹⁵A lâʼ lə́ páp ngô: «N ntsâa mə́ gháʼate lə́ pə́ yi mboʼ paghʼə təmtə ńnyáŋ ńzʉ́ məzʉ̂ wo Pásʉ́ka m mboŋə́ jwó ngwôʼ.

¹⁶Məŋ ndâʼ gháʼá wéi ńgó n ndáʼ kə́ pǒu zʉ́ ghâa cǒ Pásʉ́ka po, tə láʼ kə́u mpfu yi no wêi wo lətsei pə̂utə́ mə́ cər Ləfou Sê.»

¹⁷A lə lâʼ lə́ páp yə́rə́, ə́ nkhwǒr tə́tóʼ məluʼ ńgwô, ə́ ŋə́ nkhwo mbó Sê, ə́ ngǐ cóghʼ mbó páp ńdǎʼ ngô: «Pei ko tə́tóʼ wo ńnó pei pə́tsəm.

¹⁸Pei jí ńgó məŋ, n ndáʼ kə́ pǒu nô ghâa məluʼ po tə kə́u mpfu yi Ləfou Sê tô.»

¹⁹A lə pou mbyé mbələ̂ghʼ, ə́ ŋə́ nkhwo mbó Sê, ə́ mbwóʼ wěi, ə́ ngí ńŋə́ lə́ ngaŋə-jyêʼ-no yé, ə́ ndǎʼ ngô: «Yo mbap mbəʉ zâa yi pə́ ŋə́ ńté tû zéi. Pei cʉ̂ʼ nyáŋ ńgʉ̂ gháʼá lə̂ ndághʼ mə́ nkʉ̂ʉtə ghâa.»

²⁰Gháp lə zʉ̂ məzʉ̂ tə myâghʼ, Yěso khwôr tə́tóʼ məluʼ ə́ ngí pə́ côghʼ mbô páp, ə́ ndǎʼ ngô: «Tə́tóʼ məluʼ wo gháʼá mbə́ kaa shwî ə́ ndeitə́ lə̂ məci mâa mi ə́ wo ncwə́rə́ wó ńté tû zéi.

²¹Paghʼ ŋuu yi a fêi ghâa ńŋə́ pə́ ntəm zə̂u ńzʉ́.

²²Ə̂ no lə́nə́ʉ, Môu Ŋuu wo kwʉ́ ghíʼ Sê lə láʼ ntághʼ, lə́ ndou wə́ tû ŋuu yi a fêi yé yé ńŋə́.»

²³Gháp zûʼ yə́rə́, ə́ nǎa ndyár, ə́ shərə́ ńtúŋú təcər páp ńgó wǒ gháʼa ḿbə́ nou páp yi a wo ngʉ zêi mbə̂u no?

²⁴Ngaŋə-jyêʼ-no Yěso pə̂ nzóŋə no lə̂ ndághʼ njwó ŋuu yi a wo pə́ təcər páp, ə́ pə́ ŋuu njwǐ.

²⁵Yěso lâʼ lə́ páp ngô: «Pəfou pətəpə̌i-no Sê pə̂ sâʼ məlâʼ máp, ə́ nôʼtə pye noʼtə́, ə́ nkə́ nkôŋ záp pə́ ńgó pə fûŋ gháp ńgó pəghʉ̌ shʉʼʉ.

²⁶Lə́, koo pei fəiʼi gháp. Tə ncʉ́ʼ yə́rə́, ŋuu yi a pə̌ ŋuu njwǐ təcər pei, â pə̂ pə́ ghíʼ môu lə́, ŋuu yi a pôu sâʼ wéi, â pə̂ pə́ ghíʼ ŋuu yi a faʼ mbó pei lə.

²⁷Pei láʼ ghâa: Ŋuu njwǐ wǒ ŋuu? Â ŋuu yi a nyǎŋ sê mə́ nzʉ̂ zə̂u, kəʉ pə́ ŋuu yi a ghaptə? Tə kâa pə̂ pə́ ŋuu yi a nyǎŋ sê mə́ nzʉ́? Lə́ ə́ ngwǒ lə́ məŋ, mə́i m mbə̂ zâa təcər pei pə́ ghíʼ ŋuu yi a faʼ mbó pei lə̂.

²⁸Pei gháʼá mbə́ pye pi pei kə́ nyáŋ mbəʉ məŋ mpfu yi n ndə pə́ cər nkwaʼtə.

²⁹Ə̂ zə̂u yi ə́ ghʉ̌, n ngwô kə́ ŋə́ zei ləfou, ə́ ndʉŋ-ndʉŋ ghíʼ Tə́ ghâa lə ŋə́ ləfou lə́ məŋ lə̂.

³⁰Ńjí ńgó ə́ leitə́ yə́rə́, pei nyâŋ ndə̂ məŋ cər ləfou zâa, ə́ nzʉ́ ə́ mbǒu nó, ə́ nyáŋtə́ lə̂ məlwoŋ ləfou, ə́ féʼ məcʉŋə-ndə̂ Ísə́lahêl ntsap pwô lə̂ ləghə̂m.»

³¹Yěso fûŋ Síməu, ə́ ndǎʼ lə́ zʉ́ ngô: «Sə́tə gháʼá mə́i a yaa mə́ ndǎʼ ńgó pə nyér wéi lə́ zʉ́, â cʉ̂ʼ wéi ghíʼ pə́ cʉ̂ʼ pâa lə̂.

³²Lə́, n sʉʉtə́ mə́ Sê ńté gho, ńgó koo pə̂i-ntə̂ʉ zô cwî. Lə́ o lə̌i ntáa mbə̂ʉ tə mbə́ nzəm məŋ, o côghʼ ntə̂ʉ pəfə̌r pô.»

³³Pyêh lâʼ ngô: «Ə́ Nde, ə́ lə̌i mbə́ pə́ lə̂ nkə́u tsâŋ kəʉ pə́ lə̂ nkwʉ̂, mə́i poghʼo wo nǎa pə́.»

³⁴Yěso lâʼ lə́ zʉ́ ngô: «Pyêh, n ntsúŋú ndǎʼ ghô: Mənkhwoʼ táa tóŋ yé lətwûʼ leʼé wo, tə́ ghó o muŋú mə́ ghâa mpfu tárə́ po.»

³⁵Yěso kə ncí ntúŋú ngaŋə-jyêʼ-no yé ngô: «N ndə tə́u wéi tə nkâp, tə məlaŋə́, tə paa gháʼá, pei lə kə́u mbûŋ có zə̂u mo?» Gháp pwor ngô: «Ə́ ngə́! Káa có zə̂u lə pûŋ yé wághʼ.»

³⁶A pôu ndáʼ lə́ páp ngô: «Ə́ tə̂ʉ mpfu wo gháʼa, ə́ mbə́ yi ŋuu lə̌i ngwô nkâp ye, a pyê, tə mbaa paa. Ŋuu yi kâa ghwô ye nyǐ ntso, â fə̂i ndǐ ye ńdághʼ ńzə́u.

³⁷Məŋ ndâʼ wéi ńgó no yi pə́ lə ŋwaʼá cər ŋwaʼa ńté ghâa ngô: Pə lə kwaʼ yé nou məfwôr. Ə́ pə́ mə́ ngwo mbə̂utə́ wó.»

³⁸Ngaŋə-jyêʼ-no yé lâʼ lə́ zʉ́ ngô: «Ə́ Nde, mənyǐ ntso mwo sê mə́mbwô.» Yěso lâʼ ngô: «Ə́ kuʼ gháʼá lə́.»

³⁹Yěso lə lâʼ yə́rə́, ə́ kwǎr mə́ ndə́r lə̂ ləkôr mətʉ̌ məwə̂r Olîvə ghíʼ ə́ lə pə́ mar ye, ngaŋə-jyêʼ-no yé tsə̂ʉ nzəm zʉ́.

⁴⁰Gháp lə lər tə nkə́u wó, a lâʼ lə́ páp ngô: «Pei sʉ̂ʉtə Sê, ə́ mbóghʼ lə̂ mpfúŋ cər nkwaʼtə.»

⁴¹Ə́ ndǎʼ yə́rə́, ə́ nyér gháp, ə́ ŋə̌i no tâʼ lǎp ləmǎʼ ləghǒ, ə́ shíʼ ńkʉ́ʼtə́ sê, ə́ sʉ́ʉtə́ Sê ńdâʼ ngô:

⁴²«Tǎa, o lə̌i nkôŋ, o pfû yo ntə̂uʼ ngwôʼ mbó məŋ. Lə́, káa məŋ ndâʼ ńgó o ghʉ́ pə́ ghaa ləkoŋtə. Ghʉ̌ pə̂ gho.»

⁴³[Ə́ ndáʼ yə́rə́, tâʼ cwôʼ Sê fû tʉ̌-lə́pû ńtó lə̂ ntóutə́ yé.

⁴⁴Ləmoghʼ ghôu yé, a cʉ̂ʼ mə́ sʉ̂ʉtə Sê pə́ lə́ cʉ́ŋə́, jiʼi yé ghi pə́ kwǎr tsə̂ʉtə sê, ə́ cʉ́ʼ mbə̂ pə́ ghíʼ məkǎa məci lə̂.]

⁴⁵A lə sʉ́ʉtə́ Sê yə́rə́ tə ə́ kûʼ, a lesê mbə̌ʉ nzəm ńcə́r ngaŋə-jyêʼ-no yé; ə́ ngǐ tó, mə́i gháp fʉ mə́ tə nkáa, ə́ ndétə gháp.

⁴⁶A lâʼ lə́ páp ngô: «Pei lê ńté hó, pei létə sê ńsʉ́ʉtə́ Sê ḿbóghʼ lə̂ mpfúŋ cər nkwaʼtə.»

⁴⁷Yěso lə pyêr mə́ ntsâr tsarə́, nou lâʼ tô, Yúda yi a lə pə́ cǒ tâʼ ŋuu lə̂ ngaŋə-jyêʼ-no yé ntsap pwô lə̂ ləghə̂m pfû mbi, ə́ ncʉ́ŋə́ mbáatə́ yé, ə́ mbáʼá yé.

⁴⁸Yěso lâʼ lə́ zʉ́ ngô: «Yúda, o laghʼ pə̂ mbáʼá féi Môu Ŋuu ńŋə́ áa?»

⁴⁹Ngaŋə-jyêʼ-no Yěso yi ə́ lə pə́ mbəʉ zʉ́ jwô zə̂u yi ə́ pə́ ngwo nděi wó, ə́ ntúŋu yé ngô: «Ə́ Nde, paghʼ lághʼ mənyǐ ntsô mághʼ ńdwóʼó?»

⁵⁰Cǒ ŋuu lə́ páp kə̂ ntóghʼ ndághʼ nyǐ ntsô ye ńsə́u ngaŋə-faʼ tə́-ndə̂ pənuŋú-poʼ Sê, ə́ nzáʼ lətuŋú yé yi təʉ, ə́ pfûŋ sê.

⁵¹Lə́ Yěso lâʼ lə́ páp ngô: «Pei nyér, ə́ kuʼ gháʼá lə́.» Ə́ ncʉ́ʼ nkə́ nkə̂u lətuŋú ŋuu wêi, ə́ shwîtə.

⁵²Yěso lâʼ lə́ pətə́-ndə̂ pənuŋú-poʼ Sê gháp pə pətə́-ndə̂ pəpáp ndə̂ Sê, ə́ ngʉ̌ pəkə̌m lâʼ pi gháp lə tó lə̂ ngôu yé ngô: «Pei laghʼ ghâa ńfúŋ pə́ cǒ ntsǒŋ tə mə́ ntô ńgǒu məŋ, ə́ ŋə́i ńgwô mənyǐ ntso gháp pə pəkə́shʉŋ mo?

⁵³N ndə pə̂ leʼé tsəm, ə́ nkə́ mbə̂ pə́ təcər pei *ndə̂ Sê, káa pei ghôu wéi ghâa. Lə́, zêi mpfu yo, ə́ nkûʼ mə́, ə́ mbə́ mpfu yi nzə̌m wo nyarə mətəʉ mé.»

⁵⁴Ə́ pə̂ yə́rə́, gháp ghou yé mə́ ndághʼ yé ńdə̂r lə̂ nzeʼ tə́-ndə̂ pənuŋú-poʼ Sê, Pyêh tsə̂ʉ nzəm páp, lə́ mbə́ pə́ tə nzəm.

⁵⁵Gháp kə́u wó, ə́ ntsuŋú mǒghʼ soŋ tətáa ńnyáŋtə́ sê mə́ ńzâghʼ. Pyêh tô yé ńnyáŋ təcər páp.

⁵⁶Cǒ môu-məngyě yi a lə faʼ nzeʼ wêi nyâŋ tə mǒghʼ kêʼ yʉʼ, a lə̂i Pyêh, ə́ ndâʼ ngô: «Ŋuu wo gháp ŋuu yi pə́ tə́i ngǒu yé lə̂ yǎa mbə́.»

⁵⁷Pyêh múŋu Yěso, ə́ ndâʼ ngô: «Mǎa, káa m mə́ ńjí ghâa yé!»

⁵⁸Ə́ ghi pə́ mpfu pwô, cǒ ŋuu nâŋ yé yé lə́wó tə ndáʼ ngô: «Ô zô cǒ ŋuu gháp.» Pyêh pwor lə́ ngaŋ ngô: «Tǎa, kâa m mbə̂ ghâa cǒ.»

⁵⁹Ə́ pou ngí lěi tâʼ mə́nəu, cǒ ŋuu lâʼ yé tə nkâa ngô: «Kwaʼ lə́nə́ʉ, gháp ŋuu wo yǎa mbə́, ńté ńgó a yaa mbə̌i mbə̂ yé ŋuu Galilêi lə́wó.»

⁶⁰Pyêh pwôr ngô: «Kâa njî ghâa zə̂u yi o lou ńdáʼ zěi.» Pyêh ghi pə́ lâʼ yə́rə́, mənkhwoʼ kə̂ mə́ ntóŋ.

⁶¹Nde shə́rə, ə́ náŋtə́ Pyêh. A kʉ̂ʉtə no yi Nde tə̌i ndǎʼ lə́ zʉ́ ngô: «Mənkhwoʼ táa ghǐ tóŋ leʼé wo, mə́i o muŋu mə́ ghâa mpfu tárə́.»

⁶²Pyêh kwâr tə nkə́u pěi, ə́ ngêʼtə́ gháʼate.

⁶³Pye pi gháp lə pâp Yěso lə pə́ sə̂u yé, ə́ mə́ nzôutə yé.

⁶⁴Gháp lə pôu sʉ̂ yé, ə́ mə́ sə́u yé, ə́ ndâʼ lə́ zʉ́ ngô: «Tóghʼ ŋuu yi a sə̌u ghô.»

⁶⁵Gháp lə ghʉ yə́rə́, ə́ mə́ kʉ́ʼʉ́ ńdaʼ məno tə nzáa lə́ zʉ́ mi gháp laghʼ ńzôutə yé zoutə́.

⁶⁶Nzʉ̂ fôghʼ, pəkə̌m lâʼ, pətə́-ndə̂ pənuŋú-poʼ Sê gháp pə pəkeʼtə́-lə́pə́ʉ Mə̌usə̂i fûŋ cûʼtə záp, ə́ ngʉ̌ pə́ lághʼ Yěso ńtó lə̂ mbi páp.

⁶⁷Gháp lâʼ lə́ zʉ́ ngô: «O lə̌i mbə́ Kəlísto, o lâʼ wághʼ.» Yěso pwôr lə́ páp ngô: «Məŋ ndə̌i ndáʼ wéi, mə́i pei wo pə̂i wéi po,

⁶⁸ə́ mbǒu ńtúŋu wéi no, mə́i pei wo pwôr wéi po.

⁶⁹Lə́, lə̂ fú mpfu wo, Môu Ŋuu wo cʉ̂ʼ nyâŋ pə́ lə̂ ndyəghʼə́ pô Tsə-pye yi təʉ.»

⁷⁰Gháp pə́tsəm kəmə ńdâʼ ngô: «Ńjí ńgó ô Môu Sê áa?» Yěso pwôr ngô: «Ə́ kwar pə́ ntsʉ pei, mə̂ŋ wěi.»

⁷¹Gháp cʉ́ʼ shə́rə́ ńdǎʼ təcər páp ngô: «Tə ə́ lə̌i mbə́ gháʼa, paghʼə kə̂ mbóu ndou warə́ nzǔʼ-njwó? Paghʼə tsuŋu ńzúʼ no yi ə́ kwǎr ntsʉ zʉ́ pə́ paghʼə.»