Read Ngombale Lúʼkáasʉ 23 Bible Online

Lúʼkáasʉ 23 - Ngombale bible

Lúʼkáasʉ 23

¹Ngaŋə cûʼtə lâʼ yə́rə́, ə́ nděsê pə́tsəm, ə́ ndǎghʼ Yěso ńdə́r lə̂ mbi Piláto.

²Ə́ njǐ lə̂ mbútə́ yé ndǎʼ ngô: «Paghʼ jwǒ ŋuu wo ghíʼ a ŋâa nkár cər ngoŋ wághʼə ńcôŋ tû lâʼ, ə́ ntôʼ pye lə̂ máʼ ntsəp ńŋə́ lə́ fou pəlóma. Ə́ mbǒu mə́ ndâʼ ńgó â Kəlísto, ə́ mbə́ fou.»

³Piláto túŋu Yěso ngô: «Ô fou pə Yúda áa?» Yěso pwôr lə́ zʉ́ ńgó: «O pə̌ ndaʼ yə́rə́.»

⁴Piláto lâʼ lə́ pətə́-ndə̂ pənuŋú-poʼ Sê mbaa lə́ lâʼ ngô: «Káa m mə́ njwó ghâa no yi ŋuu wo fǎa zěi.»

⁵Lə́ gháp kʉʼʉ ntə̂i ndəʼ ńdâʼ ngô: «A pə̌ ŋáa nkár ńtwótə pye ńgó gháp tə̂i tû ə́ cər lâʼ Yudêi tsəm. A lə ji Galilêi, ə́ yo a kə́ mə́ ndaghʼ ńtó tó tə ńkə́u yaʼa gháʼá lo.»

⁶Piláto zûʼ yə́rə́, ə́ ntúŋú ngô: «Â ŋuu Galilêi mo?»

⁷Gháp pə̂i. A tə̂u Yěso ńŋə́ lə́ fou Elôdə, ńté no zʉ́ lə́ lə sâʼ zêi paghʼə-ngoŋ. Ə́ ghi pə́, mə́i Elôdə kə tô tə mbə́ yé Yelúsalêm lə́ məleʼé mêi.

⁸Elôdə jwô Yěso, ə́ fú ntsêi gháʼate, ńté ńgó tə fú, a pə̂ ntsâa lə̂ njwó yé ńté məno mi pə́ lə ləʼtə ńté yé; ə́ mə́ nkwâŋ ńgó mboʼ a ghʉ̂ cǒ ndǎa-jwô-no wêi, a jwô yé lə́wó.

⁹Ə́ ntúŋú yé məno tə nzáa, lə́u a pwôr yé có po.

¹⁰Pətə́-ndə̂ pənuŋú-poʼ gháp pə pəkeʼtə́-lə́pə́ʉ Mə̌usə̂i pə̂ yʉʼ wó, ə́ fú mə́ nkâp məno tû zʉ́ gháʼate.

¹¹Elôdə gháp pə pəmə́káa pé nzoutə Yěso, ə́ ndyáŋə́ yé tə mbyé ndǐ ləfou, ə́ mǎʼ ndəu zʉ́. Elôdə lâʼ ńgó pə lághʼ yé mbə̌ʉ nzəm ngwó ńŋə́ yé lə́ Piláto.

¹²Ə́ lə ghi pə́, Piláto gháp Elôdə pə̂ lə̂ mbəu, lə́ tə mbóu fú leʼé wêi, gháp zʉ́ cʉ̂ʼ pəsə̌u.

¹³Pə́ lâghʼ yé ńkə́u wó, Piláto fûŋ pətə́-ndə̂ pənuŋú-poʼ, tə mbaa pəsǎʼ-lâʼ gháp pə pye lâʼ pé, ə́ nkə̂itə́ gháp.

¹⁴Ə́ ndǎʼ lə́ páp ngô: «Pei yǎa ńdǎghʼ ŋuu wo tó mbi məŋ, ə́ ndaʼ ńgó a pə̌ ŋáa ńcôŋ tû pye lâʼ. N nkə̌ fěʼ yé pə́ mbi pei. N ngwo lə́ məno mi pei yǎa ndǎʼ měi ńté yé, kâa jwô ghâa có no yi a wʉ̌ zěi tə mboʼ pə́ jwî yé jwí.

¹⁵Tə mbaa fou Elôdə kâa jwô yé wʉ no yé, tə a pou mə́ mbághʼə yé ńŋə́ lə́ məŋ. Məŋ ndâʼ gháʼá wéi ńgó ŋuu wo kâa wʉ̂ yé có no tə ə́ pə̂ yi mboʼ pə́ jwî yé.

¹⁶Lə́ ghíʼ ə́ kə́ mbə́ yə́rə́ lə̂, n ngwo ghʉ̌ pə lághʼ ngwaa ńsə́u yé ńtyághʼ yé ńnyér.»

¹⁷Ə́ lə pə̂ lə́ maa lətsei Pásʉ́ka ntsəm, Piláto ghwô lə̂ nkwárə́ tâʼ ngaŋə-tsâŋ.

¹⁸Lə́, lâʼ cʉ̂ʼ mbáŋə pə̂ yʉʼ ńdâʼ ngô: «Pə jwí ŋuu wə̂, ə́ nyêr Pənə́páasʉ.»

¹⁹Pənə́páasʉ wêi lə pə́ tsâŋ ńté tághʼə́ yi a lǎʼ mbə́ túsoŋ, ə́ mbou nkʉ́ʼʉ́ no njwí ŋuu.

²⁰Piláto kə ncí ndáʼ no lə̂ lâʼ ńté ńgó a lə pə́ nkôŋ nyêr Yěso.

²¹Lə́ lâʼ tsəm kə̂ mə́ nkʉ́ʼʉ́ mbáŋə pə̂ yʉʼ, ə́ ndâʼ ngô: «Kʉ̌ʉ yé lə́ tʉ̌-mbʉ̂ŋtə! Kə́ nkʉ̌ʉ yé pə́ lə́ tʉ̌-mbʉ̂ŋtə!»

²²Piláto lâʼ no lə̂ lâʼ lə̂ mbâatə mpfu tárə́ ngô: «No tə́poŋ yi a ghʉ̌ zěi, ə̂ zarə́? Káa məŋ njwô ghâa có no yi a wʉ̌ zěi tə mboʼ pə́ jwî yé. N ngwo ghʉ̌ pə lághʼ ngwaa ńsə́u yé, məŋ nyér yé.»

²³Lə́ gháp kə̂ mə́ ntə̂i pə̂ ndəʼ ńgó pə kə́ nkʉ̂ʉ Yěso kʉ̌ʉ lə̂ tʉ̌-mbʉ̂ŋtə.

²⁴Ə́ tsə Piláto, a cʉ̂ʼ ngʉ́ zə̂u yi gháp lə pə́ ntúŋu yé zěi.

²⁵Ə́ fú tsâŋ ńkwarə́ ŋuu yi gháp lə túŋú ńgó a kwárə́ yé. Ə́ ŋuu yi a lə kə́u tsâŋ ńté tághʼə́ mbaa no njwí ŋuu, ə́ ŋə́ Yěso lə́ páp ńgó gháp laghʼ yé ńgwó ńgʉ̂ záp zə̂u yi gháp kǒŋ.

²⁶Gháp laghʼ Yěso mə́ ndə́r, ə́ nkə́u laŋə́-ndə̂u ńjwó Síməu ŋuu Silêinə pə̂ nkwô nkâʼ. pəlwóʼó-ntso ghou yé ndǎghʼ təʉ ńgʉ́ a khwôr tʉ̌-mbʉ̂ŋtə Yěso ndághʼ ńtsə́ʉ nzəm páp.

²⁷Ə lâʼ lə pə́ nzəm, pəngyě pə̂ nou ŋə́i mə́ mbûʼ mənzoʼ máp ə́ ngêʼtə́ ńtʉ́ŋə ngwôʼ Yěso.

²⁸Yěso ŋəi tə shərə ńnáŋtə́ gháp ndǎʼ ngô: «Pəngyě Yelúsalêm, koo pei kə̂ ndâa ghâa, pei lâa pə̂ tû-mbəʉ zéi tə mbaa ghəpə́ zéi.

²⁹Pei jí ńgó məleʼé lâʼ pə́ ntó, ə́ mbə́ mi pə́ wo lǎʼ ngô: Pəndʉʉ-mboŋ, ə̂ pəkə̌i-pəngyě, ə́ pi gháp laa kə́ jí, káa kə́ nóŋə gháp môu.

³⁰Ə́ wo láʼ kə́ pə́ pə̂ tə pye lâʼ lə́ məkôr jwǐ ngô: Pei kóghʼə́ ńcwə́rə́ lə́ paghʼ, ə́ lǎʼ lə́ mi pəmə́ceʼé ngô: Pei koghʼə́ shwə̌ghʼ wághʼ.

³¹Ə́ tsâa lə̂ nkwʉ́tə́ yə́rə́, ńté no pə́ lə̌i ndáp lə̂ tʉ̌ shwî gháʼa, mə́i pə́ táa kə́u lə̂ tʉ̌ zə̌u, ə́ fú cʉ́ʼ ghʉ̌ pə́ gháʼá?»

³²Pə́ lə nâa Yěso gháp pə pəcó pətsǒŋ pə́pwô ńdǎghʼ ńdə́r, lə̂ ngwó ńjwítə́ gháp pəpáp.

³³Gháp lə lə̂r tə nkə́u yʉʼ yi pə́ fûŋ ńgó Kwěi-tû, pə́ kəʉ Yěso lə́ tʉ̌-mbʉ̂ŋtə, tə mbaa pətsǒŋ pêi pə́pwô lə̂ máp mətʉ̌-mbʉ̂ŋtə. Tâʼ pə̂ lə́ ndyəghʼə́ po Yěso yi təʉ, cǒ pə̂ lə́ ndyəghʼə́ po yé yi kwap.

³⁴Yěso sʉ̂ʉtə Sê ngô: «Tǎa, lyəghʼə́ məfaa ghâp, ńté ńgó káa gháp pə̂ ńjí gháp zə̂u yi gháp ghʉ̂ zěi.» Pəlwóʼó-ntso tə̂m pyêr ńdaghʼ ńgáptə́ məndǐ mé.

³⁵Ə lâʼ lə tə̂ʉ mə́ njwô ghíʼ pə́ kʉʉ Yěso. Pəsǎʼ-lâʼ pə̂ njwî yé ńdâʼ ngô: «A lə pfû pəcó pye mbó ləwʉ̂, a pou mpfú tû-mbəʉ yé mpfu wo láa, ghíʼ a lə̌i mbə́ Kəlísto, ə́ ŋuu yi Sê lə tsóʼó yé.»

³⁶Pəlwóʼó-ntso lə kə́ mə́ ndyáŋə záp yé lə́wó, ə́ ncʉ́ŋə́ mbâatə yé, ə́ nkʉ̂ʉ lətǐ ntsʉ zʉ́.

³⁷Ə́ mə́ ndâʼ ngô: «O lə̌i mbə́ fou pəyúda, o pfû tû zô mbô ləwʉ̂ pə́ gho.»

³⁸Pə́ lə ŋwaʼá zə̂u, ə́ nkʉ̌ʉ lə́ tʉ̌-mbʉ̂ŋtə ndəu tû Yěso ngô: «Yo gháʼá mbə́ fou pəyúda.»

³⁹Cǒ tâʼ ntsǒŋ yi pə́ lə kə́r yé lə̂ yé tʉ̌-mbʉ̂ŋtə pə̂ nzôutə Yěso ńdâʼ ngô: «Koo pə́ Kəlísto mo? Pfú tû zô mbó ləwʉ̂, ə́ nkə́u ḿpfú zághʼ lə́wó.»

⁴⁰Lə́ cǒ zûʼ, ə́ sáʼ yé, ə́ ndâʼ ngô: «Koo o póghʼ Sê áa? Gho yi pei zʉ́ naa nkwʉ̂ tâʼ mbə̂u.

⁴¹Poghʼo kwʉ gháʼá məno móghʼo. Lə́ ə́ ngwǒ lə́ zʉ́, mə́i kâa ghʉ́ yé có no tə́poŋ.»

⁴²A lə sâʼ yé yə́rə́, ə́ mbǒu sʉ̂ʉtə Yěso ngô: «Yěso, táa nkʉ́ʉtə́ ghâa mpfu yi o tǒ ḿbə́ fou.»

⁴³Yěso lâʼ lə́ zʉ́ ngô: «Kwaʼ lə́nə́ʉ, məŋ ndâʼ ghô ńgó poghʼo wo nǎa pə́ tʉ̌-lə́pû leʼé wo.»

⁴⁴Ntə̌ʉ-nəu lə cʉ́ʼ mə́ nkûʼ kuʼú, mə́nəu fû ncwí, yʉʼ naa shʉ́ŋ cər lâʼ tsəm, ə́ ncí tə nkə́u mpfu mbwǒr-nəu lə́ pəmə́nəu pə́tárə́.

⁴⁵Ndǐ yi pə́ lə lǎghʼ ńkhʉ́ŋə́ yʉʼ yi pənuŋú-poʼ-Sê tə̂ʉ wó ndə̂ Sê fû tʉ́ sáa təcər tə nkə́u sê.

⁴⁶Yěso ghêʼtə lə̂ təʉ ńdâʼ ngô: «Tǎa n nyěr Zəghʼə zâa mbó gho.» Ə́ ndǎʼ yə́rə́, ə́ ndêi-lěi ntsə́ʉ ńgó kəpə́.

⁴⁷Ŋuu yi a sâʼ pəlwóʼó-ntso nkʉ pəlóma lə jwô zə̂u tsəm yi ə́ lěi, ə́ ngúʼtə́ Sê ńdǎʼ ngô: «Kwaʼ lə́nə́ʉ, ŋuu wo lə pə́ yé pə̂ mbə̌uʼ.»

⁴⁸Ə lâʼ lə tô mənou mənou lə̂ njwô mwo məno tə mə́ mbə̂ʉ nzəm, ə́ ŋə̌i ndyár ḿbûʼ mənzoʼ máp.

⁴⁹Pəsə̌u Yěso pə́tsəm tə mbaa pəngyě pi gháp lə tsə́ʉ nzəm zʉ́ lə̂ fú Galilêi lə tə̂ʉ pə́ lə̂ nzəm, ə́ njwó zə̂u yi ə́ lěi.

⁵⁰Cǒ ŋuu lə pə́ wó, pə́ fûŋ yé ńgó Yosêp, a pə̂ cǒ ngaŋə cûʼtə jwǐ yi Pəyúda. A lə pə́ ŋuu shʉʼʉ, ə́ mbou nkóŋ no lə́nə́ʉ.

⁵¹Káa a lə pə́i yé no yi có ngaŋə cûʼtə jwǐ zêi lə zápə́ ə́ mbǒu ńgʉ́ lə́ Yěso. A lə pə́ ŋuu Arimatê cər paghʼə-ngoŋ Yudêi. A lə nyáŋ ə́ mə́ nzʉ́ʼtə Ləfou Sê.

⁵²Yosêp wêi wô ńjwó Piláto, ə́ ndóu pfú Yěso mbó zʉ́, a pə̂i.

⁵³A wô fú lə̂ tʉ̌-mbʉ̂ŋtə shúʼú yé, ə́ ndǎghʼ zə̂u-ndí ńzə́mtə́ yé, ə́ ngwǒ ńcóghʼ yé cər ləshi yi pə́ lə shʉ̌ʼ lə̂ ləghǒ wáŋə́, ə́ pə̂ yi pə́ laa kə́ cóghʼ yé pfû ŋuu cər wó.

⁵⁴A lə côghʼ yə́rə́ mpfu ngwʉ̂ leʼé yi pə́ lə pə́ ntsuŋtə ghíʼ nzʉ̂ wo fóghʼ, ə́ pə́ leʼé nji Pəyúda.

⁵⁵Pəngyě pi gháp pə Yěso lə pə́ nou tə fú Galilêi lə tsə̂ʉ nzə̂m Yosêp tə nkə́u yʉʼ ləshi, ə́ njwó mbə̂u yi a lǎghʼ ńnuŋú pfû Yěso cər wó,

⁵⁶ə́ ncʉ́ʼ mbə̂ʉ gháp lə̂ mənzeʼ páp túsoŋ, ə́ ntsûŋtə́ lamə́ndaa, tə mbaa məcó məwə̂r shʉʼʉ lə̂ ngʉ́ ńdaghʼ ńzóʼ pfû Yěso. Nji kə̂u ndə̂, gháp zətə ghíʼ ləpə̌ʉ lə pə́ ntúŋú.