Read Ngombale Lúʼkáasʉ 24 Bible Online

Lúʼkáasʉ 24 - Ngombale bible

Lúʼkáasʉ 24

¹Ə́ pə̂ nduŋ-mbi leʼé lə̂ ngap lâʼ, pəngyě pêi mə̂ʉ məmbaʼa-mbaʼ, ə́ ndǎghʼ lamə́ndaa yi gháp lə tsuŋtə́ ńdə́r lə̂ yʉʼ ləshi.

²Ə́ nkə́u wó, ə́ njwó mə́i pə́ tyetə́ mə́ tə́koʼ ləghǒ yi pə́ lə lǎghʼ ńkə́ʼ ntsʉ ləshi, ə́ nuŋú nzəm.

³Gháp kə̂u cər wó, káa kə́ jwó gháp pfú Nde Yěso.

⁴Ə́ tsə gháp, gháp pə̂ ndôu njí zə̂u yi ə́ lěi, ə́ nkə́ ncʉ́ʼ ngwóghʼə́-woghʼə́ njwó pye pə́pwô tə̂ʉ mbi páp, məndǐ máp fôghʼ tə ŋwáŋtə́.

⁵Gháp pôghʼ tə ntsʉ́ŋə́ məsʉ̂ máp sê, pye pêi túŋu gháp ngô: «Ńté hó pei lou ntəʉ təcər pəpfû-sê?

⁶Káa a pyêr yé yaʼa gháʼá, a zʉ̌ʉ mə́ lə̂ ləwʉ̂. Pei yâa nkʉ́ʉtə́ məno mi a lə lǎʼ lə́ pei mpfu yi a lə pyér ḿbə́ pə́ Galilêi.

⁷A lə lâʼ ngô: Ə́ pə́ ntúŋu ńgó pə féi Môu Ŋuu ńŋə́ lə́ pəghaŋə məfaa, gháp kʉʉ yé lə̂ tʉ̌-mbʉ̂ŋtə, a zʉ̂ʉ lə̂ ləwʉ̂ lə̂ mbâatə leʼé tárə́.»

⁸Gháp zûʼ yə́rə́, ə́ nkʉ́ʉtə́ mətsâr Yěso;

⁹ə́ fû ləshi ḿbə̂ʉ ḿbyétə́ məno mêi mə́tsəm ńdáʼ mbó ngaŋə-jyêʼ-no ntsap môʼ lə̂ ləghə̂m mbaa mbó pəcó pye.

¹⁰Pəngyě pi gháp lə pyêtə məno mêi ńdâʼ ngaŋə-jyêʼ-no Yěso lêi lə pə́: Mǎyaa Mǎghʼdala, ə́ ngʉ́ Jânə, mbaa Mǎyaa mə́ pə Jâghʼ, ə́ nkʉʼʉ́ pəcó pəngyě.

¹¹Gháp zûʼ mətsâr mêi, ə́ shwî pə̂ lyaŋə, káa gháp pə̂i gháp.

¹²Pyêh lêsê ńkhʉtə́ tə nkə́u yʉʼ ləshi, ə́ ŋúʼú sê ńcʉ́ʼ njwó pə̂ ndaʼ məzə̂u ndǐ mi pə́ lə lǎghʼ ńzə́mtə́ pfû Yěso, ə́ ngí pə́ pə̌ʉ, no yi ə́ yǎa nděi pə̂ nkə́ʼə yé.

¹³Ə́ lə kə́ mbə́ pə̂ leʼé wêi, có ngaŋə-jyêʼ-no Yěso pwô lesê Yelúsalêm mə́ ndə̂r lə̂ có lâʼ yi pə́ fûŋ ńgó Emayúsʉ. Ndǐ wěi pə̂ ghíʼ zə̂u pəkíləu-mítə ntsap pwô lə̂ ləghə̂m.

¹⁴Ə́ mə́ ŋə́i ntsár ḿbyétə məno mə́tsəm mi ə́ lə lěi.

¹⁵Gháp lə pə́ ntsár ḿbyêtə məno mêi yə́rə́, tû-mbəʉ Yěso kwátə gháp laŋə́-ndə̂u, gháp pə pǎp cʉ̂ʼ mə́ ŋə́i.

¹⁶Lə́ có zə̂u kə̂ʼtə gháp lə̂ ndə̂i yé.

¹⁷Yěso túŋu gháp ngô: «Pei fǔ ŋə̌i ḿbyétə pə̂ no hó gháʼá? Gháp zûʼ, ə́ ntə́ʉ lə̂ məjʉ̂ŋ.»

¹⁸Cǒ ŋuu lə́ páp yi ləjôghʼ yé lə pə́ Kəlopáasʉ túŋu yé ngô: «Ô ndaʼ ngəʉ yi a pə̌ Yelúsalêm yaʼa káa pə́ jî yé zə̂u yi ə́ lěi lə̂ məleʼé mwo áa?»

¹⁹A túŋu gháp ngô: «Ə́ zarə́ zə̂u?» Gháp pwôr ngô: «Ə́ zə̂u yi ə́ kə lěi ńté Yěso ŋuu Nǎazalêi yi a lə pə́ kwaʼ ntsətə-nkəʉ-Sê yi ntə̌i lə̂ məfaʼ mé mbaa lə̂ tsâr yé, ə́ mbi Sê mbaa mbi lâʼ tsəm.

²⁰Pətə́-ndə̂ pənuŋú-poʼ-Sê gháp pə pəsǎʼ-lâʼ paghʼ kə laghʼ yé ńgwó, pə feʼ yé, ə́ nzáʼ ńgó pə wo jwí yé. Gháp kə̂ ngwó nkʉ̌ʉ yé lə̂ tʉ̌-mbʉ̂ŋtə.

²¹Lə́ mə́i paghʼ kə pə́ nkwâŋ zághʼ pə́ ńgó zʉ́ lə́ táa záʼ nkʉ puʼ lóŋ pye Ísə́lahêl, gháp cwór. Lə́ yo cʉ̌ʼ ndaghʼ mbə̂ mbâatə leʼé tárə́ ghíʼ mwo məno kə pǒu ńkwátə́.

²²Ə̂ no lə́nə́ʉ ńgó có ngaŋə-ku zághʼ pi pəngyě pi gháp yǎa mə́ʉ yʉʼ ləshi tə́i nkwó ńkə́ʼə́ wághʼ.

²³Gháp yǎa nkə́u wó, káa jwô gháp pfû yé, ə́ mbə̌ʉ nzəm ńdáʼ wághʼ ńgó pəcwôʼ Sê kə́u ńkwǎr mbi páp ghíʼ cər njwô lə́, ə́ ndǎʼ gháp ńgó Yěso pə̌ pə̂ ntəʉ!

²⁴Có ngaŋə-ku zághʼ yǎa nzúʼ yə́rə́, ə́ nděsê ngwô záp yʉʼ ləshi lə́wó, ə́ njwó zə̂u tsəm kə̂ mbə́ pə́ ndʉŋ-ndʉŋ ghíʼ pəngyě pêi yǎa mbyétə́ ńdáʼ wághʼ, lə́ káa jwó gháp Yěso.»

²⁵A cʉ̂ʼ ndáʼ lə́ páp ngô: «Pye tə̂ jîno záp wó, pei fú ndaatə́ lə̂ mbə́i zə̂u tsəm yi pətsətə́-nkəʉ Sê lə lǎʼ zěi!

²⁶Káa ə̂ kə pə́ ntúŋú ńgó Kəlísto jwó ngwôʼ yə́rə́ mboŋə́ kə́u cər ləghûʼ yé mo?»

²⁷Ə́ ndǎʼ yə́rə́, ə́ ngwo ńjí lə́ ŋwaʼa Mə̌usə̂i, ə́ mbáatə́ lə́ yi pətsətə́-nkəʉ Sê, ə́ nkéʼtə́ ńdáʼ gháp məno mə́tsəm mi pə́ lə ŋwaʼá cər wó ńté yé.

²⁸Gháp pə pǎp lər tə mbáatə́ lâʼ yi gháp pə́pwô yǎa ndər lə̂ wó, gháp jwô, Yěso ghʉ pə́ ghíʼ a pyěr poŋə́ ŋə̌i tə ndǐ sâghʼ.

²⁹Gháp fárə yé ńdáʼ lə́ zʉ́ ngô: «Paghʼə nyáŋ ńté ńgó zâʼ nzʉ̂ lěi mə́, twûʼ pou ncʉ́ʼ mə́ ngwo pə́ shʉ́ŋ wó.» A pə̂i, gháp pə pǎp kə̂u ndə̂.

³⁰Mpfu kûʼ, gháp nyâŋ sê lə̂ nzʉ́ zə̂u, a pyê mbələ̂ghʼ, ə́ ŋə́ nkhwo mbó Sê, ə́ mbwóʼ ə́ ŋə́ lə́ páp.

³¹Ə́ nkə́ ndéi tə ngʉ́ yə́rə́, nyôghʼ máp ŋéʼe, gháp ləi yé, a mê mbi páp.

³²Gháp shərə ńdâʼ təcər páp ngô: «Paghʼə pə pǎp tə́i nyaa nkə́ mbə́ laŋə́-ndə̂u, a pə̂ nkêʼtə tsâr Sê ńdâʼ wóghʼə, ə ntə̂ʉ ŋuu cʉ̂ʼ mbə́ cər wó ńtôu pə́ ghíʼ mǒghʼ lə̂.»

³³Gháp cʉ̂ʼ nkə́ ndésê pə́ mpfu wêi ntsə́ʉ laŋə́-ndə̂u, ə́ mbə̌ʉ lə̂ Yelúsalêm, ə́ ncə́r ngaŋə-jyêʼ-no Yěso ntsap moʼ lə̂ ləghə̂m gháp ngaŋə-ku záp, ghíʼ gháp pə pǎp kəitə́.

³⁴Ə́ ntó ńcə́r gháp yə́rə́, gháp pə̂ ndâʼ ngô: «Kwaʼ lə́nə́ʉ Nde zʉ̂ʉ mə́ lə̂ ləwʉ̂ tə Síməu jwo yé.»

³⁵Gháp kə̂ mbyêtə záp ńdáʼ pêi pye zə̂u yi ə́ yǎa nkə́u laŋə́-ndə̂u ńděi tə gháp cʉ́ʼ ngí lə̌i Yěso, mə́i a pyê mə́ mbələ̂ghʼ ńgwô, ə́ ŋə́ nkhwo mbó Sê, ə́ mbwóʼ wěi ńŋə́ lə́ páp.

³⁶Gháp lə pyêr mə́ ntsâr tsarə́, Yěso kwâr ńtə́ʉ təsoŋ páp ńdǎʼ lə́ páp ngô: «Mbwórə pə̂ lə́ pei!»

³⁷Mənzoʼ máp tsóʼo. Gháp pôghʼ, ə́ ncʉ́ʼ mə́ nkwâŋ záp pə́ ńgó gháp jwô wú-ŋuu.

³⁸Lə́ Yěso lâʼ lə́ páp ngô: «Mənzoʼ méi tsóʼo tsoʼó ńté hó? Pei mʉ̂ŋtə mʉŋtə́ ńté hó?

³⁹Pei náŋtə́ mbô mâa tə mbaa məku mâa ńjwó, ə̂ tû-mbəʉ zâa. Pei kə́u ghâa ńzúʼ, ńté ńgó wú-ŋuu kâa ghwô yé mbap mbəʉ, káa kə́ ghwo yé məkwěi ghíʼ pei zûʼ n ngwô lo.»

⁴⁰Ə́ ngǐ pə́ lǎʼ, ə́ mə́ nyárə gháp mbô mé gháp pə məku mé.

⁴¹Gháp pə̂ ntsêi gháʼate, lə́ ə́ mə́ mʉ̂ŋtə mʉŋtə́, ə́ pyêr mə́ nkə́ʼə gháp kəʼə́, Yěso túŋu gháp ngô: «Pei ghwo məzʉ̂ yaʼa gháʼá mo?»

⁴²Gháp ŋə̂ kəm shû tǒu lə́ zʉ́.

⁴³A pfû zěi ńtə́ʉ pə́ mbi páp ḿpfár.

⁴⁴Ə́ mbǒu ndáʼ lə́ páp ngô: «N ndə pyér ḿbə́ pə́ təcər pei, ə́ ndáʼ wéi ngô: Ə́ pə́ ntúŋú ńgó məno mə́tsəm mi pə́ lə ŋwaʼá cər ŋwaʼa Mə̌usə̂i, mbaa cər yi pətsətə́-nkəʉ Sê, gháp pə yi Məzap-nci ńté ghâa, ə̂ pə̂utə́.»

⁴⁵Ə́ ndǎʼ yə́rə́ tə ə́ kûʼ, a tsôʼ jîno záp lə̂ ndághʼ nzúʼ məno mi pə́ ŋwaʼá cər ŋwaʼa Sê.

⁴⁶Ə́ nkə́ ncí ńdáʼ lə́ páp ngô: «Ə́ pə́ cər ŋwaʼa Sê ngô: Nzaʼ-nkʉ táa jwó ngwôʼ, ə́ kwʉ́, ə̂ póu mbə́ lə̂ mbâatə leʼé tárə́, a zʉ́ʉ lə̂ ləwʉ̂.

⁴⁷Ə́ pə póu njǐ Yelúsalêm, ə́ ndǎghʼ ləjôghʼ yé ńdéʼtə́ tə myâghʼ məlâʼ mə́tsəm ńgó wǒwó kə́p cí yé, ə Sê lyəghʼə́ məfaa ye.

⁴⁸Pei cʉ̌ʼ mbə́ pənzǔʼ-njwó lə̂ ndághʼ məno mêi mə́tsəm sâr lâʼ.

⁴⁹Tû-mbəʉ zâa, n ngwo kə́u tə́u zə̂u yi Tə́ ghâa lə ghʉ̌ ndaʼá mə́u lə̂ ngʉ́ ŋə́ lə́ pei. Pêi cʉ́ʼ nkə́ nyáŋ pə́ túsoŋ tə nkə́u mpfu yi mətəʉ Sê wo fú tʉ̌-lə́pû shíʼ kə́u lə́ pei.»

⁵⁰Yěso lâʼ yə́rə́, ə́ ndǎghʼ gháp ńdə́r tə mə́ nkə́u Mbetanî, ə́ mbəʼə́ mbô mé ńcóghʼ mbwórə lə́ páp.

⁵¹Ə́ mə́ ncôghʼ mbwórə lə́ páp yə́rə́, Sê kwarə yé nou páp, ə́ ndaghʼ yé nkóʼ ńdə́r lə́ tʉ̌-lə́pû.

⁵²Gháp cʉ̂ʼ ntə́ʉ yʉʼ wó mə́ ngûʼtə yé tə mpfu kuʼ, gháp laghʼ lətsei ḿbə̂ʉ nzəm lə́ Yelúsalêm.

⁵³Ə́ mbə̌ʉ tə nkə́u wó, ə́ ncʉ́ʼ mə́ mbə̂utə ndə̂ Sê mpfu tsəm ńgûʼtə Sê.