Read Ngombale Lúʼkáasʉ 4 Bible Online

Lúʼkáasʉ 4 - Ngombale bible

Lúʼkáasʉ 4

¹Yěso lə pə́ fû Yuudêŋ nkwó, Zəghʼə Ndêi-lěi pə̂ lə́ zʉ́, ə́ ndaghʼ yé ńdə́r lə̂ koŋə məkwaʼá.

²Sə́tə kə̂u wó, ə́ nkwaʼtə́ yé təcər leʼé mə̂m-ləkwo. A lə láʼ nyáŋ yʉʼ wó káa zʉ́ yé zə̂u tə ndwuŋ məleʼé mêi lei, nji záŋə yé.

³Ə́ pə̂ yə́rə́, Sə́tə cʉ̂ʼ nkə́ ndâʼ lə́ zʉ́ ngô: «O lə̌i mbə́ Môu Sê, o lâʼ lə̂ ləghǒ yo ńgó ə̂ shə́rə́ ncʉ́ʼ mbələ̂ghʼ.»

⁴Yěso pwôr lə́ zʉ́ ngô: «Pə́ ŋwaʼa cər ŋwaʼa Sê ńgó káa ŋuu pfâr pə́ ndaʼ mbələ̂ghʼ mboŋə́ cî mbî.»

⁵Sə́tə lâghʼ yé ńkóʼ lə̂ yʉʼ yi ə́ ŋáʼá ńgwǒ tʉ́ gháʼate, ə́ ngʉ̌ a tə̂ʉ yʉʼ wó nǎa njwó ləfou tsəm yi wə́ ndəu ndesé.

⁶Ə́ mbǒu ndâʼ lə́ zʉ́ ngô: «N ngwo ŋə́ mətəʉ lə́ gho lə̂ ndághʼ ńsáʼ məlâʼ mwo mə́tsəm, ə́ pǒu ŋə́ məfuʼ mə́tsəm mi ə́ pə́ cər wó lə́ gho. Ńté ńgó pə́ lə ŋə̂ zə̂u pêi tsəm lə́ məŋ, mboʼ n nkə̂ ŋə́ zâa lə́ ŋuu yi n nkǒŋ.

⁷O lə̌i nkʉ́ʼtə́ sê mbi məŋ ńgúʼtə́ ghâa, mə́i məzə̂u mêi mə́tsəm wo cʉ́ʼ pə́ pə̂ mô.»

⁸Yěso pwôr lə́ zʉ́ ngô: «Pə́ ŋwaʼa cər ŋwaʼa Sê ngô: O ghwo lə̂ ngúʼtə́ pə́ ndaʼ Nde Sê zô, ə́ mbǒu fáʼ pə́ ndaʼ mbó zʉ́.»

⁹Sə́tə pôu ndâghʼ yé fú yʉʼ wó ndə́r tə nkə́u Yelúsalêm, ə́ ntághʼ yé ntsôʼ ndə̂ Sê, ə́ ndǎʼ lə́ zʉ́ ngô: «O lə̌i mbə́ Môu Sê, o fû yaʼa gháʼá ntyár ńtsə́ʉ sê; ńté ńgó pə́ ŋwaʼa cər ŋwaʼa Sê ngô:

¹⁰Sê táa ghʉ̌ pəcwôʼ pé tó mə́ ḿbâp ghô.

¹¹Ə́ mbǒu ndâghʼ mbô máp khwǒr ghô mbóghʼ no mboʼ o tô ku zô lə̂ ləghǒ.»

¹²Yěso pwôr lə́ zʉ́ ngô: «Ŋwaʼa Sê pə̌ ndaʼ ngô: Koo o láʼ nkwaʼtə́ Nde Sê zô.»

¹³Sə́tə lə kwaʼtə́ Yěso tə nkáa, ə́ fú mbəʉ zʉ́ ńdə́r ngwo mə́ nzʉ́ʼtə cǒ mpfu lə̂ nkə́ ncí ńtó nkwáʼtə́ yé.

¹⁴Yěso laghʼ mətəʉ Zəghʼə Ndêi-lěi ḿbə̌ʉ lə̂ Galilêi, ləjôghʼ yé fû sâr yʉʼ cər zêi paghʼə-ngoŋ.

¹⁵A lə jyêʼ pye no Sê cər məndə̂ cûʼtə, ŋuu tsəm pôu mə́ ngúʼtə yé.

¹⁶Yěso wô Nǎazalêi yʉʼ yi a lə ghúʼ wó. Ə́ pə̂ leʼé nji záp, a kə̂u ndə̂ cûʼtə ghíʼ a yaa ncí nkə́u. Ə́ nyáŋ tə mpfu kûʼ, a lesê lə̂ fúŋ ŋwaʼa Sê.

¹⁷Pə́ pyê ŋwaʼa Esǎya ntsətə-nkəʉ-Sê ńŋə́ lə́ zʉ́. A ŋéʼe ŋwaʼa ńfúŋ lə̂ yʉʼ yi pə́ lə ŋwaʼá yʉʼ wó ngô:

¹⁸«Ə Zəghʼə Nde wə́ lə́ məŋ, ńté no a tsǒʼ ghâa lə̂ ntsətə́ Nkəʉ Shʉʼʉ lə́ pəpûŋ; ə́ ntə́u ghâa ńgó n ngwó ndǎʼ lə́ pəghaŋə-tsâŋ ńgó pə́ wo nyér gháp, ə́ ntə́u ghâa ńgó n ńgwó ndǎʼ lə́ pəfwoghʼ-mə́nyôghʼ ńgó gháp wo jwó yʉʼ, ńgó n ngwó ńgʉ̌ pə tsóʼ pô lə́ pye pi pə́ pə́ noʼtə gháp,

¹⁹ə́ nkə́ ncí ntə́u ghâa ńgó n ńgwó sǎghʼ mbó lâʼ ńgó yo nguʼ yi Sê wo mǎʼ pou ŋuu tsəm.»

²⁰Yěso lə fûŋ zêi yʉʼ tə ə́ me, a pâatə ŋwaʼa wêi ńŋə́ lə́ ŋuu yi a faʼ ndə̂ wêi, ə́ shíʼ ńnyáŋ sê. Ŋuu tsəm yi a lə pə́ ndə̂ cûʼtə wêi cʉ̂ʼ nkə́ shə́rə́ nyôghʼ mé ntághʼ lə́ zʉ́.

²¹Ə́ pə̂ yə́rə́, a cʉ̂ʼ nkə́ ndáʼ lə́ páp ngô: «Yo tsâr yi pei nyǎŋ nzûʼ lo, ə́ pə̂utə leʼé wo.»

²²Ŋuu tsəm lə pə́ nkʉ̂ʉ yé shʉʼʉ ńté tsâr shʉʼʉ yi ə́ lə kwar ntsʉ zʉ́, ə́ mbǒu mə́ ndâʼ ngô: «Tə káa a pə́ môu Yosêp?»

²³Yěso lâʼ lə́ páp ngô: «Kwaʼ lə́nə́ʉ pei wo lǎghʼ wo saghʼ-ləghaa lǎʼ lə́ məŋ ngô: Lóghʼtə zǒŋ mbəʉ zô pə́ gho tə shwítə́, paghʼ kə zûʼ zə̂u tsəm yi o kə ghʉ̌ Kapérnawûm. Kə́ mbǒu ńgʉ́ yə́rə́ lâʼ pei yaʼa gháʼa!»

²⁴A pou nkə́ ncí ndáʼ lə́ páp ngô: «Məŋ ndaʼ wéi kwaʼ lə́nə́ʉ ńgó, ŋuu lə̌i mpfú yé cǒ ntsətə-nkəʉ-Sê lâʼ páp shʉʼʉ po.

²⁵Məŋ ndâʼ wéi lə́nə́ʉ, pəpfǒghʼ pəngyě lə́ záa Ísə́lahêl mpfu yi mbʉŋ lə nyáŋ tə́ lô nguʼ tárə́ lə́ saŋ ntoghʼó tə wáʼ wʉ̂ cər lâʼ zêi tsəm;

²⁶lə́ káa Sê pə́i ntə̂u yé Elyê lə̂ cǒ ghap, tə ndyéʼ lə̂ cǒ mpfǒghʼ məngyě, ə́ Sarépta cər ngoŋ Sidôŋ.

²⁷Pəghaŋə tsóʼ-páp lə kə́ nzáa záp lə́wó Ísə́lahêl lə̂ mpfu yi Elizê ntsətə-nkəʉ-Sê. Lə́ káa Elizê lə ghʉ yé cǒ gháp shwítə́ tə ndyéʼ Naamâŋ ŋuu Silə̂i.»

²⁸Gháp pə́tsəm pi gháp lə pə́ ndə̂ cûʼtə wêi zûʼ mətsâr mêi, ə́ nzáŋə́ lóŋ.

²⁹Ə́ nděsê ńcǐ Yěso ńdághʼ yé fú túsoŋ ńkwár, ə́ ndə́r lə̂ tú ləkoʼó yi pə́ lə kə́r túsoŋ Nǎazalêi mə́u, lə̂ ncʉ́ʼ fú yʉʼ wó, ə́ ncí yé ḿmâʼ toʼo.

³⁰Lə́, a toghʼə soŋ páp ńdə́r yé.

³¹A cʉ̂ʼ shíʼ ńdə́r lə̂ Kapérnawûm, ə́ pə̂ túsoŋ yi ə́ pə́ cər paghʼə-ngoŋ Galilêi. Ə́ mə́ njyêʼ gháp zə̂u leʼé nji pəyúda.

³²Ye mbə̂u laghʼ ńjyêʼ pye zə̂u lə kəʼə gháp gháʼate, ńté no Sê kə ŋə̂ yé mətəʉ a lâghʼ ńjyêʼ pye zə̂u.

³³Cǒ ŋuu lə́ pə́ ndə̂ cûʼtə, zəghʼə tə́poŋ pə̂ mbə̂u yé, a mâʼ wâr lə̂ təʉ, ə́ ndâʼ ngô:

³⁴«Hê! Yěso ŋuu Nǎzalêi, o pfû hó mbó paghʼ? O yǎa ńtó pə́ lə̂ mbə́ghʼ wághʼ mo? N ntsuŋu mə́ njî ŋuu yi o pə̌ zʉ́: “Ô ndêi-lěi, ə́ ŋuu Sê.”»

³⁵Yěso sâʼ zəghʼə tə́poŋ zêi, ə́ ndǎʼ lə́ zʉ́ ngô: «Nâʼ! Fú lə́ ŋuu wo nkwâr!» Zəghʼə tə́poŋ cwôʼ ŋuu wêi ńtə́m sê mbi ngaŋə cûʼtə, ə́ ncʉ́ʼ nkə́ fú lə́ zʉ́ ńkwár tə́ ghʉ có no tə́poŋ lə́ zʉ́.

³⁶Gháp pə́tsəm pôghʼ, ə́ ncʉ́ʼ mə́ ndâʼ təcər páp ngô: «Ə tsâr ntikáŋ wo pə̂ gháʼá gháʼa? A təi tə ndâʼ no lə̂ məzəghʼə tə́poŋ gháp zûʼ ntsʉ yé.»

³⁷Pə cʉ̂ʼ nkə́ ndághʼ ləjôghʼ yé ńsár yʉʼ tsəm cər zêi paghʼə-ngoŋ.

³⁸Yěso kwâr ndə̂ cûʼtə, ə́ ndə̌r lə̂ nzéʼ Síməu. Ə́ nkə́u wó, ə́ njwó ntəʉ nə̂r pə̂ ncʉ̂ʼ mə́kʉʼ Síməu; gháp cʉ̂ʼ sʉ́ʉtə́ yé ńgó a ghʉ̂ â shwítə́.

³⁹Yěso ŋúʼu mbəʉ zʉ́, ə́ sáʼ ntəʉ nə̂r zêi, ə fû lə́ zʉ́ nkwǎr. A cʉ̂ʼ nkə́ ndésê pə̂ mpfu wêi, ə́ ndǐ gháp.

⁴⁰Ə́ pə̂ ntsǒ-nəu, pye pə́tsəm pi gháp lə ghwǒ pəghou mbə̂u lə̂ mbə̂u laghʼ gháp ńtó ńcə́r Yěso. A zápə mbô mé lə́ warə́-warə́ ngou, a shwítə.

⁴¹Məzəghʼə tə́poŋ lə́wó ghi pə́ fû lə́ pəghou tə́ nzáa kwatə́, ə́ mə́ ntóŋ ndâʼ ngô: «Ô Môu Sê!» Lə́ Yěso sâʼ gháp, káa pə̂i yé ńgó gháp lâʼ no, ńté no gháp lə pə́ njî ńgó â Nzaʼ-nkʉ.

⁴²Nzʉ̂ lə kə́ nkə́u lə̂ fóghʼ, Yěso fû túsoŋ ńkwár ńdə̌r lə̂ yʉʼ yi káa pye pə̂ gháp wó. Lâʼ ji lə̂ ŋáa ndôu yé; gháp lə lou yé tə njwó yé, ə́ mə́ ndû lə̂ ngwô yé tə lə́u a kə̂ nyêr yé gháp ndə́r lə̂ có yʉʼ po.

⁴³Lə́ a lâʼ lə́ páp ngô: «N ngwo lə̂ nkə́ ncí ngwó cər məcó mətúsoŋ ntsə́tə́ Nkəʉ Shʉʼʉ yi no Ləfou Sê, ńté ńgó ə̂ zə̂u yi Sê lə tə́u ghâa ńté zěi.»

⁴⁴Ə́ ndǎʼ yə́rə́, ə́ ncʉ́ʼ mə́ ŋáa ndêʼtə tsâr Sê cər məndə̂ cûʼtə mi ə́ pə́ Yudêi.