Read Ngombale Lúʼkáasʉ 5 Bible Online

Lúʼkáasʉ 5 - Ngombale bible

Lúʼkáasʉ 5

¹Ə́ lə pə́ có leʼé, Yěso tə̂ʉ nkaŋ lətʉŋ nci Jenezarêd, ə lâʼ pə̂ fárə mbəʉ zʉ́ lə̂ ńzúʼ tsâr Sê.

²Yěso jwô məkənyúʼ mə́mbwô nkaŋ nci, mə́i pəmǎʼ-shû lə fú cər wó ńkwár, ə́ mə́ sôghʼ mənkʉ máp.

³A kə̂u cər có, ə́ pə̂ yi Síməu, ə́ sʉ́ʉtə́ yé ńgó a nyêʼ ndághʼ yé ńcʉ́ŋə́ lə̂ cər nci, a pei. Yěso shîʼ ńnyáŋ cər kənyúʼ, ńjǐ lə̂ ńjyêʼ pye no Sê.

⁴A lə tsâr tə myâghʼ, ə́ ndǎʼ lə́ Síməu ngô: «Kʉʼʉ ncʉ́ŋə́ tə nkə́u lə̂ yʉʼ yi nci shǐ wó, ə́ njí ńgó pei mâʼ mənkʉ méi ńdághʼ ńgǒu shû!»

⁵Síməu pwôr ngô: «Cícye, paghʼ lě lətwûʼ wo pə̂ ntáŋə taŋə́ tə́ ghou có zə̂u. Lə́ ghíʼ o kə̌ ndǎʼ ńgó m mâʼ mənkʉ lə̂, n ngwo mǎʼ.»

⁶Gháp kə̂ ńgʉ́ yə́rə́, ə́ ŋwâr shû ə́ zâa tə mənkʉ máp cʉ̂ʼ mə́ nzêʼtə zeʼtə́.

⁷Gháp cʉ̂ʼ mə̂iʼtə́ pô ndaghʼ ńfúŋ có ngaŋə-ku záp pi gháp lə pə́ cər có kənyúʼ, ńgó gháp tó ḿpfútə́ gháp. Gháp tô, gháp pə pǎp nâa ńcóghʼ shû cər məkənyúʼ mêi mə́mbwô, ə́ lóghʼə tə ncʉ́ʼ mə́ tsô pə́ nci.

⁸Síməu Pyêh jwô yə́rə́, ə́ nkʉ́ʼtə́ sê mbi Yěso ńdáʼ ngô: «Ə́ Nde fú mbəʉ məŋ ndə̂r ghô, ńté no mə̂ŋ ngaŋə-məfaa.»

⁹A lə kʉ́ʼtə́ sê mbi zʉ́ yə́rə́, ńté ńgó ndwuŋ shû yi gháp lə pǒu ngôu lə kəʼə gháp pə́tsəm.

¹⁰Ə́ lə kə́ ḿbə́ pə́ yə́rə́ mbó Jâŋ gháp Jâghʼ, ghəpə́ Zebede pi gháp lə pə́ pəghaŋə-ku Síməu. Lə́ Yěso lâʼ lə́ Síməu ngô: «Koo pôghʼ; lə̂ fú leʼé wo, o cʉ́ʼ ghou pə́ pye-mə́soŋ.»

¹¹Gháp zûʼ yə́rə́, ńcʉ́ʼ nkə́ ndághʼ məkənyúʼ máp ḿbə̌ʉ nzəm lə̂ nkaŋ nci, ə́ ntyǎghʼ zə̂u tsəm nyér sê yʉʼ wó, ə́ ntsə́ʉ nzəm Yěso.

¹²Yěso lə pə́ cər có túsoŋ. Cǒ ŋuu yi tsóʼ-páp lə fú nzʉ́ mbəʉ yé tsəm pə̂ yé wó. Ə́ njwó Yěso, ə́ shíʼ ńkə́ptə́ sʉ̂ yé sê mbi zʉ́, ə́ sʉ́ʉtə́ yé ńdǎʼ ngô: «Ə́ Nde o lə̌i nkôŋ, mə́i mboʼ o ghʉ̂ məŋ shwítə.»

¹³Yěso shî pô yé, ə́ nzápə́ ndəu zʉ́, ə́ ndâʼ ngô: «Məŋ koŋ yə́rə́, shwítə̂!» Nkaʼ cʉ̂ʼ nkə́ ndêi-lěi ə́ mê lə́ zʉ́.

¹⁴Yěso lâʼ lə́ zʉ́ ngô: «Ghíʼ o lěi lə̂, páa lə̂ nkʉ́ʉ tə ndâʼ ŋuu, lər ngwo nyárə́ mbəʉ zô mbó pənuŋú-poʼ-Sê, ə́ nkə́u ŋə́ məzə̂u poʼ Sê, ə́ ndʉŋ-ndʉŋ ghíʼ Mə̌usə̂i lə ŋwaʼá, lə̂ ndaghʼ ńnyarə́ ŋuu tsəm ńgó o shwitə́ mə́.»

¹⁵Lə́, pə́ fû ngáʼ lə̂ nkʉ́ʉ Yěso, lâʼ pə̂ nzúŋ ńtó ńkəitə́ ńtə́ʉ nzûʼ tsâr yé, ə́ mbou mə́ sʉ̂ʉtə yé, a ghʉ̂ məghou máp mê.

¹⁶Ə́ pə̂ yə́rə́, Yěso pə̂ nyáŋ ngwô yʉʼ yi káa pye pə̂ gháp wó, ə́ sʉ́ʉtə Sê.

¹⁷Yěso pə̂ có leʼé, ə́ mə́ njyêʼ pye no Sê, pye falísia gháp pə pəkeʼtə́-lə́pə́ʉ Mə̌usə̂i tô ńnyáŋ sê, ə́ fû cər məlâʼ mi ə́ pə́ cər paghʼə-ngoŋ Galilêi gháp yi Yudêi tə mbaa pə́ túsoŋ Yelúsalêm. A pə̂ ndâghʼ mətəʉ Nde ńgʉ́ pəghou shwítə.

¹⁸Pəcó pye pyeʼ cǒ ngaŋə-pwóʼtə́ ndəu kweʼ ńdághʼ ńtó mə́ ndôu lə̂ nkə́u ndə̂ nuŋú yé mbi Yěso.

¹⁹Ə́ lâʼ fû fárə́ ntsʉ ndə̂ tə gháp jwô kə́káŋ, ńcʉ́ʼ ndághʼ yé ńzáp pə́ lə̂ ndə̂u yi ə́ lər lə̂ ntsôʼ ndə̂, ə́ nkə́u yʉʼ wó, ə́ ntsóʼtə́ zə̂u yi pə́ lə lǎghʼ shwí ndə̂, ə́ fú yʉʼ wó shúʼú ngou lə́ kweʼ zêi ńnuŋú yé mbi Yěso.

²⁰Yěso jwô pə̂i-ntə̂ʉ záp, ə́ ndǎʼ lə́ ngaŋə-pwóʼtə́ wei ngô: «Ə sə̌u ghaa, pə́ lyəghʼə məno tə́poŋ mô.»

²¹Pəŋwaʼá-zə̂u gháp pə pəfalísia zûʼ, ə́ njí lə̂ ndə̂mtə́ təcər páp ndǎʼ ngô: «Yo wǒ ŋuu a zoutə Sê? Tə mboʼ wǒ lyəghʼə məno tə́poŋ ŋuu tə ndyéʼ ndaʼ Sê?»

²²Yěso tôghʼ ńjí no yi gháp ləmtə zěi, ńtúŋú gháp ngô: «Ńté hó pei ghwo yo mbə̂u məkwaŋtə cər məntə̂ʉ pei?

²³Ə zarə́ gháʼá nzáŋə́ lə́ ndâʼ ngô: Pə́ lyəghʼə məfaa gho, káa lə̂ ndâʼ ngô: Lə̌sê ŋə̌i?

²⁴Lə́ m mə̌ ndou lə̂ nyarə́ wei ńgó Môu Ŋuu ghwo mətəʉ ndəu ndesé lə̂ ndághʼ ńdyəghʼə́ məfaa pye», ə́ ncʉ́ʼ ndâʼ lə́ ngaŋə-pwóʼtə́ ngô: «Lə̌sê khwor kweʼ zô mbə̌ʉ ghô lə̂ nzeʼ gho.»

²⁵A kə̂ ntóghʼ ndésê mbi páp, ə́ nkhwór kweʼ yé, ə́ mə́ mbə̂ʉ lə̂ nzeʼ zʉ́, ə́ ŋə̌i ńgûʼtə Sê.

²⁶Gháp pə́tsəm jwô ə́ kəʼə gháp, gháp pə̂ ngúʼtə Sê, ńdâʼ ngô: «Paghʼ jwǒ məndǎa-jwô-mə́no leʼé wo.»

²⁷Ə́ lə lei yə́rə́, Yěso pôu nkwár mə́ ŋə́itə́, ə́ njwó cǒ mpfu ntsəp, ləjôghʼ yé pə̂ Levî, a nyâŋ ləpfǔ ntsəp. Yěso lâʼ lə́ zʉ́ ngô: «Tsə́ʉ nzəm məŋ.»

²⁸Levî nyêr zə̂u tsəm, ə́ nděsê ńtsə́ʉ nzəm zʉ́.

²⁹Levî ghə̂u tə́koʼ lətsei ndə̂ zʉ́ ńté Yěso; gháp pə Pəpfǔ-ntsəp tə nzáa, ńkʉ́ʼʉ́ pəcó pye naa nyáŋ ə́ mə́ nzʉ̂ zə̂u.

³⁰Pəfalísia gháp pə pəŋwaʼá-zə̂u pə̂ ndə̂mtə́ ńdâʼ lə̂ ngaŋə-jyêʼ-no Yěso ngô: «Ńté hó pei pə pəpfǔ ntsəp mbaa ngaŋə cǐ tə́poŋ tə̂m zə̂u ńzʉ́?»

³¹Yěso pwôr lə́ páp ngô: «Pye pi gháp pə́ nzûʼ shʉʼʉ kâa pə́ ndôu gháp lóghʼtə, pəghou lə́ lou yé.

³²Káa n ndə tó ghâa ńtê pye no lə́nə́ʉ, n ndə tó ńté pə́ pətəpə̌i no Sê, ńgó gháp kə́pə́ cí záp.»

³³Pəfalísia kə̂ ncí ndâʼ lə́ Yěso ngô: «Ngaŋə-jyêʼ-no Jâŋ gháp pə pághʼə pə́ nkoŋ koŋə́ ńnyâŋ nji ə́ sʉ̂ʉtə Sê. Lə́, ə́ pô pə̂ nzʉ́ ə́ mbou mə́ nó.»

³⁴Yěso pwôr lə́ páp ngô: «Tə mboʼ pə́ ghə̂u pye no lətsei lâa-ndə̂, gháp tô ndə̂u-ngəʉ pyêr ḿbə́ pə́ təcər páp, pə́ ghʉ gháp nyâŋ nji?

³⁵Mpfu ghʉ̌ kǔʼ, pə́ fú mbəʉ páp, ə́ nkwarə́ ndə̂u-ngəʉ ńdághʼ yé ńdə̌r, gháp fû yə́rə́, ə́ ncʉ́ʼ nyáŋ nkôŋ koŋə́ ə́ nyâŋ nji ə́ sʉ̂ʉtə Sê*.»

³⁶Yěso kə̂ ncí ndâʼ lə́ páp ngô: «Mboʼ ŋuu zâʼ yé zə̂u ndǐ lə̂ ndǐ shwî ńdǎghʼ ńcə́r ngwʉ̂ lə̂ ndwuŋu ndǐ po. Ŋuu lə̌i ńgʉ́ yə́rə́, mə́i a lâghʼ ńcôŋ pə̂ ndǐ shwî, zə̂u ndǐ shwî yi a yǎa nzáʼ lêi wo pə̂u yé lə̂ ndwuŋu ndǐ po.

³⁷Mboʼ ŋuu côghʼ yé məluʼ shwî cər pəlwuŋu məntə̂uʼ ngəp po; pə́ lə̌i ngʉ́ yə́rə́, mə́i məluʼ shwî wo fə̌uʼ ə́ séitə́ məntə̂uʼ, ə́ cwərə́, pə cwí məluʼ, ə́ cwí məntə̂uʼ.

³⁸Lə́, ə́ pə́ ntúŋu ńgó pə cóghʼ məluʼ shwî pə́ cər* məntə̂uʼ shwî.

³⁹Mboʼ ŋuu nô yé məluʼ pǐ, ə́ mbou mbə́i lə̂ nó mi ə́ pə́ ndə̌ʉ po. Ńté ńgó a wo lǎʼ ńgó mi pǐ poŋ.»