Read Ngombale Lúʼkáasʉ 6 Bible Online

Lúʼkáasʉ 6 - Ngombale bible

Lúʼkáasʉ 6

¹Ə́ lə pə́ có leʼé nji pəyúda, Yěso gháp pə ngaŋə-jyêʼ-no yé pə̂ ndêi cər mənkâʼ ngəsâŋ-ncʉ̂ŋ, ngaŋə-jyêʼ-no yé ŋəi mə́ mbwôʼ mətû ngəsáŋ ńdâghʼ mbô máp ńshʉʼʉ́, məmbəm měi kwatə gháp pfâr.

²Pəcó pəfalísia túŋu gháp ngô: «Ńté hó pei ghʉ̂ zə̂u yi ləpə̌ʉ zághʼə tǒʼ zěi leʼé nji?»

³Yěso pwôr lə́ páp ngô: «Pei laa kə́ fúŋ ŋwaʼa ńzúʼ zə̂u yi nji lə zaŋə́ Ndavîd gháp pə ngaŋə-ntə̂u yé a ghʉ̂ zěi mo?

⁴A lə kə́u ndə̂ Sê, ə́ mbyé mbələ̂ghʼ poʼ Sê ḿpfár, ə́ ŋə́ yi ngaŋə-ntə̂u yé, lə́ mə́i ndaʼ pənuŋú-poʼ Sê lə́ ghwǒ lə̂ mpfár wěi.»

⁵Yěso kə̂ ncí ndáʼ lə́ páp ngô: «Môu Ŋuu gháʼá mbə́ ŋwár leʼé nji pəyúda.»

⁶Ə́ lə pə̂ có leʼé nji pəyúda, Yěso kə̂u ndə̂ cûʼtə, ə́ mə́ njyêʼ pye no Sê. Cǒ ŋuu mbiŋə pə̂ yé ndə̂ wei, mə́i pô yé yi təʉ lə kwʉ́ mə́.

⁷Pəfalísia gháp pə pəŋwaʼá-zə̂u pə̂ ndôu zə̂u yi gháp wo fú mə́u, ə́ cóghʼ fər paa Yěso, ə́ mə́ ndôu lə̂ njwó ńgó kəʉ a wo ghʉ̌ ŋuu shwítə́ leʼé nji záp, gháp lâghʼ ńkǎp no tû zʉ́.

⁸Lə́ Yěso jî kwaŋtə záp, ə́ ndǎʼ lə́ kwʉ-pô wei ngô: «Lěsê ńtə́ʉ təsoŋ yʉʼ wə̂. A kə̂ ndêse ngwo ńtə́ʉ yʉʼ wó.»

⁹Yěso cʉ̂ʼ ndâʼ lə́ pfuʼ pye ngô: «Ə́ ghíʼi mbə́ yi mboʼ ə́ pə̂ leʼé nji pə́ ghʉ pə̂ shʉʼʉ kəʉ pə̂ pâghʼ? Mboʼ pə́ zoŋ ŋuu a pə̂ wó, kəʉ mboʼ pə́ nyêr yé a kwʉ̂?»

¹⁰Ə́ ndǎʼ yə́rə́, ə́ náŋ gháp pə́tsəm tə mbóu ndǎʼ lə́ ŋuu wêi ngô: «Shǐ pô zô!» A kə̂ shî, pə́ jwô, mə́i pô yé zei shwítə́ mə́.

¹¹Pəfalísia gháp pə pəkeʼtə́-lə́pə́ʉ Mə̌usə̂i jwô, ə́ nzáŋə́ lóŋ. Ə́ ncʉ́ʼ ntúŋú təcər páp ngô: «Tə mboʼ paghʼə ghʉ gháʼá lə́ Yěso wêi wo?»

¹²Yěso pə̂ có leʼé, ə́ ngwo nkóʼ ndəu có ləkôr lə̂ ngʉ́ sʉ̂ʉtə, ə́ nkə́ ndé wó pə́ sʉ̂ʉtə Sê.

¹³Ə́ pə̂ nkôʼ-nzʉ̂, a fûŋ ngaŋə-jyêʼ-no yé, ə́ ngwǒ təcər páp ntsóʼ pi ntsap pwô lə̂ ləghə̂m, ə́ ncǐ ləjôghʼ záp ńgó ngaŋə-ntə̂u yé.

¹⁴Ə́ lə pə́ Síməu yi Yěso lə cǐ có ləjôghʼ yé ńgó Pyêh, ə́ ngʉ̌ Aŋderê fə̌r Síməu wêi, Jâghʼ, Jâŋ, Fílîp, Patələmî,

¹⁵Matyê, Tomásʉ, Jâghʼ môu Aləfê, Síməu nzoŋ-məno-lâʼ,

¹⁶Yúda môu Jâghʼ, Yúda Isəkaryôtə yi a lə pôu ncʉ́ʼ fəi-ngoŋ, ə́ féi Yěso ńŋə́.

¹⁷Yěso lâghʼ gháp fú ləkôr ńshíʼ tə ńkə́u lə̂ có yʉʼ yi ə́ sʉŋtə́-sʉŋtə́, ə́ njwó ə có ngaŋə-jyêʼ-no yé tə nzáa gháp pə mənou lâ jwǐ mi ə́ fú Yudêi, ə́ fú túsoŋ Yelúsalêm, ə́ fú mənkaŋ nci Tîr gháp Sidôŋ, ə́ ntó lə̂ nzúʼ tsâr yé.

¹⁸Gháp pə́tsəm lə tô lə̂ nzúʼ tsâr yé, â póu ngʉ̌ gháp shwítə́. Pye pi məzəghʼə tə́poŋ lə pə́ mbə̂u gháp lə shwítə̂.

¹⁹Mâa ŋuu tsəm lə pə́ ndôu lə̂ nkə́u yé lə́ pô, ńté no məcó mətəʉ lə pə́ kwâr lə́ zʉ́, ə́ ngʉ́ pəghou pə́tsəm shwîtə.

²⁰Yěso kə̂ mbóu náŋ ngaŋə-jyêʼ-no yé náŋə́ tə ndáʼ lə́ páp ngô: «Pei pəpûŋ, pêi pəndʉʉ-mboŋ, ńté ńgó Ləfou Sê, ə̂ zéi.

²¹Pei pi nji pə̌ nzáŋə wéi mpfu wo, pêi pəndʉʉ-mboŋ ńté ńgó pei táa zʉ́ tə jwə́r. Pei pi pei pə̌ ntsə́rə́ mpfu wo, pêi pəndʉʉ-mboŋ ńté ńgó pei táa jwǐ.»

²²«Pêi pəndʉʉ-mboŋ ghíʼ pye lə̌i mə́ ndə̂ʼ no zéi, ə́ mə́ tyê wéi, ə́ mə́ nzôutə wéi, ə́ mə́ ncôŋ ləjôghʼ zéi ńté no pei pə̌i no Môu Ŋuu.

²³Zêi mpfu lə̌i ntáa ńtó, pei tsêi tə ntyatə́, ńté ńgó tâʼ tə́koʼ ntsoʼó-faʼ pə̌ nzʉ́ʼtə wéi tʉ̌-lə́pû. Pətə́ páp lə yaa nkə́ ŋə̂ záp pətsətə́-nkəʉ Sê ngwôʼ pə́ yə́rə́.

²⁴Lə́, pei pəghaŋə-zə̂u, pêi pəndʉʉ-tə́poŋ ńté ńgó pei ghwo mə́ gháʼá méi məntsoʼó-faʼ.

²⁵Pei pi pei pə̌ nzʉ́ ńjwə́r mpfu wo, pêi pəndʉʉ-tə́poŋ ńté ńgó nji táa záŋə́ wéi. Pei pi pei pə̌ njwi mpfu wo, pêi pəndʉʉ-tə́poŋ, ńté ńgó pei táa pə́ cər ngwôʼ, ə́ pə́ tsə́rə́.»

²⁶«Pêi pəndʉʉ-tə́poŋ ghíʼ pye lə̌i mə́ nkʉ̂ʉ wéi shʉʼʉ, ńté ńgó pətə́ páp lə yaa nkə́ ngʉ̂ záp pə́ yə́rə́ lə́ pətáŋ-mə́laa ńgó gháp pətsətə́-nkəʉ Sê.»

²⁷«Lə́, m mə̌ ndâʼ lə́ pei ngô: Pei kôŋ pəghaŋə mbəu péi, ə́ nkə́ ngʉ̂ pə̂ shʉʼʉ lə́ pye pi gháp paa wéi.

²⁸Pei sʉ́ʉtə́ Sê ńgó â cóghʼ mbwórə lə́ pye pi gháp tə̂m kwaʼ wei, ə́ mbǒu sʉ́ʉtə́ Sê tû pye pi gháp côŋ ləjôghʼ zéi.

²⁹Ŋuu lə̌i sə́u ghô ləwoʼ gho, o nyárə yé có. Ŋuu lə̌i ngôu ndǐ fwoghʼ zô ḿpfú, o nyêr a pfû yi cər wó lə́wó.

³⁰Ŋuu lə̌i ndóu ghô zə̂u, o ŋə̂. Ŋuu póu mbyé zə̂u zô, koo túŋu ghô yé zěi.

³¹Zə̂u yi pei koŋ ńgó pə ghʉ́ lə́ pei, pei ghʉ́ zěi lə́ pəcó pye.

³²Pei lə̌i mə́ nkôŋ pə́ ndaʼ pye pi gháp koŋ wéi, pə́ pou fə́tə́ wéi ńté hó? Ngaŋə-məfaa kə́ nkoŋ pə́ pye pi gháp koŋ gháp záp.

³³Pei lə̌i nkə́ ngʉ̂ shʉʼʉ pə́ lə́ pye pi gháp pə́ ngʉ záp shʉʼʉ lə́ pei lə́wó, pei pou nzʉ́ʼtə ńgó pə fə́tə́ wéi ńté hó? Tə mbaa ngaŋə-məfaa kə́ ngʉ̂ záp pə́ yə́rə́.

³⁴Pei lə̌i mə́ fô zə̂u, ə́ fô pə́ lə́ pye pi pei jǐ ńgó gháp ghʉ̌ paghʼə́ ńŋə́ lə́ pei, pei pôu nzʉ́ʼtə ńgó pə fə́tə́ wéi ńté hó? Tə mbaa ngaŋə-məfaa kə́ fô záp zə̂u pə́ lə̂ pəcó ghíʼ gháp ghʉ̌ paghʼə́ ńŋə́ lə́ páp.

³⁵Lə́, pei kôŋ pəghaŋə mbəu péi, ə́ ngʉ̌ shʉʼʉ lə́ páp mbou fó zə̂u lə́ pye tə́ kwǎŋ ńgó gháp ghʉ̌ paghʼə́ ńŋə́ lə́ pei. Ə̂ leitə́ yə́rə́, ntsoʼó-faʼ zéi ghʉ́ ḿbə́ tə́koʼ wěi, ə́ pei ncʉ́ʼ ghəpə́ Tsəpye, ńté ńgó a poŋə́ no mbó pəzʉ-tə-pə̂i tə mbaa mbó pəghaŋə məfaa lə́wó.»

³⁶«Pei pə́ ngaŋə-tsâa-mə́jʉ̂ŋ ghíʼ Tə́ wéi pə̌ ngaŋə-tsâa-mə́jʉ̂ŋ.

³⁷Koo pei nyâŋ tô məlǒʼ pye, ə́ mbóghʼ Sê lə̂ ntáa ntô méi lə́wó. Koo pei nyâŋ côghʼ fər paa ŋuu, Sê táa nkə́ cóghʼ yé fər paa pei lə́wó po. Pei nyáŋ ńdyə́ghʼə mə́faa pye, Sê táa ndyə́ghʼə́ mə́faa wêi lə́wó.

³⁸Pei nyáŋ ńŋə̂ zə̂u lə́ pəcó pye, pə táa ngí ŋə́ lə́ pei zéi, ə́ fə̌iʼ ḿbʉŋə́ cər môu-paa wei, â lóghʼə́, pə́ cʉ́ʼtə́, ə́ ndə́ghʼə́ tə ə́ zêʼ ńcwə́rə́.»

³⁹Yěso kə̂ ncí ndâʼ lə́ páp ngô: «Tə mboʼ fwoghʼ-mə́nyôghʼ myághʼə nyárə cǒ laŋə́-ndə̂u? A lə̌i mə́ ndôu nyárə́ yé, mə́i gháp zʉ́ wǒ nǎa pfúŋ cər ghəm.

⁴⁰Njyêʼ-faʼ kâa pə́ ndêi yé tə́-faʼ ye. Lə́, a jyêʼ faʼ tə fú ńjí, ə́ ncʉ́ʼ ḿbə́ pə́ ghíʼ tə́-faʼ ye.

⁴¹Ńté hó o pə̂ ndôu lə̂ njwó fəpə pʉ̌ʉ yi nuŋú ləjôghʼ fə̌r gho, lə́ lə́u mə́ njwô ghô kə̂u nkwə̂i yi a pʉŋtə́ ləjôghʼ gho po?»

⁴²Tə mboʼ o kûʼ lə̂ ndáʼ lə́ fə̌r gho ngô: «Ə fə̌r, cʉ̂ʼ n nkwarə́ fəpə pʉ̌ʉ yo yi pə̌ ləjôghʼ gho lo, lə́ ngǐ lǎʼ, kə̂u nkwə̂i pʉ̂ŋtə ləjôghʼ gho? Sap-ndwô-fʉ́ŋ! Tsə̌mbi nkwárə́ kə̂u nkwə̂i yi a pʉŋtə́ ləjôghʼ gho, tə ntsúŋú mə́ njwô yʉʼ mboŋə́ lǔ lə̂ nkwárə́ fəpə pʉ̌ʉ yi pə́ ləjôghʼ fə̌r gho.»

⁴³Tʉ̌ shʉʼʉ kâa pə́ nzə̂m yé ntǎa tə́poŋ. Ə tʉ̌ yi pə́ ngǒu kə̂ mə́ nzə̂m yé ntǎa shʉʼʉ po.

⁴⁴Pə́ jî tʉ̌ tsəm pə́ lə̂ məntǎa měi. Pə́ lə̌i nkâp yé nyar lə̂ tʉ̌ nkaŋ-nyêʼ po. Ə́ kə́ ḿbə́ ndʉŋ-ndʉŋ ghíʼ mboʼ pə́ kə̂ kâp yé mbwʉ̌ lə̂ tʉ̌ ngə́m po.

⁴⁵Ŋuu shʉʼʉ ghʉ no shʉʼʉ yi ə́ kwar lə̂ shʉʼʉ yi lóghʼə́ cər ntə̂ʉ zʉ́, ŋuu tə́poŋ ghʉ no tə́poŋ yi ə́ kwar lə̂ no tə́poŋ yǐ lóghʼə́ cər ntə̂ʉ zʉ́, ńté ńgó tsâr yi ə́ kwar ntsʉ ŋuu ə́ fú lə́ yi ə́ lóghʼə́ cər ntə̂ʉ zʉ́.

⁴⁶Ńté hó pei pə̂ fûŋ ghâa ńgó ə́ Nde! Ə́ Nde! Ə́ mbǒu káa kə́ pə́ ghʉ̂ wéi zə̂u yi məŋ ndaʼ zěi?

⁴⁷N ngwo nyarə́ wéi ŋuu yi ńgó, ŋuu yi a tǒ ńcə́r ghâa, ə́ nzúʼ tsâr zâa, ə́ mbǒu ngʉ́ ghíʼ ə́ pə́ ntúŋú shwǐ yé.

⁴⁸A shwǐ ŋuu yi a lə ghí kə́r ndə̂ ye, ə́ ntsə̌mbi ntúŋ cû zěi tə ntə́ʉ ndəu ghǒ mboŋə́ jǐ lə̂ mbóu. Nci tâa ndóghʼə́ ńzéʼ ńtó ńdwúŋ ndə̂, lə́ káa kûʼ yé lə̂ nkə̂m ńté ńgó pə́ lə pôu shʉʼʉ.

⁴⁹Lə́, ŋuu yi a zǔʼ tsâr zâa káa ghʉ̌ yé ghíʼ ə́ pə́ ntúŋú wə́ ghíʼ ŋuu yi a kə̌r ndə̂ pə́ tə pǒu cû zěi. Nci tâa ndóghʼə́ ńzéʼ ńtó ńdwúŋ ndə̂ zêi, ə lêi-lěi kə́mə́ ńcwə́rə́ tə mê.