Read Ngombale Lúʼkáasʉ 8 Bible Online

Lúʼkáasʉ 8 - Ngombale bible

Lúʼkáasʉ 8

¹Ə́ lei yə́rə́, Yěso pə̂ ŋáa ŋə̂i cər mətúsoŋ mbaa cər məlâʼ ə́ ntsə́tə Nkəʉ Shʉʼʉ yi no Ləfou Sê. Gháp pə ngaŋə-jyêʼ-no yé ntsap pwô lə̂ ləghə̂m ŋəi,

²tə mbaa pəcó pəngyě pi a lə zǔŋ məzəghʼə tə́poŋ lə́ páp, ə́ mbou ngʉ́ gháp shwítə: ə́ lə pə́ Mǎyaa Madəlêŋ yi məzəghʼə tə́poŋ saambwô lə fú lə́ zʉ́ ńkwatə́.

³Ə́ ngʉ̌ Jânə, ngwě Shuza yi a lə loʼo nkâp fou Elôdə, tə mbaa Səsə́naa, ə́ nkʉʼʉ́ pəcó pəngyě tə nzáa pi gháp lə laghʼ məzə̂u máp ńtôutə Yěso gháp pə ngaŋə-jyêʼ-no ye.

⁴Pye lə pə́ fû məsʉ̂ məsʉ̂ cər mətúsoŋ ńtó ńkə̂itə mbəʉ Yěso, a laghʼ saghʼ-ləghaa ńdáʼ lə́ páp ngô:

⁵«Cǒ ŋuu lǎʼ ngwǒ nkâʼ zʉ́ mâʼ mbi zə̂u. Ə́ nkə́u mǎʼ wó, məcó məmbəm pfûŋtə laŋə́-ndə̂u, pye lei ńnyʉ́ŋtə́, pəshʉ̌ŋ pou ntsûʼtə́ ḿmî.

⁶Məcó məmbəm pfûŋtə lə̂ yʉʼ məghǒ, ə́ ngʉ̌ sáʼ, ə́ mbúŋ nci ńzə́u.

⁷Məcó məmbəm pfûŋtə cər mə́kǎp-kǎp gháp pə mêi mə̂ nâa sáʼ, mə́kǎp-kǎp cʉ̂ʼ fə́mə měi.

⁸Lə́ cǒ mbi zêi pfûŋ lə́ yʉʼ ndesé shʉʼʉ; ə́ ngʉ sáʼ, ə́ ngúʼ tə nzə́m, tâʼ ləcʉŋə́ pə̂ nzə̂m no məmbəm nkʉ.» Yěso pou ndâʼ ngô: «Ŋuu lə̌i ngwó mətuŋú lə̂ ndághʼ ńzúʼ, a zûʼ!»

⁹Ngaŋə-jyêʼ-no Yěso túŋu yé no yi wêi wo saghʼ-ləghaa laghʼ ńdáʼ.

¹⁰A pwôr lə́ páp ngô: «Pə́ lə ŋə́ wéi jîno lə̂ ńdághʼ ńjí məno Ləfou Sê mi ə́ pə́ ləlwǒ. Lə́ ə́ ngwǒ lə́ pəcó pye, pə́ laghʼ pə́ saghʼ-ləghaa ńdáʼ gháp no, ńjí ńgó gháp pə́ náŋtə́, lə́ mə́ ńjwô gháp po, ə́ mə́ ńzʉ́ʼtə́, lə́ ə́ mə́ nzûʼ gháp po.»

¹¹«Yô no yi saghʼ-ləghaa wêi laghʼ ńdáʼ: Mbi zə̂u gháʼá mbə́ tsâr Sê.

¹²Məmbəm mi ə́ pfúŋtə́ ndəu laŋə́, ə̂ pye pi gháp zûʼ tsâr Sê, lə́ Sə́tə kə̂u məntə̂ʉ páp ńkwárə́, ə́ mbóghʼ ńgó, mboʼ gháp pə̂i, Sê ghʉ̂ gháp cwôr.

¹³Mi ə́ pfúŋtə́ lə̂ məghǒ, ə́ pə̂ pye pi gháp zûʼ tsâr Sê, ə́ mpfû lə̂ lətsei, lə́ káa zěi lâr yé məŋaŋə məntə̂ʉ páp. Gháp pə̂i pə́ məyʉʼ. Nkwaʼtə lêi tə ńtó, gháp kâa lə̂ nkə́ ncóghʼ ntə̂ʉ lə̂ Sê.

¹⁴Mǐ pfúŋtə́ cər mə́kǎp-kǎp, ə́ pə̂ pye pi gháp zûʼ tsâr Sê, ə́ ndə̌r; ə́ nkə́u ncí ndə̂ nzuŋtə nzəm məfuʼ gháp pə məno nzʉ̂, měi fə́mə gháp. Lə́u gháp zə̂m gháp ntǎa po.

¹⁵Mbi zə̂u yi ə́ pfuŋtə́ lə́ yʉʼ ndesé shʉʼʉ laghʼ mbə̂ pye pi gháp zûʼ tsâr Sê, ə́ mbə́i, ə́ ndoʼó cər məntə̂ʉ shʉʼʉ, ə́ mə́ ngʉ̂ maa mpfu tsəm ghíʼ ə́ pə́ ntúŋú, ə́ ndaghʼ ńzə̂m gháʼá məntǎa shʉʼʉ yə́rə́.»

¹⁶«Káa ŋuu pə́ cûʼ yé lâm ndâghʼ ngwǒŋ ńkə́ptə́, kəʉ ntâghʼ ncʉŋ kə̌u lo. Pə́ cûʼ lâm ntâghʼ pə́ ndəu ləʼtə zěi, ńjí ńgó ŋuu ghí pə́ kə̂u ndə̂, yʉʼ pə̂ fwótə́.

¹⁷Zə̂u tsəm yi ə́ lwǒ táa kwǎr ndəu zǎa ntə̌ʉ-nəu, zə̂u tsəm yi ə́ pǒu mbə́ pə́ ləlwǒ, pə́ táa jí; ə́ pôu nkwâr lə̂ nkeʼ.

¹⁸Pei laghʼə́ tû zéi lə̂ mbə̂u yi pei laghʼ ńzúʼ no, ńté ńgó pə́ táa ŋə́ zə̂u lə́ ŋuu yi a yaa mə́ ngwo có. Ə́ ngwǒ lə́ ŋuu yi káa a ghwô yé có zə̂u, mə́i pə́ táa pfú mbaa məyʉʼ yi a kwaŋ ńgó a ghwo.»

¹⁹Mə́ pə Yěso gháp pə pəfə̌r pé lə tô tə ntə́ʉ mə́ njwô yé, lə́ káa kǔʼ gháp lə̂ ncʉ́ŋə́ tə mbáatə́ yé, ńté mbə̂u yi lâʼ lə lǎghʼ nzáa yʉʼ wó.

²⁰Pə́ lâʼ lə́ Yěso ngô: «Mə́ gho gháp pə pəfə̌r pô wə́ pěi mə́ ndôu ńjwó ghô.»

²¹Lə́ a pwôr lə́ páp ngô: «Pəmə́ pâa gháp pə pəfə̌r pâa ə̂ pye pi gháp pə́ nzûʼ tsâr Sê, ə́ mbou mə́ ngʉ̂ ghíʼ ə́ pə́ ntúŋú.»

²²Ə́ lə pə́ có leʼé, Yěso gháp pə ngaŋə-jyêʼ-no yé kə̂u kənyúʼ, a lâʼ lə́ páp ngô: «Paghʼə tə́u lətʉŋ-nci ńdə́r lə̂ cǒ njʉŋə́.» Gháp pə pǎp kə̂ mə́ ntə́u ńdə́r.

²³Gháp lə pə́ ndâghʼ kənyúʼ ńtə́u yə́rə́, Yěso ji lə̂ ndé. Ə fə̂m ghapə ghapə́ njǐ lə̂ ncʉ̂ʼ yʉʼ, nci nkə̂u cər kənyúʼ tə gháp cʉ̂ʼ ńtə́ʉ pə́ ntsʉ ləwʉ̂.

²⁴Ngaŋə-jyêʼ-no cʉ́ŋə mbáatə́ Yěso, ə́ njyě yé lə̂ təʉ, ə́ ndǎʼ lə́ zʉ́ ngô: «Cícye, Cícye paghʼə wo kwʉ́tə́ lə!» Yěso jye, ə́ sáʼ fə̂m gháp pə mələ̂ʉ nci, ə fə̂m záʼa, nci shîʼ, yʉʼ nâʼ ńgó ntə́uʼ.

²⁵A pou ndâʼ lə̂ ngaŋə-jyêʼ-no yé ngô: «Pə̂i-ntə̂ʉ zéi ghǒ?» Lə́ gháp kə pə́ mbóghʼ, ə́ pou ngí pə́ kəʼə gháp, gháp pə̂ ndâʼ təcər páp ngô: «Ŋuu wo gháʼa mbə́ pə̂ wǒ? A sâʼ fə̂m gháp pə mələ̂ʉ nci tə měi zûʼ ntsʉ yé.»

²⁶Gháp pə ngaŋə-jyêʼ-no yé lər tə nkə́u paghʼə lâʼ Gadazanyê yi ə́ ŋwě Galilêi.

²⁷Yěso pə̂ nkwâr kənyúʼ, cǒ ŋuu túsoŋ wêi tô ḿbə̂utə́ yé, məzəghʼə tə́poŋ pə̂ lə́ zʉ́, ə́ ghi pə́ mə́i ə́ cî mə́ gháʼate, lə́u a pyêr mə́ mâʼ yé ndǐ po; ə́ mbyér ncî yé cər cǒ ndə̂ po, ə́ ncʉ́ʼ ncî pə́ yʉʼ mətû-lə́shi.

²⁸Ŋuu wêi lêi tə njwó Yěso, ə́ mǎʼ wâr, ə́ mpfúŋ ńnúŋ məku zʉ́, ə́ ndǎʼ lə̂ təʉ ngô: «O pfû hó mbó məŋ gho Yěso môu Tsəpye Sê? Tə́sə́u, koo o pə̂u ghâa!»

²⁹Yěso sâʼ zəghʼə tə́poŋ zêi ńgó ə̂ fû lə́ ŋuu wêi ńkwǎr. Ə́ ghí pə́, mə́i zəghʼə tə́poŋ zêi ji mə́ mbə́u yé gháʼate. Pə́ lə nyâŋ ndâghʼ pəcêŋ ńkə̂r mbô mé gháp pə məku mé mboŋə́ loʼo yé, lə́ a kə̂ nzêʼtə pěi zéʼtə́. Zəghʼə zêi lə pou nyáŋ ncʉ́ŋə yé a lər pə́ lə̂ məyʉʼ mi káa ŋuu pə̂ yé wó.

³⁰Yěso túŋu yé ngô: «Ləjôghʼ zô wǒ?» A pwôr ngô: «Ləjôghʼ zâa ə̂ Tənzáa.» Ə́ lə yaa ngǐ pə́, mə́i məzəghʼə tə́poŋ kə́utə́ mə́ lə́ zʉ́ tə nzáa záa.

³¹Məzəghʼə tə́poŋ mêi lə pə́ sʉ̂ʉtə Yěso ńgó koo a côghʼ gháp cər tâa-tə́-ləlyəghʼtə́.

³²Ə́ ghi pə́, cǒ mbuŋu pəkúnye yi pə́ lə pə́ nkóʼo gháp pə̂ yʉʼ wó, ə́ mə́ ŋáa nkár ḿpfâr zə̂u ndəu ləkôr. Məzəghʼə tə́poŋ mêi sʉ̂ʉtə Yěso ńgó a pə̂i gháp wó nkə́utə́ lə̂ pəkúnye pêi; a kə̂ mbə́i.

³³Məzəghʼə tə́poŋ mêi cʉ̂ʼ nkə́ fú lə́ ŋuu wêi ńkwátə́ ńkə́utə́ lə́ pəkúnye pêi. Mbuŋu pəkúnye ntsəm fû ləkôr nkəmə́, ə́ sěi ńgwo ńcwə́rə́ cər lətʉŋ-nci, ə́ məiʼí cər wó, ə́ kwʉ́tə́ gháp.

³⁴Pye pi gháp lə pápə mbuŋu pəkúnye zêi jwô zə̂u yi ə́ lěi, ə́ nkhʉ̂ gháp, ə́ ngwo ndághʼ yo no ńsár yʉʼ cər túsoŋ mbaa cər məlâʼ.

³⁵Pye lâʼ zûʼ, ə́ nzǔŋ lə̂ ngwó njwó záp zə̂u yi ə́ lěi, ə́ ntó tə nkə́u mbəʉ Yěso, ə́ njwó ŋuu yi məzəghʼə tə́poŋ yǎa nkwatə́ lə́ zʉ́ lêi nyâŋ mbəʉ zʉ́, mə́i jîno yé pəʉ mə́ tə a mâʼ ndǐ. Gháp ji lə̂ mbóghʼ.

³⁶Pye pi gháp tə́i njwó zə̂u tsəm, pyêtə ńdáʼ gháp ghíʼ ə́ tə́i nděi záʼa-ndě ŋuu yi məzəghʼə tə́poŋ lə pə́ lə́ zʉ́ poŋə́ shwítə́.

³⁷Ə́ pə̂ yə́rə́ pye lâʼ pêi pə́tsəm lâʼ lə́ Yěso ńgó a fú lâʼ páp ndə́r, ńté ńgó gháp lə pə́ mbóghʼ gháʼate. Yěso kə̂u cər kənyúʼ lə̂ mbə̂ʉ yé.

³⁸Ŋuu yi məzəghʼə tə́poŋ yǎa nkwatə́ lə́ zʉ́ lêi pə̂ sʉ̂ʉtə yé ńgó a pə́i a tsə́ʉ nzəm zʉ́. Lə́ Yěso lə̂ʼ, ə́ ndǎʼ lə́ zʉ́ ngô:

³⁹«Pə̌ʉ lə̂ nzeʼ gho, ə́ nkə́u ńdéʼtə́ zə̂u tsəm yi Sê ghʉ̌ lə́ gho.» A ghi pə́ pəʉ lə̂ nzéʼ zʉ́, ə́ ŋə́i ndeʼtə pye zə̂u yi Yěso yǎa ngʉ̌ lə́ zʉ́.

⁴⁰Yěso pə̂ʉ nzəm tə nkə́u lə̂ cǒ njʉŋə́ lətʉŋ-nci, ə lâʼ laghʼ lətsei pfû yé, ńté ńgó gháp lə yaa mbə́ yʉʼ wó ə́ mə́ nzʉ́ʼtə yé.

⁴¹Cǒ tə́-ndə̂ cûʼtə pəyúda yi pə́ fûŋ yé ńgó Njalúsʉ tô, ə́ mpfúŋ ńnúŋ məku Yěso, ə́ sʉ́ʉtə́ yé ńgó a tó ndə̂ zʉ́,

⁴²ńté ńgó a lə ghwo tâʼ môu moʼ, a pə̂ yi məngyě, mə́i a ghwô mə́ no nguʼ ntsap pwô lə̂ ləghə̂m; ə́ mbə́ nzeʼ ncʉ́ʼ mə́ nkwʉ̂ kwʉ̌. Yěso pə̌ ndə̂r lə̂ wó, ə lâʼ tsə̂ʉ nzəm zʉ́ ə́ nzáa tə ncʉ́ʼ ŋə́i fárə-farə́.

⁴³Cǒ məngyě pə̂ yé nou lâʼ, mə́i mə́sóu cî mə́ lə́ zʉ́ nguʼ ntsap pwô lə̂ ləghə̂m tə́ záʼa. A lə naa zə̂u pé tsəm fə́i nkə́ ńté pə̂ ghou zêi, lə́ kâa cǒ lóghʼtə kûʼ yé lə̂ fáʼ lə́ zʉ́ tə a shwítə́.

⁴⁴A tô fû pə́ nzəm, ə́ nkə́u lətsáa ndǐ Yěso, mə́sóu wêi kə̂ ntóghʼ nzáʼá.

⁴⁵Yěso ntúŋu ngô: «Wǒ ŋuu kə̌u ghâa?» Wǒwó múŋu no mə́u. Pyêh lâʼ ngô: «Cícye, jwó mbə̂u yi lâʼ lǎghʼ ńfárə́ mbəʉ gho!»

⁴⁶Lə́ Yěso lâʼ ngô: «Ŋuu kə̂u mə́ ghâa, ńté ńgó n nzǔʼ ghíʼ məcó mətəʉ fú lə́ məŋ ńkwár.»

⁴⁷Məngyě wei jwô ńgó ləcʉŋ kéʼe, ə́ mə́ ŋə́i ńgwə̌r, ə́ ntó ńshíʼ ńnúŋ məku Yěso. Ə́ mbyétə́ ńdáʼ yé pə́ mbi lâʼ, ə́ zə̂u yi ə́ yǎa ncʉ́ŋə́ yé a poŋə́ kə̌u yé, mbaa mbə̂u yi a kə̌ ndaghʼ ntóghʼ ńshwítə́ pə̂ mpfu wêi.

⁴⁸Yěso lâʼ lə́ zʉ́ ngô: «Ngwâa ghâa, pə̂i-ntə̂ʉ zô ghʉ o shwítə. Lər ghô lə̂ mbwórə.»

⁴⁹Yěso lə pyér mə́ ndâʼ laʼá, cǒ ŋuu fû nzeʼ Njalúsʉ ńtó ńdáʼ lə́ zʉ́ ngô: «Môu gho kwʉ mə́ yé, koo o kə̂ njwóghʼ ngághʼə́ Cícye fefe.»

⁵⁰Lə́ Yěso zûʼ ghíʼ a laʼá, ə́ ndǎʼ lə́ Njalúsʉ ngô: «Koo pôghʼ, ghwǒ pə̂ pə̂i-ntə̂ʉ, a wo cwór.»

⁵¹Yěso lə̂r tə nkə́u nzeʼ Njalúsʉ, káa pə́i yé ńgó cǒ ŋuu ndeʼe kə́u ndə̂, tə ndyéʼ Pyêh, ə́ ngʉ̌ Jâghʼ gháp Jâŋ, ə́ nkʉʼʉ́ tə́ môu gháp maa môu.

⁵²Ŋuu tsəm pə̂ ntsə́rə́ ndâa môu wêi. Lə́, Yěso lâʼ ngô: «Koo pei kə̂ ntsə́rə́, a kə́ kwʉ̂ yé, a lê lě.»

⁵³Gháp jî lə̂ ndyaŋə́ yé, ńté no gháp lə jî záp ńgó a kwʉ mə́.

⁵⁴Lə́, Yěso pyê pô môu, ə́ ndǎʼ lə́ zʉ́ lə́ təʉ ngô: «Môu, lěsê!»

⁵⁵A zʉ̂ʉ lə̂ ləwʉ̂, ə́ nkə́ ntóghʼ ndésê, Yěso lâʼ ńgó pə ŋə́ zə̂u môu wêi zʉ́.

⁵⁶Pətə́ môu jwô, ə fû nkəʼə́ gháp gháʼate. Lə́ Yěso cwôtə gháp ńgó koo gháp kʉ̂ʉ tə ndáʼ ŋuu zə̂u yi ə́ tə́i nděi.