Read Ngombale Jâŋ 10 Bible Online

Jâŋ 10 - Ngombale bible

Jâŋ 10

¹Yěso kə̂ ncí ndâʼ ngô: «Kwaʼ lə́nə́ʉ məŋ ndâʼ wéi ńgó ŋuu lə̌i ndə́iʼ fú pə́ ntsʉ nkâʼ kə́u cər nkâʼ mənye po, ə́ nzéʼ pə́ lə́ tâa-nkâʼ mboŋə́ kə́u, mə́i ngaŋ ntsǒŋ, ə́ mbə́ fwôr.

²Lə́, ə́ mbə́ ŋuu yi a pâp mbî, a fû pə́ ntsʉ nkâʼ ńkə́u.

³Ŋuu yi a pâp ntsʉ nkâʼ tsôʼ, a kə̂u nkâʼ, mbî yé zûʼ nji mbapə mbî, a fûŋ warə́ warə́ məmbî lə̂ ləjôghʼ yé, ə́ ndǎghʼ gháp ńkwár.

⁴Ə́ ndéi tə fú nkâʼ nkwárə́ gháp pə́tsəm, ə́ mbə́ mbi, gháp pə̂ nzəm; ńté no gháp lə̂i nji yé.

⁵Mboʼ gháp tsə̂ʉ gháp nzəm ngəʉ po, gháp wo khʉ̌ yé khʉ̌, ńté no káa gháp pə́ ndə̂i gháp nji ye.»

⁶Yěso lâʼ gháp wo saghʼ-ləghaa, lə́ káa gháp zûʼ gháp no yi a laghʼ ńdáʼ.

⁷Yěso kə̂ ncí ndáʼ lə́ páp ngô: «Məŋ ndaʼ wéi kwaʼ lə́nə́ʉ, mə̂ŋ ntsʉ nkâʼ mbî.

⁸Ŋuu ntsəm yi a kə tsə̌mbi ntó m mboŋə́ tó pə̌ pə̂ ntsǒŋ, ə́ mbə́ fwôr; lə́ mbî káa kə zʉ̂ʼtə gháp mənji máp.

⁹Mə̂ŋ lə̂ mbə̌ ntsʉ nkâʼ, ŋuu lə̌i ndéi lə́ məŋ ńkə́u nkâʼ a ghʉ̂ ncwór; mə́i a wo kə́u, ə́ pǒu nkwǎr ghíʼ a pə̌ nkǒŋ, ə́ ŋáa lǒu zə̂u yi mboʼ a zʉ̂.

¹⁰Ə ntsǒŋ tô yé pə́ lə̂ njú, pə́ lə̂ njwí, pə́ lə̂ mbə́ghʼ ngər; lə́ məŋ, n nkə tô zâa pə́ lə̂ ngʉ́ pye-mə́soŋ pə́tsəm ghwo lənyâŋ shʉʼʉ, ə́ kwaʼ wěi pə̂ ntsəm.

¹¹Mə̂ŋ mbapə mbî yi shʉʼʉ, mbapə mbî yi shʉʼʉ ŋə̂ tû yé ńté mbî yé.

¹²Ŋuu yi a faʼ yé ńdôu pə̂ nkâp, káa a pə̂ yé mbapə mbî yi shʉʼʉ, kâa mbî pə̂ yé pé. A lei tə njwó nye-njwi tô, a mêʼ mbî ńkhʉ̂ yé. Nye-njwi ghôu cǒ, pfuʼ zěi sêi.

¹³Wêi ŋuu mêʼ mbî ńkhʉ̂ yé gháʼá ńté no a kə tô pə́ ndou nkâp, káa jî yé mvûŋ mbî zêi.

¹⁴Mə̂ŋ mbapə mbî yi shʉʼʉ, m mə̌ njî mbî zâa, gháp pou mə́ njî ghâa;

¹⁵ə́ ndʉŋ-ndʉŋ ghíʼ Tə́ ghâa pə̌ njî ghâa, n nkə̂ mə́ njî zâa Tə́ lə́wó. M mbou ŋə̂ tû zâa ńté mbî zâa.

¹⁶N nkə̌ ncí ngwô có mbî zâa pi káa gháp pə̂ gháp cər nkâʼ yaʼa. Ə́ pə́ ntúŋu ńgó n ngwó ńdǎghʼ gháp ńtó; gháp záp zúʼ nji zâa, ə̂ lêi yə́rə́ nou mbî cʉ́ʼ mbə́ tâʼ, mbapə mbî kə̂ mbə̂ yé pə́ tâʼ.

¹⁷Tə́ ghâa koŋ ghâa, ńté ńgó n ŋə̂ tû zâa ghíʼ n ngʉ̌ pǒu pfú.

¹⁸Káa cǒ ŋuu kûʼ yé lə̂ njwí ghâa, lə́ n nkoŋ pə́ məŋ ə́ ŋə́ tû zâa. N ngwo mətəʉ lə̂ ndághʼ ńŋə́, ə́ ngwǒ mətəʉ lə̂ ndághʼ ḿpfú. Ə́ pə̂ zə̂u yi Tə́ ghâa lə lǎʼ ńgó məŋ ngʉ̂ zěi.»

¹⁹Pəyúda zûʼ mətsâr mêi mwo, ə ghaptə kə̂ ncí nkwár təcər páp.

²⁰Lələʉ pye təcər páp pə̂ ndâʼ ngô: «Zəghʼə tə́poŋ pə́ lə́ zʉ́, â pə! A lâʼ hó tə pei zʉ̂ʼtə?»

²¹Pəcó pə̂ ndâʼ ngô: «Káa zə̂ pə́ mətsâr ŋuu yi zəghʼə tə́poŋ pə́ lə́ zʉ́. Mboʼ zəghʼə tə́poŋ ghʉ̂ pəfwoghʼ-mə́nyôghʼ jwô yʉʼ?»

²²Ə́ lə pə́ mpfu məghǎa, pə́ pə̂ Yelúsalêm mə́ nzʉ̂ lətsei laghʼ ńkʉ́ʉtə́ ghíʼ pə́ lə sǒghʼ lǒʼ lə̂ ndə̂ Sê yi pə́ lə cǒŋ.

²³Yěso pə̂ tətáa ndə̂ Sê mə́ ŋáa ŋə̂itə mbəʉ tə́koʼ ntsʉ nkâʼ yi pə́ lə fûŋ ńgó yi Salə́məu.

²⁴Pəyúda zə́mə Yěso ńŋə́ təcər, ə́ ntúŋú yé ngô: «Paghʼ wo zʉ́ʼtə́ tə kə́u pə́ shʉ́ŋə́ o poŋə́ lǎʼ wághʼ ŋuu yi o pə̌ zʉ́? Ə́ lə̌i mbə́ yi ô Nzaʼ-nkʉ, o sâa-sǎa ndâʼ wághʼ.»

²⁵Yěso lâʼ lə́ páp ngô: «N ndə láʼ mə́ ndâʼ wéi lə́ káa pei pə̂i wéi; məfaʼ mi n ndaghʼ ləjôghʼ Tə́ ghâa ńgʉ́, pə́ nyárə ŋuu yi m mbə̌ wěi.

²⁶Lə́ káa pei pə́ mbə̂i wéi ńté ńgó káa pei pə̂ wéi lə̂ nou mbî zâa.

²⁷Mbî zâa zûʼ nji zâa ə́ ndə̌i, m mə̂ njî gháp, gháp pə̂ ŋə̂i nzəm məŋ.

²⁸M mə̂ ŋə̂ gháp ləcwôr tə me, gháp láʼ nkə́ nkwʉ̂tə gháp po, ŋuu kə́ mbóu kuʼ yé lə̂ fú mbô məŋ mpfú gháp po.

²⁹Tə́ ghâa lə ŋə́ gháp lə́ məŋ, a ghwô mətəʉ ndêi ŋuu ntsəm, mboʼ cǒ ŋuu kuʼ yé lə̂ fú mbô zʉ́ ntsôghʼ có zə̂u po.

³⁰Paghʼ Tə́ ghâa pə́ pə́ tâʼ ŋuu.»

³¹Pəyúda kə̂ ncí ndâghʼ məghǒ, ə́ ndou lə̂ ńdághʼ ńtə́m Yěso njwí.

³²Yěso kə̂ ncí ńdâʼ lə́ páp ngô: «N ndə ghʉ pei jwô məfaʼ shʉʼʉ tə nzáa mi Tə́ ghâa lə ŋə́ ghâa mətəʉ lə̂ ndághʼ ńgʉ̌, pei laghʼtə məghǒ lə̂ ndághʼ ńtə́m ghâa njwí gháʼa ńté zarə́?»

³³Gháp pwor lə́ zʉ́ ngô: «Káa paghʼ pə́ ndôu lə̂ ndághʼ məghǒ ńtə́m gho ńjwí ńté pə̂ có no shʉʼʉ, paghʼ lou ńtə́m gho ńjwí ńté ńgó o zoutə Sê. Gho yi o pə̌ ŋuu-məsoŋ, o cʉ̌ʼ mə́ ndâʼ ńgó ô Sê.»

³⁴Yěso lâʼ lə́ páp ngô: «Pə́ lə ŋwáʼá cər ŋwaʼa ləpə̌ʉ Mə̌usə̂i ńgó Sê lə laʼ ngô: “Pêi məsê.”

³⁵Paghʼə pə́tsəm pə́ njî ńgó mboʼ pə́ kə́p yé zə̂u yi ŋwaʼá Sê lǎʼ po. Lə́ a pou ndǎʼ ńgó pye pi a fûŋ gháp ńgó məsê, ə̂ pye pi a lâʼ no lə́ páp.

³⁶Ə́ ngwǒ lə́ məŋ yi Sê lə tsóʼ ghâa ntə́u cər nzʉ̂ yo, ńté hó n ndâʼ ńgó mə̂ŋ Môu ye pei lâʼ ńgó n nzoutə́ yé?

³⁷N ndə̌i ndə́iʼ fǎʼ məfaʼ Tə́ ghâa po, koo pei pə̂i wéi no zâa.

³⁸Lə́ n ndə̌i fâʼ məfaʼ mêi, pei lə́iʼ kǒŋ lə̂ mbə́i no zâa po, pei pə̂i məfaʼ mêi ńjí ńgó, ə́ lei yə́rə́ pei jî ńgó Tə́ pə́ ndəu məŋ, m mbə̂ zâa ndəu zʉ́.»

³⁹Yěso lâʼ yə́rə́, gháp kə̂ ncí mə́ ndôu məsʉ̂ lə̂ ndághʼ ńgǒu yé, a tə̂u mbó páp ə́ ndər yé.

⁴⁰Yěso kə̂ ncí mbə̂ʉ, ə́ ntə́u nci Yuudêŋ, ə́ ndə́r lə̂ cǒ njʉŋə́, ə́ yʉʼ yi Jâŋ lə ŋə́ pye nci wó, ə́ nyáŋ wó.

⁴¹Pye tə nzáa tô ńcə́r yé, ə́ mə́ ndâʼ təcər páp ngô: «Jâŋ, káa lə ghʉ yé cǒ nkəʼə-no, lə́ no tsəm yi a lə lǎʼ ńté ŋuu wo lə pə́ no lə́nə́ʉ.»

⁴²Pye tə nzáa lə́ pye pi gháp lə pə́ yʉʼ wó cʉ̂ʼ nkə́ mbə́i no Yěso.