Read Ngombale Jâŋ 13 Bible Online

Jâŋ 13 - Ngombale bible

Jâŋ 13

¹Ə́ lə pə́ ghíʼ nzʉ̂ lə təi fóghʼ, ə̂ pə́ leʼé lətsei Pásʉ́ka pəyúda, Yěso pə̂ njí ńgó ye mpfu kuʼ mə́ ghíʼ a wo fú cər nzʉ̂ yo lə̌r wǒ cə́r Tə́ ye. Ghíʼ zʉ́ Yěso lə kǒŋ pye pi gháp pə̂ pé ndəu nzʉ̂ yáʼa lə̂, a lə nkə́ nkǒŋ gháp koŋə́ tə ngwó ndyəghʼtə́.

²Ə́ pə̂ mpfu-ngwʉ̂, Yěso gháp pə ngaŋə-jyêʼ-no yé nyáŋ sê mə́ nzʉ̂ zə̂u, ə́ ghi pə́ mə́i Sə́tə côghʼ mə́ kwaŋtə cər ntə̂ʉ Yúda Isəkaryôtə môu Síməu lə̂ féi Yěso ŋə́.

³Yěso pə̂ njî ńgó Tə́ ye lə ŋə̂ mətəʉ lə́ zʉ́ lə̂ ndághʼ ńgʉ̌ zə̂u tsəm, ə́ nkə́ ncí mə́ njî ńgó a lə fú pə́ mbó Sê, ə́ mbǒu mə́ mbə̂ʉ yé lə̂ mbó Sê.

⁴Ə́ nyáŋ tə ndêse, ə́ sǎr ndǐ fwôghʼ ye nuŋú sê, ə́ mbyé táwərə ə́ mbə́ʉtə́ lətyêr zʉ́.

⁵Ə́ ncóghʼ nci cər kâŋ, ə́ njǐ lə̂ ndághʼ sǒghʼ məku ngaŋə-jyêʼ-no yé, ə́ ndǎghʼ táwərə yi a yǎa mbə́ʉtə́ lətyêr zʉ́ lêi ńzághʼ.

⁶Ə́ ndə̌r tə nkə́u lə́ Síməu Pyêh, a lâʼ lə́ Yěso ngô: «Ńgó gho Nde, o wo sǒghʼ məku mâa?»

⁷Yěso pwôr lə́ zʉ́ ngô: «Ə zə̂u yi n ngʉ zěi, mboʼ o zûʼ gho mpfu wo po, lə́ o táa poŋə́ zúʼ.»

⁸Pyêh lâʼ lə́ zʉ́ ngô: «Lyeʼe zâa, mboʼ o sôghʼ gho məku mâa po.» A lâʼ lə́ zʉ́ ngô: «N ndə̌i ndə́iʼ sǒghʼ məku mô po, poghʼo kə̂ mbyêr wóghʼə lə̂ có no po.»

⁹Síməu Pyêh lâʼ lə́ zʉ́ ngô: «Ə́ lə̌i mbə́ yə́rə́, Ə Nde, koo o sôghʼ pə́ ndaʼ məku mâa, fǔ sǒghʼ mbô mâa gháp tû zâa!»

¹⁰Yěso lâʼ lə́ zʉ́ ngô: «Kâa pə́ ntúŋu yé ńgó pə kə́ ncí sôghʼ mbəʉ ŋuu yi a yaa mə́ sǒghʼ [tə ndyéʼ məku mé,] ńté no ngaŋ fu mə́ ndéi. Pei pə̌ ndéi, lə́ kâa pə́ pei pə́tsəm.»

¹¹Yěso lə lâʼ ńgó káa pei léi pə́tsəm, ńté no a lə pə́ njî ŋuu yi a wo féi zʉ́ ŋə́.

¹²Yěso sôghʼ məku tə nyér, ə́ mbyé ndǐ fwôghʼ ye mâʼ, ə́ mbə̌ʉ nyáŋ sê ńtúŋú gháp ngô: «Tə pei zûʼ no yi zə̂u yi n nyǎŋ ngʉ lə́ pei lo laghʼ ńdâʼ?

¹³Pei fûŋ ghâa ńgó Cícye mbaa ńgó Nde, ə́ pə̂ no. N nyâa mbə́ wěi.

¹⁴Ə́ lə̌i mbə́ yi məŋ yi m mbə̌ Cícye, ə́ mbə́ Nde, n sôghʼ məku méi, mə́i ə́ pə́ ntúŋu ńgó pei zéi sôghʼ məku méi təcər pei.

¹⁵N nyarə́ wéi gháʼá tâʼ fəiʼ yi pei wo lǎghʼ ghʉ̌ ghíʼ pei nyǎŋ njwô n ngʉ̂ lə́ pei lo.

¹⁶Məŋ ndaʼ wéi kwaʼ lə́nə́ʉ ńgó môu-faʼ kâa ghûʼ yé ndêi tə́ faʼ ye, ngaŋə-ntə̂u káa a kə́ ngûʼ yé ndêi ŋuu yi a tə̌u yé.

¹⁷Ghíʼ pei pə̌ njî mpfu wo lə̂, pei lə̌i ngʉ́ yə́rə́ mə́i pêi pəndʉʉ-mboŋ.

¹⁸Kâa n ndâʼ yo no gháʼa lə́ pei pə́tsəm; m mə̌ njî pye pi n ndə tsóʼ gháp. Ə́ poŋ ńgó no yi pə́ lə ŋwaʼá cər ŋwaʼa Sê pə̂utə́. Pə́ lə ŋwáʼa ngô: “Ŋuu yi paghʼ zʉ́ kə pə́ ntəm zə̂u nzʉ́ kə shərə ə́ ncʉ̂ʼ ngaŋə-mbəu ghâa.”

¹⁹N nzâʼ nzʉ̂ ndǎʼ wéi məno mêi mpfu wo, záʼa-ndě měi poŋə́ tó; ńjí ńgó měi lə̌i ntáa ntó, pei pə̂i ngô: “Mə̂ŋ ŋuu yi m mbə́ wó.”

²⁰Kwaʼ lə́nə́ʉ, n ndaʼ wéi ńgó ŋuu lə̌i mpfú ŋuu yi n ntə̌u yé, mə́i a pfû gháʼá ghâa. Ŋuu póu mpfú ghâa, mə́i a pfû ŋuu yi a tə̌u ghâa.»

²¹Yěso lâʼ yə́rə́, nzoʼ ye tsóʼo, a sâa-sǎa ndáʼ ngô: «N ndáʼ wéi kwaʼ lə́nə́ʉ ńgó cǒ ŋuu lə́ pei wo féi ghâa ŋə́.»

²²Ngaŋə-jyêʼ-no yé zûʼ yə́rə́, wǒwó shə́rə ńnáŋ fə̌r ye, ə́ mə́ ntúŋu cər ntə̂ʉ zʉ́ ngô: «A laʼ gháʼa wǒ?»

²³Cǒ tâʼ ngaŋə-jyêʼ-no yi Yěso lə koŋ no yé gháʼate nyâŋ mbəʉ zʉ́, gháp pə pǎp pə̂ nzʉ̂ məzʉ̂.

²⁴Síməu Pyêh mə̂iʼ nyôghʼ lə́ zʉ́ ə́ ndaghʼ ńdâʼ ńgó a túŋú Yěso ńgó a laʼ wǒ ŋuu?

²⁵A ŋúʼu lətuŋú Yěso, ə́ ntsəmtə́ ńtúŋú yé ngô: «Ə́ Nde wêi ŋuu wǒ?»

²⁶Yěso pwôr ngô: «Â ŋuu yi n ngwo cʉ̌ŋ mbwôʼ məzʉ̂ ńŋə́ lə́ zʉ́.» Ə́ ndǎʼ yə́rə́, ə́ ncʉ̌ŋ mbwôʼ məzʉ̂ ńŋə́ lə́ Yúda Isəkaryôtə môu Síməu.

²⁷Yúda lêi tə́ mpfú, Sə́tə kə̂u cər ntə̂ʉ zʉ́. Yěso lâʼ lə́ zʉ́ ngô: «Fátə́ ngʉ̌ zə̂u yi o lou lə̂ ngʉ́ zěi.»

²⁸Kâa cǒ ŋuu lə́ pye pi ə́ lə pə́ yʉʼ wó zûʼ yé no yi Yěso laghʼ ndâʼ lə́ zʉ́.

²⁹Pəcó pye kwaŋ záp pə́ ńgó Yěso lâʼ lə́ zʉ́ ńgó a wó ńzə́u máp pə pǎp məzə̂u lətsei Pásʉ́ka, káa ńgó â ŋə́ məzə̂u lə́ pəpûŋ; ńté no zʉ́ lə́ lə lóʼo môu-paa gháp pə pǎp.

³⁰Yúda pfû mbwôʼ məzʉ̂ zei, ə́ nděi-lěi ə́ fú ndə̂ nkwár, ə́ ghi pə́, mə́i twûʼ shʉ́ŋ mə́.

³¹Yúda lêi tə nkwâr, Yěso lâʼ ngô: «Ə́ ghí pə́ mpfu wo gháʼa, mə́i pə́ jwô ləghûʼ Môu Ŋuu; Môu ŋuu pôu ngʉ́, pə́ jwô ləghûʼ Sê.

³²[Ghíʼ pə́ wo lěi lə́ Môu ŋuu ə́ jwó ləghûʼ Sê lə̂,] tû-mbəʉ Sê wo ghʉ̌ pə jwó ləghûʼ Môu ŋuu. Ə́ cʉ̂ʼ mpfu pwô, â ghʉ́ ə́ pə jwó.

³³Ghəpə́ zâa, káa m mbyêr ghâa lə̂ nkə́ ncí təcər pei tə́sə́ʉ. Pei ghʉ̌ ŋáa lǒu ghâa; ghíʼ n ndə lǎʼ lə́ pəyúda ngô: “Yʉʼ yi n ndər lə̂ wó, mboʼ pei kûʼ wéi lə̂ ntó tə nkə́u wó po.” N nkə̌ ndǎʼ lə́ pei zéi lə́wó mpfu wo.

³⁴N ngwo ŋə́ ləpə̌ʉ yi shwî lə́ pei, zěi pə̂ ngô: Pei koŋə́ mbəʉ zéi təcər pei ghíʼ məŋ zâa n nkə kǒŋ wéi lə̂. Pei koŋə́ mbəʉ zéi təcər pei.

³⁵Pei lə̌i nkóŋə́ mbəʉ zéi təcər pei, mə́i ŋuu ntsəm wo jí ńgó pêi ngaŋə-jyêʼ-no zâa.»

³⁶A lâʼ yə́rə́, Síməu Pyêh túŋu yé ngô: «Ə́ Nde o lər pə́ lə̂ ghó?» Yěso pwôr lə́ zʉ́ ngô: «Yʉʼ yi n ndər lə̂ wó, koo o kûʼ ghô lə̂ ntsə́ʉ nzəm məŋ mpfu wo, lə́ o táa poŋə́ tsə́ʉ nzəm məŋ.»

³⁷Pyêh túŋu Yěso ngô: «Ə́ Nde ńté hó kâa n nkûʼ ghâa lə̂ tsə́ʉ nzəm gho mpfu wo? N ntə̌ʉ lə̂ ŋə́ tû zâa ńté gho.»

³⁸Yěso pwôr lə́ zʉ́ ngô: «O laʼ ńgó o wo ŋə́ tû zô ńté ghâa? Kwaʼ lə́nə́ʉ məŋ ndaʼ gho ńgó mənkhwoʼ ghǐ tóŋ leʼé wo, mə́i o muŋú mə́ ghâa mpfu tárə́.»