Read Ngombale Jâŋ 14 Bible Online

Jâŋ 14 - Ngombale bible

Jâŋ 14

¹Yěso kə̂ ncí ndáʼ lə̂ ngaŋə-jyêʼ-no yé ngô: «Koo mənzoʼ méi kə̂ ntsoʼó! Pei pə́i no Sê, ə́ nkə́ mbə́i no zâa lə́wó.

²Məyʉʼ lənyǎŋ pə́ ndə̂ Tə́ ghâa tə nzáa, ə́ tə́i ndə̌iʼ pə́ wó po, mə́i kâa n ndâʼ ghâa wéi ńgó n ngwo wǒ wó tsuŋú méi məyʉʼ lənyǎŋ.

³Məŋ ndə̌i ngʉ́ ngwǒ tə n ntsuŋú yʉʼ zéi, mə́i n ngwo pə̌ʉ tó lǒu wéi, paghʼə lə́r, ńjí ńgó yʉʼ yi m mbə̌ wó, pei kə̌ mbə̂ zéi yʉʼ wó lə́wó.

⁴Ə́ ngwǒ lə̂ yʉʼ yi pei lər lə̂ wó, mə́i pei pə̌ njî laŋə́-ndə̂u zěi.»

⁵Tomásʉ lâʼ lə́ zʉ́ ngô: «Ə́ Nde káa paghʼ pə́ njî wághʼ yʉʼ yi o lər lə̂ wó, paghʼ wo ghʉ gháʼá poŋə́ jí laŋə́-ndə̂u?»

⁶Yěso lâʼ lə́ zʉ́ ngô: «Mə̂ŋ laŋə́-ndə̂u, ə́ mbə́ no lə́nə́ʉ, ə́ mbə́ ŋuu yi a ghʉ pə́ pə̂ wó. Mboʼ ŋuu wô yé ncə́r yé Tə́ tə́ lěi pə́ lə́ məŋ po.

⁷Pei tə̌i ngíʼi ə́ mə́ njî ghâa, mə́i pei pə̌ njî Tə́ ghâa yé lə́wó. Lə̂ mpfu wo, pei pə mə́ njî yé, pei jwó yé.»

⁸Fílîp zûʼ ńdáʼ lə́ Yěso ngô: «Ə́ Nde, nyárə́ wághʼ Tə́ gho wêi, ə̂ kûʼ mbó paghʼ yə́rə́.»

⁹Yěso lâʼ lə́ zʉ́ ngô: «Paghʼə cî mə́ ndwuŋ wo o pyêr pə́ tə jǐ ghâa Fílîp? Ŋuu yi a jwǒ ghâa jwo mə́ Tə́. Ńté hó o lâʼ ngô: “Nyárə́ wághʼ Tə́ gho?”

¹⁰Koo o pə́ mbə̂i ńgó m mbə́ ndəu Tə́, Tə́ pôu mbə́ ndəu məŋ mo? Məno mi n ndâʼ wéi lo kâa fû yé pə́ mbó məŋ. Tə́ yi a pə̌ ndəu məŋ laghʼ ghâa ńgʉ məfaʼ mé.

¹¹Pei pə́i no yi məŋ ndaʼ wéi: m mbə́ ndəu Tə́, Tə́ pə̂ ndəu məŋ. Ə́ lə̌i mbə́ yi pei lə̌iʼ pə̂i wéi po, pei nâŋtə lə̂ məfaʼ mi n ngʉ měi, ə́ měi mbə́i.

¹²Məŋ ndaʼ wéi kwaʼ lə́nə́ʉ, ŋuu lə̌i mbə́i no zâa, mə́i a wo kə́ faʼ yé məfaʼ mi n faʼ měi lə́wó. Ə́ pə̌i fǎʼ mi ə́ ghúʼ tə ndêi měi, ńté ńgó m mə̌ ndər ghâa lə̂ mbəʉ Tə́.

¹³Pei lə̌i ndághʼ ləjôghʼ zâa ńdóu pə̂ hó, mə́i n ngwo ŋə́, ə́ njí ńgó pə́ lei lə̂ ləjôghʼ Môu, ə́ ngúʼtə́ Tə́.

¹⁴Pei lə̌i ndághʼ ləjôghʼ zâa ndóu pə̂ hó, mə́i n ngwo ŋə́ lə́ pei.»

¹⁵«Pei lə̌i nkoŋ ghâa, pei ŋə̂i lə̂ məntǎghʼ mâa.

¹⁶Ə́ njí ńgó n sʉʉtə́ Tə́, a ŋə̂ cǒ Nzoŋ-tû wei yi ndeʼe; ə́ yi pei pə pǎp láʼ cí pə́ wó lə̂ mənguʼ mənguʼ.

¹⁷Nzoŋ-tû wêi pə̂ Zəghʼə yi ə́ ghʉ pə́ jî ghíʼ Sê pə̌; ə́ mbə́ yi pye nzʉ̂ yo kâa kûʼ yé lə̂ mpfú yé, ńté no káa gháp pə́ njwó gháp məfaʼ, káa kə́ pə́ jî gháp yé; lə́ ə́ ngwǒ lə́ pei, mə́i pei pə̌ njî yé, ńté no a pə́ mbəʉ pei, ə́ ghʉ̌ kə́ pə̂ pə́ ndəu pei mpfu tsəm.

¹⁸N ngʉ̌ nyér ghâa wéi pei lə́ pei, pêi cʉ́ʼ mbə́ ghíʼ pəcǐ po; n ngʉ̌ pə̌ʉ tó, ə́ pə́ təcər pei.

¹⁹Mpfu pə̂ mə́ nkǔʼ ghíʼ pye nzʉ̂ pwo kə́ jwó gháp ghâa po. Lə́ ə́ ngwǒ lə́ pei, mə́i pei ghʉ̌ pə́ jwô ghâa; m mbə̂ ntəʉ, pêi kə́ mbə̂ zéi ntəʉ lə́wó.

²⁰Ə́ ghʉ̌ pə́ leʼé wêi, pei jí ńgó m mbə́ ndəu Tə́ ghaa, pei pə̂ lə́ məŋ, m mbə̂ lə́ pei.»

²¹«Ŋuu yi a zûʼ məntǎghʼ mâa, ə́ mbou mə́ ŋə̂i mə́u, â ŋuu yi a kǒŋ ghâa. Ŋuu lə̌i nkóŋ ghâa, mə́i Tə́ ghâa wo koŋ yé, n nkə́ nkôŋ zâa ngaŋ, ə́ ngʉ̌ a jí ghíʼ m mbə̌.»

²²Jwîdə yi káa a pə́ yé Yúda Isəkaryôtə tuŋú Yěso ngô: «Ə́ Nde, ə́ wo lěi gháʼá o nyárə́ mbəʉ zô pə̂ ndaʼ mbó paghʼ, tə lə́u ŋuu tsəm jwô yé ghô po?»

²³Yěso pwôr lə́ zʉ́ ngô: «Ŋuu lə̌i nkoŋ ghâa, a ŋə̂i ghíʼ tsâr zâa pə́ ntúŋú, Tə́ ghâa pou nkóŋ yé, paghʼ zʉ́ tó ńcə́r ngaŋ, ə́ ncʉ́ʼ cî pə́ cər ntə̂ʉ zʉ́.

²⁴Ŋuu lə̌i ndə́iʼ kǒŋ ghâa po, a ŋəi yé ghíʼ tsâr zâa pə́ ntúŋú po; ə tsâr yi pei zûʼ lêi, káa fû yé pə̂ mbó məŋ, ə́ fû pə̂ mbó Tə́ ghaa, ə́ zʉ́ yi a lə tə̂u ghâa.

²⁵Məŋ ndaʼ wéi mwo məno, ə́ mpfu wo yi m mbyěr təcər pei lo.

²⁶Lə́ pei wo cʉ́ʼ nzəm, Nzoŋ-tû wei yi a pə̌ Zəghʼə Nděi-lěi yi Tə́ wo lǎghʼ ləjôghʼ zâa tə́u ŋə́ lə́ pei, wo jyêʼ wéi zə̂u tsəm, ə́ pǒu ghʉ̌ pei nkʉ́ʉtə́ zə̂u tsəm yi n nkə lǎʼ wéi.»

²⁷«Koo pei cʉ̂ʼ nzəm, mənzoʼ méi kə̂ ntsóʼó, koo pei kə̂ mbóghʼ; n ngwo cóghʼ mbwórə məntə̂ʉ pei, ə̂ pə́ mbwórə yi fû mbó məŋ; káa ə̂ pə̂ yé mbə̂u yi pye lou cər nzʉ̂ yo.

²⁸Pei zuʼ mə́ ghíʼ n ndǎʼ wéi ngô: “N ndə̌r ə́ kə́u pə̌ʉ cə́r wéi.” Pei tə̌i mbə́ ghíʼi ə́ mə́ nkôŋ ghâa, mə́i pei ghwô pə́ lətsəi ghíʼ m mə̌ ndər lə̂ mbəʉ Tə́ ghaa; ńté ńgó Tə́ ghaa ghǔʼ nděi ghâa.

²⁹N nzâʼ nzʉ̂ ndǎʼ wéi mêi mwo məno mpfu wo, ə́ njí ńgó měi táa ntó, pei pə̂i no zâa.

³⁰Káa paghʼə pyér ngwó wághʼə tsâr tə ə́ záa, ńté no fou yi a sâʼ nzʉ̂ yo pə̌ ntó. Káa a ghwô yé məcó mətəʉ ndəu məŋ.

³¹Lə́ ə́ pə́ ntúŋú ńgó pye-mə́soŋ jí ńgó n nkôŋ Tə́ ghaa, ə́ mbou ngʉ̂ pə̂ zə̂u yi a lǎʼ ńgó məŋ ngʉ́.» Yěso lâʼ yə́rə́, ə́ ndǎʼ lə̂ ngaŋə-jyêʼ-no yé ngô: «Pei lêsê paghʼə fú yaʼa ndə́r!»