Read Ngombale Jâŋ 16 Bible Online

Jâŋ 16 - Ngombale bible

Jâŋ 16

¹«N ndaʼ wéi mwo məno, ńjí ńgó pei cʉ̌ʼ nzəm lə́u ncwî wéi pə̂i-ntə̂ʉ zéi nzəm məŋ po.

²Pə́ ghʉ̌ fú cər məndə̂ cûʼtə pəyúda zǔŋ wéi. Ə mpfu pə́ mə́ nkǔʼ ghíʼ pye ghǐ jwítə́ wéi, ə́ kwǎŋ ńgó gháp ghʉ yə́rə́, ə́ ndághʼ ńgûʼtə Sê.

³Gháp ghʉ̌ ghʉ̌ yə́rə́ ńté ńgó káa gháp pə́ njî gháp Tə́ ghaa, káa kə́ pə́ jî gháp ghâa.

⁴Lə́ n ndaʼ wéi gháʼá ńjí ńgó mpfu zêi lə̌i ngʉ́ nkǔʼ pei kʉ̂ʉtə ńgó n nkə yaa mə́ ndâʼ wéi.» «Tə fú ghíʼ pei lə tsə́ʉ nzəm məŋ, káa n ndâʼ ghâa wéi yo no, ńté ńgó n ndə pyér mbə́ pə́ təcər pei.

⁵M mbou ntə́ʉ mpfu wo lə̂ ndə́r lə̂ mbəʉ ŋuu yi a lə tə́u ghâa cər nzʉ̂. Lə́ kâa cǒ wei túŋu yé ghâa ngô: “O lər lə̂ ghó?”

⁶Lə́ pei pə̌ shʉ́ŋə sʉ̂ wéi ńté no n ndaʼ wéi ńgó m mə̌ ndə̌r.

⁷Lə̂ mpfu wo, n ndaʼ wéi gháʼa no lə́nə́ʉ ńgó ə́ pə́ ntúŋu ńgó n ndə̂r, ə́ njí ńgó pei zʉ̂ pəi; ńté no n ndə̌i ndə́iʼ lə̌r po, nzoŋ-tû wei tô yé po. Lə́ n ndə̌i ndə́r, n nkə́u ńtə́u yé ńŋə́ lə́ pei.

⁸A ghʉ̌ tó, ə́ ghʉ̌ pye ndəu-nzʉ̂ jí ńgó gháp ghʉ pə̂ no tə́poŋ, ə́ mbou lə́u mbyér njî gháp zə̂u yi no tə́poŋ ə̂ zěi po, lə́u mbyér njî gháp zə̂u yi no lə́nə́ʉ ə̂ zěi po, lə́u ə́ mbyér njî gháp zə̂u yi ə fêʼ kôr laghʼ ńdâʼ po.

⁹No tə́poŋ yi a ghʉ̌ ghʉ̌ gháp jí pə̂ ńgó káa gháp pə̂i gháp no zâa;

¹⁰ə no lə́nə́ʉ pə̂ ngô: n ngwo lə̌r lə̂ mbəʉ Tə́ ghaa, ə́ pei kə́ njwô wéi ghâa po;

¹¹ə́ ngwǒ lə̂ no féʼ kôr, mə́i pə́ feʼ mə́ kôr fou yi a sâʼ nzʉ̂ yo.»

¹²«M mbyěr ngwǒ məno tə nzáa mi ngwo lǎʼ wéi, lə́ mboʼ pei kûʼ wéi lə̂ nzúʼ mpfu wo po.

¹³Ə Zəghʼə Ndêi-lěi ghʉ̌ tó, ə́ ghʉ̌ pei jí no lə́nə́ʉ tsəm, ńté no zʉ́ lâʼ no lə́nə́ʉ. A ghʉ̌ lâʼ yé məno mi ə́ kwǎr cər ntə̂ʉ zʉ́ po, lə́ a ghʉ̌ leʼtə pə̂ məno mi a zǔʼ, ə́ pǒu leʼtə́ wéi məno mi ə́ pə́ mbi mə́ ntó.

¹⁴A ghʉ̌ nyarə́ wéi ghíʼ ləghûʼ ghâa pə̌, ńté ńgó a ghʉ̌ lǎʼ wéi pə̂ məno mi ə́ fú mbó məŋ.

¹⁵Ə zə̂u tsəm yi Tə́ ghaa ghwǒ pə́ pə̂ zâa. Ə̂ zə̂u yi ghʉ̌ n ndâʼ ńgó Zəghʼə Ndêi-lěi ghʉ̌ zûʼ tsâr zâa, ə́ tó leʼtə wéi.»

¹⁶«Mpfu pwô pei kə́ njwô wéi ghâa po, lə́ ə̂ cî yé po, pei kə́ ncí njwó ghâa.»

¹⁷Yěso lâʼ yə́rə́, pəcó ngaŋə-jyêʼ-no yé pə̂ ntúŋu təcər páp ngô: «Ə́ laghʼ ńdâʼ ńgó ho? A laʼ lə́ paghʼə ngô: “Mpfu pwô pei kə́ njwô wéi ghâa po, ə̂ cî yé po, pei kə́ ncí njwó ghâa,” ə́ mbou ndáʼ ngô: “N ndər lə̂ ncə́r Tə́ ghaa.” Ə́ laghʼ ńdâʼ ńgó ho?

¹⁸Mpfu pwô yi a laʼ lêi laghʼ ndâʼ ńgó ho? Káa paghʼə pə́ nzûʼ wághʼə no yi a lou ndáʼ zěi.»

¹⁹Yěso jî ńgó gháp pə́ ndou ńtúŋú yé no, ə́ ndǎʼ lə́ páp ngô: «N ndaʼ lə́ pei ngô: “Mpfu pwô pei kə́ njwô wéi ghâa po, ə̂ cî yé po, pei kə́ ncí njwó ghâa. Pei pə̌ ndou təcər lə̂ njí zə̂u yi no yi məŋ ndǎʼ lo laghʼ ńdâʼ áa?”

²⁰Məŋ ndâʼ wéi kwaʼ lə́nə́ʉ ńgó pei ghʉ̌ tsə́rə́, ə́ pǒu lǎa ə́ mpfu yi pye ndəu-nzʉ̂ pə́ ntsěi. Pei ghʉ̌ pə́ zʉ́ŋ, lə́ nzʉ́ŋ zei póu shərə́ ńcʉ́ʼ lətsei.

²¹Məngyě lei tə môu pə̂ ndə̂u yé, a zʉ̂ŋ ńté ńgó mpfu ngwôʼ kûʼ mə́. Ə́ mbou nkə́ ndéi tə njí, káa kə́ kʉ̂ʉtə yé ngwôʼ yi a yǎa mbə́ cər wó lêi. Ə́ ncʉ́ʼ mbə́ pə́ cər lətsei ńté ńgó tâʼ ŋuu-məsoŋ tǒ ndəu ndesé.

²²Pei zéi lə́wó pə̂ mpfu wo, ə́ mə́ nzʉ́ŋ; lə́ n ntáa ghǐ pǒu jwó wéi shwi shwî, pêi cʉ́ʼ mbə́ pə́ cər lətsei, cǒ ŋuu póu kûʼ yé lə̂ nkə́ʼtə́ wei lə̂ ntsêi po.»

²³«Ə́ ghʉ̌ pə́ leʼé wêi, pei kə́ ntúŋu wéi ghâa có no po. Məŋ ndâʼ wéi kwaʼ lə́nə́ʉ ńgó pei lə̌i ndághʼ ləjôghʼ zâa ńdóu zə̂u mbó Tə́ ghâa, mə́i a wo ŋə́.

²⁴Lə́ tə nkə́u mpfu wo, pei kə́ laghʼ wéi ləjôghʼ zâa ńdóu có zə̂u mbó Sê. Pei lóu, Sê wo ŋə́ lə́ pei, ə̂ lêi yə́rə́ lətsei pə́ məntə̂ʉ pei, ə́ fú mbə́ tə có zə̂u pûŋ yé mə́u po.»

²⁵«N ntə̌i ndǎghʼ pə́ pəsaghʼ-ləghaa ńdáʼ wéi məno mêi mə́tsəm, mpfu pə mə́ nkǔʼ yi n nkə́ laghʼ ghâa pəsaghʼ-ləghaa lǎʼ no lə́ pei po, lə́ ə́ cʉ́ʼ laʼ wéi məno mi ə́ náŋtə́ Tə́ ghâa pə̂ sâa-sǎa.

²⁶Ə́ ghʉ̌ pə́ leʼé wêi, pei lághʼ ləjôghʼ zâa ńdóu zə̂u mbó Tə́ ghaa; lə́u n nkə́ ngwô ghâa lə̂ sʉ́ʉtə́ yé ńté wéi po;

²⁷ńté no tû-mbəʉ Tə́ ghaa kǒŋ wéi. A koŋ wéi ńté ńgó pei koŋ ghaa, ə́ mbou mə́ mbə̂i ńgó n ndə fú mbó zʉ́.

²⁸N ndə fú mbó Tə́ ghaa ńtó ndəu nzʉ̂; lə́ mpfu wo, m mə̌ fû ndəu nzʉ̂ mbəʉ lə̂ ngwó ncə́r Tə́ ghaa.»

²⁹Yěso tsâr yə́rə́, ngaŋə-jyêʼ-no yé lâʼ lə́ zʉ́ ngô: «Jwô, o cʉ̌ʼ ndâʼ no mpfu wo pə̂ sâa-sǎa tə́ lǎghʼ saghʼ-ləghaa ńdâʼ.

³⁰Paghʼ pə̌ njî mpfu wo ńgó o pə̌ njî zə̂u tsəm, ə no yi paghʼ kwǎŋ kwaŋə́ lə̂ ntúŋú ghô, o jî. Ə̂ zə̂u yi ə́ ghʉ̌ paghʼ pə̂i ńgó o fû mbó Sê.»

³¹Yěso pwôr lə́ páp ngô: «Pei pə̂i no zâa mpfu wo mo?

³²Ə mpfu pə mə́ nkǔʼ, ə pəi mə́ nkǔʼ kuʼú ghíʼ pə́ wo ghʉ̌ pei sêi, wǒwó pyê yé ndə̂u ə́ nkhʉ yé, ə́ meʼ ghâa yaʼa məŋə məŋ. Lə́ kâa m mbə́ ghâa məŋə məŋ, paghʼ Tə́ ghaa pə̂.

³³N nzâʼ nzʉ̂ ndaʼ wéi mwo məno, ə́ njí ńgó pei lâr mbəʉ zéi lə́ məŋ, ə mbwórə pə̂ məntə̂ʉ pei. Pei ghʉ̌ jwó ngwôʼ cər nzʉ̂, lə́ pei sáʼ mətəʉ məŋ nkə mâʼ ngoŋ, ə́ nzʉ́.»