Read Ngombale Jâŋ 18 Bible Online

Jâŋ 18 - Ngombale bible

Jâŋ 18

¹Yěso sʉ̂ʉtə Tə́ ye yə́rə́, gháp pə ngaŋə-jyêʼ-no yé shîʼ ńkə́u toʼo, ə́ ntə́u nci Sedərôŋ, ə́ ndə̌r lə̂ cǒ njʉŋə́, ə́ nkə́u cər có nkâʼ yi ə́ lə pə́ yʉʼ wó.

²Ə́ ghi pə́ Yúda yi a lə féi Yěso ŋə́ pə̂ ntsuŋú njî yʉʼ zêi, ńté ńgó Yěso gháp pə ngaŋə-jyêʼ-no yé lə yaa nyáŋ ntó ńkə̂itə yʉʼ wó.

³Yúda nyâŋ tə ngí pə́ tô yé lə̂ yʉʼ wó, ə́ mpfú mbi pəsóghəi pəlóma gháp pə pəpáp ndə̂ Sê pi pətə́-ndə̂ pənuŋú-poʼ Sê gháp pə pəfalísia tə̂u; ə́ ŋə̌i lə̂ mənkeʼ mǒghʼ, lə́ pəlâm, mbaa lə̂ məzə̂u ntso.

⁴Yěso pə̂ njî zə̂u tsəm yi ə́ wo ncə́r zʉ́, ə́ ntó ḿbə́utə́ gháp, ə́ ntúŋú gháp ngô: «Pei lou wó?»

⁵Gháp pwor lə́ zʉ́ ngô: «Ə́ Yěso ŋuu Nǎazalêi.» A lâʼ lə́ páp ngô: «Ə̂ mə̂ŋ!» Ə́ ngǐ pə́ laʼ yə́rə́, gháp pə Yúda yi a lə féi yé ŋə́ lei naa ntə́ʉ yʉʼ wó.

⁶Yěso lêi tə ndáʼ ńgó «Ə̂ məŋ», gháp pəʉ nzəmə-nzəmə mpfúŋtə́ sê.

⁷A kə̂ ncí ntuŋú gháp pə̂ shwi shwî ngô: «Pei lou wó?» Gháp pwor ngô: «Ə́ Yěso ŋuu Nǎazalêi!»

⁸A pwôr lə́ páp ngô: «N ndaʼ mə́ wéi ńgó “ə̂ məŋ”, ə́ lə̌i nkə́ mbə́ məŋ yi pei lou, pei nyêr pwo pye gháp lər.»

⁹Ə́ lə pə́ yə́rə́ ə́ ndághʼ ḿbə̂utə lə̂ tsâr yi Yěso lə lǎʼ mbó Tə́ ye ngô: «Káa cǒ ŋuu lə́ pye pi o lə ŋə́ lə́ məŋ lə̂ kə̂u yé cwí.»

¹⁰Ə́ ghí pə́ Síməu Pyêh ghwô nyǐ ntso, ə́ sǒŋ cər ngwâa, ə́ mə́ ndôu lə̂ ndághʼ ńkhwóʼ ngaŋə-faʼ tə́-ndə̂ pənuŋú-poʼ, ə́ kə̂u nzáʼ lətuŋú yé yi təʉ máʼ sê. Ləjôghʼ ngaŋə-faʼ wêi pə̂ Máashúsʉ.

¹¹Lə́ Yěso lâʼ lə́ Síməu Pyêh ngô: «cóghʼ nyǐ zô cər ngwâa. O kwaŋ ńgó n ngwo nó ntə̂uʼ ngwôʼ yi Tə́ ghâa ŋə̌ lə́ məŋ po mo?»

¹²Tə́-ndə̂ pəsóghəi gháp pə pəsóghəi pé, ə́ nkʉʼʉ́ pəpáp ndə̂ Sê pi pəkə̌m pəyúda yǎa ntə́u ghou Yěso, ə́ nkə́r yé.

¹³Ə́ nkə́r yé yə́rə́, ə́ ntsə̌mbi ndaghʼ yé ńdə́r lə̂ nzeʼ Ánə. A pə̂ tə́-kʉʼ Kayífa yi a lə pə́ tə́-ndə̂ pənuŋú-poʼ Sê lə́ zêi nguʼ.

¹⁴Kayífa wêi lə pə́ ŋuu yi a lə ŋə́ ntǎghʼ lə́ pəkə̌m lâʼ pəyúda ngô: «Ə́ poŋ ńgó mboʼ tâʼ ŋuu kwʉ̂ lə̂ tû lâʼ.»

¹⁵Síməu Pyêh gháp cǒ ngaŋə-jyêʼ-no Yěso zûŋtə nzəm Yěso. Tə́-ndə̂ pənuŋú-poʼ lə pə́ njî wêi ngaŋə-jyêʼ-no Yěso, pə́ ghi lǎghʼ Yěso só kə́u tətáa tə́-ndə̂ pənuŋú-poʼ, a kə̂ nkə̂u yé lə́wó.

¹⁶Pyêh tə̂ʉ péi mbəʉ ntsʉ ntôʼ. Ngaŋə-jyêʼ-no yi tə́-ndə̂ pənuŋú-poʼ lə pə́ njî yé lei pə̂ʉ ńgwó ńdǎʼ no lə́ məngyě yi a lə pâp ntsʉ ntôʼ tə ə́ kuʼ, a ghʉ̂ Pyêh kə̂u cər nkâʼ.

¹⁷Pyêh kə̂u cər nkâʼ, məngyě yi a pâp ntsʉ ntôʼ túŋu yé ngô: «Tə koo o pə̂ zô cǒ ngaŋə-jyêʼ-no ŋuu yi pə́ ghǒu yé lə̂?» Pyêh pwôr ngô: «Ə ngə́, kâa m mbə̂ ghâa cǒ.»

¹⁸Ə́ lə ghí pə́ fwôghʼ pə̂ nkó, pəghaŋə-faʼ gháp pə pəpáp ndə̂ Sê tsuŋu mǒghʼ tətáa, ə́ ntə́ʉ mə́ ńzâghʼ. Pyêh tô ńtə́ʉ yʉʼ wó, ə́ nkə́ mə́ nzâghʼ yé lə́wó.

¹⁹Tə́-ndə̂ pənuŋú-poʼ Sê yi njwǐ túŋu Yěso no ńté ngaŋə-jyêʼ-no yé mbaa lə̂ zə̂u yi a jyêʼ pye zěi.

²⁰Yěso pwôr lə́ zʉ́ ngô: «N ndə tə̂ʉ mbi lâʼ ə́ ndaʼ no tsəm pə̂ sâa-sǎa, n ndə jyêʼ pye zə̂u məndə̂ cûʼtə pəyúda mbaa məndə̂ Sê ə́ yʉʼ yi pəyúda pə́tsəm kəitə wó, káa láʼ lâʼ ghâa có no lə́só.

²¹O túŋu pə́ ghâa məno ńté hó? Túŋú pye pi gháp lə zúʼ məno mi n ndə jyêʼ, gháp tsúŋu mə́ njî zə̂u tsəm yi n ndə lǎʼ.»

²²Ə́ ndǎʼ yə́rə́, cǒ tâʼ lə́ pəpáp ndə̂ Sê pǐ lə pə́ yʉʼ wó ghi pə́ sə̂u ləfěi tû zʉ́, ə́ mə́ ntúŋu yé ngô: «Yo ghíʼ pə́ pwor no lə́ tə́-ndə̂ pənuŋú-poʼ Sê yi njwǐ?»

²³Yěso pwôr lə́ zʉ́ ngô: «Ə́ lə̌i mbə́ yi n ndaʼ tə́poŋ, o lâʼ ghâa yʉʼ yi n ngwʉ̌ wó; ə́ kə́ mbə́ yi n ndaʼ shʉʼʉ, o pôu sə́u ghâa ńté hó?»

²⁴Ə́ ndǎʼ yə́rə́, ə́ mbyér pə́ mənkʉ, Ánə cághʼə yé ŋə́ lə́ Kayífa, a pə̂ nuŋu-poʼ Sê yi njwǐ.

²⁵Pə́ ghi pə́ laghʼ yé lə̌r, Síməu Pyêh nyâŋ yʉʼ wó mə́ nzâghʼ mǒghʼ. Pə́ túŋu yé ngô: «Gho zô, koo o pə̂ cǒ ngaŋə-jyêʼ-no ŋuu yi pə́ ghǒu yé lə̂?» Pyêh lə̂ʼ, ə́ ndáʼ ngô: «Kâa mbə̂ ghâa cǒ!»

²⁶Cǒ tâʼ ngaŋə-faʼ nuŋú poʼ Sê yi njwǐ yi a lə pə́ fə̌r ŋuu yi Pyêh lə záʼ lətuŋú yé lə̂ lâʼ lə́ zʉ́ ngô: «Káa n nyáa njwó wéi zʉ́ cər nkâʼ?»

²⁷Pyêh kə̂ ncí ndə̂ʼ pə̂ shwi shwî, mənkhwoʼ lêi-lěi ntóŋ.

²⁸Pəkə̌m lâʼ pəyúda laghʼ Yěso fú nzeʼ Kayífa ńdə́r lə̂ nzeʼ ngə́mnaa pəlóma. Ə́ lə pə̂ gháʼa məmbaʼa-mbaʼ, lə́u gháp kə̂u gháp cər ntôʼ ngə́mnaa po, ə́ mbóghʼ lə̂ nkhwôr lǒʼ, ə́ kə̂ʼtə gháp lə̂ nzʉ́ záp lətsei Pásʉ́ka pəyúda.

²⁹Piláto kwâr nkâʼ, ə́ ntúŋú gháp ngô: «Pei pûtə ŋuu wo ńté hó?»

³⁰Gháp pwor ngô: «Ŋuu wo tə̌i ndə̌iʼ ghʉ̌ no tə́poŋ po, mə́i káa paghʼ lâghʼ wághʼ yé ńtó mbi gho.»

³¹Piláto lâʼ lə́ páp ngô: «Pei lághʼ yé ńdə́r, ə́ ngwo fêʼ kôr yé ghíʼ ləpə̌ʉ lâʼ zéi pə́ ntúŋú.» Pəkə̌m lâʼ pəyúda pwor lə́ zʉ́ ngô: «Káa pei pəlóma pə́ mbə̂i wéi ńgó paghʼ jwí ŋuu.»

³²Ə́ pə̂ yə́rə́ ə́ ndághʼ ḿbəutə lə̂ no yi Yěso lə lǎʼ, ńté mbə̂u ləwʉ̂ yi a ghʉ̌ kwʉ́ zěi.

³³Piláto pəʉ ńkə́u cər nkâʼ, ə́ ngʉ̌ pə́ laghʼ Yěso ńtó; a túŋu yé ngô: «Ô fou pəyúda áa?»

³⁴Yěso túŋu yé ngô: «Yo no o túŋu ghâa lo kwar pə́ ntə̂ʉ gho, kəʉ pəcó pye lə́ lǎʼ ghô ńgó mə̂ŋ fou?»

³⁵Piláto pwôr ngô: «O jwǒ m mbə̂ ŋuu pəyúda mô? Ə lâʼ zéi gháp pə pətə́-ndə̂ pənuŋú-poʼ lə́ féi ghô ŋə́ lə́ məŋ. Ə́ ngí féi ghô ńŋə́ lə́ məŋ, mə́i o ghʉ hó?»

³⁶Yěso pwôr ngô: «Ləfou zâa káa fû yé mbó pye nzʉ̂ yo. Ləfou zâa tə́i fú mbó pye nzʉ̂ yo, mə́i pəməncʉŋ-ndə̂ pâa kə lwóʼó ńdaghʼ ńzôŋ tû zâa tə pə́ fêi yé ghâa ńŋə́ lə́ pəkə̌m pəyúda po. Ə ngə́, káa ləfou zâa fû yé ndəu nzʉ̂ yo.»

³⁷Piláto túŋu yé ngô: «Ńjí ńgó ô fou póo?» A pwôr ngô: «Gho lǎʼ yə́rə́: mə̂ŋ wěi. Pə́ lə jí ghâa, n ntô cər nzʉ̂ lə̂ ndáʼ pye zə̂u yi no lə́nə́ʉ pə́ zěi. Ŋuu yi a pə̌ ngaŋə no lə́nə́ʉ pə̌ nzûʼ no n ndaʼ zěi.»

³⁸Piláto túŋu yé ngô: «Ə no lə́nə́ʉ hó zə̂u?» Piláto lâʼ yə́rə́, ə́ nkə́ ncí nkwár péi, ə́ njwó pəkə̌m pəyúda; ə́ ndáʼ lə́ páp ngô: «Kâa n njwô ghâa có no yi a ghʉ̌ tə mboʼ pə́ laʼ ńgó a wʉ no.

³⁹Lə́ ə́ yaa mbə́ lə́ mar wéi ńgó n ngwó lə́ maa lətsei Pásʉ́ka ntsəm, ə́ nkwárə́ tâʼ ngaŋə-tsâŋ ə́ ŋə́ lə́ pei. Pei pə̌ nkoŋ ńgó n ŋə́ fou pəyúda lə́ pei?»

⁴⁰Gháp pə́tsəm naa máʼ wâr, ə́ mə́ ndâʼ ngô: «Ə ngə́, koo o ŋə̂ pə́ ŋuu, ŋə́ pə́ Barabásʉ lə́ paghʼ!» Barabásʉ wêi lə pə̂ tâʼ ntəʉ ntsǒŋ.