Read Ngombale Jâŋ 19 Bible Online

Jâŋ 19 - Ngombale bible

Jâŋ 19

¹Piláto ncʉ́ʼ nkə́ ngʉ́ pə́ laghʼ Yěso ńdə́r, ə́ ngwo ndághʼ məngwaa sə́u yé.

²Pəsóghəi laghʼ mənzôŋ, ə́ ḿbáʼ nkaghʼə ləfou ńshóghʼə́ tû Yěso, ə́ mǎʼ paŋ-paŋ ndǐ ndəu zʉ́.

³Ə́ ncʉ́ʼ ntó ńtə̂ʉ mbi zʉ́, ə́ sóghʼə yé ńdâʼ ngô: «Zaa-môu! Fou pəyúda.» Ə́ sə̂u məfěi tû zʉ́.

⁴Piláto kə̂ ncí nkwár péi, ə́ ndǎʼ lə́ pəkə̌m pəyúda ngô: «Pei zúʼ! N ngwo ghʉ̌ pə kwarə́ yé ńŋə́ lə́ pei, ə́ lǎghʼ nyarə́ wéi ńgó kâa n njwô ghâa no yi a fǎa zěi.»

⁵Yěso cʉ̂ʼ ngí kwǎr, nkaghʼə mənzôŋ pə̂ tû zʉ́, a mâʼ ndǐ paŋ-paŋ. Piláto lâʼ ngô: «Ŋuu wêi wə̂!»

⁶Pətə́-ndə̂ pənuŋú-poʼ gháp pə pəpáp ndə̂ Sê lei tə njwó Yěso, ə́ njǐ lə̂ máʼ wâr ngô: «Pə kʉ̂ʉ yé lə̂ tʉ̌-mbʉ̂ŋtə! Pə kʉ̂ʉ yé lə̂ tʉ̌-mbʉ̂ŋtə!» Piláto lâʼ lə́ páp ngô: «Pei ko yé ə́ ngwo nkʉ̂ʉ lə̂ tʉ̌-mbʉ̂ŋtə pə́ pei, ə́ ngwǒ lə́ məŋ, mə́i kâa n njwô ghâa có no yi a ghʉ̌ tə mboʼ pə́ jwî yé.»

⁷Pəyúda laʼ lə́ zʉ́ ngô: «A faa ləpə̌ʉ zághʼ, pə́ ghwo lə̂ njwí yé, ńté no a lâʼ ńgó â Môu Sê.»

⁸Piláto zûʼ yə́rə́, ə́ fú mbóghʼ gháʼate.

⁹Ə́ mbə̌ʉ ńkə́u ndə̂, ə́ ntúŋú Yěso ngô: «Ô ŋuu mbə ghó?» Lə́ Yěso kâa ntsap yé no.

¹⁰Piláto cʉ̂ʼ nkə́ ndáʼ lə́ zʉ́ ngô: «N ntuŋú ghô no, o lʉ̂ŋtə áa? Koo o pə́ njî ńgó n nkûʼ lə̂ ngʉ̂ pə́ tyaghʼ ghô ńnyér, ə́ mbou nkûʼ lə̂ ngʉ̂ pə́ kʉʉ ghô lə̂ tʉ̌-mbʉ̂ŋtə mo?»

¹¹Yěso pwôr ngô: «Koo o ghwo ghô məcó mətəʉ ndəu məŋ, ə́ ndyéʼ ghíʼ Sê lə̌i ŋə́ lə́ gho. Ə̂ zə̂u yi ə́ ghʉ̌, no tə́poŋ ŋuu yi a fěi ghâa ńŋə́ lə́ gho ghúʼ ndei zô.»

¹²Ə́ fû mpfu wêi, Piláto ji lə̂ ndôu məsʉ̂ lə̂ nyér Yěso, lə́ pəyúda mâʼ wâr ə́ mə́ ndâʼ ngô: «O lə̌i nyér yé, mə́i koo o pyêr ghô sə̌u fou pəlóma. Ŋuu lə̌i mbə́i fou, ə́ laghʼ mbə́ ńgó â ngaŋə-mbəu fou pəlóma.»

¹³Piláto lei tə nzúʼ ghíʼ gháp lǎʼ yə́rə́, ə́ ngʉ̌ pə́ laghʼ Yěso fú ndə̂ nkwǎr. Piláto shíʼ ńnyáŋ lə̂ lwoŋ yi a cî nyâŋ mə́u fêʼ pəkôr, ə́ yʉʼ yi pə́ lə lǎghʼ məghǒ mbóu, ə́ fûŋ lə̂ tsâr Hebələ̂ ngô: «Gabáta»

¹⁴Ə́ lə pə̂ gháʼá leʼé yi pə́ tʉ̂ŋtə lətsei Pásʉ́ka, ə́ ndə́u ntə̌ʉ-nəu, Piláto lâʼ lə́ pəyúda ngô: «Fou wei wo!»

¹⁵Lə́ pəyúda naa máʼ wâr ə́ mə́ ndâʼ ngô: «Pə jwí yé! Pə jwí yé! Pə kʉ̂ʉ yé lə̂ tʉ̌-mbʉ̂ŋtə!» Piláto túŋu gháp ngô: «Ńgó məŋ ngʉ́ pə kʉ̂ʉ fou wéi lə̂ tʉ̌-mbʉ̂ŋtə áa» Pətə́-ndə̂ pənuŋú-poʼ pwor ngô: «Káa paghʼ ghwô wághʼ cǒ fou tə ndyéʼ fou pəlóma.»

¹⁶Piláto cʉ̂ʼ nkə́ ŋə́ Yěso lə́ páp ńgó gháp wó nkʉ̌ʉ yé lə̂ tʉ̌-mbʉ̂ŋtə. Gháp cʉ̂ʼ nkə́ ndághʼ Yěso ńdə́r.

¹⁷Ə́ mə́ ndə̂r, Yěso khwôr tʉ̌-mbʉ̂ŋtə yé pə́ zʉ́, gháp laghʼ yé fú túsoŋ nkwár, ə́ ndə̌r lə̂ yʉʼ yi pə́ fûŋ ńgó Kwěi-tû, ə́ pə̂ lə̂ tsâr Hebələ̂ ńgó Golgóta.

¹⁸Ə́ nkə́u yʉʼ wó, pəsóghəi kʉʉ Yěso lə̂ tʉ̌-mbʉ̂ŋtə. Ə́ nkə́ ncí nkʉ̂ʉ pəcó pye pə́pwô lə̂ máp mətʉ̌-mbʉ̂ŋtə, tâʼ pə̂ lə̂ ndyə́ghʼə́ pô Yěso yi təʉ, cǒ pə̂ lə̂ yi kwap, Yěso pə̂ təcər.

¹⁹Piláto kə̂ ncí ngʉ́ pə́ ŋwáʼa zə̂u nkʉ̌ʉ ndəu tû zʉ́ lə̂ tʉ̌-mbʉ̂ŋtə ngô: «Yěso ŋuu Nǎazalêi, fou pəyúda.»

²⁰Pəyúda tə nzáa lə fûŋ zə̂u yi pə́ lə ŋwaʼá ńkʉ̂ʉ ndəu tû Yěso lə̂ tʉ̌-mbʉ̂ŋtə, ńté ńgó yʉʼ yi pə́ lə kʉ̂ʉ yé wó lə pâatə túsoŋ, pə́ pou ŋwáʼá lə̂ tsâr Hebələ̂, lə̂ tsâr pəlóma mbaa lə́ yi pye Gərêghʼ.

²¹Pətə́-ndə̂ pənuŋú-poʼ Sê lâʼ lə́ Piláto ngô: «Káa pôŋ yé ńgó ô ŋwáʼa ngô: “fou pəyúda”. Ŋwaʼá pə́ ngô: “Ŋuu wo laʼ ńgó â fou pəyúda.”»

²²Piláto lâʼ ngô: «Ə zə̂u yi n ndǎʼ ńgó pə ŋwaʼá, pə́ kə́ ŋwaʼá pə́ zěi.»

²³Pəsóghəi myaghʼ lə̂ nkʉ̂ʉ Yěso lə̂ tʉ̌-mbʉ̂ŋtə, ə́ mbyé məndǐ mé ə́ ngaptə́ yʉʼ ləkwo, wǒwó təcər páp ghwô ye yʉʼ, ə́ vuʼ tâʼ ndǐ njwǐ, káa pə lə tə̂ yé zêi ndǐ tə̌, lə́ pə́ fú lóŋ wó, ə́ mbáʼ páʼá ə́ ngwo ŋə́ sê.

²⁴Pəsóghəi laʼ təcər páp ngô: «Koo paghʼə sêʼtə yo, paghʼə tə́m pyêr ə́ ndághʼ ńjwó ŋuu yi a wo ghwǒ zěi.» Ə́ pə̂ yə́rə́, ə́ ndághʼ ḿbəutə lə̂ zə̂u yi pə́ lə ŋwaʼá cər ŋwaʼa Sê ngô: «Gháp ghâptə́ məndǐ mâa təcər páp, ə́ mbou ntə́m pyêr lə̂ ndághʼ njwó ŋuu yi a wo ghwǒ ndǐ zâa yi njwǐ.» Ə̂ zə̂u yi pəsóghəi lə ghʉ̌.

²⁵Ncʉʼ-nzəm mə́ pə Yěso yi məngyě gháp mə́ pə Yěso, ə́ ngʉ̌ Mǎyaa ngwě Kəlopáasʉ gháp Mǎyaa môu túsoŋ Mǎghʼdala tə̂ʉ mbəʉ tʉ̌-mbʉ̂ŋtə Yěso.

²⁶Yěso jwô mə́ ye, ə́ nkə́ ncí njwó ngaŋə-jyêʼ-no ye yi a lə koŋ no yé gháʼate tə̂ʉ mbəʉ mə́ ye, Yěso lâʼ lə́ mə́ ye ngô: «Mǎa, môu gho wə̂.»

²⁷Ə́ mbǒu ndáʼ lə̂ ngaŋə-jyêʼ-no ye ngô: «Mə́ gho wə̂.» Ə́ fû mpfu wêi ngaŋə-jyêʼ-no wêi lâghʼ mə́ pə Yěso ńdə́r lə̂ nzéʼ zʉ́.

²⁸Mwo məno lei, Yěso jî ńgó no tsəm pəutə, ə́ ndǎʼ ngô: «Ə ndě nci pə́ nzə̂u ghâa.» A lə lâʼ yə́rə́, ə́ ńjí ńgó zə̂u tsəm pə́ lə ŋwaʼá cər ŋwaʼa Sê pəutə́ mə́.

²⁹Ə́ lə ghí pə́, ə có ngwǒŋ təʉ yʉʼ wó lə̂ məluʼ pǐ cər wo tə ndóghʼə́, pəsóghəi tsəp əpôŋjə mə́u, ə́ shóghʼə́ lə̂ lətû kəkaʼa, ə́ ncaghʼə́ ńcóghʼ ntsʉ zʉ́.

³⁰A lei tə nyóŋ, ə́ ndǎʼ ngô: «M myâghʼ faʼ zaa ndəu ndesé.» Ə́ ntsʉ́ŋə́ tû yé sê, ə́ nkwʉ́.

³¹Ə́ lə pə́ leʼé wêi, pə́ pə̂ ntsûŋtə leʼé nji pəyúda, ə́ pə̂ leʼé lâʼ jwǐ; lə́u ə́ mə́ ntúŋu yé ńgó məpfû pye pə́ lə̂ mətʉ̌-mbʉ̂ŋtə leʼé wêi po. Pəkə̌m pəyúda wo ńjwó Piláto ńgó a ghʉ́ pə wó ntí məku máp mbwóʼtə́, ə́ fú lə̂ mətʉ̌-mbʉ̂ŋtə shúʼú gháp.

³²Ə́ pə̂ yə́rə́, pəsóghəi wo yʉʼ wó mbwóʼtə́ məku nduŋ-mbi ŋuu, ə́ nkə́ ncí mbwóʼtə́ mi mbâatə pwô lə̂ pye pi pə́ lə kʉ̌ʉ gháp pə Yěso lə̂ mətʉ̌-mbʉ̂ŋtə.

³³Ə́ nkə́u lə́ Yěso, ə́ njwó mə́i a kwʉ̌ mə́, káa gháp kə mbwóʼtə́ gháp məku mé.

³⁴Lə́ cǒ tâʼ sóghəi lâghʼ ləkoŋ ə́ sáp saŋ-mbei yé, nci gháp məci lêi-lěi ntə̂u ńkwár.

³⁵Ŋuu yi a laʼ wéi lo, â ŋuu yi a lə jwó; no yi a laʼ wéi, ə́ pə̂ no lə́nə́ʉ; a pôu mə́ njî ńgó a laʼ wéi no lə́nə́ʉ ghíʼ pei wo lěi mə́u, ə́ ghwǒ pə̂i-ntə̂ʉ.

³⁶Ə́ pə́ yə́rə́, ə́ ndághʼ ḿbəutə lə̂ məno mi pə́ lə ŋwaʼá cər ŋwaʼa Sê ngô: «Ŋuu láʼ pwôʼ yé có kwěi yé po.»

³⁷Có yʉʼ ŋwaʼa Sê kə́ ncí mə́ ndâʼ ngô: «Gháp ghʉ̌ jwó ŋuu yi gháp lə lǎghʼ ləkoŋ sáp yé.»

³⁸Mwo məno lei, Yosêp ŋuu túsoŋ Arimatê, ə́ mbə́ cǒ ngaŋə-jyêʼ-no Yěso lə́ ə́ ndwô lwǒ ńté no a lə pə́ mbôghʼ pəyúda; wô ńjwó Piláto, ə́ ntúŋú yé lə̂ ngwó shuʼú pfû Yěso lə̂ tʉ̌-mbʉ̂ŋtə. Piláto pə̂i, a wô fú mə́u ə́ shuʼú zěi.

³⁹Nikodêm, ŋuu yi a lə záʼ mə́ nzʉ̂ cǒ lətwûʼ ngwo ńjwó Yěso lə̂ ghi tó yé, ə́ ngwǒ ləmə́ndaa tə ə́ pə̂ no kíləu mə̂m-tárə́, ə́ pə̂ yi pə́ lə lǎghʼ məkəp cǒ mbə̂u mətʉ̌ mi pə́ fûŋ ńgó Mîrə gháp alwěsʉ ə́ ntsuŋú.

⁴⁰Gháp Yosêp cʉ̂ʼ nkə́ nkhwór pfû Yěso, ə́ ngí pə́ laghʼ zə̂u-ndí zə́mtə́, ə́ mə́ ncwə̂r ləmə́ndaa zêi mə́u. Ə́ pə̂ ghíʼ pəyúda lə ghʉ lə̂ məpfû pye páp mboŋə́ tʉ́ŋ.

⁴¹Ə có nkâʼ lə pə́ mbəʉ yʉʼ yi pə́ lə kʉ̌ʉ Yěso wó, có ləshi shwî pə̂ cər wó yi pə́ laa kə́ côghʼ yé pfû ŋuu cər wó.

⁴²Pə côghʼ pfû Yěso cər ləshi zêi, ńté no ə́ lə pâatə yʉʼ zêi, mbaa ńté ghíʼ pəyúda lə pə́ ntsûŋtə no leʼé nji záp.