Read Ngombale Jâŋ 2 Bible Online

Jâŋ 2 - Ngombale bible

Jâŋ 2

¹Ə́ lei leʼé tárə́, có ləfeʼ lâa-ndə̂ pə̂ Kána cər paghʼə-ngoŋ Galilêi, mə́ pə Yěso pə̂ yé wó.

²Mə́i pə́ lə ghə́u Yěso gháp pə ngaŋə-jyêʼ-no yé záp lə́wó, ə́ no lâa-ndə̂ zêi.

³Məluʼ me, mə́ pə Yěso lâʼ lə́ zʉ́ ngô: «Káa gháp pyér ngwô gháp məluʼ.»

⁴Yěso lâʼ lə́ zʉ́ ngô: «Mǎa, poghʼo ghwo hó? Zaa mpfu kə́ kûʼ yé.»

⁵Mə́ yé lâʼ lə́ pəghaŋə-faʼ ngô: «A lə̌i ndáʼ ńgó pei ghʉ́ gháʼá, pei ghʉ̂ yə́rə́.»

⁶Ə́ ghi pə́, məcó məngwǒŋ ləghǒ pə̂ yʉʼ wó ntoghʼó mi pəyúda lə laghʼ sôghʼ pəi, mboʼ tâʼ lə pə̂ no pəlítə nkʉ.

⁷Yěso lâʼ lə́ pəghaŋə-faʼ ngô: «Pei cóghʼ nci cər məngwǒŋ mwo tə ə̂ lóghʼə́.» Gháp kə̂ ncóghʼ tə ə́ lóghʼə.

⁸A lâʼ lə́ páp ngô: «Pei tə̂uʼ cǒ məyʉʼ mpfu wo, ə́ ngwó ŋə́ lə́ ŋuu yi a tʉ̂ŋtə lətsei.» Gháp tə̂uʼ ńgwó ńŋə́ lə́ zʉ́.

⁹A zʉ̂ʼ, mə́i nci shərə mə́ ncʉ́ʼ məluʼ, lə́u a kə̂ njî yé yʉʼ yi ə́ fú wó po, lə́ pəghaŋə-faʼ pi gháp wǒ ntə́uʼ pə̂ njí. A cʉ̂ʼ fúŋ ndə̂u-ngəʉ,

¹⁰ə́ ndǎʼ lə́ zʉ́ ngô: «Pə́ lə̌i njí ŋə̂ pə̂ məluʼ shʉʼʉ lə́ pye gháp nô tə ə́ ghwotə ntsʉ gháp, pə́ poŋə́ ŋə́ mi nyéʼ měi mbə́. Lə́ ngwǒ lə́ gho, o lóʼo məluʼ shʉʼʉ tə ŋə́ mpfu wo!»

¹¹Yo nduŋ-mbi nkəʼə-no yi Yěso lə ghʉ̌. A lə ghʉ yə́rə́ Kána cər paghʼə-ngoŋ Galilêi, ə́ ndághʼ ńnyárə ləghûʼ ye, ngaŋə-jyêʼ-no yé kʉʼʉ ŋə́ ntə̂ʉ gháp lə́ zʉ́.

¹²Yo no lei, Yěso gháp mə́ ye, lə́ pəfə̌r pé ə́ nkʉʼʉ́ ngaŋə-jyêʼ-no yé lər lə̂ Kapérnawûm, ə́ nkə́u wó nyáŋ leʼé ndwuŋ.

¹³Leʼé ləfeʼ Pásʉ́ka pəyúda pə̂ mbáatə́, Yěso kôʼ lə̂ Yelúsalêm.

¹⁴Ə́ ntó ńkə́u ndə̂ Sê, ə́ njwó pye pə̂ wó mə́ fə̂i məfoŋ, məndənzʉ gháp pə məpuŋu, mbaa pəkə́pə́ nkâp nyâŋtə nzəm pətə́pələ mətǎa páp mə́ nkə́pə nkâp.

¹⁵Ə́ pə̂ yə́rə́, Yěso lâghʼ mənkʉ ńtsúŋú ngwaa, ə́ ndaghʼ ńfú ndə̂ Sê ńzǔŋ pye pêi gháp pə məndənzʉ máp, gháp pə məfoŋ, ə́ ncǐ pətə́pələ pəkə́pə́ nkâp ə́ máʼtə́ sê, nkâp zap cwə́rə.

¹⁶Ə́ ndǎʼ lə́ pəfə̌i məpuŋu ngô: «Pei lághʼ məzə̂u mwo fú yáʼa ńdə́r, koo pei kə̂ ndâghʼ ndə̂ tə́ ghâa ńgʉ́ yʉʼ mətǎa!»

¹⁷Ngaŋə-jyêʼ-no Yěso kʉ̂ʉtə yʉʼ ŋwaʼa Sê yi ə́ laʼ ngô: «Nkoŋə yi n ngwǒ lə̂ ndə̂ zô ə̂ yi ngwo láʼ kwʉ́ pə́ zěi.»

¹⁸Pəsǎʼ lâʼ pəyúda lâʼ lə́ Yěso ngô: «Tə mboʼ o ghʉ̂ tâʼ nkəʼə no ə́ ndághʼ ńnyárə́ wághʼ ńgó pə́ lə ŋə́ mətəʉ lə́ gho lə̂ ndághʼ ńgʉ̌ zə̂u yi o ghʉ̌ lo?»

¹⁹Yěso pwôr lə́ páp ngô: «Pei vôghʼ ndə̂ Sê yo, n ndághʼ leʼé tárə́ mbəʼə́ ńtághʼ.»

²⁰Pəyúda lâʼ lə́ zʉ́ ngô: «Paghʼ lə laghʼ nguʼ ntsap ntoghʼó lə̂ mə̂m-ləkwo ńkə́r ndə̂ Sê yo, o ghó mboʼ o lâghʼ leʼé tárə́ ə́ mbəʼə́ ńtághʼ áa?»

²¹Ndə̂ Sê yi Yěso lə laʼ zěi lə́ pə́ tû-mbəʉ yé.

²²A lə zʉ́ʉ təcər pəpfû, ngaŋə-jyêʼ-no yé kʉ̂ʉtə no yi pə́ lə ŋwáʼá cər ŋwaʼa Sê mbaa mətsâr mi Yěso lə lǎʼ, ə́ mbə́i.

²³Yěso pyêr mbə́ pə́ Yelúsalêm, pye tə nzáa leitə́ lə̂ mənkəʼə məno mi a lə pə́ ngʉ́, ə́ mbə́i.

²⁴Lə́ káa Yěso mêʼ yé mbəʉ ye lə́ páp, ńté ńgó a pə̌ njî ghíʼ gháp pə̂.

²⁵Kâa lə pə́ ndôu yé ńgó pə lâʼ yé zə̂u yi ŋuu-məsoŋ pə̌ zěi laʼá, ńté no tû-mbəʉ yé lə fú mə́ njî zə̂u yi ə́ pə́ ntə̂ʉ ŋuu ntsəm.