Read Ngombale Jâŋ 20 Bible Online

Jâŋ 20 - Ngombale bible

Jâŋ 20

¹Ə́ pə̂ nduŋ-mbi leʼé lə̂ ngap-lâʼ, Mǎyaa môu túsoŋ Mǎghʼdala mə̂ʉ məmbaʼa-mbaʼ tə yʉʼ pyêr shʉ̂ŋtə shʉŋtə́ ə́ ngwǒ yʉʼ ləshi, ə́ nkə́u ńjwó, mə́i pə́ tyetə́ mə́ ləghǒ yi pə́ lə lǎghʼ ńgúʼú ntsʉ ləshi.

²A khʉ̂tə ńgwó ńjwó Síməu Pyêh gháp cǒ ngaŋə-jyêʼ-no Yěso yi Yěso lə kǒŋ no yé gháʼate, ə́ ndáʼ lə́ páp ngô: «Pə́ fú mə́ cər ləshi nkwárə́ pfû Nde, káa paghʼ pə́ njî wághʼ yʉʼ yi pə́ cʉ̂ʼ zěi wó.»

³Pyêh gháp wêi ngaŋə-jyêʼ-no kwar ńdə́r lə̂ yʉʼ ləshi.

⁴Gháp pə́pwô pə̂ náa nkhʉ́tə́, lə́ cǒ ngaŋə-jyêʼ-no khʉ́tə lə̂ təʉ ńdéi Pyêh, ə́ mbyə̌ghʼ ləshi;

⁵Ə́ ŋúʼú ńnáŋ, ə́ njwó məpaghʼə ndǐ nuŋtə cər wó, lə́ káa a kə́u yé cər wó.

⁶Síməu Pyêh yi a tə̌i mbə́ nzəm zʉ́ lə̂ tô yé, ə́ só ńkə́u cər wó, ə́ njwó məpaghʼə ndǐ nuŋtə sê,

⁷gháp zə̂u-ndí yi pə́ lə lǎghʼ ńzə́mtə́ tû Yěso, lə́ zə̂u-ndí zêi kâa nâatə́ yé lə́ məpaghʼə ndǐ; ə́ lə pə́ yi katə́, ə́ núŋú pə́ lə̂ yé yʉʼ.

⁸Ə́ pə̂ yə́rə́, ngaŋə-jyêʼ-no Yěso wə̂ yi a tə̌i mbyə̌ghʼ ləshi lə̂ kə̂ nkə̂u yé cər wó, ə́ njwó, ə́ mbə́i ńgó ə̂ no lə́nə́ʉ.

⁹Ə́ kə ghí pə́, mə́i gháp kə́ zûʼ gháp no yi yʉʼ ŋwaʼa Sê yi ə́ laʼ ngô: «Ə Sê ghʉ̌ ghʉ̌ Yěso zʉ́ʉ lə̂ ləwʉ̂» laghʼ ńdâʼ.

¹⁰Ə́ pə̂ yə́rə́, pəghaŋə-jyêʼ-no pei pə́pwô pəʉ gháp lə̂ yʉʼ yi gháp tə́i mbə́ wó.

¹¹Mǎyaa cʉ̂ʼ ntə́ʉ pěi ntsʉ ləshi ə́ mə́ ndâa, ə́ ngǐ pə́ lǎa, ə́ mə́ ŋúʼú ńnáŋtə́ cər ləshi;

¹²ə́ njwó pəcwôʼ Sê pə́pwô lə̂ məndǐ fúfú nyâŋtə lə̂ yʉʼ yi pfû Yěso lə nuŋú wó, tâʼ nyâŋ lə̂ yʉʼ yi tû yé kə nuŋú wó, cǒ nyâŋ lə̂ yʉʼ yi məku mé kə nuŋú wó.

¹³Gháp túŋu yé ngô: «Mǎa, o laa hó?» A pwôr lə́ páp ngô: «Pə́ khwor mə́ pfû Nde ghâa, káa m mə́ njî ghâa yʉʼ yi pə́ cʉ́ʼ zěi wó.»

¹⁴Ə́ mbyér mə́ ndâʼ laʼá, ə́ shərə́ ńjwó ghíʼ Yěso tə̌ʉ, lə́ káa a jî yé ńgó ə̂ Yěso.

¹⁵Yěso lâʼ lə́ zʉ́ ngô: «Mǎa, o laa hó? O lou wǒ?» A kwâŋ yé ńgó ə̂ ŋuu yi a faʼ cər ngárə zêi, ə́ ndǎʼ lə́ zʉ́ ngô: «Ə́ Nde, ə́ lə̌i mbə́ yi gho yǎa nkhwǒr pfû Yěso, o lâʼ ghâa yʉʼ yi o yǎa nuŋú wó, n ngwó ńkhwǒr.»

¹⁶Yěso fûŋ yé ngô: «Mǎyaa». A shə́rə, ə́ mbə́i mbó zʉ́ lə̂ tsâr Hebələ̂ ngô: «Rabunî» Ə́ ndǎghʼ ndâʼ ńgó «Cícye».

¹⁷Yěso lâʼ lə́ zʉ́ ngô: «Koo o kə̂u ghâa, ńté no n nkə́ kôʼ ghâa tə nkə́u mbəʉ Tə́ ghâa. Ə́ ngwo lə́ gho, wo ńjwó pəfə̌r pâa, ə́ ndáʼ gháp ńgó n ngwo kóʼ wǒ cə́r Tə ghâa yi a kə̌ mbə́ Tə́ wei zéi; n ngwo kóʼ wǒ cə́r Sê zâa yi a kə̌ mbə́ Sê zei lə́wó.»

¹⁸Mǎyaa môu túsoŋ Mǎghʼdala tô ńdáʼ lə́ ngaŋə-jyêʼ-no Yěso ńgó a jwǒ Nde, ə́ mbǒu ndáʼ gháp məno mi a yǎa ndǎʼ lə́ zʉ́.

¹⁹Ə́ lə́ pə́ mpfu-ngwʉ̂ lə̂ leʼé lâʼ zêi, ə́ mbə́ nduŋ-mbi leʼé lə̂ ngap-lâʼ, ngaŋə-jyêʼ-no Yěso kəitə ńnyáŋ cər ndə̂, ə́ mə́ mbôghʼ pəkə̌m lâʼ pəyúda, ə́ ntsághʼə́ məntsʉ ndə̂, Yěso kwâr ńtə́ʉ təcər páp, ə́ ndǎʼ lə́ páp ngô: «Ə mbwórə pə́ lə́ pei.»

²⁰Ə́ ndǎʼ yə́rə́, ə́ nyárə́ gháp mbô mé gháp saŋ-mbei yé, ngaŋə-jyêʼ-no jwô Nde yə́rə́, ə́ tsêi gháʼate.

²¹Yěso kə̂ ncí ndáʼ lə́ páp ngô: «Ə mbwórə pə́ lə́ pei! Ə́ ndʉŋ-ndʉŋ ghíʼ Tə́ ghâa lə tə́u ghâa, məŋ zâa n nkə̌ ntə́u wéi zéi.»

²²Ə́ ndǎʼ yə́rə́, ə́ fwóghʼ fwôghʼ ntsʉ ye lə́ páp, ə́ ndǎʼ lə́ páp ngô: «Pei pfú Zəghʼə Ndêi-lěi.

²³Pye pi pei wo lyə́ghʼə́ məfaa ghap ńŋə́ lə́ páp, Sê wo kə́ lyəghʼə́ yé lə́wó ńŋə́ lə́ pəghaŋ, pei kə́ ndə́iʼ lyəghʼə́ məfaa pye ńŋə́ lə́ páp po, ə Sê kə̂ ndyəghʼə yé yé ńŋə́ lə́ pəghaŋ po.»

²⁴Ə́ ghi pə́, cǒ tâʼ lə̂ ngaŋə-jyêʼ-no Yěso tsap-pwô lə̂ ləghə̂m yi ləjôghʼ yé Tomásʉ, ləjôghʼ məsəu yé pə̂ Môu-ləfâghʼ, káa a lə pə̂ yé təcər páp mpfu yi Yěso lə tó.

²⁵A pôu ntó, có ngaŋə-jyêʼ-no Yěso laʼ lə́ zʉ́ ngô: «Paghʼ jwo mə́ Nde!» A lâʼ lə́ páp ngô: «N ndə̌i ndə́iʼ jwó məlaghʼə́ fʉ̌ŋ mi məmbaŋə kə cóghʼ lə̂ məlaa mbô mé, ə́ ndə́iʼ shóghʼə́ shípo ghaa mə́u po, ə́ ndə́iʼ shóghʼə́ pô zâa lə̂ saŋ-mbei yé po, m mbə̂i ghâa po.»

²⁶Ə́ lei leʼé ləfǎa, ngaŋə-jyêʼ-no Yěso kə̂ ncí nkə̂itə́ ndə̂ pə̂ shwi shwî, ə́ ntsághʼə́ məntsʉ měi, Tomásʉ pə̂ yé nou páp. Yěso kə̂ ncí nkwár ntə́ʉ təcər páp, ə́ ndǎʼ lə́ páp ngô: «Ə mbwórə pə́ lə́ pei!»

²⁷Ə́ mbou ndáʼ lə́ Tomásʉ ngô: «Shóghʼə́ shípo gho yaʼa; náŋtə́ məlǎa mbô mâa ńjwó! Cághʼə́ pô zô ńshóghʼə́ saŋ-mbei məŋ! Koo o kə̂ mʉ́ŋtə́, pə́i ńgó ə̂ məŋ.»

²⁸Tomásʉ pwôr lə́ zʉ́ ngô: «Nde ghâa, ə́ mbə́ Sê zâa.»

²⁹Yěso lâʼ lə́ zʉ́ ngô: «O pə̌i ńté ńgó o jwǒ ghâa. Pəndʉʉ-mboŋ ə̂ pye pi gháp pə́i tə́ yǎa ntsə̌mbi njwó.»

³⁰Yěso lə kə́ ncí ə́ ngʉ́ məcó mənkəʼə-məno tə nzáa təcər ngaŋə-jyêʼ-no yé. Lə́ káa pə́ lə ŋwáʼá yé mêi mə̂ cər ŋwaʼa wo.

³¹Lə́ pə́ lə ŋwáʼa mwo məno, ńjí ńgó pei fǔ mə́u, ə́ mbə́i ńgó Yěso Nzaʼ-nkʉ, ə́ mbə́ Môu Sê; mbaa njí ńgó pei lə̌i ngwô pə̂i-ntə̂ʉ nzəm Yěso, a ghʉ ńgʉ́ pei ghwo ləcwôr tə mé.