Read Ngombale Jâŋ 21 Bible Online

Jâŋ 21 - Ngombale bible

Jâŋ 21

¹Zêi yo no lei, Yěso kə̂ ncí nyárə́ mbəʉ ye mbó ngaŋə-jyêʼ-no yé nkaŋ lətʉŋ-nci yi pə́ fûŋ ńgó Tiberiadə. Ə mbə̂u yi a lə lǎghʼ ńkwár mbi páp yo:

²ə có ngaŋə-jyêʼ-no Yěso lə kəitə́ ḿbə́ tâʼ yʉʼ, ə́ mbə́ Síməu Pyêh, ə́ ngʉ̌ Tomásʉ yi có ləjôghʼ yé Môu-ləfâghʼ, ə́ ngʉ̌ Natanayêl môu Kána cər paghʼə-ngoŋ Galilêi, ə́ nkʉʼʉ́ ghəpə́ Zebede, gháp pə có ngaŋə-jyêʼ-no Yěso pwô.

³Síməu Pyêh lâʼ lə́ páp ngô: «N ngwo wǒ mǎʼ shû!» Gháp laʼ lə́ zʉ́ ngô: «Paghʼə wo nǎa lə̌r.» Gháp pə pǎp naa ndə́r ə́ ngwo kə́u cər Kənyúʼ, ə́ ndé pə́ maʼ shû, lə́ káa ghou gháp có.

⁴Nzʉ̂ fôghʼ, Yěso tə̂ʉ nkaŋ nci; lə́, ngaŋə-jyêʼ-no yé zêi káa jî gháp ńgó ə̂ zʉ́.

⁵Yěso túŋu gháp ngô: «Ghəpə́ zâa, káa pei ghôu shû áa?» Gháp pwor ngô: «Ə ngə́»

⁶A lâʼ lə́ páp ngô: «Pei máʼ lənkʉ lə̂ ndyəghʼə́ kənyúʼ yi təʉ lə̂ ndághʼ ńgǒu shû.» Gháp maʼ lənkʉ, ə́ ghou shû ə́ zâa tə káa gháp kə́ nkûʼ gháp lə̂ fú nci ńshúŋ lənkʉ.

⁷Ngaŋə-jyêʼ-no yi Yěso lə kǒŋ no yé gháʼate lə̂ lâʼ lə́ Pyêh ngô: «Ə̂ Nde.» Síməu Pyêh lei tə nzúʼ ńgó ə̂ Nde, ə́ mbyé ndǐ ye, ə́ njərə́ lətyêr zʉ́, ńté ńgó ndǐ yi a lə wé lə zaŋə́, ə́ nzéʼ ńkə́u nci.

⁸Pfuʼ pəghaŋə-jyêʼ-no Yěso cʉ̂ʼ ngí lǎghʼ kənyúʼ pə́ pə̌ʉ, ə́ mə́ shûŋ lənkʉ lə̂ shû cər wó tə ndóghʼə́. Káa gháp lə pə̂ gháp pə́ soŋ nci. Ləfǔ nkaŋ nci ə́ nkə́u yʉʼ yi gháp lə pə́ wó, ə́ lə pə́ no pəmítə nkʉ.

⁹Gháp fû cər kənyúʼ ńkwátə́ tə ntə́ʉ sê, ə́ njwó məwoʼ mǒghʼ; ə shû gháp mbələ̂ghʼ nuŋu ndəu wó.

¹⁰Yěso lâʼ lə́ páp ngô: «Pei lâghʼ có shû zə̂ yi pei ghǒu lə̂ ntó.»

¹¹Síməu Pyêh kə̂u cər Kənyúʼ, ə́ shǔŋ lənkʉ ə́ ŋə́ sê, pətə́koʼ shû lóghʼə cər wó tə mbə́ ntâʼ nkʉ lə̂ ntsap tárə́ lə̂ mə̂m-taa; ə́ pə̂ tə nzáa, lə́ káa lənkʉ sêʼtə yé.

¹²Yěso lâʼ lə́ páp ngô: «Pei tó ńzʉ́ zə̂u.» Lə́ káa cǒ ŋuu lə̂ ngaŋə-jyêʼ-no pə́i ntúŋu yé yé ngô: «Ô wǒ?» Ńté no gháp lə pə́ njî ńgó ə̂ Nde.

¹³Yěso cʉ́ŋə mbáatə́ gháp, ə́ mbyé mbələ̂ghʼ ńgáptə́ lə́ páp, ə́ nkə́ ncí mbyé shû ńŋə́ lə́ páp.

¹⁴Ə́ lə laghʼ ḿbə̂ mbâatə mpfu tárə́ ghíʼ Yěso nyarə mbəʉ ye lə̂ ngaŋə-jyêʼ-no yé tə fú ghíʼ Sê lə ghʉ̌, a zʉ̂ʉ lə̂ ləwʉ̂.

¹⁵Gháp zʉ̂ məzʉ̂ tə myâghʼ, Yěso túŋu Síməu Pyêh ngô: «Síməu môu Jâŋ, o koŋ ghâa tə ndêi ghíʼ pwo pye koŋ ghaa?» A pwôr ngô: «Ə̂ŋ Nde! O tsuŋu mə́ njî ńgó n nkoŋ ghô.» Yěso lâʼ lə́ zʉ́ ngô: «Pápə́ pôu məndənzʉ mâa.»

¹⁶Ə́ nkə́ ncí ntuŋú yé lə̂ mbâatə mpfu pwô ngô: «Síməu môu Jâŋ o koŋ ghâa?» A pwôr lə́ zʉ́ ngô: «Ə̂ŋ Nde, o tsuŋu mə́ njî ńgó n nkoŋ ghô.» Yěso lâʼ lə́ zʉ́ ngô: «Pápə́ mbî zâa.»

¹⁷Yěso kə̂ ncí ntúŋú yé lə̂ mbâatə mpfu tárə́ ngô: «Síməu môu Jâŋ, o koŋ ghâa?» Pyêh shʉ́ŋə sʉ̂ yé, ńté no Yěso túŋú yé lə̂ mbâatə mpfu tárə́ ńgó a koŋ yé? Ə́ ndǎʼ lə́ Yěso ngô: «Ə́ Nde, o pə̌ njî zə̂u tsəm, o tsuŋu mə́ njî ńgó n nkoŋ ghô.» Yěso lâʼ lə́ zʉ́ ngô: «Pápə́ mbî zâa.

¹⁸Məŋ ndaʼ gho kwaʼ lə́nə́ʉ ńgó o lə pə́ môu-ngwəsəu, ə́ nkə̂r têi zô pə́ gho, ə́ ndə̂r lə̂ yʉʼ yi o kǒŋ; o táa lwǔŋ, ə́ ŋáʼá mbô mô, ŋuu ndeʼe lə̂ cʉ́ʼ nkə́r têi zô, ə́ ndaghʼ gho ńdə̌r lə̂ yʉʼ yi koo o yáa mə́ nkôŋ gho.»

¹⁹Yěso lə laʼ yə́rə́ ə́ ndághʼ ńdâʼ mbə̂u ləwʉ̂ yi Pyêh ghʉ̌ kwʉ́ zěi, ə́ lǎghʼ ghúʼtə́ Sê. Ə́ ndǎʼ yə́rə́, ə́ mbou ndáʼ lə́ Pyêh ngô: «Tsə́ʉ nzəm məŋ.»

²⁰Pyêh nyâŋ tə shə́rə́, ə́ njwó ngaŋə-jyêʼ-no yi Yěso lə kǒŋ no yé gháʼate lə̂, ə́ ŋuu yi gháp pə Yěso lə nyáŋ sê, ə́ mə́ nzʉ̂ zə̂u; a tô ŋúʼu lətuŋú zʉ́, ə́ ntúŋú yé ngô: «Ə́ Nde, ŋuu yi a wo féi gho ńŋə́, â wǒ?»

²¹Pyêh jwô yé yə́rə́, ə́ ntúŋú Yěso ngô: «Ə́ Nde, ə́ ngwǒ lə́ wo ŋuu, yé no ghʉ̌ pə́ gháʼá?»

²²Yěso pwôr lə́ zʉ́ ngô: «N ndə̌i nkóŋ ńgó a láʼ kə́ cî pə́ mbî tə n ndáʼ mbə̂ʉ ńtó, zô no pə̂ mə́u ḿbə́ hó? Tsə̂ʉ pə́ nzəm məŋ.»

²³Yěso lâʼ yə́rə́, pə́ ji lə̂ sʉ́ŋ təcər pəfə̌r ńgó wêi ngaŋə-jyêʼ-no ye láʼ kwʉ̂ yé po. Lə́ mə́i káa Yěso lə lâʼ yé ńgó a láʼ kwʉ̂ yé po, a lə laʼ pə́ ngô: «N ndə̌i nkóŋ ńgó a láʼ nkə́ ncî pə́ mbî tə n ndáʼ mbə̂ʉ ńtó, no yi Pyêh pə̂ mə́u ḿbə́ hó?»

²⁴Ngaŋə-jyêʼ-no Yěso wêi leʼtə məno mwo, zʉ́ lə pǒu nkə́ ŋwaʼá měi. Paghʼ pôu mə́ njî ńgó məno mi a lâʼ, ə́ pə́ lə́nə́ʉ.

²⁵Yěso lə kə́ mbou ngʉ̂ məcó məno tə nzáa; tə pə́ lə̌i mə́ ŋwáʼa mə̂i mə́tsəm tâʼ tâʼ môʼ, mə́i n nkwaŋ ńgó mboʼ ndəu nzʉ̂ ghwo yé yʉʼ yi mboʼ pə́ lóʼo pəŋwaʼa pêi wó po.