Read Ngombale Jâŋ 3 Bible Online

Jâŋ 3 - Ngombale bible

Jâŋ 3

¹Ə́ lə ghí pə́, cǒ kə̌m pəyúda pə̂ lə nou pəfalísia, ləjôghʼ yé pə̂ Nikodêm.

²A ghʉ̂ ntô cǒ lətwûʼ, ə́ ndǎʼ lə́ Yěso ngô: «Cícye paghʼ pə̌ njî ńgó Sê lə̂ lə tə́u gho ńgó o wó njyéʼ pye məno, ńté no mboʼ ŋuu ghʉ̂ yé mənkəʼə məno mi o ghʉ lo tə́ ghó Sê pə́ lə́ zʉ́ po.»

³Yěso lâʼ lə́ zʉ́ ngô: «Kwaʼ lə́nə́ʉ, mboʼ ŋuu jwô yé Ləfou Sê tə́ ghó pə́ jí yé lə̂ ləjî yi shwî po.»

⁴Nikodêm túŋu yé ngô: «Tə mboʼ ŋuu pə̂ ntikáŋ pə́ pyə́ghʼə njí yé gháʼá? Tə mboʼ a kə̂ ncí nkə́u ləpəm mə́ ye a pyə́ghʼə njí yé?»

⁵Yěso pwôr lə́ zʉ́ ngô: «Məŋ ndaʼ gho kwaʼ lə́nə́ʉ ńgó mboʼ ŋuu kə̂u yé cər Ləfou Sê tə́ ghó pə́ laghʼ nci gháp pə Zəghʼə ńjí yé po.»

⁶Ə zə̂u yi ə́ kwǎr lə̂ mbap mbəʉ ə̂ mbap mbəʉ, yi ə́ kwǎr lə̂ Zəghʼə pə̂ Zəghʼə.

⁷Koo ə́ kəʼə yé ghô ghíʼ n ndǎʼ lə́ gho ńgó ə́ poŋ ńgó pə jí ghô lə̂ ləjî yi shwî.

⁸Kəfwor khʉ pə́ lə̂ yʉʼ yi a kǒŋ, o zûʼ ghíʼ a lei lə́ káa jí yʉʼ yi a fû wó, káa kə́ jí yʉʼ yi a lər lə̂ wó. Ə́ kə́ mbə́ pə́ yə́rə́ lə́ ŋuu yi a kwǎr lə̂ Zəghʼə.

⁹Nikodêm túŋu Yěso ngô: «Zêi yo mbə̂u no gháʼa ndêi gháʼá?»

¹⁰Yěso pwôr lə́ zʉ́ ngô: «O pə́ Ísə́lahêl, ə́ mbə́ ŋuu yi a jyêʼ pye ləpə̌ʉ ə́ mbǒu káa pə́ jî yo no áa?

¹¹Məŋ ndaʼ ghô Kwaʼ lə́nə́ʉ ńgó paghʼ laʼ no lə̂ no yi paghʼ pə̌ njí, ə́ mbə́ pənzǔʼ-njwó lə̂ no yi paghʼ lə jwó lə́ káa pei pə́ mbə̂i wéi.

¹²M mə̌ ndaʼ wéi no lə̂ məno mi ə́ leitə ndəu ndesé káa pei pə́ mbə̂i wéi, n ndə̌i ntə́i ndáʼ wéi pə́ mi ə́ leitə tʉ̌-lə́pû mə́i pei ghʉ̂ gháʼá poŋə́ pə́i?

¹³Ŋuu laa kə́ kóʼ ńgwó tʉ̌-lə́pû, ə̂ ndaʼ Môu ŋuu yi a lə fú wó shíʼ ńtó.

¹⁴Ndʉŋ-ndʉŋ ghíʼ Mə̌usə̂i lə lǎghʼ tâʼ tʉ̌ ḿbə́ʼə nô koŋə-məkwaʼá ńŋə́ tʉ́ lə̂, ə́ pə́ túŋu ńgó pə ghʉ́ nkə́ mbəʼə́ Môu ŋuu pə́ yə́rə́.

¹⁵Ə́ njí ńgó lei yə́rə́, ŋuu yi a pə̌i no zâa ghwo ləcwôr tə me.

¹⁶Ńté no Sê lə koŋ ndəu nzʉ̂ tə ntə́u tâʼ Môu ye moʼ ńjí ńgó ŋuu yi a ŋə̌ ntə̂ʉ lə́ zʉ́ kə̌ kwʉ̂ yé po, ə́ ncʉ́ʼ ngwó pə́ ləcwôr tə me.

¹⁷Kâa Sê lə tə̂u Môu yé ńgó a tó ńféʼ ndəu nzʉ̂, a lə tə̂u yé pə́ ńgó ndəu nzʉ̂ lêitə́ lə́ zʉ́ ə́ ncwór.

¹⁸Ŋuu yi a pə̌i no yé, pə́ ghʉ̌ fêʼ yé yé po, lə́ ŋuu yi kâa ŋə̂ yé ntə̂ʉ yé lə́ zʉ́, pə́ feʼ mə́ yé tə nzáʼ ntsâŋ ńté ghíʼ a lə̌ʼ lə̂ ŋə́ ntə̂ʉ yé lə́ Môu Sê.

¹⁹Yo ghíʼ pə́ wo fěʼ no zêi: nkeʼ tǒ cər nzʉ̂, pye-mə́soŋ ləʼ keʼ, ə́ nkə́ mbə̂ gháp pə́ cər nzə̌m ńté ńgó ngʉ̌ məno gháp kâa pôŋ.

²⁰Ńté no ngʉ-məno-tə́poŋ ntsəm khʉ nkeʼ khʉ̌, ə́ nkǒŋ lə̂ nyáŋ yé pə́ cər nzə̌m ə́ mbóghʼ no nkeʼ wo kěʼ məno tə́poŋ mé ə̂ kwâr ndəu zǎa.

²¹Lə́ ŋuu yi a ŋəi lə̂ laŋə́-ndə̂u no lə́nə́ʉ koŋ lə̂ ŋə̂i cər nkeʼ njí ńgó nkeʼ kêʼ məno shʉʼʉ mé, pə́ jwô ńjí ńgó məfaʼ mé fû mbô Sê.»

²²Yo no lei, Yěso gháp pə ngaŋə-jyêʼ-no yé lər lə̂ cər paghʼə-ngoŋ Yudêi, ə́ nkə́u wó nyáŋ leʼé ndwuŋ, a pə̂ ŋə̂ pye nci.

²³Jâŋ pə̂ yé túsoŋ Enôŋ mbəʉ yi Salîm lâʼ pə̂ ńtó a lâghʼ nci ńŋə̂ gháp nci ńté ńgó mənci lə záa yʉʼ wó gháʼate.

²⁴Ńté no lə ghí pə́ mə́i Jâŋ kə́ kə̂u yé tsâŋ.

²⁵Cǒ ŋuu pəyúda gháp pə ngaŋə-jyêʼ-no Jâŋ nyâŋ tə njî lə̂ nzóŋə́ no ŋə́ lə̂ no sôghʼ pəi mboŋə́ ghúʼtə́ Sê.

²⁶Ngaŋə-jyêʼ-no Jâŋ wo njwó yé, ə́ ndáʼ lə́ zʉ́ ngô: «Cícye o pə̌ nkʉ̂ʉtə ŋuu yi pei zʉ́ lə pə́ njʉŋə́ nci Yuudêŋ lə̂ tə o pə̂ ndâʼ məno mi o pə̌ njî lə́ zʉ́ lə̂? A pə̌ ŋə̂ yé nci lə́ pye tə lâʼ tsəm cʉ́ʼ ngwo cə̂r pə́ yé.»

²⁷Jâŋ pwôr ngô: «Sê yi a pə́ tʉ̌-lə́pû lə̂ ŋə̂ faʼ ŋuu ntsəm.»

²⁸Tû-mbəʉ zéi pə́ ntsuŋú njî ńgó n ndə laʼ wéi ńgó káa məŋ mbə̂ ghâa Nzaʼ-nkʉ. M mbə̌ pə́ ŋuu yi pə́ lə tə́u yé ńgó â pə́ mbi zʉ́.

²⁹Ŋuu yi a zǒʼ məngyě lə̂ pə̌ ndə̂u məngyě. Lə́ Sə̌u ndə̂u məngyě təʉ mbəʉ ndə̂u, ə́ mə́ nzûʼ nji ye, no poŋə́ yé gháʼate. Lətsei wêi, â ghâa, m mbôu ntsêi tə myâghʼ ntə̂ʉ ghâa ntsəm.

³⁰Ə́ pə́ ntúŋu ńgó no yé lə́r lə̂ mbi, zâa pə̂ʉ lə̂ nzəm.

³¹Ŋuu yi a fû tʉ̌-lə́pû ghǔʼ ńděi ŋuu tsəm. Ŋuu yi a pə́ ndəu ndesé pə̂ ŋuu ndesé; ə́ mbou ndâʼ no pə́ lə̂ məno mi náŋtə́ ndəu ndesé. Lə́ ŋuu yi a fǔ tʉ̌-lə́pû ghǔʼ ńděi maa ŋuu tsəm.

³²A laʼ məno mi a lə jwó mbou nzúʼ, lə́ káa ŋuu pə̂i yé.

³³Ŋuu yi a pə̌i tsâr yé laghʼ ńnyárə ńgó Sê pə̌ ndaʼ no lə́nə́ʉ.

³⁴Ŋuu yi Sê tə̌u yé laʼ pə̂ məno mi ə́ fú mbó Sê, ńté no Zəghʼə Sê pə́ lə́ zʉ́.

³⁵Tə́ kôŋ Môu yé, ə́ mbou ncóghʼ zə̂u tsəm mbó zʉ́.

³⁶Ŋuu lə̌i mbə́i no Môu, a ghwo ləcwôr tə me. Ŋuu póu ndə̌ʼ no Môu, a lâʼ ngwô yé ləcwôr po; záŋə-lóŋ Sê tə̂i ndəu zʉ́.