Read Ngombale Jâŋ 4 Bible Online

Jâŋ 4 - Ngombale bible

Jâŋ 4

¹Pəfalísia zûʼ pə́ pə̂ ndêʼtə ńgó pye pi gháp tsə̂ʉ nzəm Yěso gháp pə pye pi pfû nci mbó zʉ́ pə́ nzáa ndêi pye pi Jâŋ.

²Kwaʼ lə́nə́ʉ, káa Yěso lə pə́ ŋə̂ yé pye nci, ngaŋə-jyêʼ-no yé lə́ lə ŋə̂.

³Yěso zûʼ yə́rə́, ə́ fú Yudêi mə́ mbə̂ʉ lə̂ Galilêi,

⁴ə́ pə̂ yi a wo lěi Samalə̂i.

⁵Ə́ ŋə̌i tə nkə́u cər có túsoŋ Samalə̂i yi pə́ fûŋ ńgó Sikâa, ə́ pə̂ mbəʉ nkâʼ yi Yokôp lə ŋə́ lə́ môu yé Yosêp.

⁶Ə ghəm nci yi pə́ fûŋ ńgó ghəm nci Yokôp pə̂ yʉʼ. Yěso ghi kə́u yʉʼ wó, mə́i mə́nəu təʉ mə́, ə mvúŋ ləŋəi ghʉ a kâa, ə́ shíʼ ńnyáŋ mbəʉ ghəm nci zêi.

⁷Cǒ məngyě Samalə̂i tô ńtə̂uʼ nci, Yěso lâʼ lə́ zʉ́ ngô: «Ŋə́ nci, n nó.»

⁸Ə́ ghi pə́, ngaŋə-jyêʼ-no Yěso lər lə̂ túsoŋ lə̂ nzə́u məzʉ̂.

⁹Məngyě Samalə̂i wêi túŋu Yěso ngô: «Ô ŋuu pəyúda, ə́ mbou ndôu nci mbó məŋ məngyě Samalə̂i áa?»

¹⁰Yěso pwôr lə́ zʉ́ ngô: «O tə̌i mbə́ ghíʼi ə́ mə́ njî fuʼ yi ə́ fû mbó Sê, ə́ mbou mə́ njî ŋuu yi a laʼ lə́ gho ngô: Ŋə́ nci, n nó, mə́i gho lə̂ cʉ̌ʼ ndóu yé nci, a ŋə̂ ghô ləsǎʼ nci yi ə́ ghʉ pə́ pə̂ wó.»

¹¹Məngyě Samalə̂i wêi lâʼ lə́ zʉ́ ngô: «Ə́ Nde, koo o ghwo ghô nkaa laghʼ ńtə́uʼ nci, nci pou shî ndwuŋ wo gháʼa, o lǎghʼ wêi nci ləcwôr fú pə́ ghó?

¹²Tə́ waghʼ Yokôp lə ŋə̂ nci wo lə́ paghʼ. A lə nô pə́ wěi, ghəpə́ yé gháp pə mənye mé kə̂ nô pə́ wěi. O kwaŋ ńgó o lei tə́ waghʼ Yokôp wêi áa?»

¹³Yěso pwôr lə́ zʉ́ ngô: «Ŋuu nô nci wo ndě nci kə̂ mbóu nzə́u yé zə́u.

¹⁴Lə́ ŋuu lə̌i nó nci yi n ŋə̌ lə́ zʉ́, ndě nci lâʼ nkə́ nzə́u yé yé po; ə́ cʉ̂ʼ mbə́ ndəu zʉ́ ḿbə́ ləsǎʼ nci ləcwôr tə me.»

¹⁵Məngyě Samalə̂i wêi lâʼ lə́ zʉ́ ngô: «Ə́ Nde, ŋə́ nci wêi lə́ məŋ, ndě nci láʼ nkə́ nzə́u yé ghâa po, lə́u n ndáʼ nkə́ ntô ghâa yaʼa ntə́uʼ nci po.»

¹⁶Yěso lâʼ lə́ zʉ́ ngô: «Wo ndǎghʼ ndə̂u gho ńtó.»

¹⁷Məngyě wêi pwôr lə́ zʉ́ ngô: «Káa n ngwo ghâa ndə̂u.» Yěso cʉ̂ʼ ndáʼ lə́ zʉ́ ngô: «O ghwo lə̂ ndâʼ yə́rə́,

¹⁸ńté no o zoʼ mə́ pələ̂u pə́taa; mbaa yi pei zʉ́ pə́ ndə̂ mpfu wo, káa a pə̂ yé ndə̂u gho. Ə́ laghʼ ḿbə́ ńgó o lâʼ no lə́nə́ʉ.»

¹⁹Məngyě wêi lâʼ lə́ Yěso ngô: «Ə́ Nde, n njwǒ ńgó ô tâʼ ntsətə-nkəʉ-Sê.

²⁰Pəmə́ngâa-njʉʼ paghʼ lə ghûʼtə Sê ndəu ləkôr yo, lə́ ngwǒ lə́ pei Pəyúda, pei lâʼ zéi ńgó pə́ ghwo lə̂ ngúʼtə́ Sê pə́ Yelúsalêm.»

²¹Yěso lâʼ lə́ zʉ́ ngô: «Mǎa, pə́i no yi n ngwo ndǎʼ wó, mpfu pə mə́ ngwo nkǔʼ wó yi pei wo kə́ ghûʼtə wéi Sê ndəu ləkôr yo po, ə́ kə́ ghûʼtə wéi yé Yelúsalêm po.

²²Pei pye Samalə̂i pei ghûʼtə Sê pə́ tə jǐ yé. Lə́ ngwǒ lə́ paghʼ Pəyúda, paghʼ ghí pə́ ghûʼtə yé, ə́ fú mə́ njî yé ńté ńgó Sê wo lěi pə́ lə́ Pəyúda, ə́ ghʉ̌ pye cwór.

²³Lə́ mpfu pə́ mə́ nkǔʼ, yo pou mbə́ mpfu zêi yi kwaʼ pəghúʼtə́ Tǎa Sê wo ghúʼtə́ yé cər Zəghʼə mbaa cər no lə́nə́ʉ. Ńté no Tǎa yaa ndôu pə́ zêi mbə̂u pəghúʼtə́ Sê.

²⁴Ə Sê Zəghʼə, ə́ pou mə́ ntúŋu ńgó pye pi gháp ghûʼtə yé, ghúʼtə́ yé lə̂ Zəghʼə mbaa cər no lə́nə́ʉ.»

²⁵Məngyě wêi lâʼ lə́ zʉ́ ngô: «M mə̌ njî ńgó Nzaʼ-Nkʉ pə̌ ntó, ə́ mbə́ ŋuu yi pə́ fûŋ yé ńgó Kəlísto. A táa tó, ə́ kéʼtə́ zə̂u tsəm lǎʼ wághʼə.»

²⁶Yěso lâʼ lə́ zʉ́ ngô: «Məŋ wěi, məŋ yi n ndaʼ no lə́ gho lo.»

²⁷Yěso pə̂ ndâʼ yə́rə́, ngaŋə-jyêʼ-no yé tô; ə́ njwó gháp məngyě pə̂ ntsár, ə́ fû nkəʼə́ gháp gháʼate. Lə́ káa cǒ ghap túŋú yé Yěso zə̂u yi gháp məngyě wêi sʉ̂ŋ zěi.

²⁸Ə́ pə̂ yə́rə́, məngyě wêi nyêr twô nci yé yʉʼ wó, ə́ mbə̌ʉ ńgwó túsoŋ ńdáʼ lə́ pye ngô:

²⁹«Pei tó njwó cǒ ŋuu yi a leʼtə́ ghâa məno mə́tsəm mi n nkə ghʉ mə́. Tə mboʼ a tî tə́ pə́ Nzaʼ-nkʉ?»

³⁰Lâʼ fû túsoŋ ńkwár ńtó ńcə́r Yěso.

³¹Gháp ghi tó, ngaŋə-jyêʼ-no yé pə̂ fárə yé ngô: «Cícye zʉ́ zə̂u.»

³²Lə́ Yěso lâʼ lə́ páp ngô: «N ngwo məcó məzʉ̂ mi n ngwo zʉ́ mi káa pei pə́ njî wéi.»

³³Ngaŋə-jyêʼ-no yé zûʼ yə́rə́ ə́ shərə́ ńtuŋú təcər páp ngô: «Ə́ gháʼa mbə́ ńgó cǒ ŋuu ŋə́ mə́ məzʉ̂ lə́ zʉ́ áa?»

³⁴Yěso lâʼ lə́ páp ngô: «Ə mâa məzʉ̂, ə̂ ngʉ́ ləkoŋtə ŋuu yi a lə tə́u ghâa ə́ mbǒu myághʼə́ məfaʼ mi a lə ŋə́ lə́ məŋ.

³⁵Lə́u pei pə̌ ndaʼ ńgó ə́ cʉ́ʼ mə́ mbûŋ saŋ ləkwo, pə pyé məzʉ̂ ŋə́ ndə̂ péh, lə́ m mə̌ ndaʼ wéi ńgó pei pə́ʼə́ nyôghʼ méi náŋ mənkâʼ ńjwó; məzə̂u təʉ mə́ tə ncʉ́ʼ mə́ ntúŋu pə̂ mbyé ńŋə́ ndə̂.

³⁶Ŋuu yi a pyê məzʉ̂ ŋə̂ ndə̂ mpfû mə́ ntsoʼó-faʼ yé, ə́ mbǒu mə́ nkə̂itə məntǎa-ntʉ́ ləcwôr tə me. Ə́ njí ńgó ŋuu yi a pyê ŋə̂ ndə̂ gháp ŋuu yi a pi naa ngwǒ lətsei.

³⁷No yi saghʼ-ləghaa lâʼ ə́ pə́ lə́nə́ʉ ngô: “Ŋuu yi a pi zə̂u pə́ wó, ŋuu yi a pyê ńŋə̂ ndə̂ pə̂ wó.”

³⁸N nkə tə́u wéi mbyê məzʉ̂ cər nkâʼ yi káa pei kə fâʼ wéi wó. Pəcó pye kə faʼ, pei cʉ̂ʼ ntó mə́ nzʉ̂ pəi zěi.»

³⁹Pye Samalə̂i tə nzáa túsoŋ wêi lə pə̂i no Yěso, ə́ ndeitə́ lə̂ tsâr yi məngyě wêi lə lǎʼ ngô: «A lâʼ məno mâa mə́tsəm mi n nkə ghʉ mə́.»

⁴⁰Ə́ pə̂ yə́rə́ gháp tô tə kə́u mbəʉ Yěso, ə́ sʉ́ʉtə́ yé ńgó gháp pə pǎp lə̂ cʉ́ʼ mə́ nyáŋ. A pə̂i, gháp pə pǎp nyâŋ leʼé pwô.

⁴¹Pye tə nzáa kə̂ ncí nkʉʼʉ́ mbə́i no yé, ńté tsâr yé.

⁴²Gháp laʼ lə́ məngyě wêi ngô: «Káa paghʼ pyér ə́ mbə̂i no Yěso ə́ ntê pə̂ tsâr yi o kə̂ lǎʼ wághʼ, paghʼ cʉ̌ʼ mbə́i ə́ ntê pə́ ghíʼ paghʼ tsuŋú nzúʼ tsâr yé pə́ paghʼ, tə mə́ njî ńgó â kwaʼ ŋuu yi a tǒ lə̂ ngʉ́ pye-mə́soŋ cər nzʉ̂ cwôr.»

⁴³Leʼé zêi pwô lei, Yěso fû yʉʼ wó ə́ ndə́r lə̂ Galilêi.

⁴⁴Mə́i tû-mbəʉ yé lə laʼ mə́ ngô: «Káa ŋuu pə́ ŋə̂ yé məkuʼ ntsətə-nkəʉ Sê lâʼ páp.»

⁴⁵Lə́, ə́ ndə̌r tə kə́u Galilêi, pye Galilêi pfû yé kwaʼ shʉʼʉ, ńté no gháp záp lə wô yʉʼ lətsei Pásʉ́ka Yelúsalêm, ə́ nkə́u wó njwó məno mi a ghʉ̌.

⁴⁶Yěso pə̂ʉ lə̂ Kána cər paghʼə-ngoŋ Galilêi, ə́ yʉʼ yi a lə shərə́ nci wó ə́ ndaghʼ ńgʉ́ məluʼ lə̂, cǒ ngaŋə-faʼ fou yi njwǐ pə̂ wó, môu ye pə̂ Kapérnawûm mə́ ngôu.

⁴⁷Ŋuu wêi zûʼ ńgó Yěso fǔ Yudêi ə́ ntó Galilêi, ə́ ngwo sʉ́ʉtə́ yé ńgó a wó Kapérnawûm, ə́ ngʉ́ môu yé yi a cʉ̂ʼ mə́ nkwʉ̂ kwʉ̌ shwítə́.

⁴⁸Yěso lâʼ lə́ zʉ́ ngô: «Pei lə̌i ndə́iʼ jwó mənkəʼə-məno gháp pə pəndǎa-jwô məno mi ə́ nyárə mətəʉ Sê po, pei pə̂i wéi no Môu ŋuu po.»

⁴⁹Ngaŋə-faʼ fou wêi lâʼ lə́ zʉ́ ngô: «Ə́ Nde, tô tə sáp ləjôghʼ lə́ môu ghâa wêi a poŋə́ kwʉ́.»

⁵⁰Yěso lâʼ lə́ zʉ́ ngô: «Pəʉ lə̂ nzeʼ gho, môu gho shwitə̂.» Ŋuu wêi pə̂i no yi Yěso lǎʼ lə́ zʉ́, ə́ ndə̌r.

⁵¹Ə́ mə́ mbə̂ʉ lə̂ nzeʼ zʉ́, pəghaŋə-faʼ pé tô ḿbə̂utə́ yé, ə́ ndáʼ lə́ zʉ́ ngô: «Môu gho shwitə̂.»

⁵²A túŋu gháp mpfu yi môu lə shwítə́, gháp pwor ngô: «Ə́ kə pə́ mpfu mbwǒr-nəu zou lə́ tâʼ mə́nəu nə̂r záʼa lə́ zʉ́.»

⁵³Tə́ môu zûʼ ə́ pəutə lə̂ mpfu yi Yěso lə lǎʼ lə́ zʉ́ ngô: «Môu gho shwitə̂.» Ə́ pə̂ yə́rə́, gháp pə cʉŋə-ndə̂ yé tsəm naa ncóghʼ ntə̂ʉ gháp lə́ Yěso.

⁵⁴Yěso lə ghʉ wo nkəʼə-no, ə́ mpfu yi a lə fú Yudêi mbə̂ʉ lə̂ Galilêi, ə́ laghʼ ḿbə̂ nkəʼə-no mbâatə pwô yi a ghʉ Kána.