Read Ngombale Jâŋ 5 Bible Online

Jâŋ 5 - Ngombale bible

Jâŋ 5

¹Yo no lei, pəyúda pə̂ ngʉ̂ cǒ lətsei, Yěso kôʼ ńdə́r lə̂ Yelúsalêm.

²Ə́ pə̂ Yelúsalêm, ə có ghəm-nci pə̂ mbəʉ ntsʉ nkâʼ məndənzʉ, ə́ mbə́ yi pə́ sôghʼ mbəʉ cər wó, pə́ fûŋ lə̂ tsâr pye Hebələ̂ ńgó Betésda; mə́i pə́ lə pôu məyʉʼ ləzətə́ mə́ntaa ə́ ndághʼ ńzə́mə́ zěi.

³Pəghou mbə̂u lə̂ mbə̂u nuŋtə cər məyʉʼ mêi, ə́ mbə́ pəfwoghʼ-mə́nyôghʼ, ə́ ngʉ́ pəkə́niʼí-ku lə̂ pənkhwô. [Gháp lə pə́ nzʉ́ʼtə mpfu yi nci wo cʉʼʉ́.

⁴Ə́ nté no cǒ cwôʼ Nde lə nyâŋ shîʼ lə̂ məcó məmpfu ḿvúŋu nci. Ə́ nděi tə mvúŋú, wǒwó yi a pyə̌ghʼ cər wó, ə́ tə́i ngwô pə́ zarə́ mbə̂u ghou, a shwítə.]

⁵Cǒ ŋuu pə̂ wó, mə́i a lə cʉ́ʼ nkhwo, tə mə́i ə́ pə́ mə́ nguʼ ntsap ləfǎa lə̂ mə̂m-tárə́.

⁶Yěso jwô ghíʼ a nǔŋ, ə́ njí ńgó ə́ cí mə́ gháʼate ghíʼ a pə̌ yʉʼ wó, ə́ ntúŋú yé ngô: «O pə̌ nkoŋ shwítə́?»

⁷Ə nkhwo wei pwôr lə́ zʉ́ ngô: «Ə́ Nde, ə́ pə̂ mpfu tsəm yi nci cʉʼʉ́, ghâa ŋuu yi a khwǒr ghâa mǎʼ cər wó pə̂ yé wó po. M mbóu mə́ ndə́r, cǒ ŋuu zêʼtə ghâa ḿbyə̌ghʼ nci.»

⁸Yěso lâʼ lə́ zʉ́ ngô: «lěsê, ə́ mbyé mátə gho, ə́ ŋə̂i.»

⁹Ŋuu wêi kə̂ ntóghʼ shwítə́ pə̂ mpfu wêi, ə́ nděsê, ə́ mbyé mátə ye, ə́ njǐ lə̂ ŋə̂i. Ə́ lə pou ndêi yə́rə́ gháʼa leʼé nji pəyúda.

¹⁰Pəkə̌m pəyúda lâʼ lə́ ŋuu yi a shwitə́ lei ngô: «Yo leʼé nji, mátə ghʉ hó mbó gho?»

¹¹A lâʼ lə́ páp ngô: «Ŋuu yi a yǎa ngʉ̌ n shwítə tə̌i ndǎʼ lə́ məŋ ńgó m mbyé mátə ghâa ńŋə̂i.»

¹²Gháp túŋu yé ngô: «Ŋuu yi a yǎa ndǎʼ ngô: “Pyé mátə gho ńŋə̂i” wǒ?»

¹³Lə́ ŋuu yi a shwitə́ lei, kâa pə́ njî yé ngaŋ, ńté no Yěso yǎa ndâʼ yə́rə́, ə́ ncwí təcər lâʼ yi ə́ lə pə́ yʉʼ wó.

¹⁴Yěso ghʉ̂ njwó yé ndə̂ Sê, ə́ ndǎʼ lə́ zʉ́ ngô: «O tsuŋu shwítə́, lə́ koo o lâʼ nkə́ ngʉ́ no tə́poŋ, mə́i no wo ghʉ̌ ghô tə lěi yi o kə yǎa mbə́ mə̂u.»

¹⁵Ŋuu wêi wo ndáʼ pəkə̌m pəyúda ńgó ŋuu yi a kə ghʉ̌ a shwítə lə̂, â Yěso.

¹⁶Gháp ji lə̂ nkʉ́ʉ Yěso tə́poŋ, ńté no zêi yi a lə ghʉ̌ leʼé nji.

¹⁷Yěso pwôr lə́ páp ngô: «Tə́ ghâa pyěr mə́ fâʼ-faʼá tə ŋə́ mpfu wo mbaa məŋ zâa m mbyêr mə́ fâʼ-faʼá.»

¹⁸Ə́ ndǎʼ tsâr zêi, gháp ghâʼ lə̂ ndôu məsʉ̂ lə̂ ndághʼ ńjwí yé, ńté no a lə ghí pə́ faa nji gháp, ə́ mbóu mə́ ndâʼ ńgó Sê kwaʼ Tə́ ye, ə́ ndǎghʼ ńdâʼ ńgó gháp zʉ́ pəu.

¹⁹Yěso lâʼ lə́ páp ngô: «Kwaʼ lə́nə́ʉ, məŋ ndaʼ wéi, mboʼ Môu ghʉ̂ yé có zə̂u lə̂ ndʉʉ mətəʉ ye po, a ghʉ pə́ yi a jwǒ Tə́ ye ghʉ̂. Zə̂u tsəm yi Tə́ ghʉ̂, Môu kə̌ ngʉ yé pə́ zěi.

²⁰Ńté no Tə́ koŋ Môu, ə́ mə́ nyárə yé zə̂u tsəm yi a ghʉ̂, a táa kə́ cí nyárə́ yé məcó məzə̂u mi ə́ ghúʼ nděi mwo, ńjí ńgó pei jwǒ ə́ kəʼə wéi.

²¹Ghíʼ Tə́ ghʉ pye zʉ̂ʉ lə̂ ləwʉ̂, a ghʉ̂ gháp pə̂ wó lə̂, ə̂ ndʉŋ-ndʉŋ ghíʼ Môu kə̌ mə́ ngʉ́ pye pi a kǒŋ lə̂ ngʉ́ gháp zʉ́ʉ lə̂ ləwʉ̂ zʉ̂ʉ.

²²Ə́ yaa ngǐ pə́, Tə́ kâa pə́ fêʼ yé cǒ ŋuu, a lə nyêr feʼ-no tsəm pə́ lə́ Môu ye.

²³Ńjí ńgó pye pə́tsəm ŋə̂ məkuʼ Môu, ə́ ndʉŋ-ndʉŋ ghíʼ gháp ŋə̂ mi Tə́. Ŋuu lə̌i ndə́iʼ ŋə́ məkuʼ Môu po, ə́ pə̂ ńgó káa a ŋə̂ yé mi Tə́ yi a lə tə́u Môu.

²⁴Kwaʼ lə́nə́ʉ, n ndaʼ wéi, ŋuu lə̌i nzúʼ tsâr zâa, ə́ mbou ncóghʼ ntə̂ʉ yé lə́ ŋuu yi a lə tə́u ghâa, a ghwô ləcwôr tə me, pə́ ghʉ nkə́ ntâghʼ yé cǒ ngwôʼ tû zʉ́ po. A fu mə́ cər ləwʉ̂ nkwǎr ńkə́u cər ləcwôr tə me.

²⁵Kwaʼ lə́nə́ʉ, n ndaʼ wéi, mpfu pə mə́ nkǔʼ; ə pəi mə́ nkǔʼ, ə́ yi pəpfû-sê wo zúʼ nji Môu ŋuu, ə pye pi gháp wo zúʼ, táa ncwór.

²⁶Ə́ pə̂ yə́rə́, ghíʼ Tə́ lə́ ghwǒ mətəʉ lə̂ ndághʼ ńgʉ̌ pye pə́ wó, a lə kə́ ŋə́ mətəʉ lə́ Môu lə̂ ndághʼ ńgʉ yé pye pə̂ wó.

²⁷A lə kə́ ncí ŋə́ yé mətəʉ lə̂ ndághʼ ńfěʼ pye-mə́soŋ ńté no â Môu Ŋuu.

²⁸Koo ə́ kəʼə yé wéi kəʼə, ńté no mpfu pə mə́ nkǔʼ yi pəpfû-sê pi nuŋtə́ cər məshi wo zúʼ nji Môu Ŋuu.

²⁹Ə́ pə́ yə́rə́, gháp fú cər məshi máp ńkwátə́. Pye pi gháp lə pə́ ngʉ̂ no shʉʼʉ, ə̂ zʉ́ʉ lə̂ ləwʉ̂, ə́ ngwǒ ləcwôr tə me, lə́ pye pi gháp lə pə́ ngʉ̂ no tə́poŋ zʉ́ʉ, ə́ pə tághʼ ngwôʼ tû páp.

³⁰Káa m mə́ ngʉ̂ ghâa có zə̂u pə́ ndʉʉ məŋ, n feʼ lə̂ mbə̂u yi Sê lǎʼ; ə́ pə̂ yə́rə́, zâa mbə̂u lə̂ fêʼ pə̂ ndʉŋ-ndʉŋ, ńté no káa m mə́ ngʉ̂ ghâa pə̂ zə̂u yi ə́ wo poŋə́ ghâa, n ngʉ pə́ yi ə́ wo poŋə́ ŋuu yi a yi lə tə́u ghâa.»

³¹«N ndə pə́ ghíʼi, ə́ mbə́ nzǔʼ-njwó lə̂ məno mi ə́ náŋtə tû-mbəʉ zâa, mə́i káa ŋuu kə pə̂i yé no yi n ndaʼ zěi.

³²Ŋuu ndeʼe lə̂ lâʼ no yi a jǐ lə́ məŋ, m mbôu mə́ njî ńgó no yi a laʼ, ə́ pə́ lə́nə́ʉ.

³³Lə́u pei lə tə́u pye lə́ jâŋ péh? A kə̂ ndáʼ no lə́nə́ʉ yi a pə̌ njî lə́ məŋ.

³⁴Káa ə̂ pə̂ yé ńgó m mə̌ ntsâa ńgó pye-mə́soŋ lâʼ no ńdághʼ ńzǒŋ tû zâa. Lə́ n ndaʼ yo no gháʼá ə́ pə̂ yi pei wo lěi mə̂u, ə́ cwór.

³⁵Jâŋ lə pə́ ghíʼ lâm yi pə́ látə́ a pə̂ nkêʼ yʉʼ, pei lə lâghʼ lətsei ḿbə́i ńgó â nyéʼ nkêʼ wéi lə́ mə́ceʼé mpfu.

³⁶Lə́, n ngwo zə̂u yi ə́ pə́ ndâʼ zə̂u yi m mbə̌ zěi ńdéi yi Jâŋ lə lǎʼ ńté ghâa. Ə́ pə̂ məfaʼ mi Tə́ ghaa lə lǎʼ ńgó n ngʉ̂, m mbou mə́ fâʼ, ə́ pə̂ nyárə́ ńgó Tə́ ghaa lə tə́u ghaa.

³⁷Tû-mbəʉ Tə́ ghaa yi a lə tə́u ghâa pə̌ ndâʼ ŋuu yi m mbə̌ wěi. Pei laa kə́ zûʼ wéi nji ye, káa kə́ jwô wéi sʉ̂ yé.

³⁸Káa pei pə́ ndóʼo wéi tsâr yé məntə̂ʉ pei, ńté ńgó káa pei pə́ ncôghʼ wéi ntə̂ʉ wéi lə́ ŋuu yi a lə tə́u yé.

³⁹Pei lûʼ ləcʉŋ ŋwaʼa Sê, ńté ńgó pei pə̌ nkwaŋ zéi ńgó pei wo lěi mə̂u ə́ ghwǒ ləcwôr tə me. Ŋwaʼa Sê wei lə̂ kə̌ mə́ ndâʼ ŋuu yi m mbə̌ wěi.

⁴⁰Pei pôu káa pə́ koŋ wéi lə̂ ntó ńcə́r ghâa, ə́ ngwǒ ləcwôr tə me.»

⁴¹«Káa m mə́ ntsâa ńgwó ləghûʼ yi a fǔ mbó pye-mə́soŋ.

⁴²Lə́, m mə̌ njî wéi, káa pei ghwô wéi nkoŋə Sê cər məntə̂ʉ pei.

⁴³N ndə tó lə̂ ləjôghʼ Tə́ ghâa, pei lə̂ʼ lə̂ mpfú ghâa. Lə́ ŋuu ndeʼe lə̌i mbóu ntó lə́ ndʉʉ ləjôghʼ ye, mə́i pei wo pfú yé.

⁴⁴Pei pə́ təcər pei, ə́ mə́ nkôŋ ŋə́ məkuʼ pəfə̌r péi, gháp pou ŋə̂ méi; lə́ káa pǒu pə́ sâʼ wéi mətəʉ lə̂ ngʉ́ Sê ŋə̂ məkuʼ méi. Pei wo pǒu ghʉ̌ gháʼá poŋə́ cóghʼ ntə̂ʉ wéi lə́ məŋ?

⁴⁵Koo pei kwâŋ ńgó n ntáa tə́ʉ mbi Tə́ ghâa, ə́ cóghʼ fər paa pei. Mə̌usə̂i lə̂ táa cóghʼ, ńté no â wei ŋuu yi pei cǒghʼ ntə̂ʉ wéi lə́ zʉ́.

⁴⁶Pei yaa mbə́i mbə́ tə ndâʼ ńgó pei pə̌ ncóghʼ ntə̂ʉ wéi lə́ Mə̌usə̂i gháʼá, pei yǎa mə́ ncóghʼ ntə̂ʉ wéi lə́ zʉ́ lə́nə́ʉ, mə́i pei kə̌ ncóghʼ ntə̂ʉ wéi lə́ məŋ zâa lə́wó; ńté no məno mi a lə ŋwaʼá, a lə ŋwaʼa gháʼá ńté pə́ ghâa.

⁴⁷Ə̂ŋ, tə ghíʼ káa pei pə́ mbə̂i wéi no Mə̌usə̂i lə ŋwaʼá lo, mboʼ pei pôu mbə́i tsâr zâa gháʼa gháʼá?»