Read Ngombale Jâŋ 7 Bible Online

Jâŋ 7 - Ngombale bible

Jâŋ 7

¹Yo no lei, Yěso pyêr mbə́ pə́ cər paghʼə-ngoŋ Galilêi mə́ ŋáa ŋə̂i, káa pə́ kôŋ yé ngwó cər paghʼə-ngoŋ Yudêi ńté ńgó pəkə̌m lâʼ pəyúda lə pə́ ndôu lə̂ njwí yé.

²Ə́ ghí pə́ lətsei pəyúda yi pə́ fûŋ ńgó lətsei məjûŋ pâatə.

³Pəfə̌r Yěso laʼ lə́ zʉ́ ngô: «Fú yaʼa ndə́r lə̂ Yudêi, ə́ njí ńgó ngaŋə-jyêʼ-no zô jwô záp məfaʼ mi o faʼ měi.

⁴Ŋuu lə̌i mə́ kôŋ ńgó pə jí yé, a ghʉ̂ yé məno pə̂ ndwo lwǒ po. Ghíʼ o pə̌ ngʉ pətə́koʼ məno lə̂, ghʉ lâʼ jí gho.»

⁵Gháp lə lâʼ lə́ zʉ́ yə́rə́, ńté no tû-mbəʉ pəfə̌r pé, káa gháp lə pə́ côghʼ gháp ntə̂ʉ gháp lə́ zʉ́ lə́wó.

⁶Yěso pʉ̂ŋ lə́ páp ngô: «Zaa mpfu kə́ kûʼ yé, lə́ ngwǒ lə́ pei, mə́i mpfu tsəm pə́ mbó pei, ə́ mbə́ pə́ yi shʉʼʉ.

⁷Mboʼ pye ndəu nzʉ̂ paa gháp wéi po; lə́ ə́ ngwǒ lə́ məŋ mə́i gháp pə́ mbaa ghâa, ńté ńgó m mə̌ ndaʼ gháp ńgó məngʉ̌ məno máp kâa pôŋ yé.

⁸Pei kóʼ ńdə́r wéi lə̂ yʉʼ lətsei; lə́ ə́ ngwǒ lə́ məŋ mə́i n ngwo ghâa wó po, ńté ńgó zaa mpfu kə́ kûʼ yé.»

⁹Ə́ ndǎʼ lə́ páp yə́rə́, ə́ ncʉ́ʼ nyéʼ nyáŋ Galilêi.

¹⁰Pəfə̌r Yěso lə lei tə nkóʼ ńdə́r lə̂ yʉʼ lətsei məjûŋ, a cʉ̂ʼ nzəm nkə́ ndə̂r yé lə́wó, káa ŋə̌i sâa-sǎa, ə́ ŋə̌i pə̂ sótə sotə́.

¹¹Gháp pə̂ nzʉ̂ lətsei, pəsǎʼ lâʼ pəyúda pə̂ ŋáa ndôu yé ńtúŋu ngô: «Yěso pə́ pə́ ghó?»

¹²Ə lâʼ pə̂ nzóŋə tsâr təcər páp ńté Yěso. Pəcó pye pə̂ ndâʼ ngô: «Â ŋuu shʉʼʉ.» Pəcó pə̂ ndâʼ záp ngô: «A pə̌ faʼa pye laŋə́-ndə̂u.»

¹³Lə́ káa ŋuu pə́ sâa yé sáa ə́ nkʉ̂ʉ yé, ńté ńgó gháp lə pə́ mbôghʼ pəsǎʼ lâʼ pəyúda.

¹⁴Pə́ zʉ̂ lətsei tə məleʼé měi ghapə təcər, Yěso lə̂r lə̂ ndə̂ Sê, ə́ njǐ lə̂ njyéʼ pye zə̂u.

¹⁵Mbə̂u yi a laghʼ ńjyêʼ pye zə̂u kəʼə pəyúda, gháp túŋu təcər páp ngô: «A ghʉ gháʼá mboŋə́ jí ŋwaʼa Sê ndwuŋ wo lə́ mə́i kâa lə jyêʼ yé səkwə̂r?»

¹⁶Yěso pwôr lə́ páp ngô: «Ə zə̂u yi məŋ njyêʼ pye zěi, kâa fû yé mbó məŋ, ə́ fû pə́ mbó ŋuu yi a lə tə́u ghâa.

¹⁷Ŋuu lə̌i mə́ nkôŋ lə̂ ngʉ́ zə̂u yi Sê pə̌ nkǒŋ, mə́i a wo jí ńgó zə̂u yi məŋ njyêʼ pye zěi fû mbó Sê kəʉ ńgó ə̂ ndʉʉ tsâr ghâa lo.

¹⁸Ŋuu lə̌i mə́ ndâʼ no, lə́ ə́ pə̂ pə́ ndʉʉ tsâr yé, mə́i a lou ńgó pə ghúʼtə́ yé, lə́ ŋuu yi a lou ńgó pə́ ghúʼtə́ ŋuu yi a lə tə́u yé laʼ no lə́nə́ʉ, káa pə́ ghʉ yé cǒ píʼí.

¹⁹Lə́u Mə̌usə̂i lə ŋə́ ŋwaʼa ləpə̌ʉ lə́ pei péh? Tə wǒ lə́ pei pə̌ ŋəi ghíʼ ə́ pə́ ntúŋú? Pei pou ndôu lə̂ njwí ghâa ńté hó?»

²⁰Lâʼ pwor lə́ zʉ́ ngô: «O ghwo zəghʼə tə́poŋ. Ŋuu yi a lou lə̂ njwí gho wǒ?»

²¹Yěso pwôr lə́ páp ngô: «N nkə ghʉ pə́ ndaʼ tâʼ no, â wo a kəʼə wéi pə́tsəm lo!

²²Mə̌usə̂i lə laʼ lə́ pei ńgó pei púʼ ghəpə́ zéi, lə́ kâa lə fû yé mbó zʉ́. Pəmə́ngâa-njʉʼ pághʼə lə́ lə jǐ lə̂ mbúʼ ghəpə́, lə́ pei pou mə́ mbûʼ ghəpə́ tə mbûʼ leʼé nji.

²³Ə́ lə̌i mbə́ yi pei pə̌ mbûʼ ghəpə́ leʼé nji lə̂ ndághʼ ńgʉ̌ zə̂u yi ləpə̌ʉ Mə̌usə̂i pə́ ntúŋú, pei pôu nzáŋə́ lóŋ lə́ məŋ ghíʼ n ngʉ̌ ŋuu shwîtə leʼé nji ńté hó?

²⁴Koo pei lâghʼ ghíʼ ŋuu pə̌ yə́rə́, ə́ nzáʼ kôr ye. Pei záʼ kôr ŋuu ghíʼ ə́ yǎa mə́ ntuŋú.»

²⁵Ə có ntâʼ pye Yelúsalêm pə̂ ndâʼ ngô: «Káa yo pə́ ŋuu pə́ lou lə̂ njwí yé lə̂?»

²⁶Â wo a sâa-sǎa ntsâr mbi lâʼ lo, káa ŋuu túŋu yé yé có no. Ndeʼ có pəsǎʼ lâʼ pághʼə fú mə́ mbə́i ńgó â Kəlísto.

²⁷Lə́ wo ŋuu gháʼa, paghʼə pə̌ njî yʉʼ yi a fǔ wó, ə́ ngwǒ lə́ Kəlísto, mə́i a táa ghǐ tó, ŋuu jî yé yʉʼ yi a fû wó po.

²⁸Yěso pə̂ ndə̂ Sê mə́ njyêʼ pye zə̂u yə́rə́, ə́ ndǎʼ lə̂ təʉ ngô: «Pei pə̌ njî ghâa, ə́ mə́ njî yʉʼ yi fǔ wó, lə́ káa n nkə kôŋ ghâa pə́ məŋ ntó; ŋuu yi a lə tə́u ghâa, â ngaŋə no lə́nə́ʉ, lə́ káa pei pə́ njî wéi yé.

²⁹Ə́ ngwǒ lə́ məŋ mə́i m mə̌ njî yé, ńté no n fǔ mbəʉ zʉ́, zʉ́ lə́ kə tə́u ghâa.»

³⁰Gháp zûʼ yə́rə́, ə́ mə́ ndôu ngôu yé lə́ káa ŋuu záp pô lə́ zʉ́ ńté no ə́ lə ghí pə́ mə́i ye mpfu kə́ kûʼ.

³¹Lələʉ pye cər nou lâʼ pə̂ mbə̂i no Yěso, ə́ mə́ ndâʼ ngô: «Tə Kəlísto ghʉ̌ tó ə́ ghʉ̌ məcó mənkəʼə-məno tə póu nděi mi ŋuu wo ghʉ lo?»

³²Pəfalísia zûʼ ghíʼ lâʼ tsəmə ńkʉ̂ʉ Yěso, ə́ ngwo njwó pətə́-ndə̂ pənuŋú-poʼ Sê gháp pə pǎp tə̂u pəpáp ndə̂ Sê ńgó gháp wó ngǒu Yěso.

³³Ə́ lə ghí pə́ Yěso pə̂ ndâʼ ngô: «M mbyěr təcər pei lə́ mə́ceʼé mpfu, ə́ poŋə́ wǒ cə́r ŋuu yi a lə tə́u ghâa.»

³⁴Pei ghʉ̌ ŋáa lǒu ghâa, lə́ jwô wéi ghâa po, ńté ńgó yʉʼ yi n ndər lə̂ wó, mboʼ pei kûʼ wéi lə̂ ntó wó po.

³⁵Pəyúda ji lə̂ ntúŋú təcər páp ngô: «A gháʼa ndə̂r lə̂ ghó tə lə́u paghʼə kə́ njwô wághʼə yé po? A wo nkwátə́ pye pághʼə pi gháp lə sěi ńdə́r lə̂ lâʼ Gərêghʼ lə̂, kəʉ a wo pə́ njyêʼ pye Gərêghʼ no Sê?

³⁶Zêi yo mbə̂u tsâr gháʼa ə́ ndághʼ ńdaʼ ńgó ho? A laʼ ńgó pei ghʉ̌ lǒu ghâa, ə́ jwô wéi ghâa po. Ə́ pǒu kuʼ wéi lə̂ ntó yʉʼ yi n ndər lə̂ wó po.»

³⁷Ə́ pə̂ ndyəghʼ-nzəm leʼé lətsei yi ə́ pə́ kwaʼ leʼé lətsei yi jwǐ, Yěso lêsê ńtə́ʉ nou lâʼ ə́ ndáʼ lə̂ təʉ ngô: «Lóŋ ŋuu lə̌i mə́ sʉ́, a tô ńcə́r ghâa, ə́ nó nci.

³⁸Ŋuu lə̌i mbə́i no zâa, mə́i nci yi ə́ ghʉ pə́ pə̂ wó wo sáʼ ntə̂ʉ zʉ́; ə̂ ghíʼ Sê lə lǎʼ cər ŋwaʼa ye.»

³⁹Yěso lə lâʼ yə́rə́, ə́ ndâʼ Zəghʼə Sê yi wo kə́u lə́ pye pi gháp pə́i no yé; ə́ ngí pə́ laʼ yə́rə́, mə́i Sê kə́ ŋə̂ yé Zəghʼə yé zêi ńté ńgó lə ghí pə́ mə́i a kə́ kə̂u cər ləghûʼ ye.

⁴⁰Ə lâʼ zûʼ tsâr Yěso, pəcó pye təcər páp laʼ ngô: «Ŋuu wo kwaʼ ntsətə-nkəʉ Sê!»

⁴¹Pəcó pə̂ ndâʼ ngô: «Â Kəlísto!» Lə́ pəcó pə̂ ndâʼ záp ngô: «Tə mboʼ Kəlísto yâa nkwâr Galilêi?»

⁴²Ńté no pə́ lə ŋwáʼa cər ŋwaʼa Sê ńgó Kəlísto táa kwǎr lə̂ ngər-ndə̂ fou Ndavîd. Ə́ pə́ ŋuu Mbetelehêm, ə́ mə́ceʼé túsoŋ yi fou Ndavîd lə fú wó.

⁴³Ə́ pə̂ yə́rə́, ghaptə cʉ̂ʼ nkə́ nkwár cər nou lâʼ ńté Yěso.

⁴⁴Pəcó pye təcər páp pə̂ ndôu lə̂ ngôu yé lə́ káa ŋuu zâp yé pô lə́ zʉ́.

⁴⁵Pəpáp ndə̂ Sê pi pə́ lə tə́u, pəʉ nzəm ńkwátə́ pətə́-ndə̂ pənuŋú-poʼ gháp pə pəfalísia, gháp túŋu gháp ngô: «Káa pei lághʼ Yěso ńtó ńté hó?»

⁴⁶Pəpáp ndə̂ Sê pwor ngô: «Paghʼ laa kə́ jwó ŋuu tsâr ghíʼ ŋuu wêi!»

⁴⁷Pəfalísia cʉ̂ʼ ndâʼ lə́ páp ngô: «Njí ńgó pei kə̌ mbə́i zéi, a kə̂ ncôŋ zéi tû lə́wó péh?

⁴⁸Cǒ kə̌m pəyúda kəʉ pə́ cǒ ŋuu Falísia lə yaa mə́ mbə́i no yé?

⁴⁹Lə́ pye pwo pi káa gháp pə́ njî gháp ləpə̌ʉ yi Sê lə ŋə́ lə́ Mə̌usə̂i ńté wághʼə lo, gháp pəghaŋə-ndou.»

⁵⁰Pəfalísia pə̂ nzóŋə yə́rə́, cǒ ŋuu gháp yi a lə záʼ mə́ nzʉ̂ ə́ ngwo ńjwó Yěso, ləjôghʼ pə̂ Nikodêm lâʼ lə́ páp ngô:

⁵¹«Ləpə̌ʉ zághʼə ghíʼi mbə́i ńgó pə tághʼ ngwôʼ tû ŋuu tə́ zúʼ ntsʉ yé? Tə́ jí zə̂u yi a ghʉ̌?»

⁵²Gháp pwor lə́ zʉ́ ngô: «Ô zô ŋuu Galilêi mo? Cǒ ntsətə-nkəʉ Sê laa kə́ kwâr yé Galilêi.»

⁵³Ə no zêi lei yə́rə́, wǒwó lə̂r yé lə̂ nzeʼ zʉ́.