Read Ngombale Jâŋ 8 Bible Online

Jâŋ 8 - Ngombale bible

Jâŋ 8

¹Yěso fû yʉʼ wó ńdə́r lə̂ ləkôr mətʉ̌ məwə̂r Olîvə.

²Ə́ ngʉ mə́ʉ məmbaʼa-mbaʼ ə́ mbə̌ʉ ńdə́r lə̂ ndə̂ Sê, lâʼ tô ńcə́r yé wó, a nyâŋ sê, ə́ njǐ lə̂ njyéʼ gháp no Sê.

³Pəkeʼtə́-lə́pə́ʉ Mə̌usə̂i gháp pə pəfalísia nyâŋ tə ndâghʼ cǒ məngyě ńtó, ə́ ntághʼ yé mbi lâʼ, a pə̂ məngyě yi pə́ ghǒu yé a pə̂ ngʉ̂ məghap,

⁴ə́ ndǎʼ lə́ Yěso ngô: «Cícye, pə́ kəm məngyě wo ghíʼ a pə̌ ngʉ məghap.

⁵Ə́ pə́ cər ŋwaʼa ləpə̌ʉ, Mə̌usə̂i lə laʼ ńgó pə́ lə̌i njwó mbə̂u pəngyě pwo, pə́ laghʼ məghǒ ńtə́m gháp njwítə́. Ə́ ngwo lə́ gho, o lâʼ zô mə́u ńgó ho?»

⁶Gháp lə lâʼ yə́rə́ gháʼá, ə́ ndaghʼ ńdə̂ʼ ləkei yi gháp lǎghʼ ghǒu Yěso, ə́ cóghʼ fər paa zʉ́. Lə́ Yěso ŋwúʼu sê, ə́ njǐ lə̂ ndághʼ shípo ye ńŋwaʼá zə̂u lə̂ ndesé.

⁷Gháp kə̂ mə́ fárə́ ntúŋu yé túŋú, a pə́ʼə mbəʉ ye ńdáʼ lə́ páp ngô: «Ŋuu yi a pə́ təcər pei yi a laa kə́ fâa no, mâʼ nduŋ-mbi ləghǒ ə́ ndaghʼ ńtə́m yé!»

⁸Ə́ ndǎʼ yə́rə́, ə́ nkə́ ncí ŋwúʼú sê, ə́ nkə́ mə́ ŋwáʼa pə̂ zə̂u lə̂ ndesé.

⁹Gháp zûʼ yə́rə́, ə́ njǐ lə̂ ntsóʼtə́ ńdə̂r pə̂ moʼ moʼ lə̂ fú lə̂ pətikáŋ, tə ə́ cʉ̂ʼ Yěso zə́ghʼə́-zʉ́, məngyě wêi kə̂ mbyér ńtə́ʉ pə́ yʉʼ wó.

¹⁰Yěso pə́ʼə mbəʉ ye, ə́ ndáʼ lə́ məngyě wêi ngô: «Mǎa, gháp ghǒ? Káa cǒ ŋuu gháp tághʼ ngwôʼ tû gho péh?»

¹¹A lâʼ ngô: «Ə́ ngə́ Nde!» Yěso lâʼ lə́ zʉ́ ngô: «Mbaa məŋ zâa, n ntâghʼ ghâa ngwôʼ tû gho po. Lər! Koo o lâʼ nkə́ fâa no.»

¹²Ə́ lei yə́rə́, Yěso kə̂ ncí njî lə̂ njyéʼ pye zə̂u, ə́ mə́ ndâʼ ngô: «Mə̂ŋ nkeʼ cər nzʉ̂. Ŋuu lə̌i ntsə́ʉ nzəm məŋ a nkə̂ ŋə̂i yé cər nzə̌m po, mə́i a wo ghwǒ nkeʼ yi ə́ keʼ laŋə́-ndə̂u ləcǐ-mbî yi shʉʼʉ.»

¹³Pəfalísia zûʼ yə́rə́, ə́ ndǎʼ lə́ Yěso ngô: «O laʼ məno mi o jǐ lə̂ tû-mbəʉ zô pə́ gho. Ə no yi o laʼ zěi, mboʼ ŋuu pə̂i yé po.»

¹⁴Yěso pwôr lə́ páp ngô: «M mbə̌ tə ndâʼ ŋuu yi m mbə̌ wěi pə́ məŋ, lə́ no yi n ndaʼ zěi, ə́ pə̂ no lə́nə́ʉ, ńté ńgó m mə̌ njí yʉʼ yi n ndə fú wó, ə́ mbǒu mə́ njí yʉʼ yi n ndər lə̂ wó; lə́ káa pei pə́ njí wéi yʉʼ yi n ndə fú wó, káa kə pə́ jî wéi yʉʼ yi n ndər lə̂ wó.

¹⁵Pei feʼ pye pə́ lə̂ mbə̂u yi pye-mə́soŋ, lə́ ə́ ngwǒ lə́ məŋ, mə́i kâa m mə́ fêʼ ghâa kôr cǒ ŋuu.

¹⁶N ndə̌i mbə́i mə́ fêʼ pə́ kôr ŋuu, n ndâghʼ no lə́nə́ʉ ńfêʼ, ńté ńgó kâa m mbə́ ghâa məŋə məŋ. Paghʼ Tə́ ghaa yi a lə tə́u ghâa pə̂.

¹⁷Pə́ lə ŋwaʼá cər ŋwaʼa ləpə̌ʉ wei ńgó pye pə́pwô lə̌i mbə́i pənzǔʼ-njwó lə̂ no, mə́i pə́ wo pə́i ńgó no yi gháp laʼ zěi, ə̂ no lə́nə́ʉ.

¹⁸M mə̌ ndaʼ no yi n njǐ lə̂ tû-mbəʉ zâa, Tə́ ghâa yi a lə tə́u ghâa kə̂ ncí mə́ ndâʼ no yi a pə̌ njî lə́ məŋ.»

¹⁹Gháp túŋu yé ngô: «Tə́ gho pə́ ghó?» Yěso pwôr ngô: «Káa pei pə́ ntsúŋú njî wéi ghâa, káa kə́ pə́ jî wéi Tə́ ghâa. Pei tə̌i mbə́ ghíʼi, ə́ mə́ ntsúŋú njî ghâa, mə́i pei kə̌ mə́ njî Tə́ ghâa yé lə́wó.»

²⁰Yěso lə ghí pə́ laʼ mwo məno gháʼa, ə́ mbə́ ndə̂ Sê mə́ njyêʼ pye zə̂u, ə́ mbə́ mbəʉ yʉʼ yi pə́ maʼ ntsəp ndə̂ Sê wó; lə́ káa ŋuu ghôu yé yé ńté ńgó ə́ lə ghí pə́, mə́i ye mpfu kə́ kûʼ.

²¹Yěso kə̂ ncí ndáʼ lə́ páp ngô: «N ngwo lə̌r, pei lôu ghâa, pei wo nkwʉ́tə́ cər məno tə́poŋ méi. Mboʼ pei kûʼ wéi lə̂ ntó tə nkə́u yʉʼ yi məŋ ndər lə̂ wó po.»

²²Pəyúda zûʼ yə́rə́, ə́ njǐ lə̂ ntúŋú təcər páp ngô: «A wo pə́ njwî mbəʉ ye? Ńté no a laʼ ngô: Mboʼ pei kûʼ wéi lə̂ ntó tə nkə́u yʉʼ yi n ndər lə̂ wó po.»

²³A laʼ lə́ páp ngô: «Pêi pye ndəu ndesé, m mbə̂ ŋuu tʉ̌-lə́pû, pêi pye nzʉ̂ yo, káa m mbə̂ ghâa ŋuu nzʉ̂ yo.

²⁴Ə̂ zə̂u yi ə́ ghʉ̌, n ndaʼ mə́ wéi ńgó pei wo kwʉ́tə́ cər məfaa méi, ńté ńgó pei lə̌i ndə́iʼ pə́i ńgó ŋuu yi pə́ fûŋ yé ngô: “Məŋ ŋuu yi məŋ mbə̌ wěi” po, mə́i pei ghʉ̌ kwʉ́tə́ cər məfaa méi.»

²⁵Gháp túŋu yé ngô: «Ô wǒ ŋuu?» Yěso pwôr lə́ páp ngô: «Məŋ ŋuu yi n ndə fú ləjitə́ lə̂ ndáʼ wéi ńgó məŋ wěi lə̂.

²⁶N ngwo məno tə nzáa mi n ngwo ndǎʼ wó ńté wéi, mbaa mi n ngwo fěʼ wéi mə́u. Lə́ məno mi n ndaʼ měi lə́ pye ndəu nzʉ̂ pə́ pə́ mi ə́ fú mbó ŋuu yi a lə tə́u ghâa, ŋuu yi a lə tə́u ghâa pôu mbə́ ngaŋə no lə́nə́ʉ.»

²⁷Yěso laʼ lə́ páp yə́rə́, lə́ káa gháp zûʼ gháp ńgó məno mi a laʼ měi, a tsâr gháʼá ńté Tə́ ye.

²⁸Yěso cʉ̂ʼ ndáʼ lə́ páp ngô: «Pei lə̌i ngʉ́ mbəʼə́ Môu Ŋuu lə̂ tʉ̌-mbʉ̂ŋtə ńŋə́ tʉ́, mə́i pei wo jí ńgó ŋuu yi pə́ fûŋ yé ngô: “Məŋ mbə̌ wěi”, ə́ pǒu jí ńgó káa m mə́ ngʉ̂ ghâa có zə̂u pə́ məŋ. N ndaʼ pə̂ məno mi Tə́ ghâa lə jyéʼ ghâa.

²⁹Paghʼ ŋuu yi a lə tə́u ghâa pə̂, káa a nyêr yé ghâa məŋə məŋ, ńté no n nkə̌ ngʉ̂ pə̂ zə̂u yi ə́ pǒŋ yé.»

³⁰Yěso lə pə́ tsâr yə́rə́, pye tə nzáa pə̂i no yé.

³¹Yěso laʼ lə́ pəyúda pi gháp pə́i no yé ngô: «Pei lə̌i nzúʼ tsâr zâa, ə́ ngʉ̌ ghíʼ ə́ pə́ ntúŋú, mə́i pêi kwaʼ ngaŋə-jyêʼ-no zâa.

³²Ə̂ lêitə́ yə́rə́, pei jí no lə́nə́ʉ, ə no lə́nə́ʉ kéʼtə́ wéi lə̂ mənkʉ puʼ.»

³³Gháp laʼ lə́ zʉ́ ngô: «Paghʼ ngər-ndə̂ Ábələhâm, paghʼ laa kə́ pə̂ wághʼ pûʼ cǒ ŋuu, ńté hó o laʼ lə́ paghʼ ngô: “Paghʼ láʼ kə́ pyêr wághʼ məpuʼ po?”»

³⁴Yěso pwôr lə́ páp ngô: «Kwaʼ lə́nə́ʉ, məŋ ndaʼ wéi, ŋuu lə̌i ngʉ́ məfaa, a pə̂ puʼ məfaa.

³⁵Puʼ kâa pə̂ yé môu nzeʼ. Lə́ ə́ ngwǒ lə́ môu nzeʼ, mə́i a ghʉ̌ cí nyâŋ pə́ wó.

³⁶Ə́ pə̂ yə́rə́, Môu Sê lə̌i nkwárə́ wéi ndə̂ puʼ, mə́i kwaʼ lə́nə́ʉ pei wo fú cər wó kwǎr.

³⁷M mə̌ njî ńgó pêi ngər Ábələhâm, lə́ pei pə̌ ndou lə̂ njwí ghâa, ńté ńgó káa pei pə́ ngʉ̂ wéi zə̂u yi tsâr zâa pə́ ntúŋú.

³⁸Məŋ ndaʼ zâa pə̂ zə̂u yi n ndə jwó mbó Tə́ ghâa, lə́ pei ghʉ zéi pə́ yi tə́ wei lǎʼ ńgó pei ghʉ̂.»

³⁹Gháp pwor lə́ zʉ́ ngô: «Tə́ waghʼ â Ábələhâm.» Yěso pwôr lə́ páp ngô: «Pei lə̌i mbə́ ghəpə́ Ábələhâm, pei ghʉ̂ ghíʼ zʉ́.

⁴⁰Məŋ ndaʼ wéi no lə́nə́ʉ yi n nkə zúʼ mbó Sê, pei pou mbə́ mpfu wo, ə́ mə́ ndôu lə̂ njwí ghâa; lə́ mə́i káa Ábələhâm lə ghʉ́ yé yə́rə́.

⁴¹Pei pə̌ faʼ məfaʼ Tə́ wei.» Gháp laʼ lə́ zʉ́ ngô: «Káa paghʼ pə́ ghəpə́ məghap, paghʼ ghwo pə́ tâʼ Tə́ moʼ, a pə̂ Sê.»

⁴²Yěso lâʼ lə́ páp ngô: «Sê tə̌i mbə́ Tə́ wei lə́nə́ʉ, mə́i pei kôŋ no zâa. Ńté no n ngí pə́ yaʼa, ə́ fú pə́ mbó zʉ́, m mbə́ yaʼa lə̂ yé ləjôghʼ, káa m mbə́ ghâa yaʼa pə́ lə̂ ghâa ləkoŋtə, zʉ́ lə́ kə ntə́u ghâa.

⁴³Ńté hó m mə̂ ndaʼ wéi no, káa pei pə́ nzúʼ? Káa pei pə́ ngʉ̂ wéi zə̂u yi m mə̌ ndǎʼ ńté no káa pei kûʼ wéi lə̂ nzúʼ tsâr zâa.

⁴⁴Wei tə́, â Sə́tə; pei pə̂ nkôŋ lə̂ ngʉ́ məno mi a kôŋ měi. Tə fú ləjitə́ ngoŋ, a pə̂ pə́ ngaŋə pəi. Káa a kôŋ yé ŋə̂i lə̂ no lə́nə́ʉ, ńté ńgó káa có no lə́nə́ʉ pə̂ yé cər ntə̂ʉ zʉ́. A pə̌ ntâŋ məlaa, ə́ fû mbə́ ghíʼ ntə̂ʉ yé pə̂ ńté ńgó â ngaŋə məlaa, məlaa lə fú pə́ lə́ zʉ́ nkwâr.

⁴⁵Ə́ ngwǒ lə́ məŋ, káa pei pə́ mbə̂i wéi no yi n ndâʼ ńté ńgó m mə̌ ndâʼ no lə́nə́ʉ.

⁴⁶Mboʼ wǒ ŋuu təcər pei lâʼ no tə́poŋ yi n ngʉ̌ zěi? Ńté hó m mbôu mə́ ndâʼ no lə́nə́ʉ, káa pei póu mə́ mbə́i?

⁴⁷Ŋuu yi â ŋuu Sê zʉ̂ʼtə tsâr Sê. Káa pei póu mə́ nzʉ̂ʼtə tsâr zâa ńté no káa pei pə̂ wéi pye Sê.»

⁴⁸Pəyúda lâʼ lə́ Yěso ngô: «Paghʼ lə̌i fúŋ gho ńgó ŋuu Samalə̂i mbaa ndáʼ ńgó zəghʼə tə́poŋ pə́ lə́ gho, mə́i káa paghʼ wʉ̂ wághʼ no.»

⁴⁹Yěso pwôr lə́ páp ngô: «Zəghʼə tə́poŋ kâa pə̂ yé lə́ məŋ, m mə̌ ŋə̂ məkuʼ Tə́ ghâa, lə́ pei pôu mə́ ncôŋ ndwuŋ ghâa.

⁵⁰Kâa m mbə́i mə́ ndôu ghâa ńgó pə́ ghúʼtə́ ghâa, ŋuu pə́ wó yi a ghʉ pə́ ŋə́ ghûʼtə ghâa, zʉ́ lə́ ghʉ̌ kə́ kwě no zâa.

⁵¹Kwaʼ lə́nə́ʉ, ŋuu lə̌i nzúʼ tsâr zâa, ə́ ngʉ̌ ghíʼ ə́ pə́ ntuŋú, a lâʼ nkwʉ̂ yé po.»

⁵²Pəyúda lâʼ lə́ zʉ́ ngô: «Lə̂ mpfu wo, paghʼ pə̌ njî ńgó zəghʼə tə́poŋ pə́ lə́ gho. Ábələhâm lə kwʉ̂, pətsətə́-nkəʉ Sê kə̂ nkwʉ̂tə záp, gho wo, o pou mə́ ndâʼ ńgó ŋuu lə̌i nzúʼ tsâr zô ə́ ngʉ̌ ghíʼ ə́ pə́ ntuŋú, a lâʼ nkə́ nkwʉ̂ yé po.

⁵³Tə́ waghʼ Ábələhâm lə kwʉ̂, o kwaŋ ńgó o lei yé áa? Pətsətə́-nkəʉ Sê kə̂ nkwʉ̂tə záp lə́wó, o kwaŋ ńgó o hó zə̂u?»

⁵⁴Yěso pwôr lə́ páp ngô: «N ndə̌i nyár mbəʉ, mə́i nyar mbəʉ zêi kâa pə̂ yé có zə̂u; Tə́ ghâa lə̂ ghʉ pə́ ghûʼtə ghâa, pei lâʼ ńgó â Sê zei.

⁵⁵M mbou mə́ ngʉ̂ ghíʼ tsâr yé pə́ ntúŋú, lə́ káa pei póu mə́ njî wéi yé, m mbôu mə́ njî yé. N ndə̌i ndâʼ ńgó kâa m mə́ njî ghâa yé, mə́i n ngwo cʉ́ʼ ngaŋə-məlaa ghíʼ pei. Lə́ m mə̌ njî yé, ə́ mbou mə́ ŋə̂i ghíʼ tsâr yé pə́ ntúŋú.

⁵⁶Tə́ wei Ábələhâm lə ghwo lətsei mpfu tsəm yi a lə kwaŋ lə̂ njwó mpfu yi n ngwo tó ndəu ndesé. A lə kə́ njwó, ə́ tsêi gháʼate.»

⁵⁷Yěso lâʼ yə́rə́, pəyúda lâʼ lə́ zʉ́ ngô: «O kə́ pə́i ngwo gho nguʼ mə̂m-taa, ə́ ndǎʼ ńgó o kə jwó Ábələhâm áa?»

⁵⁸A lâʼ lə́ páp ngô: «Kwaʼ lə́nə́ʉ, Ábələhâm lə ghí pə́ wó, məŋ mbə̂ wó.»

⁵⁹Gháp zûʼ yə́rə́, ə́ ndǎghʼ məghǒ lə̂ ndághʼ ńtə́m Yěso ńjwí, lə́ a cwî mənyôghʼ páp, ə́ fú ndə̂ Sê só ńkwár ńkhʉ yé.